ᒫᑎᐅᓯᐅᑉ ᐊᒡᓚᖏᑦ 14
14
ᔪᐊᓇᓯ ᐹᑉᑎᑎᕆᔨᐅᑉ ᑐᖁᓂᖓ
ᒫᑯᓯ 6:14-29; ᓘᑲᓯ 9:7-9
1ᑍᑦᓱᒪᓂ ᐃᕉᑕᓯ ᒐᓕᓕᐊᒥ ᐊᐅᓚᑦᓯᔨᐅᔪᖅ ᔩᓱᓯᒥᒃ ᑐᓴᕐᑎᑕᐅᒐᒥ ᖁᕕᐊᒋᔭᐅᓂᖓᓂᒃ. 2ᐊᖓᔪᖅᑳᖁᑎᓂ ᐅᖃᐅᑎᕔᑦ, “ᔪᐊᓇᓯ ᐹᑉᑎᑎᕆᔨᓪᓚᕆᐅᓇᓱᒋᕙᕋ, ᑐᖁᖓᔪᓂᑦ ᒪᑭᑦᑐᕕᓂᖅ; ᑍᒤᒻᒪᑦ ᐱᔪᓐᓇᕐᓂᖃᓕᕐᐳᖅ ᑲᒪᓇᕐᑐᓕᓂᕐᓂᒃ ᐱᓇᓱᐊᕈᓐᓇᕐᓗᓂ.”
3 #
ᓘᑲᓯ 3:19,20. ᑕᒪᑐᒪ ᓯᕗᓂᖓᒍᑦ ᐃᕉᑕᓯᐅᑉ ᔪᐊᓇᓯ ᑎᒍᔭᐅᖁᓚᐅᕋᒥᐅᒃ, ᐊᑦᑐᖏᕐᓗᒍ ᑎᒍᔭᐅᓯᒪᕕᖕᒧᐊᕐᑕᐅᑎᓪᓗᓂᐅᒃ, ᑍᒤᓕᐅᓚᐅᕐᐳᖅ ᐃᕉᑎᐊᓯ ᐱᑦᔪᑎᒋᓪᓗᒍ, ᖃᑕᓐᖑᑎᖓᑕ ᐱᓕᑉᐴᓯᐅᑉ ᓄᓕᐊᖓ. 4#ᒨᓯᓯ ᐱᖓᔪᖏᑦ 18:16; 20:21.ᑕᒪᑐᒪ ᓯᕗᓂᖓᒍᑦ ᔪᐊᓇᓯᐅᑉ ᐃᕉᑕᓯ ᐅᖃᐅᑎᓚᐅᕐᒪᒍ, “ᑕᒻᒪᓪᓚᕆᒃᐳᑎᑦ ᐃᕉᑎᐊᓯᒥᒃ ᓄᓕᐊᕐᑖᕐᓗᑎᑦ!” 5ᐃᕉᑕᓯᐅᑉ ᔪᐊᓇᓯ ᑐᖁᑕᐅᑎᑦᓱᒪᓚᐅᕋᓗᐊᕐᐹ, ᔫᑎᓪᓕ ᓯᕘᕋᒋᕔᑦ, ᔪᐊᓇᓯᒥᒃ ᓇᓚᐅᑦᑍᔨᐅᓇᓱᒋᒃᓯᖕᒪᑕ.
6ᐃᕉᑕᓯᐅᑉ ᐃᓅᓕᕐᕕᒃᓯᐅᕐᕕᖓᓂ ᐃᕉᑎᐊᓯᐅᑉ ᐸᓂᖓ ᑖᓂᓯᕐᐳᖅ ᓇᓪᓕᐅᓐᓂᕐᓯᐅᕆᐊᕐᓯᒪᔪᓕᒫᓄᑦ ᑕᑯᓐᓈᕐᑕᐅᓪᓗᓂ, ᐃᕉᑕᓯᐅᓪᓗ ᖁᕕᐊᒋᒻᒪᕆᒃᐹ. 7ᐅᖃᓚᐅᕐᐳᖅ ᓱᓕᓚᕆᒃᑎᓐᓂᐊᕐᑕᒥᓂᒃ ᓴᖑᑎᓂᐊᓐᖏᑕᒥᓂᒡᓗ, ᑐᓂᓯᕕᒋᔪᓐᓇᕐᐸᒋᑦ ᓱᓇᑐᐃᓐᓇᕐᒥᒃ ᐱᔪᒪᔭᕐᓂᒃ.
