Tawˆ kʼai ve li‸ 30

Sha hawnˉ tuˉ tanˇ kuiˬ

1Sha hawnˉ tuˉ tanˇ tuˬ awˬ pon, Aˍhkeˇshaˍ suhˆ yuˬ leh tuˉ tanˇ kuiˬ teˇ maˬ gʼa te ve yoˬ. 2Oˇ ve lehˬ, awˇ ceˍ awˇ hpawˇ hkʼa hui gʼa cawˬ piˇ leh, zuhˬ hpawˇ teˇ shaw‸, kʼehˬ hpawˇ teˇ shaw‸, mvuh hpawˇ nyiˇ shaw‸ gʼa cawˬ piˇ ve yoˬ. Awˬ hkaw teˇ hpaˍ htawˇ, oˇ ve hta‸ teˇ pawˆ tiˉ gʼa te tcuhˉ naw‸ taˍ ve yoˬ. 3Tuˉ tanˇ kuiˬ oˇ ve hkʼa caw zuhˇ leh awˬ hkaw teˇ hpaˍ hta‸ shi gʼa oˍ taˍ leh, oˇ ve hta‸ hkʼa cawˬ zuhˇ shi caˆ gʼa dawˆ nehˉ taˍ ve yoˬ. 4Tuˉ tanˇ kuiˬ oˇ ve nyiˇ hpawˇ lo, suhˆ taˬ keu taˆ hpeh‸ tuˬ shi la‸ kawˬ nyiˇ maˬ gʼa te keu taˍ leh, la‸ kawˬ oˇ ve nyiˇ maˬ lehˬ, shi caˆ nehˉ keu taˍ ve awˬ hkʼaˇ awˬ hawˉ paˉ lo gʼa cawˬ piˇ ve yoˬ. 5Taˆ tuˬ ve suhˆ taˬ hta‸ aˍhkeˇshaˍ suhˆ gʼa yuˬ te leh, shi gʼa oˍ taˍ ve yoˬ. 6Oˇ ve hta‸ ka ti‸ shaˉ caˆ ta kʼoˍ hpa ko taˍ ve awˬ baˬ hpawˇ, nawˬ hui hta‸ hpuˇ da‸ kuiˬ lo gʼa teh taˍ ve yoˬ. 7Teˇ shawˉ le le Aˍronˍ lehˬ kawˆ faiˇ hta‸ gu htaˇ tanˇ kuiˬ oˇ ve awˬ hkʼoˆ lo sha hawnˉ gʼa tuˉ tanˇ ve yoˬ. 8Mehˆ muiˉ naˆ la leh kawˆ faiˇ gu tuˉ htaˇ, yawˇ lehˬ sha hawnˉ hta‸ htawˇ gʼa kʼaw‸ tuˉ tanˇ ve yoˬ. Nawˬ hui lehˬ, teˇ co peuˬ teˇ co sha hawnˉ tuˉ tanˇ ve hta‸ hkʼaˬ htaˆ ka‸ gʼa te tcuhˉ taˍ ve yoˬ. 9Tuˉ tanˇ kuiˬ oˇ ve awˬ hkʼoˆ lo ngaˬ a hkaw-anˬ maˇ piˇ ve awˬ nu ve tuˉ tanˇ tuˬ teˇ ceuˬ ka‸ maˇ gʼa tuˉ tanˇ. To nuˇ to shaˆ, caˇ tuˬ leh awˬ gʼuiˬ teˇ hpaˍ oˇ kaˬ lo maˇ gʼa tuˉ tanˇ. 10Aˍronˍ lehˬ teˇ hkʼaw‸ teˇ pawˆ awˬ hkaw oˇ ve teˇ hpaˍ hta‸ da‸ kehˬ tuˬ, awˬ suhˍ yuˬ leh tuˉ tanˇ kuiˬ chi venˇbaˆ ponˬ tuˬ gʼa te ve yoˬ. Nawˬ hui ve awˬ yaˇ awˬ duˬ teˇ co peuˬ teˇ co, teˇ hkʼaw‸ teˇ pawˆ oˇ hkʼe gʼa te ve yoˬ. Oˇ ve lehˬ, ngaˬ ve da‸ kehˬ jaˇ ve tuˉ tanˇ kuiˬ hpeh‸ ve yoˬ, teh‸ Gʼuiˬsha kʼoˆ ve yoˬ.

