ᒫᑎᐅᓯᐅᑉ ᐊᒡᓚᖏᑦ 23
23
ᔩᓱᓯᐅᑉ ᐃᓂᕐᑎᕆᓂᖓ ᒪᓕᖁᔨᓇᓂ ᐱᖁᔭᓂᒃ ᐃᓕᓮᔨᓂᒃ ᐹᕆᓯᓂᒡᓗ
ᒫᑯᓯ 12:38-39; ᓘᑲᓯ 11:43,46; 20:45-46
1ᑕᕝᕙ ᔩᓱᓯ ᐃᓄᒋᐊᒃᑐᕐᔪᐊᓄᑦ ᐃᓕᓐᓂᐊᕐᑎᒥᓄᓪᓗ ᐅᖃᕐᐳᖅ, 2“ᐱᖁᔭᓂᒃ ᐃᓕᓮᔩᑦ ᐹᕆᓯᓪᓗ, ᐱᔪᓐᓇᕐᓯᑎᑕᐅᓯᒪᕗᑦ ᑐᑭᓯᓇᕐᓯᑎᑦᓯᔨᐅᖁᓪᓗᒋᑦ ᒨᓯᓯᐅᑉ ᐱᖁᔭᖏᓐᓂᒃ. 3ᑍᒤᒻᒪᑦ ᓈᓚᒋᐊᖃᕐᐸᓯ ᒪᓕᒡᓗᓯᐅᒡᓗ ᐅᖃᐅᓯᕆᔭᓕᒫᖏᓐᓂᒃ ᐃᓕᑦᓯᓐᓄᑦ; ᐱᓂᐊᕐᓂᖏᓪᓕ ᒪᓕᒐᒃᓴᕆᓐᖏᓚᓯ; ᐊᔪᕆᕐᑐᐃᑦᔪᑎᒋᔭᒥᖕᓂᒃ ᐊᑐᕈᓐᓇᖏᒻᒪᑕ. 4ᓇᖕᒪᒐᒃᓴᓂᒃ ᕿᓚᒃᓱᐃᕗᑦ ᐅᖁᒤᑦᑐᓂᒃ, ᐃᓄᐃᑦ ᓇᖕᒪᖕᓂᐊᕐᑕᖏᓐᓂᒃ; ᓇᖕᒥᓂᕐᓕ ᒥᑭᔪᒥᒡᓘᓐᓃᑦ ᐊᒃᑐᐃᔪᒪᓇᑎᒃ. 5#ᒫᑎᐅᓯ 6:1; ᒨᓯᓯ ᑕᓪᓕᒪᖏᑦ 6:8; ᒨᓯᓯ ᓯᑕᒪᖏᑦ 15:38.ᓱᓇᑐᐃᓐᓇᕐᓂᒃ ᐱᓇᓱᐊᖃᑦᑕᕐᐳᑦ ᐃᓄᖕᓄᑦ ᑕᑯᔭᐅᔪᒪᑐᐃᓐᓇᕐᓗᑎᒃ; ᒎᑎᐅᑉ ᐅᖃᐅᓯᖏᓐᓂᒃ ᑎᑎᕋᕐᕕᒋᓯᒪᔪᑦ ᖃᐅᕈᑎᖏᑦ ᑕᓕᕐᒥᐅᑕᖏᓪᓗ, ᑕᑯᓚᐅᕐᓯᐅᒃ ᐊᖏᔫᑎᐊᓗᐃᑦ! ᐅᓕᒡᔪᐊᖏᑕᓗ ᓂᒡᔭᖏᑦ#23:5 ᓂᕕᓐᖓᑖᑦ ᒎᑎᐅᑉ ᐅᖃᐅᓯᖏᓐᓂᑦ ᐱᓯᒪᔪᑦ ᑎᑎᕋᕐᓯᒪᓪᓗᑎᒃ ᑕᑭᔫᑎᐊᓗᐃᑦ! 