ᒫᑎᐅᓯᐅᑉ ᐊᒡᓚᖏᑦ 24
24
ᔩᓱᓯᐅᑉ ᐅᖃᐅᓯᖃᕐᓂᖓ ᑐᒃᓯᐊᕐᕕᒡᔪᐊᑉ ᓯᖁᒥᑕᐅᔪᒫᕐᓂᖓᓂᒃ
ᒫᑯᓯ 13:1-2; ᓘᑲᓯ 21:5-6
1ᔩᓱᓯ ᑐᒃᓯᐊᕐᕕᒡᔪᐊᕐᒥᑦ ᐊᓂᖕᒪᑦ, ᐃᓕᓐᓂᐊᕐᑎᖏᑕ ᐅᐸᒃᓗᒍ ᐅᖃᐅᑎᕚᑦ ᑕᑯᖁᓪᓗᒍ ᑐᒃᓯᐊᕐᕕᒡᔪᐊᑉ ᓴᓇᓯᒪᑦᓯᐊᕐᓂᖓᓂ. 2ᔩᓱᓯᐅᑉ ᐅᖃᐅᑎᕔᑦ, “ᑕᒪᒃᑯᐊᓕᒫᑦ ᑕᑯᒥᓇᕐᓂᖏᑦ ᑕᑯᒐᓗᐊᕐᑕᓯ, ᓱᓕᔪᒥᒃ ᐅᖃᐅᑎᕙᑦᓯ, ᑕᕝᕙᓃᑦᑐᑦ ᐅᔭᕅᑦ ᐃᓂᒥᓂ ᖃᓕᕇᒃᑐᖃᕈᓐᓃᕈᒫᕐᐳᑦ; ᐃᓘᓐᓇᓕᒫᖓ ᓯᖁᒥᑕᐅᔪᒫᕐᒪᑦ.”
ᑲᑉᐱᐊᓇᕐᑐᑦ ᐊᑭᕋᕐᑐᕐᑕᐅᓃᓪᓗ
ᒫᑯᓯ 13:3-13; ᓘᑲᓯ 21:7-19
3ᔩᓱᓯ ᐃᖏᒻᒪᑦ ᖃᖅᑲᒧᑦ ᐅᕐᓱᒃᓴᐅᔪᓐᓇᕐᑐᓂᒃ ᐸᐅᕐᖓᖅᑲᓲᓂᒃ ᓇᐹᕐᑐᓕᖕᒧᑦ, ᐃᓕᓐᓂᐊᕐᑎᖏᑕ ᐅᐸᒃᐹᑦ ᑖᒃᑯᑐᐊᖑᓪᓗᑎᒃ, ᐊᐱᕆᓪᓗᒍ, “ᐅᖃᐅᑎᓚᐅᕐᑎᒍᑦ, ᑕᒪᒃᑯᐊ ᖃᖓ ᓇᓪᓕᐅᑎᔪᒫᕐᐸᑦ ᖃᓄᖅ ᑎᑭᕝᕕᒃᓮᑦ ᓇᓗᓁᒃᑯᑕᖃᕈᒫᕐᐸ? ᓄᓇᕐᔪᐊᓪᓗ ᐃᓱᓕᕝᕕᒃᓴᖓ?”