Bon yehˬ awˬ pon awˬ hkawnˍ shaw ve

11Gʼuiˬsha Moˉseˍ hta‸ chi hkʼe kʼoˆ piˇ ve yoˬ. 12Iˉsaˍreˍlaˆ chaw teˇ hpaˍ hta‸ awˬ shenˍ yuˬ chehˇ ve teˇ yanˇ, kawˆ tuˬ dawˇ haˍ tuˬ yawˇ hui awˬ hkʼoˆ maˇ gʼa gaˬ la tuˬ chaw teˇ gʼaˇ le le a shu yawˇ ve a sha‸ hta‸ vuiˬ hkʼaw‸ tuˬ awˬ pon ngaˬ hta‸ awˬ hpfuhˇ gʼa piˇ laˇ ve yoˬ. 13Caˇ lanˇ hkʼaw awˬ meh cawˬ ve chaw teˇ hpaˍ lehˬ, awˬ hkanˉ teh taˍ ve hkʼe, ngaˬ hta‸ awˬ hpfuhˇ gʼa piˇ laˇ ve yoˬ. 14Caˇ lanˇ hkʼaw awˬ meh cawˬ leh a sha‸ 20 hkʼawˬ awˬ hkʼoˆ ve chaw teˇ gʼaˇ le le, awˬ hpfuhˇ chi gʼa keu laˇ ve yoˬ. 15Chaw teˇ gʼaˇ le le a shu yawˇ ve a sha‸ hta‸ vuiˬ hkʼaw‸ tuˬ awˬ pon keu ve teˇ yanˇ, paw sha ve chaw maˇ kʼoˆ, haˍ gʼawˇ ve chaw maˇ kʼoˆ, hkʼa shuˍ shuˍ gʼa keu ve yoˬ. 16Iˉsaˍreˍlaˆ chaw hui keu laˇ ve hpu chi hta‸ yuˬ leh, aˉ po kʼo bon yehˬ pon gʼa yehˇ ve yoˬ. Oˇ ve lehˬ, ngaˬ Iˉsaˍreˍlaˆ chaw hui hta‸ dawˇ nawˇ tuˬ awˬ pon hpeh‸ leh, nawˬ hui ve a sha‸ hta‸ vuiˬ hkʼaw‸ tuˬ awˬ pon hpeh‸ ve yoˬ, teh‸ Moˉseˍ hta‸ kʼoˆ piˇ ve yoˬ.

Kuiˇ hkehˇ lonˉ

17Gʼuiˬsha Moˉseˍ hta‸ chi hkʼe kʼaw‸ kʼoˆ piˇ ve yoˬ. 18Kuiˇ hta‸ yuˬ leh hkehˇ pe le lonˉ teˇ maˬ leh hkehˇ taˍ kuiˬ hta‸ gʼa te ve yoˬ. Hkehˇ oˇ ve hta‸ aˉ po kʼo bon yehˬ leh tuˉ tanˇ kuiˬ awˬ kaˍ lo gʼa teh taˍ leh, oˇ ve hkʼaw iˉ kaˆ gʼa keu taˍ ve yoˬ. 19Aˍronˍ leh yawˇ ve yaˇ teˇ hpaˍ iˉ kaˆ oˇ ve hta‸ yehˇ leh yawˇ hui ve hkui sheh la‸ sheh hta‸ gʼa tsuhˇ ve yoˬ. 20Aˉ po kʼo bon yehˬ hkʼaw lo‸-e htaˇ maˇ kʼoˆ, tuˉ tanˇ kuiˬ lo kʼai htaˇ maˇ kʼoˆ, yawˇ hui iˉ kaˆ tsuhˇ taˍ peuˬ ve kʼo, gʼa suh tuˬ maˇ heˆ. 21Yawˇ hui maˇ gʼa suh tuˬ, yawˇ hui ve hkui sheh la‸ sheh hta‸ gʼa tsuhˇ taˉ ve yoˬ. Chi ve lehˬ, yawˇ hui leh yawˇ hui ve awˬ ceuˬ awˬ hkʼaˇ teˇ co peuˬ teˇ co na yuˬ leh gʼa te tuˬ ve awˬ liˇ teˇ maˬ hpeh‸ ve yoˬ, teh‸ Moˉseˍ hta‸ kʼoˆ piˇ ve yoˬ.

