ᒫᑎᐅᓯᐅᑉ ᐊᒡᓚᖏᑦ 13
13
ᐊᑦᔨᐅᔪᖅ ᐱᕈᕐᑐᒃᓴᓂᒃ ᑲᓐᖓᕐᓱᐃᔨ
ᒫᑯᓯ 4:1-9; ᓘᑲᓯ 8:4-8
1ᐅᓪᓗᒥ ᑕᑉᕙᓂᑦᓮᓐᓇᖅ ᔩᓱᓯᐅᑉ ᐃᒡᓗ ᑖᓐᓇ ᕿᒪᒡᓗᒍ ᑕᓯᐅᑉ ᓯᓈᓄᐊᕐᐳᖅ. 2#ᓘᑲᓯ 5:1-3.ᐃᓄᒋᐊᒃᑐᕐᔪᐊᑦ ᑕᕝᕙᓂ ᑲᑎᒪᔪᑦ ᔩᓱᓯᐅᑉ ᐊᕙᑖᓂ, ᐅᓄᕐᑐᒻᒪᕆᐊᓘᓕᕐᒪᑕ ᐅᒥᐊᒧᐊᕐᐳᖅ, ᑕᕝᕙᓂᓗ ᐃᒃᓯᕚᕐᓗᓂ, ᐃᓄᒐᓴᒡᔪᐊᑦ ᑕᓯᐅᑉ ᓯᓈᓂ ᓇᖏᕐᑎᓪᓗᒋᑦ. 3ᐊᑦᔨᐅᔪᓂᒃ ᐊᑐᕐᓗᓂ ᐊᒥᓱᓂᒃ ᐅᖃᓪᓚᒡᕕᒋᕔᑦ, ᐃᒫᒃ ᐅᖃᕐᓗᓂ:
“ᑍᑦᓱᒪᓂ ᐊᖑᑎᑕᖃᓚᐅᕐᐳᖅ ᓂᐊᖂᔭᒃᓴᓂᒃ ᑲᓐᖓᓱᐃᔭᕐᑐᕐᑐᒥᒃ. 4ᐱᕈᕐᓰᕕᖕᒧᑦ ᑲᓐᖓᕐᓱᐃᓕᕐᐳᖅ ᐱᕈᕐᑐᒃᓴᓂᒃ, ᐃᓚᖏᑦ ᐊᖅᑯᓯᓂᕐᒧᑦ ᑲᑕᒃᐳᑦ, ᑎᖕᒥᐊᑦ ᑕᒪᐅᓐᖓᕋᒥᒃ ᑕᒪᒃᑯᐊ ᐳᑯᓕᕐᐰᑦ. 5ᐃᓚᖏᓪᓕ ᐃᑦᔪᑭᑦᑐᒧᑦ ᕾᕐᓱᒧᑦ ᑲᑕᒃᐳᑦ, ᑕᒪᓐᓇ ᐃᑦᔪᑭᑦᑑᖕᒪᑦ; ᐱᕈᕐᑐᒃᓮᑦ ᑕᕝᕔᓐᓇ ᐱᕈᑲᐅᑎᒋᕗᑦ, ᑕᒪᑐᒪ ᐃᑦᔫᑉ ᓵᑦᑑᓂᖓᓄᑦ. 6ᓯᕿᓂᖅ ᓄᐃᖕᒪᑦ, ᐱᕈᓕᕐᑑᒐᓗᐊᑦ ᐆᑕᐅᕗᑦ; ᐊᒫᖃᖏᓐᓇᒥᒃ ᐊᑯᓂᐅᖏᑦᑐᖅ ᐸᓂᕐᐳᑦ. 7ᐃᓚᖏᓪᓕ ᐱᕈᕐᑐᒃᓮᑦ ᑲᑕᒃᐳᑦ ᐅᕐᐱᖕᓄᑦ ᑲᑭᓪᓚᐅᑎᓕᖕᓄᑦ, ᑖᒃᑯᐊ ᐱᕈᕋᒥᒃ, ᐃᐱᑎᑕᐅᕗᑦ ᐅᕐᐱᖕᓄᑦ ᑲᑭᓪᓚᐅᑎᓕᖕᓄᑦ. 8ᐃᓚᖏᓪᓕ ᐱᕈᕐᑐᒃᓮᑦ ᑲᑕᒃᐳᑦ ᓄᓇᒧᑦ ᐃᑦᔪᑦᓯᐊᕆᒃᑐᒧᑦ, ᐱᕈᕐᑐᐃᑦ ᐱᕈᕋᒥᒃ ᓂᐊᖂᔭᒃᓴᖃᓕᕐᐳᑦ: ᐃᓚᖏᑦ 100ᓂᒃ, ᐃᓚᖏᑦ 60ᓂᒃ, ᐃᓚᖏᓪᓗ 30ᓂᒃ.”
9ᔩᓱᓯᓗ ᐅᖃᕐᐳᖅ, “ᑐᓵᔪᓂᒃ ᓯᐅᑎᓖᑦ, ᑐᓴᕐᓕᑦ!”