8ᓂᕕᐊᕐᓵᖅ ᐊᓈᓇᒥᓄᑦ ᐊᐱᕆᓚᐅᕐᓗᓂ, ᐊᓈᓇᖓᑕ ᐱᔭᐅᖁᔭᖓᓂᒃ ᒪᓕᒡᓗᓂ ᐃᕉᑕᓯ ᐱᔪᒪᕕᒋᕚ, ᐅᖃᕐᓗᓂ, “ᒫᓐᓇ ᑐᓂᓯᕕᒋᓚᐅᓐᖓ ᐅᕙᓂ ᔪᐊᓇᓯ ᐹᑉᑎᑎᕆᔨᐅᑉ ᓂᐊᖁᖓᓂᒃ ᐊᓪᓕᕋᕐᒦᑎᓪᓗᒍ!”
9ᐊᖓᔪᖅᑳᕐᔪᐊᖅ ᖁᕕᐊᓱᒍᓐᓃᕐᐳᖅ; ᐊᖏᒻᒪᕆᒃᓗᓂ ᐅᖃᕕᖅᑲᐅᒐᒥ ᑕᑯᓐᓈᕆᐊᕐᓯᒪᔪᑦ ᑐᓵᑎᓪᓗᒋᑦ, ᑖᑦᓱᒪ ᐱᔪᒪᔭᖓ ᑲᔪᓯᑎᑕᐅᖁᕚ. 10ᑍᒤᒻᒪᑦ ᔪᐊᓇᓯ ᓂᐊᖁᐃᕐᑕᐅᖁᕚ ᑎᒍᔭᐅᓯᒪᕕᖕᒥ. 11ᔪᐊᓇᓯᐅᑉ ᓂᐊᖁᐊ ᐊᓪᓕᕋᕐᒦᑎᓪᓗᒍ ᓂᕕᐊᕐᓵᒧᑦ ᐂᑦᑑᑕᐅᕗᖅ, ᓂᕕᐊᕐᓵᑉ ᐊᓈᓇᒥᓄᐊᕈᑎᕚ. 12ᔪᐊᓇᓯᐅᑉ ᐃᓕᓐᓂᐊᕐᑎᖏᑦ ᑕᕝᕗᓐᖓᕋᒥᒃ, ᑎᒥᖓ ᐂᓪᓗᒍ ᐊᓐᓂᓯᕚᑦ, ᐃᓗᕕᕐᓗᒍ; ᑕᕝᕙᓐᖓᑦ ᔩᓱᓯᒧᐊᕐᐳᑦ ᑕᒪᑐᒥᖓ ᐅᖃᐅᑎᓪᓗᒍ.
ᔩᓱᓯᐅᑉ 5,000ᓂᒃ ᓂᕆᑎᑦᓯᓂᖓ
ᒫᑯᓯ 6:30-44; ᓘᑲᓯ 9:10-17; ᔪᐊᓇᓯ 6:1-14
13ᔩᓱᓯᐅᑉ ᑕᒪᓐᓇ ᑐᓴᕋᒥᐅᒃ, ᑕᕝᕙᓐᖓᑦ ᐅᒥᐊᒃᑯᑦ ᐊᐅᓪᓚᕐᐳᖅ ᐃᓄᖃᖏᑦᑐᒧᑦ ᐃᓄᑑᔭᑐᕐᓗᓂ. ᐃᓄᒐᓴᒡᔪᐊᑦ ᑐᓴᕋᒥᒃ, ᓄᓇᒥᖕᓂᑦ ᐊᐅᓪᓚᕐᐳᑦ ᒪᓕᓕᕐᓗᒍ ᐱᓱᒡᓗᑎᒃ. 14ᔩᓱᓯ ᐅᒥᐊᒥᑦ ᓂᐅᒐᒥ ᐃᓄᒐᓴᒡᔪᐊᓂᒃ ᑕᑯᕗᖅ, ᐃᓚᑦᓱᒋᓕᕐᓗᒋᑦ, ᖃᓂᒪᔨᐊᖏᑦ ᐋᖅᑭᒃᐰᑦ.
