MATEUS 2
2
Za fatan sǝr fah morcomzah'nan ge ẽera Yesu
1Yesu byaŋ yaŋ Betlehem sǝr Yudea, ne cok ah ka Herodes ye kaa goŋ sǝr ah ɓo. Fahfal byaŋ ah za fatan sǝr fah morcomzah'nan ma ẽe ŋwǝǝmǝŋgai gera yaŋ Jerusalem. 2Fiira fii faara: We mai mo byaŋ ɓo mo tǝ ga kaa Goŋ Yahuduen a kẽne? Mor aru kwo ŋwǝǝmǝŋgai ah zoo morcomzah'nan ŋhaako, so ru ge ɓo ka juupel wol ahe.
3Ne cok Goŋ Herodes mo laa ɓǝ ah naiko, zahzyil nǝǝ ko pǝlli, tǝkine za yaŋ Jerusalem daŋ. 4Tai za joŋzahsyiŋ maluu tǝkine za ma cuu ɓǝ lai daŋ, fii ra: Kristu sye a ga byaŋ kẽne? 5Zyiira faa nyi ko: A ga byaŋ yaŋ Betlehem sǝr Yudea, tǝgbana profeto Masǝŋ mo ŋwǝǝre:
6Amo Betlehem sǝr Yudea mo ye ka yaŋ malaŋ ah kǝsyil yaŋ maluu sǝr Yudea ya,
Mor goŋ tǝ ga pǝ̃ǝ gin wo ɓo ginni,
Ako ye ga pii za ɓe Israel.
7So Herodes ɗii za fatan pǝ muŋni, fii ɓǝ cok mai mo kwora ŋwǝǝmǝŋgai ah zah ɓǝǝra. 8Fahfal ah so pee ra ka ga yaŋ Betlehem, faa nyi ra: We gyo, we fii ɓǝ wel ah pǝsãhe. We lwaa ɓe, ka we ge faa ɓǝ ah nyi me, ka ame laŋ me ga juupel wol ah ta.
9Fahfal mo laara ɓǝ faa goŋe, so kalra. So kwora ŋwǝǝmǝŋgai mai mo kwora kŋ kal pel ɓǝǝra, amma ne cok ŋwǝǝmǝŋgai mo ge dai pǝ cok mai we mo gŋ, so uuni. 10Ne cok mo kwora ŋwǝǝmǝŋgai ah mo ge uu naiko, laara pǝ'nyah pǝlli. 11Danra kal ge ɓǝr yaŋ, kwora we ne mah ah Maria. Keara ge sǝŋ juura pel wo wel ahe. So wǝǝra zah dah ɓǝǝ nyira vãm kaŋnyeeri, zwahre, tǝkine ɓǝrdi pǝzyil kpuu nyi ko. 12So Masǝŋ faa ɓǝ nyi ra pǝ lom ka mo pii soora ge wo Herodes kao, so ɓaŋra fahlii maki ah kalra ge sǝr ɓǝǝra.
Ɗuura kal ge sǝr Egiɓ
13Fahfal zai mo kalra o, Angelos Dǝblii ge wo Yuseɓ faa ɓǝ nyi ko ne lomme: Mo urri, mo ɓaŋ we ne mah ah mo ɗuu ge sǝr Egiɓ ne ko, mo kaa gŋ, sai ka me so faa ɓǝ pii soo nyi mo ɓe. Mor Herodes tǝ ga kyeɓ wel ah ka in ko pǝ wulli.
14Yuseɓ ur ɓaŋ we ne mah ah daŋ ne suŋ kal ge sǝr Egiɓ ne ko. 15Kaa gŋ ŋhaa Herodes wuu. Fan ah joŋ nai mor ka baa ɓǝ mai Dǝɓlii mo faa ne zah profeto ahe: Me ɗii we ɓe gin sǝr Egiɓ.
Ikra wee nyee pǝ wulli
16Ne cok Herodes mo kwo za fatan joŋra tǝgwĩi ɓo ne ki, ɓaŋ kpãh pǝlli, so pepee kal ge yaŋ Betlehem ka ik wee wǝǝ mai mo joŋra syii ɓo gwa ne mai mo dai ya daŋ pǝ wul tǝkine ma yaŋ ma kah ah ra daŋ, tǝgbana mai mo laako ɓǝ ah zah za fatan ne cok mo kwora ŋwǝǝmǝŋgai ahe. 17Ɓǝ mai profeto Jeremias mo faa joŋ ɓe, faa:
18Laara ɓǝ ŋwaa yaŋ Rama,
Cii yee tǝkine dahgor cii gŋ pǝ'manne.
Rakel ye tǝ yeyee mor wee ahe,
Ka gak rõm ya, mor wee ah wuk ɓe.
Piira soo gin sǝr Egiɓ ge
19Fahfal Herodes mo wuu, Angelos Dǝblii ge wo Yuseɓ sǝr Egiɓ faa ɓǝ nyi ko ne lom faɗa: 20Mo ur mo ɓaŋ we ne mah ah daŋ mo jin ge sǝr Israel ne ko. Mor za mai mo tǝ kyeɓra wel ah ka in pǝ wul kŋ wukra ɓe.
21Yuseɓ ur ɓaŋ we ne mah ah pii soo ge sǝr Israel ne ko. 22Amma ne cok mo ge laa Arkelaus ye kaa goŋ ɓo sǝr Yudea pǝ cok pah ah Herodes, so ɗuu gal ga sǝr ahe. So Masǝŋ mo ge faa ɓǝ nyi ko ne lom o, so kal ge sǝr Galile, 23ge kaa yaŋ ma ɗii ne Nazaret. Ɓǝ ah joŋ tǝgbana mai profetoen mo faara: A ga ɗiira ko ne Nazareyo.
Sélection en cours:
MATEUS 2: MUAR
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
Bible Moundang © Alliance Biblique du Tchad, 1996.