6ᓂᕆᕕᒃᔪᐊᕐᑐᖃᕐᑎᓪᓗᒍ ᐅᐱᒋᔭᐅᔪᑦ ᐃᓂᖏᓐᓂ ᐃᓂᖃᕈᒪᕗᑦ, ᔫᑎᓪᓗ ᐅᒃᐱᕐᓂᕐᒧᑦ ᑲᑎᒪᕕᖏᓐᓂ ᐃᓂᑦᓯᐊᕙᐅᓂᕐᐹᓂ ᑭᓯᐊᓂ ᐃᓂᖃᕐᐸᒃᓗᑎᒃ; 7ᓂᐅᕕᕐᕕᖕᓂᓗ ᐃᒃᐱᒋᔭᐅᑦᓯᐊᕐᓗᑎᒃ ᓂᓪᓕᐅᑦᔭᐅᔪᒪᕙᒃᐳᑦ, ᐃᓄᖕᓄᑦ ᕌᑉᐰᒥᒃ ᑍᔭᐅᔪᒪᕙᒃᓗᑎᒃ. 8ᕌᑉᐰᒥᒃ ᑍᔭᐅᔭᕆᐊᖃᓐᖏᓚᓯ, ᐃᓘᓐᓇᓯ ᖃᑕᓐᖑᑎᒌᑐᐃᓐᓇᕋᑦᓯ, ᐊᑕᐅᓯᑐᐊᒥᒡᓕ ᕌᑉᐰᖃᕐᐳᓯ. 9ᐊᑖᑕᒥᒡᓗ ᑍᓯᔪᒃᓴᐅᓐᖏᓚᓯ ᑕᒫᓂ ᓄᓇᒦᑦᑐᒥᒃ, ᐊᑕᐅᓯᑐᐊᒥᒃ ᐊᑖᑕᖃᕋᑦᓯ ᕿᓚᖕᒦᑦᑐᒥᒃ. 10ᐊᖓᔪᖅᑳᒥᒃ ᑍᔭᐅᔪᒃᓴᐅᓐᖏᓚᓯ, ᐊᑕᐅᓯᑐᐊᖅ ᐊᖓᔪᖅᑳᕆᒐᑦᓯᐅᒃ ᙭ᔅᑑᓯ. 11#ᒫᑎᐅᓯ 20:26,27; ᒫᑯᓯ 9:35; 10:43,44; ᓘᑲᓯ 22:26.ᐃᓕᑦᓯᓐᓂ ᐊᖓᔪᖅᑳᖑᓂᕐᐸᐅᔪᖅ ᑖᓐᓇ ᐱᔨᒋᔭᐅᔪᒃᓴᐅᕗᖅ. 12#ᓘᑲᓯ 14:11; 18:14.ᐃᒻᒥᓂᒃ ᐊᖏᔪᕈᕐᑎᑦᑐᖅ ᑖᓐᓇ ᒥᑭᒡᓕᑎᑕᐅᓂᐊᕐᐳᖅ, ᐃᒻᒥᓂᒡᓗ ᒥᑭᒡᓕᑎᕐᑐᖅ ᑖᓐᓇ ᐊᖏᔪᕈᕐᑎᑕᐅᓂᐊᕐᐳᖅ.”
ᔩᓱᓯᐅᑉ ᑕᒃᑯᕐᒨᕐᑐᓂᒃ ᐱᐅᖏᑦᑐᐊᓘᓂᕅᓂᖓ
ᒫᑯᓯ 12:40; ᓘᑲᓯ 11:39-44,52; 20:47
13“ᐃᓕᑦᓯᓐᓄᑦ ᑲᑉᐱᐊᓐᓇᒦᒃ, ᐱᖁᔭᓂᒃ ᐃᓕᓮᔩᑦ ᐹᕆᓯᓪᓗ, ᑕᒃᑯᕐᒨᕐᑐᓯ! ᒎᑎᐅᑉ ᐊᑕᓂᐅᕕᖓᑕ ᐅᒃᑯᐊᖓ ᐅᒃᑯᐊᕐᓯᒪᒐᑦᓯᐅᒃ ᐃᓄᐃᑦ ᐃᑎᖁᓇᒋᑦ; ᓇᖕᒥᓂᕐᓗ ᐃᑎᕐᓯᒪᓇᓯ, ᑕᕝᕗᖓᓗ ᐃᑎᕋᓱᐊᕐᑐᑦ ᐊᒡᕕᐊᕋᓱᐊᕐᐸᓯ!
