MATEUS 1
MUAR
1
Morsǝ̃ǝ Yesu Kristu
(Lu 3:23-38)
1Morsǝ̃ǝ Yesu Kristu mai ako ye mo we David ne we Abraham a naiko:
2Abraham byaŋ Isak, Isak byaŋ Yakuɓ, Yakuɓ byaŋ Yuda tǝkine wee pah ahe. 3Yuda byaŋ Peres tǝkine Zera, (ma ɓǝǝ ye Tamar). Peres byaŋ Hesron, Hesron byaŋ Aram. 4Aram byaŋ Amminadaɓ, Amminadaɓ byaŋ Naason, Naason byaŋ Salmon. 5Salmon byaŋ Boas, (mah ah ye Rahaɓ), Boas byaŋ Obed, (mah ah ye Rut), Obed byaŋ Isai. 6Isai byaŋ goŋ David.
David byaŋ Salomo ne (mawin Urias). 7Salomo byaŋ Rehoboam, Rehoboam byaŋ Abiija, Abiija byaŋ Asa. 8Asa byaŋ Yusafat, Yusafat byaŋ Yuram, Yuram byaŋ Osias. 9Osias byaŋ Yutam, Yutam byaŋ Akas, Akas byaŋ Ezekias. 10Ezekias byaŋ Manasse, Manasse byaŋ Amon, Amon byaŋ Josias. 11Josias byaŋ Jojakin tǝkine wee pah ah ne cok mai mo woora za Israel kal ge sǝr Babilon ne ko.#2 ZaG 24:14-152 KeeƁ 36:10Jer 27:20
12Fahfal mo woora za Israel kal ge sǝr Babilon ne ko, Jojakin byaŋ Salatiel, Salatiel byaŋ Serubabel. 13Serubabel byaŋ Abiud, Abiud byaŋ Eliakim, Eliakim byaŋ Asor. 14Asor byaŋ Sadok, Sadok byaŋ Akim, Akim byaŋ Eliud. 15Eliud byaŋ Eleasar, Eleasar byaŋ Mattan, Mattan byaŋ Yakuɓ. 16Yakuɓ byaŋ Yuseɓ wor Maria mai mo byaŋ Yesu ma ɗii ne Kristu.
17Pãa ɓǝǝ tǝŋ kee ne patǝtǝl daga pa ɓǝǝ lii Abraham ŋhaa dai David joŋ jemma tǝtǝl nai, so tǝŋ kee daga David ŋhaa dai cok mai mo woora za Israel kal ge sǝr Babilon ne ko, joŋ jemma tǝtǝl nai ta, so tǝŋ kee daga ne cok mo woora za Israel kal ge sǝr Babilon ne ko ŋhaa ge dai cok byaŋ Kristu, joŋ jemma tǝtǝl nai kpǝ.
Ɓǝ byaŋ Yesu Kristu
(Lu 2:1-7)
18Ɓǝ byaŋ Yesu Kristu a naiko. Mah ah Maria wee ŋwǝǝ Yuseɓ yo, amma ka ɓah kanra ki ya ba Maria gbǝ ɓil ne swah Tǝ'yak Matǝdaŋdaŋ.#Lu 1:27 19Wor ah Yuseɓ dǝɓ ma ɗuu Masǝŋ yo, 'yah ka faa ɓǝ ah gin lal a, a 'yah ka soɓ ko ɓoo pǝ muŋ 'yaŋ. 20Ne cok mo tǝ foo ɓǝ ah foo ba, angelos ge wol ah ne lom faa nyi ko: Yuseɓ we David, mo ɗuu gal ɓǝ ɓaŋ mawin ɓo Maria ka kan ka. Mor ɓil we mai mo ɓǝr ah Tǝ'yak Matǝdaŋdaŋ ye nyi nyi. 21A ga byaŋ pǝworre, ka mo ɗii ko ne Yesu#1:21 Tǝɗii Yesu ne zah Grek a 'yah faa: Dǝɓlii a ǝ̃ǝ zana. Ne zah Yahuduen ɓe, a ɗii ne Joswa., mor ako ye ga ǝ̃ǝ zan ah pǝ faɓe' ɓǝǝra.#Lu 1:31
22Fan mai daŋ joŋ nai mor ka baa ɓǝ mai Dǝɓlii mo faa ne zah profeto Masǝŋ: 23Mǝlaŋ pǝwoi ga gbǝ ɓilli, a ga byaŋ pǝworre, a ga ɗiira ko ne Imanuel, tǝgba faa: (Masǝŋ no ne na).#Esa 7:14
24Ne cok Yuseɓ mo kpiŋ gin tǝ nǝm ahe, so joŋ tǝgbana mai Angelos Dǝblii mo faa nyi ko, ɓaŋ mawin ah Maria kal ge yaŋ ah ne ko. 25Amma kaa ne ki ya ŋhaa byaŋ wel ah ne sõo. So Yuseɓ ɗii ko ne Yesu.#Lu 2:21