ᐊᑦᔨᐅᔫᑉ ᑖᑦᓱᒪ ᐅᖃᐅᓯᕆᔭᐅᑦᔪᑎᒋᔭᖓ
ᒫᑯᓯ 4:10-12; ᓘᑲᓯ 8:9-10
10ᑕᕝᕙ ᐃᓕᓐᓂᐊᕐᑏᑦ ᔩᓱᓯᒧᐊᕐᓗᑎᒃ ᐊᐱᕆᕚᑦ, “ᓱᖕᒪᑦ ᐊᑦᔨᐅᔪᑎᒍᑦ ᐃᓄᐃᑦ ᐊᔪᕆᕐᑐᕐᐱᒋᑦ?”
11ᔩᓱᓯᐅᑉ ᑭᐅᕔᑦ, “ᒎᑎᐅᑉ ᐊᑕᓂᐅᕕᖓᑕ ᓇᓗᓇᕐᓂᖓᓂᒃ ᖃᐅᔨᑎᑕᐅᕗᓯ, ᑖᒃᑯᐊᓕ ᖃᐅᔨᑎᑕᐅᓐᖏᓚᑦ. 12#ᒫᑎᐅᓯ 25:29; ᒫᑯᓯ 4:25; ᓘᑲᓯ 8:18; 19:26.ᐱᖃᕐᑐᖅ ᑐᓂᓯᕕᐅᒃᑲᓐᓂᕋᔭᕐᐳᖅ ᐱᖃᓗᐊᒃᑲᓐᓂᖁᓪᓗᒍ, ᐱᖃᖏᑦᑐᕐᓕ ᐊᕐᓵᕐᑕᐅᒐᔭᕐᐳᖅ ᒥᑭᔪᒥᒡᓘᓐᓃᑦ ᐱᖃᕋᓗᐊᕐᐸᑦ. 13ᑖᒃᑯᓄᖓ ᐊᑦᔨᐅᔪᓂᒃ ᐅᖃᐅᓯᖃᖃᑦᑕᕐᐳᖓ ᐃᒤᓐᓂᖓᓄᑦ, ᑕᑯᓐᓇᕋᓗᐊᕐᓗᑎᒃ ᑕᑯᔪᓐᓇᖏᒻᒪᑕ, ᑐᓵᒐᓗᐊᕐᓗᑎᒃ ᑐᓴᕈᓐᓇᓐᖏᓚᑦ, ᑐᑭᓯᔪᓐᓇᕋᑎᒡᓗ. 14#ᐂᓮᐊᓯ 6:9,10.ᐂᓮᐊᓯᐅᑉ ᐅᖃᐅᓯᕆᓚᐅᕐᑕᖏᑦ ᓇᓚᐅᑦᓯᕗᑦ ᐃᒤᓕᔪᑦ:
‘ᑐᓵᑦᓯᐊᕐᓂᐊᕐᐳᓯ ᑐᑭᓯᓂᐊᓐᖏᓚᓯᓕ;
ᑕᑯᑦᓯᐊᕐᓂᐊᕐᐳᓯ, ᓱᖅᑯᐃᕐᓯᓂᐊᓐᖏᓚᓯᓗ.
15ᐃᓱᒪᖏᑦ ᑭᒡᓕᖃᑦᓯᐊᕐᑎᑦᓯᔪᓐᓃᕐᒪᑕ,
ᓯᐅᑎᖏᓪᓗ ᑐᓵᑦᓯᐊᕈᓐᓃᕐᓗᑎᒃ.
ᓯᑯᓐᖏᖓᓪᓗᑎᒡᓗ, ᓯᑯᓐᖏᖏᒃᑯᑎᒃ ᑕᑯᑐᐃᓐᓇᕆᐊᖃᕋᒥᒃ,
ᓯᐅᑎᒥᖕᓄᓪᓗ ᑐᓵᑐᐃᓐᓇᕆᐊᖃᕋᒥᒃ,
ᐆᒻᒪᑎᒥᒍᓪᓗ ᑐᑭᓯᑐᐃᓐᓇᕆᐊᖃᕋᒥᒃ,
ᐅᕙᓐᓄᓪᓗ ᓵᒋᐊᑐᐃᓐᓇᕆᐊᖃᕋᒥᒃ ᐅᕙᖓᓗ ᐋᖅᑭᒃᑲᔭᕐᐸᒃᑲ.’