4ᔩᓱᓯᐅᑉ ᑭᐅᕔᑦ, “ᖃᐅᔨᓴᑦᓯᐊᖃᑦᑕᕆᑦᓯ, ᑕᒻᒪᕐᑎᑕᐅᖁᓇᓯ ᓇᓪᓕᐊᓐᓄᑦ. 5ᐊᒥᓱᑦ ᐅᕙᓐᓂᒃ ᐱᑦᔪᑎᖃᕐᓂᕋᕐᓗᑎᒃ ᑎᑭᑦᓱᒫᕐᒪᑕ, ᐅᖃᕐᓗᑎᒃ, ‘᙭ᔅᑑᓯᐅᕗᖓ,’ ᐅᓄᕐᑐᓂᒡᓗ ᑕᒻᒪᕐᑎᑦᓯᔪᒫᕐᐳᑦ. 6ᐅᓇᑕᕐᑐᓂᒃ ᖃᓂᒋᔭᑦᓯᓐᓂ ᑐᓵᔪᒫᕐᐳᓯ, ᐅᖓᓯᒋᔭᑦᓯᓐᓂᓗ ᐅᓇᑕᕐᑐᑦ ᐅᖃᐅᓯᐅᓂᖏᓐᓂᒃ ᑐᓴᔪᒫᕐᐳᓯ; ᑲᑉᐱᐊᓱᒃᑍᓕᒋᑦᓯ; ᑍᒤᑦᑐᖃᕆᐊᖃᕐᒪᑦ, ᑭᓯᐊᓂ ᑕᒪᒃᑯᐊ ᓇᓗᓁᕐᓯᓐᖏᓚᑦ ᓯᓚᕐᔪᐊᑉ ᓇᒡᒐᑎᒃᓴᖓᓂᒃ. 7ᐃᓅᖃᑎᒌᒡᔪᐊᑦ ᐅᓇᑕᕈᒫᕐᐳᑦ ᐃᓅᖃᑎᒌᒡᔪᐊᓄᑦ ᐊᓯᒥᖕᓄᑦ, ᐊᖓᔪᖅᑲᐅᕖᓪᓗ ᐊᖓᔪᖅᑲᐅᕕᖕᓄᑦ ᐊᓯᒥᖕᓄᑦ ᐅᓇᑕᖃᑦᑕᐅᑎᔪᒫᕆᕗᑦ, ᑳᖕᓇᕐᑐᕐᔪᐊᖃᕈᒫᕐᐳᖅ ᓇᓂᑐᐃᓐᓇᖅ ᓄᓇ ᓇᐅᒃᑯᑐᐃᓐᓇᖅ ᓴᔪᒃᐱᓗᖃᑦᑕᕈᒫᕐᐳᖅ. 8ᑕᒪᒃᑯᐊᓕ ᐊᕐᓇᐅᑉ ᐃᕐᓂᓱᓕᕐᑑᑉ ᐃᒃᐱᖕᓂᐊᓕᕐᓂᖓᑐᑦ ᑍᒤᑐᐃᓐᓇᕐᐳᑦ.
9 #
ᒫᑎᐅᓯ 10:22. “ᑭᖑᓂᖓᒍᑦ ᑎᒍᔭᐅᔪᒫᕐᐳᓯ ᑲᑉᐱᐊᓇᕐᑐᒦᑎᑕᐅᓗᓯ, ᑐᖁᑕᐅᓗᓯᓗ; ᐃᓅᖃᑎᒌᒡᔪᐊᓕᒫᓄᑦ ᐆᒥᒋᔭᐅᔪᒫᕐᐳᓯ ᐱᑦᔪᑎᒋᓗᖓ. 10ᑍᒤᑦᑐᒦᓕᕐᑎᓪᓗᓯ ᐊᒥᓱᑦ ᐅᒃᐱᕐᓂᕐᒥᒃ ᓴᐱᓕᕈᒫᕐᐳᑦ; ᐃᒻᒥᖕᓄᓪᓗ ᐱᔭᐅᒃᑲᖃᑦᑕᐅᑎᔪᒫᕐᐳᑦ, ᐃᒻᒥᖕᓄᑦ ᐆᒥᒋᖃᑦᑕᐅᑎᓕᕐᓗᑎᒃ. 