[ 14“ᐃᓕᑦᓯᓐᓄᑦ ᑲᑉᐱᐊᓐᓇᒦᒃ, ᐱᖁᔭᓂᒃ ᐃᓕᓮᔩᑦ ᐹᕆᓯᓪᓗ, ᑕᒃᑯᕐᒨᕐᑐᓯ! ᐅᐃᒡᒐᕐᓃᑦ ᓴᖐᑦᑐᕐᓂᐊᒐᕆᓪᓗᒋᑦ ᐱᖁᑎᖏᓐᓂᒃ ᐊᕐᓵᕋᑦᓯᐅᒃ, ᑕᑯᓐᓇᕐᑕᐅᔪᒪᓪᓗᓯᓗ ᑕᑭᔪᓂᒃ ᑐᒃᓯᐅᑎᖃᑦᑕᕐᐸᓯ! ᑕᒪᓐᓇ ᐱᑦᔪᑎᒋᓪᓗᒍ ᓱᒋᐊᕐᑕᐅᓂᓯ ᐊᖏᓂᕐᓴᐅᔪᒫᕐᐳᖅ!]#23:14 ᐃᑦᔪᔪᑐᖃᐃᑦ ᐃᓚᖏᓐᓂ ᐱᑕᖃᖏᓪᓗᓂ ᐃᓚᖏᓐᓂ ᐃᓕᔭᐅᓯᒪᓪᓗᓂ
15“ᐃᓕᑦᓯᓐᓄᑦ ᑲᑉᐱᐊᓐᓇᒦᒃ, ᐱᖁᔭᓂᒃ ᐃᓕᓮᔩᑦ ᐹᕆᓯᓪᓗ, ᑕᒃᑯᕐᒨᕐᑐᓯ! ᓄᓇᒃᑯᑦ ᐃᖏᕐᕋᕙᒃᑐᓯ ᐃᒪᒃᑯᓪᓗ ᐅᒥᐊᕐᑐᕐᓗᓯ ᐃᑳᕐᐸᒃᑐᓯ ᐊᑕᐅᓯᑯᓗᖕᒥᒃ ᒪᓕᒃᑎᑖᕆᐊᕐᑐᕐᓗᓯ; ᒪᓕᒃᑎᑖᕌᖓᑦᓯ, ᑲᑉᐱᐊᓇᕐᑐᕕᖕᒧᐊᕐᑐᒃᓴᓐᖑᕐᑎᑉᐸᓯ ᐃᓕᑦᓯᓐᓂᑦ ᒪᕐᕈᐊᕐᑎᓪᓗᐊᕐᑐᒥᒃ ᐱᐅᖏᓐᓂᕐᓴᐅᓕᕐᑎᓪᓗᒍ!
16“ᐃᓕᑦᓯᓐᓄᑦ ᑲᑉᐱᐊᓐᓇᒦᒃ, ᑕᐅᑐᖏᑦᑑᓪᓗᓯ ᑕᓯᐅᕐᑎᐅᔪᓯ! ᐊᔪᕆᕐᑐᐃᖃᑦᑕᕋᑦᓯ, ‘ᒎᑎᐅᑉ ᑐᒃᓯᐊᕐᕕᒃᔪᐊᖁᑎᖓ ᑍᖃᓯᐅᑎᓗᒍ ᐅᖃᕕᒃᑐᖃᕐᐸᑦ,#23:16 ᐱᒻᒪᕆᒃᒥᒃ ᐅᖃᕐᑐᖃᕐᐸᑦ ᑖᓐᓇ ᕿᓚᒃᑕᐅᓯᒪᖏᓐᓂᕋᕐᐸᓯ; ᒎᑎᐅᑉ ᑐᒃᓯᐊᕐᕕᒃᔪᐊᖁᑎᖓᑕ ᒎᓗᖓ ᑍᖃᓯᐅᑎᓗᒍ ᐅᖃᕕᒃᑐᖃᕐᐸᑦ, ᑖᓐᓇ ᕿᓚᒃᓱᕐᑕᐅᓂᕋᕐᐸᓯ.’ 