Naˍ manˇ

22Gʼuiˬsha Moˉseˍ hta‸ chi hkʼe kʼaw‸ kʼoˆ piˇ ve yoˬ. 23Hawˉ jaˇ ve muˇ raˍ ngaˇ cawehˬ, sha hawnˉ nyiˇ cawehˬ ngaˇ hkanˉ, awˬ pe‸ hawnˉ ve suhˆ guiˬ kʼuˉ nyiˇ cawehˬ ngaˇ hkanˉ, 24hawnˉ jaˇ ve awˬ nu ve suhˆ guiˬ kʼuˉ ngaˇ cawehˬ leh shaˍ lonˍ chu 6 kaw hta‸ yuˬ leh, 25da‸ kehˬ ve naˍ manˇ hpeh‸ tuˬ gʼa te taˍ ve yoˬ. 26Aˉ po kʼo bon yehˬ hta‸ maˇ kʼoˆ, ka ti‸ shaˉcaˆ ta kʼoˍ hta‸ maˇ kʼoˆ, 27hpui lawˇ leh awˬ hkʼeun hkʼa peu-eˬ hta‸ maˇ kʼoˆ, aˬ miˍ kawˆ faiˇ leh oˇ ve hta‸ caˉ da‸ ve awˬ hkʼeun hkʼa peu-eˬ hta‸ maˇ kʼoˆ, 28sha hawnˉ tuˉ tanˇ kuiˬ hta‸ maˇ kʼoˆ, to nuˇ to shaˆ tuˉ tanˇ kuiˬ leh, oˇ ve hta‸ caˉ da‸ ve awˬ hkʼeun hkʼa peu-eˬ hta‸ maˇ kʼoˆ, iˉ kaˆ hkehˇ pe le hta‸ maˇ kʼoˆ, da‸ kehˬ ve naˍ manˇ yuˬ leh gʼa pfuhˍ piˇ ve yoˬ 29Chi hkʼe te ve hkʼaw, nawˬ lehˬ awˬ ceuˬ oˇ ve teˇ hpaˍ hta‸ gʼa chiˇ a‸ leh awˬ ceuˬ oˇ ve teˇ hpaˍ awˬ tehˬ awˬ na da‸ kehˬ la tuˬ yoˬ. Oˇ ve hta‸ hkʼa htawˇ ve chaw hkʼa peu-eˬ gʼa luˬ gʼa sheˆ tuˬ yoˬ. 30Oˇ hkʼe te peuˬ hkʼaw‸ nawˉ, Aˍronˍ leh yawˇ ve yaˇ teˇ hpaˍ ngaˬ ve paw hkuˇ hpeh‸ la tuˬ, yawˇ hui hta‸ naˍ manˇ pfuhˍ piˇ leh, 31Iˉsaˍreˍlaˆ chaw hui hta‸ chi hkʼe kʼoˆ piˇ-oˆ. Chi ve lehˬ, nawˬ hui teˇ co peuˬ teˇ co gʼa yehˇ tuˬ ve naˍ manˇ hpeh‸ ve yoˬ. 32Naˍ manˇ chi ve hta‸ chaw teˇ gʼaˇ le le maˇ gʼa yehˇ. Chi hkʼe ve naˍ manˇ hta‸ chaw teˇ gʼaˇ ka‸ maˇ gʼa te yehˇ. Chi ve lehˬ da‸ kehˬ jaˇ leh, nawˬ hui naˍ manˇ chi hta‸ da‸ kehˬ ve awˬ ceuˬ teh‸ gʼa shawˍ taˍ ve yoˬ 33Chi hkʼe ve naˍ manˇ hta‸ te yehˇ ve chaw leh, paw hkuˇ maˇ heˆ ve chaw hta‸ naˍ manˇ chi shehˆ piˇ ve chaw hta‸, ngaˬ ve chaw teh‸ kʼaw‸ shawˍ taˍ piˇ tuˬ ve maˇ heˆ, teh‸ Gʼuiˬsha Moˉseˍ hta‸ kʼoˆ piˇ ve yoˬ.

Sha hawnˉ

34Gʼuiˬsha Moˉseˍ hta‸ kʼaw‸ kʼoˆ piˇ ve, Awˬ pe‸ hawnˉ ve muˇraˍ, awˬ pe‸ hawnˉ ve suhˆ guiˬ kʼuˉ, gaˍbaˍnunˍ leh lawˇbanˍ chi teˇ hpaˍ hta‸ hkʼa ma-ehˬ tsuh yuˬ leh, 35da‸ jaˇ ve sha hawnˉ hpeh‸ la tuˬ te-o. Sha hawnˉ oˇ ve hta‸ aˉ leh‸ gʼa hkaw‸ leh gʼa da‸ kehˬ piˇ ve yoˬ. 36Teˇ hpaˍ hpaˍ hta‸ meuˉ-ehˍ hpeh‸ la htaˇ hkʼa gaˬ teˍ leh, aˉ po kʼo bon yehˬ hkʼaw cawˬ taˍ ve ka ti‸ shaˉ caˆ ta kʼoˍ gʼuˇ suhˍ lo gʼa hkaˆ pfuhˍ ve yoˬ. Sha hawnˉ chi ve hta‸ da‸ kehˬ jaˇ ve awˬ ceuˬ hpeh‸ ve yoˬ, teh‸ nawˬ hui gʼa shawˍ taˍ ve yoˬ. 37Chi hkʼe te taˍ ve sha hawnˉ hta‸ nawˬ hui awˬ to pon maˇ gʼa yehˇ. Ngaˬ awˬ pon fuiˍ teh taˍ ve da‸ kehˬ jaˇ ve mawˇ hpeh‸ ve yoˬ, teh‸ nawˬ hui gʼa shawˍ taˍ ve yoˬ. 38Chi hkʼe ve sha hawnˉ hta‸ te htaˇ, a shu yawˇ awˬ to pon yehˇ ve chaw hta‸ ngaˬ ve chaw teh‸ kʼaw‸ shawˍ taˍ piˇ tuˬ ve maˇ heˆ, teh‸ Moˉseˍ hta‸ kʼoˆ piˇ ve yoˬ.

اکنون انتخاب شده:

Tawˆ kʼai ve li‸ 30: LHBE

های‌لایت

کپی

مقایسه

به اشتراک گذاشتن