MATEUS 3
3
Ɓǝ cuu Yohana ma joŋ baptisma
(Mk 1:1-8; Lu 3:1-18; Yoh 1:19-28)
1Ne cok ah Yohana ma joŋ baptisma ge kaa kǝsyicok sǝr Yudea tǝŋ cuu ɓǝ. 2A faa nyi zana: We fer zahzyil ɓiiri, mor Goŋ Masǝŋ ge gwari ɓe.
3Yohana ako ye dǝɓ mai profeto Esaia mo faa ɓǝ ɓo tǝl ahe:
Kyaŋ dǝɓ ki no tǝ ɓyaŋ ɓǝ kǝsyicokki:
We zyeɓ fahlii Dǝɓlii, we dǝǝ fahlii ah uu sǝraŋ.
4Yohana ɓoo mbǝro zyim ma joŋ ne syiŋ njoŋnjoŋ, a baŋ sãh ne ganda wakke, farel ah ye dahsyii ne tǝnjwǝǝre. 5Za yaŋ Jerusalem ne za sǝr Yudea daŋ tǝkine za sǝr ma kah el Yordan daŋ a ginra wol ahe. 6A keera ɓǝɓe' ɓǝǝ pel za daŋ, so Yohana a joŋ baptisma nyi ra pǝ el Yordan.
7Ne cok Yohana mo kwo Farisien ne Sadusien moo ginra wol ah mor ka nyiŋ baptisma, faa nyi ra: Awe wee soo, azu ye cuu nyi we ka we ɗuu ǝ̃ǝ pel kpãh Masǝŋ mai mo tǝ gin ne? 8We joŋ yeɓ mai moo gak cuu we fer zahzyil ɓii ɓe. 9We lǝŋ sõone a ga rõmra we mor pa ɓii lii ye Abraham ka, amma me tǝ faa nyi we, Masǝŋ gak joŋ tǝsal marai ka mo ciŋra morsǝ̃ǝ Abraham. 10Kǝlaɓ zyeɓ kan ɓo mor kpuu ka cen gin morsǝ̃ǝ ahe, kpuu mai mo ka lee syẽm pǝsãh ya daŋ a ga ce ɓoo ga tǝ wii. 11Ame, me tǝ joŋ baptisma nyi we ne bii ka cuu we toobii ɓe, amma Dǝɓ ki no tǝ gin fahfal ɓe, a pǝyǝk kal me ɓe, me kii nǝn pǝkoŋ ka nǝǝ sǝɓal ah gban a, ako ye ga joŋ baptisma nyi we ne Tǝ'yak Matǝdaŋdaŋ tǝkine wii. 12Ŋhǝǝ gee sor no jol ahe, a ga gee kun sor ga lal ne ko, a ga tai sor ah ga kahcelle, amma a ga rǝk kun ah ga tǝ wii, ka syen wii mai mo ka rum ya ŋhaa ga lii.
Yesu nyiŋ baptisma
(Mk 1:9-11; Lu 3:21-22)
13So ne cok ah Yesu ur gin sǝr Galile ge wo Yohana pǝ el Yordan mor ka nyiŋ baptisma jol ahe. 14Amma Yohana zyii kǝnah ya, faa nyi ko: Ame yee nyiŋ baptisma jol ɓo jeertǝ, mo so ge ka nyiŋ jol ɓe ne? 15Amma Yesu zyii faa nyi ko: Mo cak ɓǝ ah ka, mo zyii ka na joŋ fan daŋ ne fahlii ahe, mor ka na baa ɓǝ mai Masǝŋ mo fii ɓo daŋ. So Yohana nyiŋ ɓǝ ahe, joŋ baptisma nyi ko.
16Ne cok Yesu mo nyiŋ baptisma, pǝ̃ǝ gin pǝ bii. Ne cok ah sǝ coksǝŋ gbǝrri, Yesu kwo Tǝ'yak Masǝŋ ɗǝr gin sǝŋ tǝgbana matǝvaa ge tǝl ahe. 17So kyaŋ cii gin sǝŋ ge faa: Dǝɓ nyẽe We 'yah ɓe yo, me laa pǝ'nyah ne ki.
Sélection en cours:
MATEUS 3: MUAR
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
Bible Moundang © Alliance Biblique du Tchad, 1996.