15ᐅᓐᓄᒃᑎᓪᓗᒍ ᐃᓕᓐᓂᐊᕐᑎᖏᑕ ᐅᐸᒃᐹᑦ ᐅᖃᐅᑎᓪᓗᒍ, “ᒫᓐᓇ ᐅᓐᓄᓗᐊᓕᕐᒪᑦ, ᑕᒪᓐᓇᓗ ᓇᔪᕐᑕᕗᑦ ᐃᒡᓗᑕᖃᕋᓂ; ᐃᓄᐃᑦ ᐊᐅᓪᓚᕐᑎᓚᐅᒃᑭᑦ ᓄᓇᓕᖕᓄᐊᕐᓗᑎᒃ ᐃᒻᒥᖕᓂᒃ ᓂᕆᓂᐊᕐᑕᒥᖕᓂᒃ ᓂᐅᕕᕐᓂᐊᕐᒪᑕ.”
16ᔩᓱᓯᐅᑉ ᑭᐅᕔᑦ, “ᐅᑯᐊ ᐊᐅᓪᓚᕆᐊᖃᖏᑦᑐᑦ, ᐃᓕᑦᓯ ᓂᕿᒃᓴᖏᓐᓂᒃ ᑐᓂᓯᕕᒋᓚᐅᕐᓯᐅᒃ.”
17ᐃᓕᓐᓂᐊᕐᑎᖏᑕ ᑭᐅᕚᑦ, “ᓂᐊᖂᔭᓂᒃ ᑕᓪᓕᒤᓐᓇᕐᓂᒃ ᐱᑕᖃᕐᐳᒍᑦ, ᐃᖃᓘᖕᓂᒡᓗ ᒪᕐᕉᖕᓂᒃ.”
18ᔩᓱᓯᐅᑉ ᐅᖃᐅᑎᕔᑦ, “ᐊᑏ, ᑖᒃᑯᐊ ᕾᓚᐅᕐᓯᐅᒃ.” 19ᑕᕝᕙ ᐃᓄᒐᓴᒡᔪᐊᑦ ᓄᓇᒧᑦ ᐃᕕᓕᖕᒧᑦ ᐃᒃᓯᕙᖁᕔᑦ; ᓂᐊᖂᔧᑦ ᑕᓪᓕᒪᑦ ᐃᖃᓘᒡᓗ ᒪᕐᕉᒃ ᑎᒍᓪᓗᒋᑦ ᕿᓚᖕᒧᑦ ᑕᑯᓴᕐᓗᓂ, ᒎᑎ ᖁᔭᒋᕚ, ᓂᐊᖂᔧᑦ ᐊᒡᒍᕐᐰᑦ ᐃᓕᓐᓂᐊᕐᑎᒥᓄᑦ ᑐᓂᓪᓗᒋᑦ, ᐃᓕᓐᓂᐊᑎᖏᓪᓗ ᐃᓄᖕᓄᑦ ᑐᓂᐅᖅᑬᕗᑦ. 20ᑕᒪᕐᒥᒃ ᓂᕆᕗᑦ ᓈᒻᒪᒃᓯᓪᓗᑎᒃ. ᑕᕝᕙ ᐃᓕᓐᓂᐊᕐᑎᑦ ᐃᕕᐅᔭᓂᒃ 12ᓂᒃ ᑎᒍᓯᕗᑦ, ᐊᒥᐊᒃᑯᓂᒃ ᐊᒡᒍᕐᓯᒪᔪᓂᒃ ᑖᒃᑯᐊ ᑕᑕᑕᐅᕗᑦ. 21ᐊᖑᑏᑦ ᓂᕆᓚᐅᕐᑐᑦ 5,000 ᖃᓂᒋᔭᖓᓃᑉᐳᑦ, ᐊᕐᓁᑦ ᓱᕈᓰᓪᓗ ᓈᓴᕐᑕᐅᖃᑕᐅᑎᓐᓇᒋᑦ.