11ᓇᓚᐅᑍᔪᓐᖑᐊᕐᑐᑦ ᓱᓕᖏᑦᑐᑦ ᓴᖅᑭᑦᓱᒫᕐᐳᖅ ᐅᓄᕐᑐᓪᓗ ᑕᒻᒪᕐᑎᑦᓱᒫᕐᐰᑦ. 12ᐊᔪᕐᑐᓕᓂᐅᑉ ᐱᕙᓪᓕᐊᓂᖓᓄᑦ, ᐃᓄᐃᑦ ᓇᒡᓕᖕᓂᖏᑦ ᓂᒡᓕᕙᓪᓕᐊᔪᒫᕐᐳᑦ. 13#ᒫᑎᐅᓯ 10:22.ᐅᒃᐱᕐᓂᒥᒡᓕ ᑎᒍᒥᐊᖏᓐᓇᕐᓗᓂ ᐃᓱᐊᓄᑦ ᑎᑭᑦᑐᖅ ᑖᓐᓇ ᐱᐅᓕᔭᐅᔪᒫᕐᐳᖅ. 14ᐅᖃᐅᓰᑦ ᑐᓴᕈᒥᓇᕐᑐᑦ ᒎᑎᐅᑉ ᐊᑕᓂᐅᕕᖓᓂᒃ ᐅᖃᐅᓯᓖᑦ ᐊᔪᕆᕐᑐᐃᑦᔪᑕᐅᔪᒫᕐᐳᑦ ᓄᓇᕐᔪᐊᓕᒫᒥ ᓇᓂᑐᐃᓐᓇᖅ, ᓱᓕᓂᖓᓗ ᓴᖅᑭᑎᑕᐅᓗᓂ ᐃᓅᖃᑎᒌᒡᔪᐊᓄᑦ; ᑕᕝᕙ ᓯᓚᕐᔫᑉ ᓇᒡᒐᑖ ᓇᓪᓕᐅᑎᔪᒫᕐᐳᖅ.”
ᑐᒃᓯᐊᕐᕕᒡᔪᐊᑉ ᑕᑯᒥᓁᑦᑐᕐᔪᐊᒥᒃ ᐃᓕᓯᕕᐅᓂᖓ
ᒫᑯᓯ 13:14-23; ᓘᑲᓯ 21:20-24
15 #
ᑖᓂᐊᓕ 9:27; 11:31; 12:11. “ᑕᑯᒍᑦᓯ ᑐᒃᓯᐊᕐᕕᒡᔪᐊᕐᒥ ᑕᑯᒥᓁᑦᑐᕐᔪᐊᒥᒃ ᐃᓕᓯᕕᐅᓂᖓᓂᒃ ᓇᓚᐅᑦᑍᔫᑉ ᑖᓂᐊᓕᐅᑉ ᐅᖃᐅᓯᕆᓯᒪᔭᖓᓂᒃ, ᐃᑦᔪᕐᓁᑦᑐᕕᖕᒦᑦᑐᒥᒃ (ᐊᑐᐊᕐᓯᔫᑉ ᑐᑭᓯᔭᕆᐊᖃᕐᑕᖓ), 16ᑕᕝᕙ ᔫᑎᐊᒦᑦᑐᑦ ᕿᒫᔭᕆᐊᖃᕈᒫᕐᐳᑦ ᖃᖅᑲᓄᑦ; 17#ᓘᑲᓯ 17:31.ᐃᒡᓘᑉ ᖄᖓᓃᑦᑐᖅ ᐱᖁᑎᒥᓂᒃ ᐊᖏᕐᕋᒥᓂᑦ ᐂᒃᖠᕋᓱᒃᑍᓕᓕ; 18ᐱᕈᕐᓰᕕᖕᒦᑦᑐᖅ ᐊᖏᕐᕋᒥᓄᑦ ᐅᓕᒡᔪᐊᒥᓂᒃ ᐂᒃᖠᕋᓱᒃᑍᓕᓕ. 