Tawˆ kʼai ve li‸ 2

Moˉseˍ paw la ve

1Awˬ yanˇ oˇ ve hkʼaw, Leˍviˆ chaw teˇ gʼaˇ lehˬ yawˇ ve awˬ ceuˬ awˬ hkʼaˇ yaˇ miˇ teˇ gʼaˇ hta‸ heuˆ ve yoˬ. 2Maˇ maw maw yaˇ miˇ oˇ ve yaˇ hu la leh, yaˇ paˍ teˇ gʼaˇ paw la ve yoˬ. Yaˇ paˍ ehˉ chi da‸ jaˇ ve hta‸ yawˇ gʼa mawˬ ve teˇ yanˇ, ha pa 3 maˬ hkʼa gaˬ yawˇ hta‸ yuˬ faˉ taˍ ve yoˬ. 3Yawˇ lehˬ, awˬ hkʼaw‸ nawˉ yaˇ paˍ chi hta‸ kʼaw‸ faˉ taˍ maˇ gʼa ve teˇ yanˇ, po kʼoˍ teˇ maˬ yuˬ leh iˉ kaˆ maˇ lo‸ gaˬ tuˬ suhˆ tcuhˇ hkʼa deh‸ shehˆ peuˬ hkʼaw‸ nawˉ yaˇ paˍ ehˉ hta‸ oˇ kaˬ lo keu taˍ ve yoˬ. Peuˬ hkʼaw‸ nawˉ yawˇ hta‸ iˉ kaˆ gʼuiˬ pfuhˍ paˇ lo cawˬ ve lo de hkʼaw faˉ taˍ ve yoˬ. 4Yawˇ ve aw viˉ ma lehˬ, yaˇ ehˉ oˇ ve hkʼaˬ hkʼe hpeh‸ chehˇ ve hta‸ gʼa shiˍ tuˬ, yawˇ hta‸ maˇ vuiˇ maˇ neˇ kuiˬ lo chehˇ leh nyi taˍ ve yoˬ.

5Teˇ nyi htaˇ, jawˇmawˇ yaˇ miˇ oˇ kaˬ lo iˉ kaˆ ca hehˉ la leh, yawˇ ve awˬ ceˬ ma teˇ hpaˍ geh iˉ kaˆ gʼuiˬ pfuhˍ paˇ lo ca guiˇ toˇ chehˇ ve yoˬ. Yawˇ lehˬ lo de kaˍ lo po kʼoˍ hta‸ gʼa mawˬ leh, yawˇ ve awˬ ceˬ ma teˇ gʼaˇ hta‸ ca yuˬ tcuh ve yoˬ. 6Yawˇ po kʼoˍ hta‸ hpaw nyi ve teˇ yanˇ, yaˇ paˍ ehˉ teˇ gʼaˇ hawˬ chehˇ ve hta‸ gʼa mawˬ leh, yaˇ paˍ ehˉ oˇ ve hta‸ ha kʼaˉ jaˇ ve yoˬ. Chi ve lehˬ, Heˍbrehˇ chaw teˇ gʼaˇ ve yaˇ yoˬ, teh‸ kʼoˆ ve yoˬ.

7Oˇ htaˇ, yaˇ paˍ ehˉ ve awˬ viˉ ma kʼoˆ ve, Yaˇ paˍ ehˉ chi ve hta‸ cuˉ taw piˇ tuˬ, Heˍbrehˇ yaˇ miˇ teˇ gʼaˇ hta‸ ngaˬ gʼa ca kuˬ veu laˇ tuˬ laˇ, teh‸ na nyi ve yoˬ.