16 #
ᓘᑲᓯ 10:23,24. “ᐃᓕᑦᓯᓕ, ᖁᕕᐊᓱᒃᑐᒃᓴᐅᕗᓯ! ᐃᔨᓯ ᑕᑯᓐᓇᕐᒪᑕ, ᓯᐅᑎᓯᓗ ᑐᓵᓪᓗᑎᒃ. 17ᓱᓕᔪᒥᒃ ᐅᖃᐅᑎᕙᑦᓯ, ᓇᓚᐅᑦᑍᔪᑦ ᐊᒥᓱᑦ, ᒎᑎᐅᓪᓗ ᐃᓄᖁᑎᖏᑦ ᐊᒥᓱᑦ, ᑕᑯᔪᒪᓚᐅᕐᐳᑦ ᑕᑯᔭᑦᓯᓐᓂᒃ, ᑕᑯᓚᐅᓐᖏᓚᓪᓗ, ᑐᓴᕈᒪᒻᒪᕆᓚᐅᕐᐳᑦ ᑐᓵᔭᑦᓯᓐᓂᒃ, ᑐᓴᓚᐅᕋᑎᒡᓗ.”
ᔩᓱᓯᐅᑉ ᓇᓗᓁᕐᓯᓂᖓ ᑲᓐᖓᕐᓱᐃᔫᑉ ᐊᑦᔨᐅᔫᓂᖓᓂᒃ
ᒫᑯᓯ 4:13-20; ᓘᑲᓯ 8:11-15
18“ᓈᓚᓚᐅᕆᑦᓯ, ᑲᓐᖓᕐᓱᐃᔫᑉ ᐊᑦᔨᐅᑎᑕᐅᓂᖓᑕ ᑐᑭᖓᓂᒃ. 19ᑖᒃᑯᐊ ᐅᖃᐅᓯᕐᓂᒃ ᑐᓴᕐᑐᑦ ᒎᑎᐅᑉ ᐊᑕᓂᐅᕕᖓᓂᒃ ᑐᑭᓯᓇᑎᒡᓗ, ᐊᑦᔨᖃᕐᐳᑦ ᐱᕈᕐᑐᒃᓴᓂᒃ ᑍᒃᑯᓄᖓ ᐊᖅᑯᓯᓂᕐᒧᑦ ᑲᑕᒃᑐᓂᒃ, ᐱᐅᖏᑦᑐᖅ ᑎᑭᓐᓇᒥ ᐲᔧᕗᖅ ᑲᓐᖓᕐᓲᑎᒋᔭᐅᔪᓂᒃ ᑖᒃᑯᓄᖓ. 20ᐱᕈᕐᑐᒃᓮᑦ ᓄᓇᑭᑦᑐᒧᑦ ᕾᕐᑐᒧᑦ ᑲᑕᒃᑐᑦ ᐃᒤᑦᑐᒥᒃ ᑐᑭᖃᕐᐳᑦ, ᐅᖃᐅᓯᕐᓂᒃ ᑐᓴᕐᑐᓄᑦ ᖁᕕᐊᓱᓕᕐᓗᑎᒡᓗ ᑐᓴᕋᒥᒃ. 21ᑭᓯᐊᓂᓕ ᐃᑎᔪᒥᒃ ᑐᓐᖓᕕᒃᑖᕐᑎᑦᓯᖏᓐᓇᒥᒃ ᐊᑯᓂᐅᖏᑦᑐᖅ ᓄᖅᑲᕐᐳᑦ, ᖁᕕᐊᓇᖏᑦᑐᓄᑦ ᐅᕝᕙᓗ ᐊᑭᕋᕐᑐᕐᑕᐅᓂᕐᒧᑦ ᑎᑭᑕᐅᓕᕋᒥᒃ, ᑖᒃᑯᐊ ᐅᖃᐅᓰᑦ ᐱᓪᓗᒋᑦ, ᑕᕝᕔᓐᓇᖅ ᓴᐱᓕᑲᐅᑎᒋᕗᑦ. 22ᐱᕈᕐᑐᒃᓮᓪᓕ ᑲᑕᒃᑐᑦ ᐅᕐᐲᑦ ᑲᑭᓪᓚᐅᑎᓖᑦ ᐊᑯᕐᖓᓐᓄᑦ ᐃᒤᑦᑐᒥᒃ ᑐᑭᖃᕐᐳᑦ, ᐅᖃᐅᓯᕐᓂᒃ ᑐᓴᕐᑐᓄᑦ; ᑕᒪᑐᒪᓕ ᐃᓅᓯᐅᑉ ᐃᓱᒪᔮᕐᓇᕐᓂᖓᓄᑦ ᐊᔪᕐᓴᖏᑦᑑᔪᒪᓂᕐᒧᓪᓗ ᐅᖃᐅᓰᑦ ᐃᐱᑎᑕᐅᕗᑦ, ᐱᕈᕐᕕᐅᓇᑎᒡᓗ. 23ᐱᕈᕐᑐᒃᓮᓪᓕ ᓄᓇᒧᑦ ᐃᑦᔪᕆᒃᑐᒧᑦ ᑲᑕᒃᑐᑦ ᐃᒤᑦᑐᒥᒃ ᑐᑭᖃᕐᐳᑦ; ᐅᖃᐅᓯᕐᓂᒃ ᑐᓴᕐᑐᓄᑦ ᑐᑭᓯᓪᓗᑎᒡᓗ; ᐱᕈᕐᑎᑦᓯᓕᕐᑐᓄᑦ, ᐃᓚᖏᑦ 100ᓂᒃ, ᐃᓚᖏᓪᓕ 60ᓂᒃ, ᐃᓚᖏᓪᓗ 30ᓂᒃ.”