19ᐊᒃᓱᐊᓗᒃ ᑲᑉᐱᐊᓇᕈᒫᕐᐳᖅ ᐊᕐᓇᓄᑦ ᓄᑕᕋᒃᓴᖃᕐᑐᓄᑦ ᒥᑭᔪᓛᓂᒡᓗ ᕿᑐᕐᖓᓕᖕᓄᑦ! 20ᒎᑎᒧᑦ ᑐᒃᓯᐊᕆᑦᓯ ᕿᒫᕕᒃᓴᓯ ᐅᑭᐅᒥ ᓇᓪᓕᐅᑎᖁᓇᒍ ᓴᐸᑎᒥᓘᓐᓃᑦ. 21#ᑖᓂᐊᓕ 12:1; ᑕᑯᑎ 7:14.ᑲᑉᐱᐊᓇᕐᑐᖅ ᑕᒪᓐᓇ ᐊᑦᔨᖃᕐᕈᒫᖏᒻᒪᑦ ᐊᑐᕐᓯᒪᔭᑦᓯᓐᓂᑦ, ᓯᓚᕐᔫᑉ ᐱᒋᐊᕐᓂᖓᓂᑦ ᐅᓪᓗᒥᒧᑦ ᑎᑭᓪᓗᒍ, ᐊᑦᔨᖃᕐᓂᐊᖏᓚᖅ ᑕᒪᑐᒪ ᑭᖑᕐᖓᒍᑦ. 22ᐅᓪᓗᐃᑦ ᑍᒃᑯᐊ ᒎᑎᐅᑉ ᓁᒡᓕᒋᐊᓐᖏᑉᐸᒋᑦ, ᓇᓪᓕᐊᓐᓂᒡᓘᓐᓃᑦ ᐃᓄᖕᒥᒃ ᐊᓐᓇᒃᑐᖃᕋᔭᓐᖏᓚᖅ; ᓂᕈᐊᕐᓯᒪᔭᓂᓕ ᐱᑦᔪᑎᒋᓪᓗᒋᑦ ᒎᑎᐅᑉ ᐅᓪᓗᐃᑦ ᓁᒡᓕᒋᐊᕈᒫᕐᐰᑦ.
23“ᓇᓪᓕᐊᓐᓄᑦ ᐅᖃᐅᔭᐅᒍᑦᓯ, ‘ᑕᑯᒋᑦ ᐅᓇ ᑕᕝᕙ ᙭ᔅᑑᓯ!’ ᐅᕝᕙᓗ ‘ᐊᕙᓂ ᑍᑲ!’ ᑍᒤᓕᔪᑦ ᐅᒃᐱᕆᓂᐊᕋᓯᒋᒃ. 24᙭ᔅᑑᓯᐅᓂᕋᕐᑐᑦ ᓱᓕᖏᑦᑐᑦ, ᓇᓚᐅᑦᑍᔫᓂᕋᕐᑐᓪᓗ ᓱᓕᖏᑦᑐᑦ ᓴᖅᑭᑦᓱᒫᕐᒪᑕ; ᐊᖏᔪᓂᒃ ᑲᒪᓇᕐᑐᓕᖃᑦᑕᕐᓗᑎᒃ ᓇᓗᓁᒃᑯᑕᕐᓂᒡᓗ ᓴᖅᑭᔮᕐᑎᑦᓯᖃᑦᑕᕈᒫᕐᒪᑕ, ᑕᒻᒪᕐᑎᑦᓯᓇᓱᐊᕐᓗᑎᒃ, ᐊᒡᓛᑦ ᓂᕈᐊᕐᑕᐅᓯᒪᔪᑦ ᐊᔪᕐᓇᖏᑉᐸᑕ ᑕᒻᒪᕐᑎᓐᓇᓱᐊᕐᓗᒋᑦ. 25ᑕᑯᒋᑦ, ᑕᒪᒃᑯᓂᖓ ᐅᖃᐅᑎᕙᑦᓯ ᓯᕗᓂᖓᒍᑦ, ᓱᓕ ᐊᑐᓚᐅᕐᑎᓐᓇᒋᑦ.