17ᓯᓔᑦᑐᐊᓘᕗᓯ ᑕᐅᑐᖏᑦᑐᓯ! ᓇᓪᓕᐊᑦ ᐊᑐᕐᓂᕐᓴᐅᕙ ᒎᓗᓘᓐᓃᑦ, ᑐᒃᓯᐊᕐᕕᒡᔪᐊᕐᓘᓐᓃᑦ ᒎᓗᒥᒃ ᐃᑦᔪᕐᓁᑦᑐᓐᖑᕐᑎᑦᓯᔪᖅ? 18ᐊᒻᒪ ᐊᔪᕆᕐᑐᐃᕙᒃᑭᕗᓯ, ‘ᑐᓂᕐᕈᓯᕐᕕᒃ ᐊᓪᑕᕆ ᑍᓗᒍ ᐅᖃᕕᒃᑐᖃᕐᐸᑦ, ᐊᖏᕈᑎᒋᔭᒥᓄᑦ ᕿᓚᒃᑕᐅᓯᒪᖏᓐᓂᕋᕐᐸᓯ; ᑐᓂᕐᕈᓯᕐᕕᖕᒧᓪᓕ ᑐᓂᔭᐅᓯᒪᔪᖅ ᑍᖃᓯᐅᑎᓗᒍ ᐅᖃᕕᒃᑐᖃᕐᐸᑦ, ᑖᓐᓇ ᕿᓚᒃᓱᕐᑕᐅᓂᕋᕐᐸᓯ.’ 19ᑕᑯᓐᓇᖏᓪᓚᕆᒃᑐᓯ! ᓇᓪᓕᐊᑦ ᐊᑐᕐᓂᕐᓴᐅᕚ? ᑐᓂᕐᕈᑎᓪᓘᓐᓃᑦ, ᑐᓂᕐᕈᓯᕐᕕᒡᓘᓐᓃᑦ ᑐᓂᕐᕈᑎᓂᒃ ᐃᑦᔪᕐᓁᑦᑐᓐᖑᕐᑎᑦᓯᔪᖅ? 20ᑍᒤᒻᒪᑦ, ᐃᓄᒃ ᐅᖃᕕᒃᑯᓂ ᑐᓂᕐᕈᓯᕐᕕᒃ ᑍᖃᓯᐅᑎᓗᒍ, ᑖᓐᓇ ᑐᓂᕐᕈᓯᕐᕕᒃ ᑍᖃᓯᐅᑎᓪᓗᒍ ᐊᖏᕐᐳᖅ, ᑐᓂᕐᕈᑕᐅᔪᓕᒫᓪᓗ ᐱᖃᓯᐅᑎᕔᑦ; 21ᑐᒃᓯᐊᕐᕕᒡᔪᐊᕐᓗ ᑍᖃᓯᐅᑎᓗᒍ ᐅᖃᕕᒃᑐᖅ, ᑖᓐᓇ ᑐᒃᓯᐊᕐᕕᒃᔪᐊᖅ ᑍᖃᓯᐅᑎᓪᓗᒍ ᐊᖏᕐᐳᖅ, ᒎᑎᓗ ᑍᖃᓯᐅᑎᕚ, ᒎᑎ ᑕᕝᕙᓃᒻᒪᑦ; 22#ᐂᓮᐊᓯ 66:1; ᒫᑎᐅᓯ 5:34.ᐃᓄᒡᓕ ᕿᓚᖕᒥᒃ ᑍᖃᓯᐅᑦᔨᓗᓂ ᐅᖃᕕᒃᐸᑦ, ᑖᓐᓇ ᐊᖏᕐᐳᖅ ᒎᑎᐅᑉ ᐃᒃᓯᕙᐅᑕᕐᔪᐊᖓ ᑍᖃᓯᐅᑎᓪᓗᒍ, ᑕᕝᕙᓂᓗ ᐃᒃᓯᕙᔪᖅ ᐱᖃᓯᐅᑎᒋᕚ.
