ᒫᑎᐅᓯᐅᑉ ᐊᒡᓚᖏᑦ 15
15
ᓯᕗᓕᕕᓂᖏᑕ ᐊᔪᕆᕐᑐᐃᑦᔪᑎᕕᓂᖏᑦ
ᒫᑯᓯ 7:1-13
1ᑕᕝᕙ ᐹᕆᓯᑦ ᐃᓚᖏᑦ, ᐱᖁᔭᓂᒡᓗ ᐃᓕᓮᔩᑦ ᔨᕉᓴᓕᒻᒥᓐᖔᕐᓗᑎᒃ ᔩᓱᓯᒧᐊᕐᐳᑦ ᐅᖃᕐᓗᑎᒃ, 2“ᓱᖕᒪᓂᒃᑯᐊ ᐃᓕᓐᓂᐊᕐᑎᑎᑦ ᓯᕗᓕᑦᑕ ᐊᔪᕆᕐᑑᑎᖏᓐᓂᒃ ᓈᓚᓐᖏᓛᑦ? ᐊᒡᒐᖕᒥᖕᓂᒃ ᐅᐊᓴᖃᑦᑕᖏᒻᒪᑕ ᓂᕆᓂᐊᓕᕌᖓᒥᒃ!”
3ᔩᓱᓯᐅᑉ ᑭᐅᕔᑦ, “ᓱᖕᒪᑦ ᒎᑎᐅᑉ ᐱᖁᔭᖏᓐᓂᒃ ᓇᓛᓐᖏᓚᓯ ᓯᕗᓕᑦᓯ ᐊᔪᕆᕐᑑᑎᖏᓐᓂᒃ ᒪᓕᖔᕐᓗᓯ? 4#ᒨᓯᓯ ᐂᑉᐸᖏᑦ 20:12; ᒨᓯᓯ ᑕᓪᓕᒪᖏᑦ 5:16; ᒨᓯᓯ ᐂᑉᐸᖏᑦ 21:17; ᒨᓯᓯ ᐱᖓᔪᖏᑦ 20:9.ᒎᑎ ᐱᖁᔨᓚᐅᕐᒪᑦ, ‘ᐊᑖᑕᖕᓂᒃ ᐊᓈᓇᖕᓂᒡᓗ ᐃᒃᐱᒍᓱᑦᓯᐊᕆᑦ,’ ᐊᒻᒪᓗ ‘ᓇᓪᓕᐊᑦ ᐊᑖᑕᒥᓂᒃ ᐊᓈᓇᒥᓂᒡᓗ ᐅᖃᕐᓂᕐᓘᑎᓕᒃ ᑖᓐᓇ ᑐᖁᑕᐅᔪᒃᓴᐅᕗᖅ.’ 5ᐊᔪᕆᕐᑐᐃᕙᒃᐳᓯᓕ ᕿᑐᕐᖓᕆᔭᐅᔪᖅ ᐊᑖᑕᒥᓄᑦ ᐊᓈᓇᒥᓄᑦᓗ ᐃᑲᔪᑎᒃᓴᒥᓂᒃ ᐱᓯᒪᔪᖅ. ᐅᖃᕈᑦᓯ, ᑖᓐᓇ ᒎᑎᒧᑦ ᐱᒋᔭᐅᔪᖅ, 6ᑕᕝᕙ ᐊᑖᑕᒥᓂᒃ ᐊᓈᓇᒥᓂᒡᓗ ᐅᐱᒍᓱᖏᒃᑲᓗᐊᕐᐸᑦ ᖃᓄᐃᒋᕙᓐᖏᑕᓯ. ᑍᒤᓕᐅᕐᑎᓪᓗᓯ ᒎᑎᐅᑉ ᒪᓕᒃᑕᐅᖁᔭᖓᓂᒃ ᒪᓕᓐᖏᓚᓯ. ᒪᓕᖔᕈᒪᓪᓗᓯ ᓇᖕᒥᓂᖅ ᐊᔪᕆᕐᑐᑎᒋᕙᒃᑕᑦᓯᓐᓂᒃ. 7ᑕᑯᕐᒨᕐᑐᓯ! ᐂᓮᐊᓯ ᓱᓕᑦᓯᐊᕐᓗᓂ ᐅᖃᓚᐅᕐᐳᖅ ᐃᓕᑦᓯ ᐱᑦᔪᑎᒋᓪᓗᓯ! ᐅᖃᕐᓗᓂ:
8 #
ᐂᓮᐊᓯ 29:13. ‘ᐅᑯᐊ ᐃᓄᐃᑦ ᐅᖃᐅᓯᕐᒥᒍᑦ ᐃᓱᒪᒋᑦᓯᐊᕐᐹᖓ,
ᐆᒻᒪᑎᖏᑕᓕ ᐅᖓᓯᒋᕚᖓ.