26 #
ᓘᑲᓯ 17:23,24. “ᐅᕝᕙᓗ, ᐅᖃᐅᑦᔭᐅᒍᑦᓯ, ‘ᑕᑯᒋᑦ, ᐃᓄᖃᖏᑦᑐᒦᑉᐳᖅ,’ ᑕᐅᕗᓐᖓᕐᑍᓕᒋᑦᓯ; ᐅᖃᕐᐸᑕ, ‘ᑕᑯᒋᑦ, ᐅᕙᓂ ᐃᒡᓗᕈᓯᕐᒥ ᐃᔨᕐᓯᒪᕗᖅ,’ ᐅᒃᐱᕆᓂᐊᕋᓯᒋᒃ. 27ᓲᕐᓗ ᕿᓚᖕᒥ ᖃᐅᒻᒫᓪᓚᒃ ᐃᑳᓲᖑᖕᒪᑦ ᓯᕿᓂᐅᑉ ᓄᐃᕕᐊᓂᑦ ᓂᐱᕕᐊᓄᑦ, ᑍᒤᑦᓱᒫᕆᕗᖅ ᐃᓅᑉ ᐃᕐᓂᖓ ᑎᑭᓕᕐᐸᑦ.
28 #
ᓘᑲᓯ 17:37. “ᓇᓂᓕᒫᖅ ᑐᖁᖓᔪᖃᓕᕌᖓᑦ, ᑎᖕᒥᐊᕐᔪᐊᑦ ᓂᕿᑐᓲᑦ ᑎᒥᕕᓂᕐᒧᑦ ᑲᑎᓲᖑᕗᑦ.”
ᐃᓅᑉ ᐃᕐᓂᖓᑕ ᑎᑭᓐᓂᒃᓴᖓ
ᒫᑯᓯ 13:24-27; ᓘᑲᓯ 21:25-28
29 #
ᐂᓮᐊᓯ 13:10; ᔪᐃᓕ 2:10,31; 3:15; ᑕᑯᑎ 6:12;
ᐂᓮᐊᓯ 13:10; ᐃᓯᑭᐊᓕ 32:7; ᔪᐃᓕ 2:10; 3:15;
ᐂᓮᐊᓯ 34:4; ᑕᑯᑎ 6:13. “ᐅᓪᓗᐃᑦ ᑲᑉᐱᐊᓇᕐᑐᑦ ᑭᖑᓂᑦᓯᐊᖓᒍᑦ, ᓯᕿᓂᖅ ᑖᕐᓯᔪᒫᕐᐳᖅ, ᑕᖅᑭᕐᓗ ᖃᐅᒪᔪᓐᓃᕈᒫᕐᐳᖅ, ᐅᓪᓗᕆᐊᓪᓗ ᕿᓚᖕᒥᑦ ᑲᑕᒍᒫᕐᐳᑦ, ᓯᓚᐅᑉ ᐱᔪᓐᓇᕐᓂᖏᑦ ᐃᓂᒋᔭᒥᖕᓂ ᓴᔪᒃᐱᓗᒍᒫᕐᐳᑦ. 30#ᑖᓂᐊᓕ 7:13; ᓴᑲᕅᐊ 12:10-14; ᑕᑯᑎ 1:7.ᑕᕝᕙ ᐃᓅᑉ ᐃᕐᓂᖓᑕ ᓇᓗᓁᒃᑯᑕᖓ ᕿᓚᖕᒥᑦ ᓴᖅᑭᑦᓱᒫᕐᐳᖅ; ᐃᓄᐃᑦ ᐃᓘᓐᓇᑦᓯᐊᑎᒃ ᓄᓇᕐᔪᐊᕐᒦᑦᑐᑦ ᕿᐊᓕᕈᒫᕐᐳᑦ, ᑕᑯᓕᕈᑎᒃ ᐃᓅᑉ ᐃᕐᓂᖓᓂᒃ ᑎᑭᓕᕐᑐᒥᒃ ᕿᓚᐅᑉ ᓄᕗᔭᖏᑎᒍᑦ ᐱᔪᓐᓇᕐᑐᕐᔪᐊᒥᒃ ᓂᕐᑐᕐᓇᕐᑐᕐᔪᐊᕐᒥᒡᓗ. 31ᑕᕝᕙ ᑎᑦᑐᓚᐅᑎᕐᔪᐊᑦ ᓂᐱᖏᑦ ᓂᓪᓕᕈᒫᕐᐳᑦ, ᐂᖏᓕᖁᑎᓂ ᑎᓕᔪᒫᕐᐰᑦ ᓄᓇᕐᔪᐊᓕᒫᒧᑦ ᓄᓇᐅᑉ ᐊᓄᕌᕐᕕᒋᓲᖏᓐᓄᑦ ᓯᑕᒪᓄᑦ, ᑖᒃᑯᐊ ᑲᑎᕐᓯᔪᒫᕐᐳᑦ ᑖᑦᓱᒪ ᓂᕈᐊᕐᓯᒪᔭᖏᓐᓂᒃ ᓄᓇᐅᑉ ᐃᓱᐊᓂᑦ ᐃᓱᐊᓄᑦ.”