ᐱᕈᕐᓂᕐᓗᒃᑐᑦ ᐊᑦᔨᐅᑎᑕᐅᓂᖓᑦ
24ᔩᓱᓯᐅᓪᓗ ᐅᖃᐅᑎᒃᑲᓐᓂᕐᐰᑦ ᐊᑦᔨᐅᔪᒥᒃ ᐊᓯᐊᓂᒃ: “ᒎᑎᐅᑉ ᐊᑕᓂᐅᕕᖓ ᐃᒤᑦᑐᒥᒃ ᐊᑦᔨᖃᕐᐳᖅ; ᐊᖑᑦ ᑲᓐᖓᕐᓱᐃᕗᖅ ᑲᓐᖓᕐᓲᑎᒃᓴᓂᒃ ᐱᐅᔪᓂᒃ ᐱᕈᕐᓰᕕᖁᑎᒥᓄᑦ. 25ᐅᓐᓄᐊᒃᑯᓪᓕ ᓯᓂᓕᕐᒪᑕ, ᐊᑭᕋᖅ ᐱᕈᕐᓰᕕᖕᒧᐊᕐᐳᖅ ᑲᓐᖓᕐᓱᐃᓪᓗᓂᓗ ᐱᕈᕐᓂᕐᓗᒃᑐᒃᓴᓂᒃ ᓂᐊᖂᔭᒃᓮᑦ ᐊᑯᕐᖓᓐᓄᑦ, ᐊᐅᓪᓚᕐᓗᓂ. 26ᐱᕈᕐᑐᓪᓕ ᐱᕈᓕᕐᒪᑕ ᓄᕗᖏᑦ ᓂᐊᖂᔭᒃᓮᑦ ᐋᖅᑭᒃᐸᓪᓕᐊᓕᕐᒪᑕ, ᑕᕝᕙ ᐱᕈᕐᓂᕐᓗᒃᑐᑦ ᓴᖅᑭᒃᑭᕗᑦ. 27ᐱᕈᕐᓰᕕᖁᑎᓕᐅᑉ ᐱᔨᖏᑦ ᐊᖓᔪᖅᑳᒥᖕᓄᐊᕐᐳᑦ ᐅᖃᕐᓗᑎᒡᓗ, ‘ᐊᖓᔪᖅᑳᒃ, ᑲᓐᖓᕐᓲᑎᒃᓴᓂᒃ ᐱᐅᔪᓂᒃ ᑲᓐᖓᕐᓱᐃᓚᐅᕋᕕᑦ ᐱᕈᕐᓰᕕᖁᑎᖕᓄᑦ; ᒪᑯᐊᓖ? ᐱᕈᕐᓂᕐᓗᒃᑐᑦ ᓇᑭᑦ ᐱᔪᕕᓃ?’ 28ᑖᑦᓱᒪ ᑭᐅᕔᑦ, ‘ᐊᑭᕋᐅᑉ ᑕᒪᓐᓇ ᐱᓇᓱᐊᕐᑕᕕᓂᐊ,’ ᑖᒃᑯᐊ ᐊᐱᕆᕗᑦ, ‘ᐱᕈᕐᓂᕐᓗᒃᑐᓂᒃ ᐊᒧᓯᔭᕐᑐᖁᕕᑎᒎᑦ?’ 29ᑖᓐᓇ ᑭᐅᕗᖅ, ‘ᐋᒃᑲ, ᑕᒪᒃᑯᓂᖓ ᐱᕈᕐᓂᕐᓗᒃᑐᓂᒃ ᑲᑎᑦᓯᓕᕐᑎᓪᓗᓯ, ᓂᐊᖂᔭᒃᓮᑦ ᐃᓚᖏᑦ ᐊᒧᖃᓯᐅᑎᑐᐃᓐᓇᕆᐊᖃᕋᑦᓯᐅᒃ.’ 30ᑍᒤᒻᒪᑦ ᓂᐊᖂᔭᒃᓮᑦ, ᐱᕈᕐᓂᕐᓗᒃᑐᓪᓗ, ᐱᕈᖃᑎᒌᑐᐃᓐᓇᓚᐅᕐᓕᑦ ᑲᑎᕐᓱᐃᕕᒃᓴᖅ ᓇᓪᓕᐅᑎᓚᐅᖏᓐᓂᖓᓂ, ᑲᑎᕐᓱᐃᕕᒡᓕ ᓇᓪᓕᐅᑎᒃᐸᑦ ᓇᑲᑎᕆᔩᑦ ᐅᖃᐅᑎᔪᒫᕐᐸᒃᑲ: ᐱᕈᕐᓂᕐᓗᒃᑐᑦ ᓇᑲᑎᖅᑳᕐᓗᒋᑦ, ᕿᓚᒃᓱᕐᓯᒋᑦ ᑲᑎᓪᓗᒋᑦ ᐃᑯᐊᓪᓚᒐᒃᓴᐅᖁᓪᓗᒋᑦ, ᑭᖑᓂᖓᒍᓪᓕ ᓂᐊᖂᔭᒃᓮᑦ ᑲᑎᓯᒋᒃ ᑲᑎᕐᓯᕕᓐᓄᐊᕐᓗᒋᑦ!”
