रोमी 12
12
जिउँदो बलि
1होटबाटै विश्वासी डाजेभाइको र डैबहिनीको, परमेश्वरै नाखुरीककी कह्राङ्छ दया जाट्च बाटै नाखुरीक लाहाकी न पवित्र र होसकोकी जाक्ङ सेच जिउँदो बलिदानौ रुपाङ चढडीनी डेम ङा नाखुरीककी बिन्ती जाट्ले। नाखुरीकुङ आत्मै जाट्की पर्च साँचो आराधना र इसे न हो। 2नाखुरीक संसारुङ भर्मीकै ही जाट्ले होटन जाट्च माजाट्नी, बरु परमेश्वरकी नाखुरीकुङ विचारकी बदलीकी यान्ही। इट जाटा डेनाङ नाखुरीकुङ जीवनाङ होसकुङ इच्छा ही ले डेयार वार्खी ह्योक्ले, अथवा कुसे कुरा असल हो, कुसे कुरै होसको माह्राङ्ले, र कुसे कुरा सिद्ध हो, होसे पट्ट न कुरा नाखुरीकै वार्ल्हे।
3परमेश्वरै ङाकी अनुग्रह याछबाटै ङा नाखुरीक पट्टकी डेले, नाखुरीक लाहा कुङ्च ले, होसे डेनाङ बढी माआर्मीट्नी, तर होसकै याछ विश्वास अनुसार लाहा कुङ्च ले, होङ्च न आर्मीट्नी। 4कानुङ काट न शरीराङ वास्टै अङ्गको ले, तर होसे पट्ट अङ्कुङ काट न काम माछान्ने। 5होटजाट्न न कान वास्टै जना लेनाङ र ख्रीष्टाङ काट न शरीर हो र कान पट्टको काटौ काटकी चहडीस्च अङ्गको हो। 6परमेश्वरौ अनुग्रहै कानकी याछ फरक फरक वरदानको अनुसार काम जाटीङ। अगमवाणी ङाक्च वरदान लेचये लहो विश्वास अनुसार होसकुङ न कुरा ङाक्ख्यो। 7इडीक सेवा जाट्च वरदान ले डेनाङ सेम्हजा सेवा न जाट्ख्यो, इडीक पाहाक्च वरदान ले डेनाङ सेम्हजा पाहाक्ख्यो। 8इडीक अरुकी उत्साह याछ वरदान ले डेनाङ उत्साह याख्यो, खाँचो लेचकोलाक याछकै खुल्ला मीमनै याख्यो। इडीक परमेश्वरै अगुवाइ जाट्च वरदान याम्हने डेनाङ मीमन लैडीयार भर्मीकोलाक अगुवाइ जाट्ख्यो, भर्मीकोलाक दया टान्हाक्च वरदान ले डेनाङ खुसीखाटा दया टान्हाक्ख्यो।
9नाखुरीकुङ प्रेम टान्हाक्च मट्टै होइन तर साँचो प्रेम लेख्यो। कुसे कुरा खराब ले होसे कुराकी झीर्च जाट्नी। कुसे कुरा सेछ ले होसे कुराङ लग्डीस्न ङुनी। 10लहो डाजेभाइकोलाक लेखा न काटै काटकी प्रेम जाट्नी। लाहाकी डेनाङ धेरै अरुकी आदर जाट्नी। 11अल्छी माजाट्न काम जाट्नी। पवित्र आत्माङ जोशिलो छानार प्रभुओ सेवा जाट्नी। 12नाखुरीकै डुप्च आशाङ आनन्द जाट्नी। कष्ट रान्हाङ सहडीकी ह्योक्च छान्नी र सधैँभरि प्रार्थना जाट्न ङुनी। 13परमेश्वरौ पवित्र भर्मीकोलाक खाँचो पर्नाङ सहायता जाट्नी, लहो इमाङ राछ पाहुनाकी मेजमान जाट्नी। 14नाखुरीककी सतडीचकोलाक आशिष यान्ही, तर मासराप्डीनी। 15माह्राङ्चकोखाटा माह्राङ्नी, राप्चकोखाटा राप्नी। 16नाखुरीक पट्टकोखाटा खाटार ङुनी। घमण्ड माजाट्नी, पट्ट भर्मीकोखाटा नम्र छानार ङुनी। ङा पट्ट न ठोक वार्ल्हे डेयार सेन र माआर्मीट्नी।
17इडीक सुयेर नाकोकी मास्च जाटा डेयार होसकी र मास्च माजाट्नी। कुसे कुरा पट्ट भर्मीकै सेछ ठहरीले होसे कुराङ मट्टै मीमन लैडीच जाट्नी। 18छान्की ह्योक्ले डेनाङ ह्योक्ठर पट्टकोखाटा शान्तिखाटा खाटार ङुनी। 19ङौ विश्वासी डाजेभाइको र डैबहिनीको, सेन र, सुखाटा र बदला मालानी। तर होखुरीककी सजाय याछ काम परमेश्वरकी न डास्न यान्ही, हीजैडेनाङ धर्मशास्त्राङ परमप्रभुये डेमने, “बदला लाच काम ङौ हो, ङा न बदला लाले।”#व्यवस्था ३२:३५ 20बरु “इडीक नाकुङ शत्रुकी मीटुक रन्छीमे डेनाङ ज्याकी यान्ही, डी सोन्हे डेनाङ डी गाकी यान्ही। होटजाटा डेनाङ नाकुङ शत्रु काराम सेयार ग्याच न ग्याच छान्ने।”#हितोपदेश २५:२१-२२ 21खराब कुरै नाकोकी माजुख्यो, तर खराब कामकी असल काम जाटार जुनी।
© 2025 by Mother Tongue Translators Society and Wycliffe Bible Translators, Inc.