9ᓱᓕᓇᑎᒃ ᑐᒃᓯᐊᕐᕕᒋᕚᖓ,
ᐊᔪᕆᕐᑐᐃᑦᔪᑎᖃᕋᒥᒃ ᐃᓄᐃᑦ ᐊᖅᑭᒃᑕᕕᓂᖏᓐᓂᒃ ᐅᒃᐱᕐᓂᕐᒧᑦ ᑐᓐᖓᕕᐅᓂᕋᕐᑕᒥᖕᓂᒃ.
ᒎᑎᐅᑉ ᐱᖁᔭᖏᑎᑐᑦ ᐱᓂᐊᕈᑕᐅᑎᓪᓗᒋᑦ!’”
ᒪᑯᐊ ᑕᒪᑦᔭ ᐃᓄᖕᒥᒃ ᓴᓗᒪᔪᓐᓃᕐᑎᑦᓯᔪᑦ
ᒫᑯᓯ 7:14-23
10ᑕᕝᕙ ᔩᓱᓯᐅᑉ ᐃᓄᒐᓴᒡᔪᐊᑦ ᐃᒻᒥᓄᑦ ᕾᖁᕔᑦ, ᐅᖃᐅᑎᓪᓗᒋᑦ, “ᓈᓚᑦᓯᐊᕆᑦᓯ ᑐᑭᓯᓗᓯ! 11ᐃᓅᑉ ᖃᓂᖓᒍᑦ ᐃᑎᕐᑐᑦ ᐃᓄᖕᒥᒃ ᓇᕐᕈᓇᕐᑎᑦᓯᓐᖏᓚᑦ; ᐃᓄᖕᒥᓪᓕ ᐊᓂᔪᑦ ᐅᖃᐅᓰᑦ ᑖᒃᑯᐊ ᐃᓄᖕᒥᒃ ᓇᕐᕈᓇᕐᑎᑦᓯᕗᑦ.”
12ᑕᕝᕙ ᐃᓕᓐᓂᐊᕐᑎᖏᑕ ᐅᐸᒃᓗᒍ ᐅᖃᐅᑎᕚᑦ, “ᖃᐅᔨᒪᕖᑦ ᐹᕆᓯᑦ ᐅᖃᐅᓯᕆᔭᕐᓄᑦ ᐃᓗᐊᕈᓐᓃᕐᑎᑕᐅᖕᒪᑕ?”
13ᔩᓱᓯᐅᑉ ᑭᐅᕔᑦ, “ᐱᕈᕐᑐᑦ ᐊᑖᑕᒪ ᕿᓚᖕᒦᑦᑑᑉ ᑲᓐᖓᕐᓲᑎᒋᓚᐅᓐᖏᑕᖏᑦ ᐊᒫᖏᑎᒍᑦ ᓄᓱᒃᑕᐅᔪᒫᕐᐳᑦ, 14#ᓘᑲᓯ 6:39.ᐃᓕᑦᓯ ᐃᓱᒫᓗᑎᒋᔭᕆᐊᖃᓐᖏᑕᓯ! ᑕᓯᐅᕐᑎᐅᖕᒪᑕ ᑕᐅᑐᖏᑑᓪᓗᑎᒃ, ᑕᐅᑐᓐᖏᑑᖃᑎᒥᖕᓂᒃ ᑕᓯᐅᕐᓯᓇᓱᐊᕐᑐᑦ ᑕᐅᑐᖏᑦᑐᐃᓐᓇᐅᒍᑎᒃᓗ ᐃᑎᕐᓴᒧᑦ ᑲᑕᒃᑲᔭᕐᐳᑦ.”