ᐃᓕᓴᐅᑎᒃᓴᖅ ᓇᐹᕐᑐᖅ ᐱᒋᓕᖕᓂᒃ ᐸᐅᕐᖓᓕᒃ
ᒫᑯᓯ 13:28-31; ᓘᑲᓯ 21:29-33
32“ᐃᓕᑦᓯᕕᒋᓚᐅᕐᓯᐅᒃ ᓇᐹᕐᑐ ᐸᐅᕐᖓᓕᒃ; ᐊᕙᓚᖓᔪᖏᑦ ᐱᕈᓕᕌᖓᑕ ᑐᖑᔪᕐᓯᓪᓗᑎᒃ ᐅᖃᐅᔭᕐᑖᕐᐸᓪᓕᐊᓕᕌᖓᑕ, ᖃᐅᔨᒪᓕᕐᐸᒃᐳᓯ ᐊᐅᔭᓪᓚᕆᓐᖑᓯᖕᒪᑦ. 33ᑍᒫᒃᑕᐅᖅ, ᑕᒪᒃᑯᐊᓕᒫᑦ ᑕᑯᓕᕈᑦᓯᒋᒃ, ᖃᐅᔨᒪᓂᐊᕐᐳᓯ ᓯᓚᕐᔫᑉ ᐃᓱᐊ ᖃᓂᑦᑑᓕᕐᒪᑦ, ᐱᒋᐊᑐᐃᓐᓇᕆᐊᖃᓕᕐᓗᓂ. 34ᓱᓕᔪᒥᒃ ᐅᖃᐅᑎᕙᑦᓯ, ᑕᒪᒃᑯᐊ ᓇᓪᓕᐅᑦᑐᒃᓴᓕᒫᑦ ᓇᓪᓕᐅᑎᔪᒫᕐᐳᑦ ᒫᓐᓇ ᑭᖑᕚᖑᖃᑎᒌᑦ ᒪᑯᐊ ᓄᖑᓚᐅᕐᑎᓐᓇᒋᑦ. 35ᕿᓚᒡᓗ ᓄᓇᓗ ᓄᖑᔪᒫᕐᐴᒃ; ᐅᖃᐅᓯᒃᑲᓕ ᓄᖑᔪᒫᓐᖏᓚᑦ.”