23 #
ᒨᓯᓯ ᐱᖓᔪᖏᑦ 27:30. “ᐃᓕᑦᓯᓐᓄᑦ ᑲᑉᐱᐊᓐᓇᒦᒃ, ᐱᖁᔭᓂᒃ ᐃᓕᓮᔩᑦ ᐹᕆᓯᓪᓗ, ᑕᒃᑯᕐᒨᕐᑐᓯ! ᑐᓂᓯᖃᑦᑕᕐᑐᓯ ᒎᑎᒧᑦ ᐊᒡᓛᑦ ᓂᖀᑦ ᒪᒪᕐᓴᐅᑎᖏᑕ ᑕᓪᓕᒪᐅᔪᖏᓐᓂᒃ, ᒪᑯᓂᖓ ᒥᓐᑏᑦ, ᑎᐅᓪᓗ, ᑯᒥᓃᓂᒡᓗ, ᐱᖁᔧᑦ ᐊᔪᕆᕐᑐᐃᑦᔪᑎᖏᑕ ᐱᔭᕆᐊᖃᕐᓂᕐᐹᖏᑦ ᓈᓚᒍᒪᓇᒋᑦ, ᒪᑯᐊ ᐊᑦᔨᒌᒃᑎᑦᓯᓂᖅ, ᓂᑲᒍᓱᖕᓂᕐᓗ, ᐅᒃᐱᕐᓂᕐᓗ; ᑕᒪᒃᑯᐊ ᑕᒪᑦᔭ ᐊᑐᕆᐊᖃᕐᑕᓯ, ᐊᓯᖏᑦ ᖁᔭᓈᖏᓪᓗᒋᑦ. 24ᑕᓯᐅᕐᑎᐅᔪᓯ ᑕᐅᑐᖏᑦᑐᓯ! ᐃᒥᕐᓂᐊᕐᑕᑦᓯᓐᓂᒃ ᓴᓃᔭᐃᑦᔪᑎᒧᑦ ᒥᓗᒋᐊᓂᒃ ᐲᔧᕙᒃᑐᓯ, ᑳᒥᓕᐊᓗᖕᒥᒡᓕ ᐄᓯᖃᑦᑕᕐᐳᓯ!
25“ᐃᓕᑦᓯᓐᓄᑦ ᑲᑉᐱᐊᓐᓇᒦᒃ ᐱᖁᔭᓂᒃ ᐃᓕᓮᔩᑦ ᐹᕆᓯᓪᓗ, ᑕᒃᑯᕐᒨᕐᑐᓯ! ᐃᒥᐅᑎᑦ ᐸᓕᐊᓪᓗ ᓯᓚᑎᖏᑦ ᓴᓗᒻᒪᕐᓴᕐᐸᒃᐸᓯ, ᐃᓗᖏᓪᓕ ᑕᑕᑉᐳᑦ ᓯᕘᕋᓵᕆᓂᕐᒥᒃ, ᐃᓱᒪᒋᔭᑑᔪᒪᓂᕐᒥᒡᓗ. 26ᑕᐅᑐᖏᑦᑐᓯ ᐹᕆᓯᑦ! ᐃᒥᐅᑎᑦ ᐸᓕᐊᓪᓗ ᐃᓗᖏᑦ ᓴᓗᒻᒪᕐᓴᖅᑳᕐᓯᐅᒃ, ᑕᕝᕙ ᓯᓚᑖᑦᑕᐅᖅ ᓴᓗᒻᒪᑦᓯᐊᕐᓂᐊᕐᐳᖅ! 27#ᐋᐴᓯᑕᓖᑦ 23:3.ᐃᓕᑦᓯᓐᓄᑦ ᑲᑉᐱᐊᓐᓇᒦᒃ ᐱᖁᔭᓂᒃ ᐃᓕᓮᔩᑦ ᐹᕆᓯᓪᓗ, ᑕᒃᑯᕐᒨᕐᑐᓯ! ᐃᓗᕕᕐᑎᑐᑦ ᖃᑯᕐᑕᒥᒃ ᓯᓚᑖᒍᑦ ᐊᒥᐊᕆᔪᑎᑐᑦ ᑍᒤᑉᐳᓯ, ᓯᓚᑎᖏᑦ ᑕᑯᒥᓇᕐᑐᐊᓘᕗᑦ, ᐃᓗᖏᓪᓕ ᑕᑕᑉᐳᑦ ᓴᐅᓂᕕᓂᕐᓂᒃ ᒪᒤᑦᑐᐊᓗᖕᓂᒡᓗ. 28ᑍᒫᑦᓮᓐᓇᑦᑕᐅᖅ, ᓯᓚᑎᑦᓯᒍᑦ ᒎᑎᐅᑉ ᐱᖁᔭᖏᓐᓂᒃ ᒪᓕᑦᓯᐊᕐᑑᔮᕐᐳᓯ, ᐃᓗᑦᓯᒍᓪᓕ ᑕᑕᑉᐳᓯ ᑕᒃᑯᕐᒨᕐᓂᕐᒥᒃ ᐊᔪᕐᓂᕐᒥᒡᓗ.”