15ᐲᑦᑐᕉᓯ ᐅᖃᓕᕐᐳᖅ, “ᐊᑦᔨᐅᔪᑦ ᐅᖃᐅᓯᕆᔭᑎᑦ ᓇᓗᓁᓚᐅᒃᑭᑦ ᐅᕙᑦᑎᓐᓄᑦ.”
16ᑕᕝᕙ ᔩᓱᓯᐅᑉ ᐅᖃᐅᑎᕔᑦ, “ᓱᓕ ᖃᐅᔨᒪᓂᕐᓴᐅᓐᖏᓚᓯ ᐊᓯᑦᓯᓐᓃᑦ? 17ᑐᑭᓯᓐᖏᓚᓰ ᓱᓇᑐᐃᓐᓇᖅ ᐃᓄᖕᒧᑦ ᖃᓂᖓᒍᑦ ᐃᑎᕐᑐᖅ, ᐊᕿᐊᕈᖓᓄᐊᕐᒪᑦ, ᑭᖑᓂᖓᒍᓪᓗ ᑎᒥᖓᓂᑦ ᐊᓂᒋᓪᓗᓂ. 18#ᒫᑎᐅᓯ 12:34.ᐃᓅᓪᓕ ᖃᓂᖓᓂᑦ ᐊᓂᔪᑦ ᐃᓅᑉ ᐆᒻᒪᑎᖓᓂᓐᖔᕐᐳᑦ, ᑕᒪᒃᑯᐊ ᑕᕝᕙ ᐃᓄᖕᒥᒃ ᓇᕐᕈᓇᕐᑎᑦᓯᔪᑦ. 19ᐃᓅᑉ ᐆᒻᒪᑎᖓᓂᑦ ᐃᓱᒤᑦ ᐱᐅᖏᑦᑐᑦ ᓴᖅᑭᑉᐳᑦ, ᐱᔮᕆᓗᓂ ᑐᖁᑦᓯᓂᖅ, ᓄᓕᐊᕇᖕᓂᕐᒥᒃ ᐊᓯᓐᓂᐊᕐᓂᖅ, ᑲᑎᑎᑕᐅᓯᒪᖃᑎᒋᓐᖏᑕᒥᒃ ᐃᓐᓇᖓᖃᑎᖃᕐᓂᖅ; ᑎᒡᓕᖕᓂᖅ, ᐃᓅᖃᑎᒥᒃ ᓴᒡᓗᑎᖃᕐᓂᖅ, ᐅᖃᐅᑎᖃᕐᓗᖕᓂᖅ. 20ᑕᒪᒃᑯᐊ ᑕᒪᑦᔭ ᐃᓄᖕᒥᒃ ᓇᕐᕈᓇᕐᑎᑦᓯᕗᑦ; ᓂᕆᓗᓂᓕ ᐊᒡᒊᑦ ᐅᐊᓴᕐᓯᒪᖏᒃᑲᓗᐊᕐᑎᓪᓗᒋᑦ ᐃᓄᖕᒥᒃ ᓇᕐᕈᓇᕐᑎᑦᓯᓐᖏᓚᑦ.”