ᐊᑦᔨᐅᔪᖅ ᐱᕈᕐᓯᐊᒃᓴᖅ ᒥᑭᑦᑐᑯᓗᒃ
ᒫᑯᓯ 4:30-32; ᓘᑲᓯ 13:18-19
31ᔩᓱᓯᐅᑉ ᐅᖃᕐᕕᒋᒃᑲᓐᓂᕐᐰᑦ ᐊᑦᔨᐅᔪᒥᒃ ᐊᓯᐊᓂᒃ: ᐅᖃᕐᓗᓂ, “ᒎᑎᐅᑉ ᐊᑕᓂᐅᕕᖓ ᐱᕈᕐᓯᐊᒃᓴᑐᑦ ᒪᔅᑕᕐᑦᑐᑦ ᑍᒤᑉᐳᖅ ᐊᖑᑎᐅᑉ ᐱᕈᕐᓯᐊᒃᓴᖅ ᑎᒍᒐᒥᐅᒃ ᐱᕈᕐᓰᕕᖁᑎᒥᓄᑦ ᑲᓐᖓᕐᓲᑎᒋᕚ. 32ᑖᓐᓇ ᐱᕈᕐᓯᐊᒃᓴᓕᒫᓂᑦ ᒥᑭᓐᓂᕐᐸᐅᕗᖅ, ᐱᕈᕋᒥ ᐱᕈᕐᑐᓕᒫᓂᑦ ᐊᖏᓂᕐᐸᐅᓕᕐᐳᖅ ᓇᐹᕐᑑᓕᕐᓗᓂ, ᑕᕝᕙ ᑎᖕᒥᐊᑦ ᑕᕝᕙᓂ ᐅᓪᓗᓕᐅᓕᕐᐳᑦ ᓇᐹᕐᑑᑉ ᐊᕙᓚᖓᔪᖏᓐᓂ.”#13:32 ᐊᑭᕈᖏᓐᓂ
ᐳᕙᓪᓚᖅᑯᑎᐅᑉ ᐊᑦᔨᐅᑎᑕᐅᓂᖓ
ᓘᑲᓯ 13:20-21
33ᔩᓱᓯᐅᑉ ᓱᓕ ᐊᑦᔨᐅᔪᒥᒃ ᐊᓯᐊᓂᒃ ᐅᖃᐅᑎᒃᑲᓐᓂᕐᐰᑦ: “ᒎᑎᐅᑉ ᐊᑕᓂᐅᕕᖓ ᐃᒤᑦᑐᒥᒃ ᐊᑦᔨᖃᕐᐳᖅ, ᐊᕐᓇᖅ ᐳᕙᓪᓚᖅᑯᒻᒥᒃ ᑎᒍᓯᕗᖅ, ᓂᐊᖂᔭᒃᓴᓕᐊᒥᓄᑦ ᐊᖏᔪᒧᑦ ᐊᑯᑉᐹ,#13:33 ᐊᑯᑉᐹ ᐅᕝᕙᓗ ᐃᖑᑉᐹ ᐅᕝᕙᓗ ᐅᓗᕐᐹ ᐅᕝᕙᓗ ᐅᐊᕈᑦᓯᐅᑎᕚ ᑖᓐᓇᓕᒫᕐᓗ ᐳᕙᓪᓚᕐᑎᑉᐹ.”
ᔩᓱᓯᐅᑉ ᐊᑦᔨᐅᔪᓂᒃ ᐊᑐᕐᓂᖓ
ᒫᑯᓯ 4:33-34
34ᔩᓱᓯ ᐊᑦᔨᐅᔪᓂᒃ ᑭᓯᐊᓂ ᐅᖃᐅᓯᖃᕐᓗᓂ ᑕᒪᒃᑯᓂᖓ ᐅᖃᓪᓚᒃᐳᖅ ᐃᓄᒐᓴᒡᔪᐊᓄᑦ; ᐊᑦᔨᐅᔪᑦ ᐊᓯᖏᓐᓂᒃ ᐊᑐᕐᓗᓂ ᐊᔪᕆᕐᑐᐃᓐᖏᓚᖅ. 35#ᐃᓐᖏᕈᑦ 78:2.ᑕᕝᕙ ᓇᓚᐅᑦᑍᔫᑉ ᐅᖃᐅᓯᖏᑦ ᓇᓚᐅᑦᓯᓕᕐᐳᑦ ᐃᒤᓕᔪᑦ:
“ᐊᑦᔨᐅᔪᓂᒃ ᐊᑐᕐᓗᖓ ᐅᖃᕐᕕᒋᓂᐊᕐᐸᒃᑲ;
ᐅᖃᐅᑎᓂᐊᕐᐸᒃᑲ ᐃᔨᕐᓯᒪᓚᐅᕐᑐᓂᒃ ᓯᓚᕐᔪᐊᑉ ᐱᓐᖑᕐᑎᑕᐅᓂᖓᓂᑦ.”