ᑭᓇᒥᒡᓘᓐᓂᒃ ᖃᐅᔨᒪᔪᖃᓐᖏᓚᖅ ᐅᓪᓗᖓᓂᒃ ᐃᑲᕐᕋᖓᓂᒡᓗ
ᒫᑯᓯ 13:32-37; ᓘᑲᓯ 17:26-30,34-36
36“ᑭᓇᒥᒡᓘᓐᓃᑦ ᖃᐅᔨᒪᔪᖃᓐᖏᓚᖅ, ᓯᓚᕐᔫᑉ ᓇᒡᒐᑎᒃᓴᖓᑕ ᐅᓪᓗᖓᓂᒃ ᐃᑲᕐᕋᖓᓂᒡᓘᓐᓃᑦ; ᐂᖏᓖᑦ ᐊᒡᓛᑦ ᕿᓚᖕᒦᑦᑐᑦ ᖃᐅᔨᒪᖏᓐᓂᕗᑦ, ᐃᕐᓂᐅᓪᓘᓐᓃᑦ ᖃᐅᔨᒪᖏᓐᓂᕚ, ᐊᑖᑕᒪ ᑭᓯᒥ ᖃᐅᔨᒪᕚ. 37#ᒨᓯᓯ ᓯᕗᓪᓖᑦ 6:5-8.ᐃᓅᑉ ᐃᕐᓂᖓᑕ ᑎᑭᕝᕕᒃᓴᖓ ᐊᑦᔨᖃᕈᒫᕐᐳᖅ, ᓄᐊ ᐃᓅᑎᓪᓗᒍ ᐱᐅᓯᕆᔭᐅᓚᐅᕐᑐᑎᑐᑦ. 38ᐅᓕᕕᒡᔪᐊᑉ ᓯᕗᓂᖓᒍᑦ ᐃᓄᐃᑦ ᓂᕆᓚᐅᕐᐳᑦ ᐃᒥᕐᓗᑎᒡᓗ, ᓄᓕᐊᓂᒃᐳᑦ ᐅᐃᓂᒡᓗᑎᒡᓗ, ᐅᓪᓗᖅ ᓄᐊᑉ ᐃᑎᕐᕕᐊ ᐅᒥᐊᕐᔪᐊᒧᑦ ᑎᑭᓪᓗᒍ; 39#ᒨᓯᓯ ᓯᕗᓪᓖᑦ 7:6-24.ᖃᐅᔨᒪᓚᐅᓐᖏᓚᑦ ᐅᓕᕕᒃᔪᐊᕐᒧᑦ ᑎᑭᑕᐅᖅᑳᕋᑎᒃ ᑕᒪᕐᒥᒡ ᓄᖑᑕᐅᓚᐅᕐᐳᑦ, ᑍᒤᑦᓱᒫᕆᕗᖅ ᐃᓅᑉ ᐃᕐᓂᖓᑕ ᑎᑭᕝᕕᒃᓴᖓᓂ. 40ᑕᒪᓐᓇ ᓇᓪᓕᐅᑎᒃᐸᑦ ᐊᖑᑏᒃ ᒪᕐᕉᒃ ᐱᕈᕐᓰᕕᖕᒦᑦᓱᒫᕐᐴᒃ; ᐂᑉᐹ ᐊᐅᓪᓚᕈᑦᔭᐅᔪᒫᕐᐳᖅ ᐂᑉᐹᓕ ᕿᒪᒃᑕᐅᓗᓂ. 41ᐊᕐᓈᒃ ᒪᕐᕉᒃ ᓂᐊᖂᔭᒃᓴᓂᒃ ᓯᖅᑲᓪᓕᑎᑦᓯᕕᖕᒦᑦᓱᒫᕐᐴᒃ; ᐂᑉᐹ ᐊᐅᓪᓚᕈᑦᔭᐅᔪᒫᕐᐳᖅ, ᐂᑉᐹᓕ ᕿᒪᒃᑕᐅᓗᓂ. 42ᑍᒤᒻᒪᑦ ᖃᐅᔨᓴᑦᓯᐊᕆᑦᓯ, ᐊᑕᓂᑦᓯ ᑎᑭᕝᕕᒃᓴᖓ ᐅᓪᓗᖅ ᖃᐅᔨᒪᖏᓐᓇᑦᓯᐅᒃ. 43#ᓘᑲᓯ 12:39,40.ᐅᓇ ᑐᑭᓯᓯᐅᒃ; ᐃᒡᓗᖃᕐᑐᖅ ᖃᐅᔨᒪᒍᓂ ᑎᒡᓕᒃᑎᐅᑉ ᑎᒡᓕᒋᐊᕐᑐᕐᕕᒋᒐᔭᕐᑕᖓᓂᒃ, ᑖᓐᓇ ᐱᒑᕋᔭᕐᐳᖅ ᑎᒡᓕᒃᑎ ᐃᑎᖁᓇᒍ ᐃᒡᓗᒥᓄᑦ. 44ᑍᒤᒻᒪᑦ ᐃᓕᑦᓯᑦᑕᐅᖅ ᐅᐸᓗᖕᒊᕐᓯᒪᔪᒃᓴᐅᕗᓯ; ᐃᓅᑉ ᐃᕐᓂᖓ ᑎᑭᑦᓱᒫᕐᒪᑦ ᐃᑲᕐᕋᒥ ᓂᕆᐅᒡᕕᒋᓐᖏᑕᑦᓯᓐᓂ.”