ᐊᕐᓇᐅᑉ ᐅᒃᐱᕐᓂᖓ
ᒫᑯᓯ 7:24-30
21ᔩᓱᓯ ᑕᕝᕙᓐᖓᑦ ᐊᐅᓪᓚᕋᒥ ᓄᓇᓖᑦ ᑍᕆᐅᑉ ᓮᑐᓂᐅᓪᓗ ᖃᓂᒋᔮᓄᐊᕐᐳᖅ. 22ᑕᑯᒋᑦ, ᐊᕐᓇᖅ ᑬᓇᓂᒥᐅᖅ ᑕᒫᓂ ᖃᓂᒋᔮᓂ ᓄᓇᖃᕐᑐᖅ ᔩᓱᓯᒧᐊᕐᐳᖅ ᓂᐱᖅᑯᕐᑐᓪᓗᓂ ᐅᖃᕐᐳᖅ, “ᐊᑕᓃᖅ, ᑍᕕᑎᐅᑉ ᐃᕐᓂᖓ ᓂᑲᒋᓐᖓ; ᐸᓂᒐ ᐊᓂᕐᓂᕐᓗᖕᒧᑦ ᐃᑎᕐᑕᐅᓯᒪᖕᒪᑦ ᐊᒃᓱᕈᕐᑎᑕᐅᓪᓗᓂᓗ.”
23ᔩᓱᓯ ᐊᕐᓇᒧᑦ ᑭᐅᓐᖏᓚᕐᓘᓐᓃᑦ. ᑕᕝᕙ ᐃᓕᓐᓂᐊᕐᑎᖏᑕ ᔩᓱᓯ ᐅᐸᒃᓗᒍ ᕿᓄᕕᒋᕚᑦ, ᐅᖃᕐᓗᑎᒃ, “ᐅᓇ ᐊᕐᓇᖅ ᐊᐅᓪᓚᕐᑎᓚᐅᕈᒃ, ᐅᕙᑦᑎᓐᓂᒃ ᒪᓕᑲᑕᒡᓗᓂ ᓂᐱᓕᐊᓗᑐᐃᓐᓇᐅᖕᒪᑦ!”
24ᑕᕝᕙ ᑭᐅᕚ, “ᑎᓕᔭᐅᓯᒪᑐᐃᓐᓇᕐᐳᖓ ᓰᐱᓄᑦ ᐊᓯᐅᓯᒪᔪᓄᑦ ᐃᓴᕆᐊᓕᒥᐅᓄᑦ.”
25ᐊᕐᓇᖅ ᔩᓱᓯᐅᑉ ᐃᑎᒐᖏᓐᓄᑦ ᓰᖅᑯᕐᓗᓂ, ᐅᖃᕐᐳᖅ, “ᐊᑕᓃᖅ ᐃᑲᔪᓚᐅᓐᖓ!”
26ᔩᓱᓯᐅᑉ ᑭᐅᕚ, “ᓈᒻᒪᖏᒻᒪᑦ ᕿᑐᕐᒐᕆᔭᐅᔪᑦ ᓂᕆᓂᐊᕐᑕᖏᓐᓂᑦ ᑎᒍᓯᓗᓂ ᕿᒻᒥᓄᓪᓗ ᐃᒋᓪᓗᒋᑦ.”
27ᐊᕐᓇᐅᑉ ᑭᐅᕚ, “ᓱᓕᕗᑎᑦ ᐊᑕᓃᖅ, ᕿᒻᒦᓪᓕ ᓂᕆᖃᑦᑕᕐᐳᑦ ᓂᕆᓂᕐᓗᑯᓂᑦ ᐊᖓᔪᖅᑳᖏᑕ ᓵᖓᓂᑦ ᑲᑕᒐᕐᑕᐅᓂᑯᓂᒃ.”
28ᑕᕝᕙ ᔩᓱᓯᐅᑉ ᑭᐅᕚ, “ᐊᕐᓈᖅ ᐅᒃᐱᕐᓃᑦ ᐊᖏᔫᕗᖅ! ᐱᔪᒪᔭᕐᓂᒃ ᑐᓂᓯᕕᐅᓂᐊᓕᕐᐳᑎᑦ.” ᑕᕝᕔᓐᓇᖅ ᐊᕐᓇᐅᑉ ᐸᓂᖓ ᐋᖅᑭᒃᐳᖅ.