ᔩᓱᓯᐅᑉ ᓇᓗᓁᕐᓯᓂᖓ ᐱᕈᕐᓂᕐᓗᒃᑑᑉ ᐊᑦᔨᐅᔪᕆᔭᐅᓂᖓᓂᒃ
36ᔩᓱᓯ ᐃᓄᒐᓴᒡᔪᐊᓂᑦ ᕿᒪᕉᑎᒐᒥ ᐃᒡᓗᒧᑦ ᐃᑎᕐᒪᑦ, ᐃᓕᓐᓂᐊᕐᑎᖏᑕ ᐅᐸᒃᐹᑦ ᐅᖃᕐᓗᑎᒃ, “ᐅᖃᐅᑎᓚᐅᕐᑎᒍᑦ ᐊᑦᔨᐅᔪᖅ ᐱᕈᕐᓂᕐᓗᒃᑐᖅ ᐱᕈᕐᓰᕕᖕᒦᑦᑐᖅ ᖃᓄᖅ ᑐᑭᖃᕐᒪᖔᑦ.”
37ᔩᓱᓯᐅᑉ ᑭᐅᕔᑦ, “ᐊᖑᑦ ᐱᕈᕐᑐᒃᓴᓂᒃ ᐱᐅᔪᓂᒃ ᑲᓐᖓᕐᓱᐃᔪᖅ, ᑖᓐᓇᐅᕗᖅ ᐃᓅᑉ ᐃᕐᓂᖓ; 38ᐱᕈᕐᓰᕕᒃ, ᑕᕝᕙ ᓯᓚᕐᔪᐊᖅ, ᐱᕈᕐᑐᒃᓮᑦ ᐱᐅᔪᑦ ᑕᕝᕙ ᐃᓄᐃᑦ ᐊᑕᓂᐅᕕᐅᑉ ᐱᖏᑦ; ᐱᕈᕐᓂᕐᓗᒃᑐᑦ ᑕᕝᕙ ᐃᓄᐃᑦ ᓵᑖᓇᓯᐅᑉ ᐱᖏᑦ; 39ᐊᑭᕋᕐᑐᕐᑎ ᐱᕈᕐᓂᕐᓗᒃᑐᒃᓴᓂᒃ ᑲᓐᖓᕐᓱᐃᔪᖅ ᑖᓐᓇᐅᕗᖅ ᓵᑖᓇᓯ; ᓇᑲᑎᕆᕝᕕᒃ ᑕᕝᕙ ᓯᓚᕐᔫᑉ ᐃᓱᐊ, ᑲᑎᕐᓱᐃᔩᑦ ᑕᕝᕙ ᐂᖏᓖᑦ. 40ᑖᒃᑯᐊ ᐱᕈᕐᓂᕐᓗᒃᑐᑦ ᑲᑎᑕᐅᓪᓗᑎᒃ ᐃᑭᑕᐅᖕᒪᑕ ᐃᑯᒪᒧᑦ, ᑍᒫᑦᓮᓐᓇᕐᑕᐅᖅ ᐱᔪᖃᕈᒫᕐᐳᖅ ᓯᓚᕐᔫᑉ ᐃᓱᐊᓂ: 41ᐃᓅᑉ ᐃᕐᓂᖓ ᐂᖏᓖᖁᑎᒥᓂᒃ ᑎᓕᓯᔪᒫᕐᐳᖅ, ᑲᑎᕐᓱᐃᔭᕐᑐᖁᓪᓗᒋᑦ ᑕᕝᕙᓐᖓᑦ ᐊᑕᓂᐅᕕᖕᒥᓂᑦ, ᐃᓄᖕᓂᒃ ᐊᔪᕐᑐᓕᑎᑦᓯᔪᓂᒃ ᑕᒤᓐᓂᒃ, ᐊᓯᖏᓐᓂᒡᓗ ᐊᔪᕐᑐᓕᓂᕐᒥᒃ ᐱᓇᓱᐊᕐᑐᓂᒃ, 42ᑖᒃᑯᐊ ᐃᒋᑦᓱᒫᕐᐰᑦ ᐃᑯᒪᕐᔪᐊᕐᒧᑦ; ᑕᕝᕙᓂ ᕿᐊᔪᒫᕐᐳᑦ ᐊᒡᓕᕈᓚᕐᓗᑎᒡᓗ ᐋᓐᓂᐊᓂᕐᒧᑦ. 43ᐃᓗᐊᕐᑐᓕᔪᓪᓕ ᖃᐅᒪᓂᖃᕈᒫᕐᐳᑦ ᓯᕿᓂᕐᑐᑦ ᐊᑖᑕᖓᑦᑕ ᐊᑕᓂᐅᕕᖓᓂ. ᑐᓵᔪᓂᒃ ᓯᐅᑎᓕᒃ ᑐᓴᕐᓕ!”
