Joeli 3
3
Leza mbwayoobeteka bamasi
1Nkaambo mumazuba ayo akuciindi eco ninjooboozya basibwaange baJuda aba-Jerusalemu, 2#Zek 14:2; 2 Mak 20:26; Is 66:16njooyobolola bamasi boonse, njoobaleta mumumpata wa-Josafati, kuti tukabetekane nkuko, nkaambo kabantu bangu acisi cangu ca-Israyeli, nkaambo babamwaisya akati kabamasi, anyika yangu baiabana. 3#Ob 1:11Alimwi bantu bangu babawaalila zisolo, Mulombe balamwaabila muulo wasimamambe, amusimbi balamuuzya bukoko bwakunywa.
4 #
Dt 32:35; Lk 18:7; Jak 2:13; Is 14:29-31; 23:1-18; Jer 47:1-7; Ezk 25:15–28:26; Am 1:6-10; Zef 2:4-7; Zek 9:1-7; Mt 11:21-22; Lk 10:13-14 Mwaba anzi kulindime, nubana ba-Turo aba-Zidoni, acisi coonse cabaFilisti? Mulandiyokela na? Pele mwandiyokela, njoofwambaana caluno kumubweedezya ciyokelo canu. 5Nkaambo mwatola insiliva yangu angolida yangu, azyalo zintu zyangu ziyandisi mwazitola muzikombelo zyanu, 6Abana ba-Juda abana ba-Jerusalemu mwabauzya mumaanza aaba-Helene, mwabatola kule kuzwa kunyika yabo. 7Lino amubone! Njoobabusya kuzwa kubusena nkumwakabauzizye, aciyokelo canu njoociboozya amitwe yanu nubeni. 8#Ezk 23:42Nkabela bana banu balombe abasimbi njoobauzya mumaanza aabana ba-Juda, elyo bayoobauzya kubantu ba-Seba, kucisi cili kule, mbwaamba Jehova.
9Amulaule aya makani akati kabamasi. Amulibambile inkondo. Amubusye baalumi basintaze, Basilumamba boonse baswene kuyoolwana. 10#Zek 12:8; Is 2:4; Mik 4:3Amufule maamba aanu abe mapanga, azizibyo zyamisamu zyanu zibe masumo, Mutetete aambe kuti, Ndi singuzu, 11Amufwambaane kuboola, nuzisi zyoonse zyeengelede, akuyoboloka. Leta basilumamba bako nkuko, o Jehova. 12#2 Mak 20:26; Int 96:13Zisi zyoonse zibuke, ziinke kumumpata wa-Josafati, nkaambo kakuti nkukonya oko nkunti babeteke bamasi oonse beengelede.
13 #
Jer 51:33; Ciy 14:14-16,19-20; 19:15 Amutole cigonsyo, nkaambo maila aakutebula abizwa, Amuboole kuzoolyataula, nkaambo idindi lyakusinina misaansa lyazula, zibikilo zilafusauka, nkaambo bubi bwazyo mbupati. 14Ma lavula makamu makamu mumumpata wakukosweda makani! Nkaambo buzuba bwa-Jehova buli afwaafwi mumumpata. 15Izuba amwezi zyoonse zyasizigwa, anyenyeezi zyaleka kumweka. 16#Am 1:2Jehova ulavuluma kuzwa ku-Zioni, akulizya ijwi lyakwe ku-Jerusalemu, elyo ijulu anyika zyoonse zilateketa. Pele Jehova ngemacijilo aabantu bakwe, ngumampangala aabana ba-Israyeli. 17#Is 35:8; Nah 1:15; Ciy 21:27Lino muyooziba kuti ndime Jehova Leza wanu uukala mu-Zioni cilundu cisalala. Nkabela Jerusalemu uyoosalalisya, abazwamasi tabakooyooinda limbi akati kawo.
18 #
Ezk 47:1; Zek 13:1; Ciy 22:1 Lino mubuzuba obo zilundu ziyoolosya waini uunona, atulundulundu tuyookunkya malili, atulonga toonse twa-Juda tuyoozula maanzi. Alimwi kuyoozwa kasensa muŋanda ya-Jehova, kayootililila mumpata wa-Sitimu, 19Egepita uyooba cisaalo, acisi ca-Edomu ciyooba inkanda iitakedwe bantu, nkaambo kabukali mbubacitila bana ba-Juda, nkaambo batila bulowa bwabantu batajisi mulandu munyika yabo. 20Pele Juda uyookalilila lyoonse, a-Jerusalemu uyoobako kusikila kumazyalani-zyalani. 21Nkabela njootema mulandu wabulowa bwabo nguntana kutema, nkaambo Jehova nguukede mu-Zioni.
اکنون انتخاب شده:
Joeli 3: Ibbaib63
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
The Bible in Tonga (Zambia) © United Bible Societies, 1963.