ᔩᓱᓯᐅᑉ ᐋᖅᑭᒃᓯᓂᖓ ᐃᓄᖕᓂᒃ ᐊᒥᓱᓂᒃ
29ᔩᓱᓯ ᑕᕝᕙᓐᖓᑦ ᐊᐅᓪᓚᕋᒥ ᒐᓕᓕᐊᑉ ᑕᓯᖓᑕ ᓯᓈᒍᑦ ᐱᓱᓕᕐᐳᖅ. ᖃᖅᑲᒧᑦ ᒪᔪᕋᕐᓗᓂ, ᖄᖓᓄᐊᕋᒥ ᐃᖏᑉᐳᖅ. 30ᐃᓄᒐᓴᒡᔪᐊᓪᓗ ᐊᒥᓱᑦ ᔩᓱᓯᒧᐊᕐᐳᑦ, ᑐᓯᐊᑦᑐᓂᒃ ᐱᓱᒍᓐᓇᑦᓯᐊᖏᑦᑐᓂᒃ ᓇᒃᓴᕐᓗᑎᒃ, ᑕᐅᑐᖏᑦᑐᓂᒡᓗ, ᓇᐅᒃᑯᑐᐃᓐᓇᕐᓗ ᐃᑎᒐᖕᒥᒍᑦ ᐊᒡᒐᖕᒥᒍᓪᓗ ᐋᓐᓂᕐᓯᒪᔪᓂᒃ, ᐅᖃᕈᓐᓇᖏᑦᑐᓂᒡᓗ, ᐊᓯᖏᓐᓂᒡᓗ ᐃᓄᐃᑦ ᖃᓂᒻᒪᓯᓖᑦ ᐊᒥᓱᑦ ᔩᓱᓯᐅᑉ ᓵᖓᓄᐊᕈᑦᔭᐅᕗᑦ; ᔩᓱᓯᐅᑉ ᐋᖅᑭᒃᐰᑦ. 31ᐃᓄᐃᓪᓗ ᑲᒪᕗᑦ ᑕᑯᓕᕋᒥᒃ ᐅᖃᕈᓐᓇᖏᑦᑐᑦ ᐅᖃᓪᓚᓕᕐᒪᑕ, ᓇᐅᒃᑯᑐᐃᓐᓇᕐᓗ ᐃᓕᖅᑯᓯᕐᓗᒃᑐᑦ ᖃᓄᐃᖏᑦᓯᐊᓕᕐᒪᑕ, ᑐᓯᐊᑦᑐᑦ ᐱᓱᑦᓯᐊᓕᕐᒪᑕ, ᑕᐅᑐᖏᑦᑐᓪᓗ ᑕᐅᑐᓕᕐᒪᑕ; ᐃᓴᕆᐊᓕᒥᐅᑦ ᒎᑎᖓ ᓂᕐᑐᕐᐹᑦ.
ᔩᓱᓯᐅᑉ ᐃᓄᖕᓂᒃ 4,000ᓂᒃ ᓂᕆᑎᑦᓯᓂᖓ
ᒫᑯᓯ 8:1-10
32ᑕᕝᕙ ᔩᓱᓯᐅᑉ ᐃᓕᓐᓂᐊᕐᑎᓂ ᐃᒻᒥᓄᑦ ᕾᖁᓪᓗᒋᑦ ᐅᖃᐅᑎᕔᑦ, “ᐅᑯᐊ ᐃᓄᒐᓴᒡᔪᐊᑦ ᐃᓚᑦᓱᒋᕙᒃᑲ, ᐅᓪᓗᓂᒃ ᐱᖓᓱᓂᒃ ᐅᕙᓐᓃᒻᒪᑕ ᓂᕆᓚᐅᕋᑎᒃ; ᑳᒃᑎᓪᓗᒋᑦ ᐊᐅᓪᓚᕐᑎᑐᐃᓐᓇᕈᒪᓐᖏᓚᒃᑲ, ᐊᖏᕐᕋᕋᓱᐊᓕᕐᓗᑎᒃ ᐊᖅᑯᑎᒥᖕᓂ ᓄᑮᕈᑎᑐᐃᓐᓇᕆᐊᖃᕐᒪᑕ.”