ᐊᑦᔨᐅᔪᖅ ᐱᖁᑎ ᐃᓪᓕᕐᓇᕐᑐᖅ ᐃᔨᕐᓯᒪᔪᖅ
44“ᒎᑎᐅᑉ ᐊᑕᓂᐅᕕᖓ ᐊᑦᔨᖃᕐᐳᖅ ᐱᖁᑎᒥᒃ ᐃᓪᓕᕐᓇᕐᑐᒥᒃ ᐃᔨᕐᓯᒪᔪᒥᒃ ᐱᕈᕐᓰᕕᖕᒥ, ᐊᖑᑎᐅᑉ ᓇᓂᒐᒥᐅᒃ ᐃᔨᒃᑲᓐᓂᕆᕚ; ᐊᒃᓱᐊᓗᒃ ᖁᕕᐊᓱᓕᕋᒥ ᐱᖁᑎᓕᒫᓂ ᓂᐅᕐᕈᑎᒋᕔᑦ ᐅᑎᕋᒥ ᑖᓐᓇ ᐱᕈᕐᓰᕕᒃ ᓂᐅᕕᐊᕆᕚ.”
ᐊᑦᔨᐅᔪᖅ ᓴᐸᖓᖅ ᐱᔪᒥᓇᕐᑐᖅ
45“ᐊᒻᒪᑦᑕᐅᖅ, ᒎᑎᐅᑉ ᐊᑕᓂᐅᕕᖓ ᐊᑦᔨᖃᕐᐳᖅ ᓂᐅᕕᕐᑎᒥᒃ ᕿᓂᕐᑐᒥᒃ ᓴᐸᖓᕐᒥᒃ ᐱᔪᒥᓇᕐᑐᒥᒃ. 46ᓇᓂᓯᒐᒥᓗ ᐊᑭᑐᔪᒃᓴᔭᒻᒪᕆᐅᖕᒪᑦ ᐊᖏᕐᕋᕐᐳᖅ, ᐱᖁᑎᓕᒫᓂ ᑕᒪᕐᒥᒃ ᓂᐅᕐᕈᑎᒋᕔᑦ ᐅᑎᕋᒥ ᓴᐸᖓᖅ ᐱᔪᒥᓇᕐᑐᖅ ᓂᐅᕕᐊᕆᕚ.”
ᐃᖃᓗᒐᓱᒃᑑᑉ ᐊᑦᔨᐅᔪᕆᔭᐅᓂᖓ
47“ᐊᒻᒪᑦᑕᐅᖅ, ᒎᑎᐅᑉ ᐊᑕᓂᐅᕕᖓ ᐃᖃᓗᖕᓂᐅᑎᑎᑐᑦ ᓄᓗᐊᑎᑐᑦ ᑍᒤᑉᐳᖅ ᐃᒫᓄᑦ ᓂᖏᑎᑕᐅᔪᑎᑐᑦ ᖃᓄᐃᑦᑐᑐᐃᓐᓈᓗᖕᓂᒃ ᓄᓗᐊᕐᑎᑦᓯᔪᑎᑐᑦ. 48ᓄᓗᐊᑦ ᑕᑕᒻᒪᑕ, ᐃᖃᓗᒐᓱᒃᑎᓂᑦ ᓄᓇᒧᐊᕈᑦᔭᐅᕗᑦ ᓄᓇᒧᐊᕋᒥᒃ ᐃᒃᓯᕚᓕᕐᓗᑎᒃ ᐃᖃᓗᖕᓂᒃ ᐱᔧᓕᕐᐳᑦ ᐃᖃᓗᑦᓯᐊᕔᑦ ᑲᑎᓪᓗᒋᑦ ᖃᑦᑕᐅᔭᓄᑦ ᐱᐅᖏᑦᑐᓪᓕ ᐃᒋᑉᐰᑦ. 49ᑍᒤᑦᓱᒫᕆᕗᖅ ᓯᓚᕐᔫᑉ ᓇᒡᒐᑖᓂ. ᐂᖏᓖᑦ ᑎᑭᑦᓱᒫᕐᐳᑦ ᐲᔧᔭᕐᑐᕐᓗᑎᒃ ᐱᐅᖏᑦᑐᓂᒃ ᑖᒃᑯᓇᖓ ᐃᓗᐊᕐᑐᓕᔪᓂᑦ, 50ᐱᐅᖏᑦᑐᑦ ᐃᒋᑦᓱᒫᕐᐰᑦ ᐃᑯᒪᕐᔪᐊᕐᒧᑦ; ᑕᕝᕙᓂ ᕿᐊᔪᒫᕐᐳᑦ ᐊᒡᓕᕈᓚᕐᓗᑎᒡᓗ ᐋᓐᓂᐊᓂᕐᒧᑦ.”