ᔩᓱᓯᐅᑉ ᐱᓱᖕᓂᖓ ᐃᒪᐅᑉ ᖄᖓᒍᑦ
ᒫᑯᓯ 6:45-52; ᔪᐊᓇᓯ 6:15-21
22ᑕᕝᕙ ᔩᓱᓯᐅᑉ ᐃᓕᓐᓂᐊᕐᑎᓂ ᐅᒥᐊᒧᑦ ᐃᑭᖁᓕᕐᐰᑦ ᑕᓯᐅᑉ ᐊᑭᐊᓄᑦ ᐃᑳᖁᓪᓗᒋᑦ ᓯᕗᓂᕐᒥᓂ, ᓇᖕᒥᓂᕐᓕ ᔩᓱᓯ ᐃᓄᖕᓂᒃ ᐊᐅᓪᓚᕐᑎᑦᓯᕗᖅ 23ᐃᓄᐃᑦ ᐊᐅᓪᓚᕐᑎᑦᑕᕇᕋᒥᒋᑦ, ᖃᖅᑲᒧᑦ ᒪᔪᕋᕐᐳᖅ ᐃᓄᑑᓗᓂ ᑐᒃᓯᐊᕈᒪᓪᓗᓂ. ᐅᓐᓄᒃᑎᓪᓗᒍ ᑕᕝᕙᓃᑉᐳᖅ ᐃᓄᑑᓪᓗᓂ; 24ᐅᒥᐊᓪᓕ ᓄᓇᒥᑦ ᐅᖓᓯᒃᑐᒦᓕᕐᐳᑦ ᑕᓯᕐᒥ, ᐅᒥᐊᖓᑦ ᐴᑲᕐᑕᒻᒪᕆᓕᕐᐳᖅ ᐃᖏᐅᓕᖕᓄᑦ; ᐊᓄᕆᒧᑦ ᐊᒡᒍᕋᕋᒥᒃ. 25ᐅᓪᓛᒃᑯᑦ ᓯᕿᕐᖑᔭᖅ 3ᓗ 6ᓯᐅᓪᓗ ᐊᑯᓐᓂᖓᓃᑎᓪᓗᒍ, ᔩᓱᓯᐅᑉ ᐅᐸᓕᕐᐰᑦ, ᐃᒪᐅᑉ ᖄᖓᒍᑦ ᐱᓱᒃᓗᓂ. 26ᐃᓕᓐᓂᐊᕐᑎᑦ ᑕᑯᒐᒥᒃ ᐃᒪᐅᑉ ᖄᖓᒍᑦ ᐱᓱᒃᑐᒥᒃ ᑲᑉᐱᐊᓱᒻᒪᕆᓕᕐᐳᑦ, ᐅᖃᕐᓗᑎᒡᓗ, “ᑑᕐᖔᓗᖑᓇ!” ᓂᐱᑐᐃᓐᓇᕐᒥᒃ ᐃᓚᖏᑦ ᓂᓪᓕᕐᐳᑦ ᑲᑉᐱᐊᓱᒧᑦ.
27ᑕᕝᕔᓐᓇᕐᓕ ᔩᓱᓯᐅᑉ ᐅᖃᕐᕕᒋᕔᑦ, ᐅᖃᕐᓗᓂ, “ᖁᐊᕐᓵᖓᓇᓯ! ᐅᕙᖓᐅᕗᖓ. ᑲᑉᐱᐊᓱᒐᓯ!”
28ᐲᑦᑐᕉᓯ ᓂᓪᓕᕐᐳᖅ ᐅᖃᕐᓗᓂ, “ᐊᑕᓃᖅ, ᐃᕕᓪᓚᕆᐅᒍᕕᑦ, ᐃᒪᐅᑉ ᖄᖓᒍᑦ ᐃᓕᖕᓄᑦ ᕾᖁᓚᐅᓐᖓ.”
