Jizọs Ọnụ N'ekwuchitere Anyị

N’ime izu a, anyị ahụla kà Jizọs na-esetipú aka ọma Ya nye ndị ogbenye, ndị a na-emegbu emegbu, ndị na-atụ ụjọ, ndị mmehie, na ndị niile ọha mmadụ na-akpagbu. N'ime omume kachasị elu nke nkwuchite, ọnwụ Ya, na mbilite n’ọnwụ Ya, O bukwasịrị Onwe Ya ntaramahụhụ maka mmehie anyị nile ka anyị na Chineke dị ná mma otu ugboro na mgbe nile.

Site na Africa Study Bible mmụta ihe a kpọrọ “Jizọs, Ọnụ N'ekwuchitere Ụmụ Mmadụ”:

Nkwuchite bụ ihe ewuberè n'omenala ndị Afrịka dịka ngwaọrụ siri ike maka idozi esemokwu. Na omenala, a na-ahazi ọtụtụ alụmdi na nwunye n'Afrịka n'ihu ndị aka-ebe. Ndị a bụ ndị di na nwunye ahụ gà-agakwuru ma ọ bụrụ na ha enwee nsogbu chọrọ enyemaka. Ọ bụrụ na obodo abụọ ana-ese okwu taa, ndị okenye si n’akụkụ obodo abụọ ahụ na-ezukọ n’ihu ndị ọzọ ka ha kpaa nkata udo. Mgbe mba dị iche iche na-alụ agha, Òtù Mba Ụwa na-ezipụ ndị ozi udo ka ha gbalịa ịkwụsị agha ahụ. Ndị aka-ebe, ndị nnọchiteanya na ndị ozi udo niile na-arụ ọrụ nke ndị nkwuchite. Ha na-agbazi n'etiti ndị otù na-ese okwu iji nyere ha aka weghachi udo na mmeko.

Kraịst bịara dịka onye nkwuchite—onye nkwuchite zuru oke. O nweghị mmehie, aka Ya dị ọcha na mpụ ọbụ́ n'anyị merè. Ma dị ka onye nkwuchite n’etiti ndị dị ike na ndị na-enweghị ike, O weerè ọnọdụ anyị.

Kraịst kwụrụ ụgwọ kacha elu wee kwe nkwa na onye ọbụla kwere na Ya agaghị enweta ntaramahụhụ ahụ. Kama, onye kwere na Ya gà-enweta ndụ ebighị ebi. Site na Kraịst, ma ọ bụ nanị site n’aka Ya ka ndị mmadụ na Chineke pụrụ idi n’udo. “N'ihi na e nwerè otu Chineke na otu onye nkwuchite nke pụrụ ime ka Chineke na mmadụ dị ná mma—nwoke ahụ bụ́ Kraịst Jizọs. O nyere ndụ Ya ka O wee zụta nnwere onwe maka onye ọ bụla” (1 Timoti 2:5-6).

Tụgharịa Uche Ma Ọ Bụ Kparịta Ụka

Gịnị merè Jizọs ịbụ Onye Nkwuchite anyị jirì dị anyị mkpa?

Jizọs jerè ozi dị ka Onye Nkwuchite zuru oke, na-anata ntaramahụhụ kwesịrị anyị maka mmehie anyị. Gịnị merè i ji chee na Jizọs dị njikere imere anyị ihe a?

Gị na Chineke ọdị n'udo? Ọ bụrụ na ọ bụghị, gịnị bụ naanị ụzọ gị na Ya gà-esi dị ná mma?

Ọ bụrụ na ị tụkwasịghị obi gị na Jizọs, Onye Nkwuchite Ukwu nke mmadụ, ekwela ka ụbọchị ọzọ gafee mà ịchọtaghị onye ga-eso gị kpee ekpere gbasara nke a.