33ᑕᕝᕙ ᐃᓕᓐᓂᐊᕐᑎᖏᑕ ᐅᖃᐅᑎᕚᑦ, “ᓇᑭᓪᓕ ᑖᒃᑯᓄᖓ ᓈᒻᒪᒃᑐᓂᒃ ᓂᕿᒃᓴᕐᑖᕐᓂᐊᕐᐱᑖ? ᑕᒫᓂ ᓱᓇᖃᔪᐃᑦᑐᒥ ᐃᓄᒐᓴᒡᔪᐊᑦ ᓂᕆᑎᑕᐅᖁᓪᓗᒋᑦ?”
34ᔩᓱᓯᐅᑉ ᐅᖃᐅᑎᕔᑦ, “ᖃᑦᓯᓂᒃ ᓂᐊᖂᔭᖃᕐᐱᓰ?” ᑖᒃᑯᐊ ᐅᖃᕐᐳᑦ, “7ᓂᒃ ᓂᐊᖂᔭᖃᕐᐳᒍᑦ, ᐃᖃᓗᑯᓗᖕᓂᒡᓗ ᒥᑭᔪᓂᒃ ᐅᓄᖏᑦᑐᓂᒃ.”
35ᑕᕝᕙ ᔩᓱᓯᐅᑉ ᐃᓄᒐᓴᒡᔪᐊᑦ ᓄᓇᒧᑦ ᐃᒃᓯᕙᖁᕔᑦ. 36ᓂᐊᑰᔧᑦ 7 ᐃᖃᓗᐃᓪᓗ ᑎᒍᕔᑦ, ᖁᔭᓕᖅᑳᕐᓗᓂᓗ ᐊᒡᒍᕐᐰᑦ ᐃᓕᓐᓂᐊᕐᑎᒥᓄᑦ ᑐᓂᓪᓗᒋᑦ, ᐃᓕᓐᓂᐊᕐᑎᖏᑕᓗ ᑐᓂᐅᖃᐅᑎᒋᕔᑦ ᐃᓄᒐᓴᖕᓄᑦ. 37ᑕᒪᕐᒥᒃ ᓂᕆᕗᑦ ᓈᒻᒪᒃᓯᓪᓗᑎᒃ; ᑕᕝᕙ 7ᓂᒃ ᐃᕕᐅᔭᓂᒃ ᑎᒍᓯᓪᓗᑎᒃ ᐊᒥᐊᒃᑯᖏᓂᒃ ᐊᒡᒍᕐᓯᒪᔪᓂᒃ ᑖᒃᑯᐊᓗ ᑕᑕᑉᐳᑦ. 38ᓂᕆᔪᑦ ᐊᖑᑍᓐᓁᑦ ᐅᓄᕐᓂᖃᕐᐳᑦ 4,000ᓂᒃ, ᐊᕐᓁᑦ ᓱᕈᓰᓪᓗ ᓈᓴᖃᓯᐅᑎᓇᒋᑦ.
39ᔩᓱᓯᐅᑉ ᐃᓄᒐᓴᒡᔪᐊᑦ ᐊᐅᓪᓚᖁᓕᕐᐰᑦ, ᐅᒥᐊᒧᓪᓕ ᐃᑭᓪᓗᓂ ᓄᓇᒧᑦ ᒫᒐᑕᓂᒥᒃ ᐊᑎᓕᖕᒧᑦ ᐃᑳᓕᕐᐳᖅ.
Одоогоор Сонгогдсон:
ᒫᑎᐅᓯᐅᑉ ᐊᒡᓚᖏᑦ 15: EAIB
Тодруулга
Хуваалцах
Харьцуулах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
Eastern Arctic Inuktitut Bible © Canadian Bible Society, 2012, 2021-2023.