29ᔩᓱᓯᐅᑉ ᑭᐅᕚ, “ᕾᓕᕆᑦ!” ᑕᕝᕙ ᐲᑦᑐᕉᓯ ᐅᒥᐊᒥᑦ ᓂᐅᓪᓗᓂ, ᐃᒪᐅᑉ ᖄᖓᒍᑦ ᐱᓱᓕᕐᐳᖅ ᔩᓱᓯᒧᑦ. 30ᐃᒃᐱᒋᐅᒻᒥᓕᕋᒥᐅᑉ ᐊᓄᕆᐅᑉ ᓴᓐᖏᓂᖓ, ᑲᑉᐱᐊᓱᓕᕐᐳᖅ, ᑭᕕᓯᓪᓗᓂᓗ ᐃᒫᓄᑦ ᓂᓪᓕᕐᓗᓂ, “ᐊᑕᓃᖅ! ᐱᐅᓕᓐᖓ.”
31ᑕᕝᕔᓐᓇᖅ ᔩᓱᓯᐅᑉ ᐃᓴᒃᓗᒍ ᑎᒍᕚ ᐅᖃᐅᑎᓪᓗᒍ, “ᐅᒃᐱᕐᓂᑭᓗᐊᕋᕕᑦ! ᓱᖕᒫᑦ ᖁᓚᓕᕐᐲ?”
32ᑕᒪᕐᒥᒃ ᐅᒥᐊᒧᑦ ᐃᑭᖕᒪᑎᒃ, ᐊᓄᕆ ᐃᑯᓪᓚᕐᐳᖅ. 33ᐃᓕᓐᓂᐊᕐᑎᖏᑦ ᐅᒥᐊᒦᑦᑐᑦ ᓵᖓᓄᑦ ᐹᒻᒪᒃᑎᕐᐳᑦ, ᐅᖃᕐᓗᑎᒃ, “ᓱᓕᓪᓚᕆᒃᑐᒥᒃ ᒎᑎᐅᑉ ᐃᕐᓂᕆᕚᑎᑦ.”
ᔩᓱᓯᐅᑉ ᖃᓂᒪᔪᓂᒃ ᐋᖅᑭᒃᓯᓂᖓ ᒋᓂᓴᕇᑎᒥ
ᒫᑯᓯ 6:53-56
34ᑕᓯᕐᒥᒃ ᐃᑳᕋᒥᒃ, ᓄᓈᕐᐳᑦ ᒋᓂᓴᕆᑎᒥᒃ ᐊᑎᓕᖕᒧᑦ, 35ᐃᓄᐃᑦ ᐃᓕᑕᕐᓯᒐᒥᒃ ᔩᓱᓯᒥᒃ, ᑕᕝᕙᓂ ᖃᓂᒋᔭᖓᓃᑦᑐᑦ ᑕᒪᕐᒥᒃ ᐅᖃᐅᑦᔭᐅᕗᑦ ᖃᓂᒪᔪᓪᓗ ᑕᒪᕐᒥᒃ ᔩᓱᓯᒧᐊᕈᑎᕔᑦ. 36ᐃᓄᐃᑦ ᐃᓚᖏᑦ ᕿᓄᕗᑦ ᔩᓱᓯᐅᑉ ᐊᓐᓄᕌᖏᑕ ᓯᓈᒍᑐᐃᓐᓇᕐᖑᓐᓃᑦ ᖃᓂᒪᔪᑦ ᐊᒃᑐᕐᓯᔪᓐᓇᖁᓪᓗᒋᑦ; ᔩᓱᓯᐅᑉ ᐊᓐᓄᕌᖏᑕ ᓯᓈᓂᒃ ᐊᒃᑐᕐᓯᔪᓕᒫᑦ ᐋᖅᑭᒃᑕᐅᕗᑦ.
Одоогоор Сонгогдсон:
ᒫᑎᐅᓯᐅᑉ ᐊᒡᓚᖏᑦ 14: EAIB
Тодруулга
Хуваалцах
Харьцуулах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
Eastern Arctic Inuktitut Bible © Canadian Bible Society, 2012, 2021-2023.