ՍԱՂՄՈՍ 129
129
ԱՂՕԹՔ ՄԸ ԻՍՐԱՅԷԼԻ ԹՇՆԱՄԻՆԵՐՈՒՆ ԴԷՄ
Աստիճաններուն երգը
1Հիմա Իսրայէլ թող ըսէ.
«Իմ մանկութենէս ի վեր շատ անգամ զիս նեղեցին։
2Իմ մանկութենէս ի վեր շատ անգամ զիս նեղեցին,
Բայց ինծի չյաղթեցին։
3Հերկողները իմ կռնակիս վրայ հերկեցին
Ու իրենց ակօսները երկնցուցին»։
4Տէրը արդար է.
Անիկա ամբարիշտներուն չուանները կտրտեց։
5Բոլոր Սիօնը ատողները
Պիտի ամչնան ու ետ դառնան.
6Տանիքին վրայի խոտին պէս պիտի ըլլան,
Որ դեռ չփրցուած կը չորնայ։
7Հնձողը չի կրնար իր ձեռքը լեցնել անով,
Ոչ ալ խուրձ կապողը՝ իր գոգը։
8Անցնողները չեն ըսեր.
«Տէրոջը օրհնութիւնը ձեր վրայ ըլլայ
Ու ձեզ Տէրոջը անունովը կ’օրհնենք»։
Արդեն Ընտրված.
ՍԱՂՄՈՍ 129: WARMB
Ընդգծել
Պատճենել
Համեմատել
Կիսվել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
Հայ Արեւմտահայերէն Աստուածաշունչ © Bible Society in Lebanon, 1981.