ᔩᓱᓯᐅᑉ ᓇᓗᓁᕐᓯᓂᖓ ᓱᒋᐊᕐᑕᐅᔪᒫᕐᓂᖏᓐᓂᒃ
ᓘᑲᓯ 11:47-51
29“ᐃᓕᑦᓯᓐᓄᑦ ᑲᑉᐱᐊᓐᓇᒦᒃ ᐱᖁᔭᓂᒃ ᐃᓕᓮᔩᑦ ᐹᕆᓯᓪᓗ, ᑕᒃᑯᕐᒨᕐᑐᓯ!#23:29 ᑕᒃᑯᕐᒨᕐᑐᖅ; ᑕᑯᓐᓇᕐᑕᐅᓪᓗᓂ ᐱᑦᓯᐊᓐᖑᐊᕐᑐᖅ, ᐅᕝᕙᓗ ᐱᐅᔫᓐᖑᐊᕐᑐᖅ ᓇᓚᐅᑦᑍᔪᑦ ᐃᓗᕕᖏᑦ ᐱᐅᓴᕐᐸᓯ, ᐃᖅᑲᐅᒪᔭᐅᑦᔪᑎᒃᓴᖏᓐᓂᒡᓗ ᑎᑎᕋᕐᓯᒪᔪᑎᒍᑦ ᐃᓅᓯᖃᑦᓯᐊᓚᐅᕐᑐᓂᒃ ᐃᓅᑎᓪᓗᒋᑦ ᓇᓗᓁᕐᓯᓯᒪᔪᓯ; 30ᐅᖃᕐᐸᒃᐳᓯ, ‘ᑍᑦᓱᒪᓂᐅᑎᓪᓗᒍ ᓯᕗᓕᕕᓂᑦᑕ ᐃᓅᕕᒋᓚᐅᕐᑕᖏᓐᓂ ᐃᓅᒐᔭᕈᑦᑕ, ᐱᓂᐊᕐᓂᕆᓚᐅᕐᑕᖏᑎᑐᑦ ᑍᒤᒐᔭᓐᖏᓚᒍᑦ, ᓇᓚᐅᑦᑍᔪᓂᒃ ᑐᖁᑦᓯᖃᑦᑕᓚᐅᕐᑐᑎᑐᑦ.’ 31ᑭᓯᐊᓂᓕ ᓇᓗᓁᕐᓯᕗᓯ ᑍᒃᑯᓄᖓ ᑭᖑᕚᕆᔭᐅᓂᑦᓯᓐᓂᒃ, ᓇᓚᐅᑦᑍᔪᓂᒃ ᐃᓄᐊᓚᐅᕐᑐᓄᑦ. 32ᐊᑏ, ᒫᓐᓇ ᓯᕗᓕᕕᓂᑦᓯ ᐱᒋᐊᓚᐅᕐᑕᖓᑦ ᑲᔪᓯᑎᓕᕐᓯᐅᒃ ᐱᔭᕇᕐᓗᒍ. 33#ᒫᑎᐅᓯ 3:7; 12:34; ᓘᑲᓯ 3:7.ᖁᒡᓗᒋᐊᖑᔪᓯ, ᐃᕐᓂᐅᔪᓯᓗ ᖁᒡᓗᒋᐊᕐᔪᐊᓄᑦ, ᖃᓄᖅ ᐃᓕᑦᓯᓐᓂᒃ ᓴᐳᑎᔪᓐᓇᕋᓱᒋᕕᓯ ᑲᑉᐱᐊᓇᕐᑐᕕᖕᒥᑦ? 34ᑍᒤᒻᒪᑦ ᓇᓚᐅᑦᑍᔪᓂᒃ ᑎᓕᓯᕕᒋᓂᐊᕐᐸᑦᓯ, ᓯᓚᑐᔪᓂᒡᓗ, ᐊᔪᕆᕐᑐᐃᔨᓂᒡᓗ; ᐃᓚᖏᑦ ᑐᖁᓐᓂᐊᕐᐸᓯ, ᐃᓚᖏᓪᓗ ᓴᓐᓂᖓᔪᓕᖕᒧᑦ ᑭᑭᐊᒃᑐᕐᓗᓯᐅᒃ, ᐃᓚᖏᑦ ᑏᒐᕐᑐᕐᓗᒋᑦ ᔫᑎᑦ ᐅᒃᐱᕐᓂᕐᒧᑦ ᑲᑎᒪᕕᖏᓐᓂ, ᒪᓕᑲᑕᖕᓂᐊᕐᐸᓯᓗ ᐊᑭᕋᕐᑐᕐᓗᒋᑦ ᓄᓇᓕᖕᓂᑦ ᓄᓇᓕᖕᓄᑦ. 35#ᒨᓯᓯ ᓯᕗᓪᓖᑦ 4:8; ᑯᕉᓂᑲ ᐂᑉᐸᖏᑦ 24:20,21.