ᐊᔪᕆᕐᑑᓯᑐᖃᖅ ᐊᔪᕆᕐᑑᓯᕐᓗ ᓄᑖᖅ
51ᔩᓱᓯᐅᑉ ᐊᐱᕆᕔᑦ, “ᐅᖃᐅᓯᕆᔭᒃᑲ ᑐᑭᓯᕕᓯᐅᒃ?”
ᑖᒃᑯᐊ ᑭᐅᕚᑦ, “ᑐᑭᓯᕙᕗᑦ.”
52ᔩᓱᓯᐅᑉ ᐅᖃᐅᑎᕔᑦ, “ᑍᒤᒻᒪᑦ ᐱᖁᔭᓂᒃ ᐃᓕᓮᔨᑦ ᒎᑎᐅᑉ ᐊᑕᓂᐅᕕᖓᓂᒃ ᐃᓕᓐᓂᐊᕐᑎᑕᐅᓯᒪᔪᑦ ᐊᑦᔨᖃᕐᐳᑦ ᐃᒡᓗᒥᒃ ᓇᖕᒥᓂᖃᕐᑐᑐᑦ ᓯᕐᓗᐊᕐᒥᖕᓂᑦ ᓴᖅᑭᑎᑦᓯᔪᑎᑐᑦ ᓄᑖᓂᒃ ᓄᑕᐅᖏᑦᑐᓂᒡᓗ.”
ᓈᓴᕇᑎᒥᐅᑦ ᔩᓱᓯᒥᒃ ᓇᕐᕈᓂᖓᑦ
ᒫᑯᓯ 6:1-6; ᓘᑲᓯ 4:16-30
53ᔩᓱᓯᐅᑉ ᑕᒪᒃᑯᐊ ᐊᑦᔨᐅᔪᑦ ᐅᖃᐅᓯᕆᔭᕇᕋᒥᒋᑦ, ᑕᕝᕙᓐᖓᑦ ᓇᔪᕐᑕᒥᓂᑦ ᐊᐅᓪᓚᕐᐳᖅ. 54ᓄᓇᑐᖃᒥᓄᑦ ᐅᑎᕋᒥ ᔫᑎᑦ ᐅᒃᐱᕐᓂᕐᒧᑦ ᑲᑎᒪᕕᖓᓐᓂ ᐊᔪᕆᕐᑐᐃᓕᕐᐳᖅ, ᑐᓵᔪᓕᒫᑦ ᑲᒪᓂᐊᒻᒪᕆᒃᐳᑦ, ᐅᖃᕐᓗᑎᒃ, “ᓇᑭᓄᓇ ᓯᓚᑐᓂᕐᑖᕐᑐᕕᓂᖅ ᑲᒪᓇᕐᑐᓕᔪᓐᓇᕐᓯᓪᓗᓂᓗ? 55ᕿᔪᓕᕆᔨᐅᒧᓇ ᐃᕐᓂᕆᓐᖏᓚ? ᐅᓇ ᒥᐊᕆᒥᒃ ᐊᓈᓇᖃᓐᖏᓚᖅ? ᖃᑕᓐᖑᑎᖏᓪᓗ ᐅᑯᐊᖑᓐᖏᓛᑦ ᔧᒥᓯ, ᔫᓯᐱ ᓮᒨᓂ, ᔫᑕᓯᓗ? 56ᓇᔭᖏᓪᓗ ᐅᕙᑦᑎᓐᓂᒥᐅᑕᐅᓐᖏᓛᑦ? ᓇᑭᓪᓕᐅᓇ ᑕᒪᒃᑯᓂᖓ ᐱᑖᕐᑐᕕᓂᖅ?” 57#ᔪᐊᓇᓯ 4:44.ᑍᒤᒻᒪᑦ ᓇᕐᕈᒋᓕᕐᐹᑦ.
ᔩᓱᓯᐅᑉ ᐅᖃᐅᑎᕔᑦ, “ᓇᓚᐅᑦᑍᔪᖅ ᓇᓂᑐᐃᓐᓇᖅ ᐅᐱᒋᔭᐅᑦᓯᐊᓲᖑᕗᖅ ᓄᓇᑐᖃᒥᓂᓕ ᓇᖕᒥᓂᕆᔭᒥᓂᓗ ᐃᓚᒥᓂ, ᐅᐱᒋᔭᐅᑦᓯᐊᓲᖑᓐᖏᓚᖅ.” 58ᑕᕝᕙᓂᓕ ᑲᒪᓇᕐᑐᓕᓂᕐᓂᒃ ᐊᒥᓱᓂᒃ ᐱᓇᓱᐊᓚᐅᓐᖏᓚᖅ, ᐅᒃᐱᕈᓱᖏᓐᓂᖏᑦ ᐱᑦᔪᑎᒋᓪᓗᒋᑦ.
Одоогоор Сонгогдсон:
ᒫᑎᐅᓯᐅᑉ ᐊᒡᓚᖏᑦ 13: EAIB
Тодруулга
Хуваалцах
Харьцуулах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
Eastern Arctic Inuktitut Bible © Canadian Bible Society, 2012, 2021-2023.