ᐱᔨ ᓱᖁᓯᔪᐃᑦᑐᖅ ᓴᖑᓴᕅᑦᑐᕐᓗ
ᓘᑲᓯ 12:41-48
45“ᑭᓇ ᓱᖁᓯᔪᐃᑦᑑᓪᓗᓂ ᓯᓚᑐᓪᓗᓂᓗ ᐱᔨᐅᕚ? ᑖᓐᓇ ᐊᖓᔪᖅᑳᖓᑕ ᐊᖓᔪᖅᑳᖑᕐᑎᑕᖓ ᐱᔨᐅᖃᑎᖏᓐᓄᑦ, ᓂᕿᒃᓴᖏᓐᓂᒃ ᑐᓂᓯᖃᑦᑕᖁᓪᓗᒍ ᑐᓂᓯᕕᒃᓴᖓ ᓇᓪᓕᐅᑎᔭᕌᖓᑦ. 46ᑖᓐᓇ ᐊᖏᔪᒥᒃ ᓮᒪᕐᑎᑕᐅᓇᕐᑐᒦᑉᐳᖅ, ᑎᑭᑕᐅᒍᓂ ᐊᖓᔪᖅᑳᒥᓄᑦ ᑍᒤᓕᐅᑦᓯᐊᕐᑎᓪᓗᒍ! 47ᓱᓕᔪᒥᒃ ᐅᖃᐅᑎᕙᑦᓯ, ᑖᓐᓇ ᐊᖓᔪᖅᑳᖓᑕ ᐊᖓᔪᖅᑳᓐᖑᕐᑎᓐᓂᐊᕐᐹ ᐱᖁᑎᓕᒫᒥᓄᑦ. 48ᐱᔨᑦᓯᐊᕙᐅᖏᑦᑐᕐᓕ ᐃᓱᒪᓕᕈᓂ, ‘ᐊᖓᔪᖅᑳᕋ ᓱᓕ ᐊᑯᓂᐊᓗᒃ ᑎᑭᑦᔮᓐᖏᓚᖅ,’ 49ᐱᔨᐅᖃᑎᓂ ᐋᓐᓂᕐᓯᓕᕐᐸᒋᑦ, ᓂᕆᖃᑎᖃᓕᕐᓗᓂ ᐃᒥᖃᑎᖃᕐᓗᓂᓗ ᐋᖓᔮᕐᑎᓂᒃ. 50ᑕᕝᕙ ᐱᔨᐅᑉ ᐊᖓᔪᖅᑳᖓ ᑎᑭᒃᑲᔭᕐᐳᖅ ᐅᓪᓗᖕᒥ ᑖᑦᓱᒪ ᓂᕆᐅᒡᕕᒋᓐᖏᑕᖓᓂ ᐃᑲᕐᕋᒥᓗ ᖃᐅᔨᒪᓐᖏᑕᖓᓂ. 51ᑕᕝᕙ ᐊᖓᔪᖅᑳᖓᑕ ᓱᒋᐊᕐᓗᒍ ᐃᒋᒃᑲᔭᕐᐹ, ᑕᒃᑯᕐᒨᕐᑐᑦ ᓱᒋᐊᕐᑕᐅᕕᒋᔭᖓᓄᑦ; ᑕᕝᕙᓂ ᕿᐊᓂᖃᕋᔭᕐᐳᑦ ᐊᒡᓕᕈᓛᕐᓗᑎᒃ.
Одоогоор Сонгогдсон:
ᒫᑎᐅᓯᐅᑉ ᐊᒡᓚᖏᑦ 24: EAIB
Тодруулга
Хуваалцах
Харьцуулах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
Eastern Arctic Inuktitut Bible © Canadian Bible Society, 2012, 2021-2023.