ᑕᒪᓐᓇ ᐱᑦᔪᑎᒋᓪᓗᒍ ᓱᒋᐊᕐᑕᐅᓂᕐᒧᑦ ᑎᑭᑕᐅᔪᒫᕐᐳᓯ, ᐸᓯᔭᒃᓴᐅᖏᑦᑐᓂᒃ ᐃᓄᐊᖃᑦᑕᕐᓂᑦᓯᓐᓄᑦ ᓄᓇᕐᔪᐊᕐᒥ, ᐂᐱᓕᐅᑉ ᐸᓯᔭᒃᓴᐅᖏᑦᑑᑉ ᐃᓄᐊᕐᑕᐅᓂᖓᓂᑦ, ᓴᑲᕅᐊᐅᑉ ᐸᕋᑬᐊᐅᑉ ᐃᕐᓂᖓᑕ ᐃᓄᐊᕐᑕᐅᓂᖓ ᑎᑭᓪᓗᒍ, ᑖᓐᓇ ᐃᓄᐊᓚᐅᕐᑕᓯ ᑐᒃᓯᐊᕐᕕᒡᔪᐊᕐᒥ ᑐᓂᕐᕈᓯᕐᕕᐅᑉ ᐃᑦᔪᕐᓁᑦᑐᕕᐅᓪᓗ ᐊᑯᓐᓂᖓᓂ. 36ᓱᓕᔪᒥᒃ ᐅᖃᐅᑎᕙᑦᓯ, ᓱᒋᐊᕐᑕᐅᓂᖅ ᑕᒪᓐᓇ ᑎᑭᑦᓱᒫᕐᐳᖅ ᐅᓪᓗᒥ ᐃᓅᔪᓄᑦ.”
ᔩᓱᓯᐅᑉ ᐅᒡᒍᐊᕈᑎᖃᕐᓂᖓ ᔨᕉᓴᓕᒻᒥᒃ
ᓘᑲᓯ 13:34-35
37“ᐆ ᔨᕉᓴᓕᒻ, ᔨᕉᓴᓕᒻ, ᓇᓚᐅᑦᑍᔪᓂᒃ ᑐᖁᑦᓯᔪᑎᑦ, ᑎᓕᔭᐅᔪᓂᒡᓗ ᐅᔭᖅᑲᓄᑦ ᒥᓪᓗᕐᑐᑎᑦ! ᐃᓄᖁᑎᑎᑦ ᐅᓄᕐᑐᐃᕐᓱᕐᓗᖓ ᐃᕿᑦᓱᒪᖃᑦᑕᓚᐅᕋᓗᐊᕐᐸᒃᑲ, ᐊᕐᓇᕕᐊᑉ ᕿᑐᕐᖓᒥᓂᒃ ᐃᓴᕈᕐᒥᓄᑦ ᑲᑎᑎᑦᓯᕙᖕᓂᖓᑎᑐᑦ, ᑍᒤᑕᐅᔪᒪᓚᐅᖏᑦᑐᓯᓕ! 38#ᔨᕆᒤᐊ 22:5.ᑕᑯᒋᑦ, ᑐᒃᓯᐊᕐᕕᒃᔪᐊᖁᑎᓯ ᕿᒪᒃᑕᐅᔪᒫᕐᐳᖅ ᐃᓄᖃᕈᓐᓁᕐᓗᓂ. 39#ᐃᓐᖏᕈᑦ 118:26.ᐅᖃᐅᑎᕙᑦᓯ, ᑕᑯᓂᐊᕈᓐᓃᕐᐸᑦᓯᖓ ᐅᖃᓚᐅᖅᑳᕐᑎᓐᓇᓯ, ‘ᒎᑎᐅᑉ ᓮᒻᒪᕐᓕᐅᒃ ᐊᑕᓂᐅᑉ ᐊᑎᖓᓂ ᑎᑭᑦᑐᖅ.’”
Одоогоор Сонгогдсон:
ᒫᑎᐅᓯᐅᑉ ᐊᒡᓚᖏᑦ 23: EAIB
Тодруулга
Хуваалцах
Харьцуулах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
Eastern Arctic Inuktitut Bible © Canadian Bible Society, 2012, 2021-2023.