8Jawˇmawˇ yaˇ miˇ yawˇ hta‸ kʼo‸-e peu leh ca shiˍ veu laˇ tcuh ve yoˬ. Hkʼe te leh yaˇ miˇ ehˉ chi gʼuiˇ kʼo‸-e leh yaˇ paˍ ehˉ ve awˬ e hta‸ shiˍ veu laˇ ve yoˬ. 9Oˇ htaˇ, jawˇmawˇ yaˇ miˇ yawˇ hta‸ kʼoˆ piˇ ve, Yaˇ ehˉ chi hta‸ ngaˬ awˬ pon cuˉ taw piˇ-oˆ. Ngaˬ nawˬ hta‸ awˬ hpfuhˇ piˇ laˇ tuˬ yoˬ, teh‸ kʼoˆ piˇ ve yoˬ. Hkʼe te leh, yaˇ miˇ oˇ ve yaˇ ehˉ hta‸ yuˬ leh cuˉ taw piˇ ve yoˬ. 10Yaˇ ehˉ oˇ ve uiˍ la ve teˇ yanˇ, yawˇ hta‸ jawˇmawˇ yaˇ miˇ geh shiˍ laˬ ve yoˬ. Yawˇ lehˬ, yaˇ paˍ chi hta‸ yawˇ ve yaˇ hkʼe shawˍ leh, yawˇ hta‸ Moˉseˍ teh‸ meh piˇ ve yoˬ. Awˬ lawn kʼo, Yawˇ hta‸ ngaˬ iˉ kaˆ hkʼaw yuˬ tawˆ taˍ ve yoˬ, teh‸ kʼoˆ ve yoˬ.

Moˉseˍ Meˇdiˍanˍ mvuhˇmiˬ lo hpaw-e ve

11Moˉseˍ uiˍ la ve teˇ yanˇ, yawˇ ve chaw teˇ hpaˍ geh ca guiˇ kʼai leh, yawˇ hui kanˉ gʼaˇ hte‸ gʼa te chehˇ ve hta‸ gʼa mawˬ ve yoˬ. Eˇjiˇtu‸ chaw teˇ gʼaˇ, Heˍbrehˇ chaw hta‸ tiˇ pehˍ chehˇ ve hta‸ yawˇ gʼa mawˬ ve yoˬ. 12Yawˇ hkʼaˬ hpawˇ chi hpawˇ chiˇ nyi leh, chaw teˇ gʼaˇ hta‸ kaˬ maˇ mawˬ ve teˇ yanˇ, Eˇjiˇtu‸ chaw oˇ ve hta‸ yawˇ tiˇ pehˍ leh shehˇ shiˍ hkʼaw gaˆ fiˆ taˉ ve yoˬ. 13Awˬ hkʼaw‸ nawˉ teˇ nyi yawˇ teˇ pawˆ kʼaw‸ laˬ leh, Heˍbrehˇ chaw nyiˇ gʼaˇ ya‸ da‸ chehˇ ve hta‸ gʼa kʼaw‸ mawˬ ve yoˬ. Shu hta‸ ya‸ ve chaw geh yawˇ kʼai leh, Aˬ hto‸ ma pa taw, nawˬ ve awˬ chawˇ hta‸ dawˆ ve le, teh‸ kʼoˆ piˇ ve yoˬ.

14Chaw oˇ ve hpaˇ lehˬ, Ngaˬ huiˉ maˬ awˬ hkʼoˆ jawˇmawˇ te leh suhˉ jehˬ tuˬ, a shu nawˬ hta‸ teh taˍ ve le. Nawˬ Eˇjiˇtu‸ chaw hta‸ tiˇ pehˍ ve hkʼe, ngaˬ hta‸ htawˇ tiˇ pehˍ laˇ tuˬ ve laˇ, teh‸ kʼoˆ piˇ ve yoˬ. Oˇ htaˇ Moˉseˍ kawˆ jaˇ leh, Ngaˬ te taˍ ve kanˉ hta‸ shu shiˍ peuˬ law, teh‸ dawˇ ve yoˬ. 15Awˬ lawn chi ve hta‸ jawˇmawˇ gʼa kaˇ htaˇ, yawˇ Moˉseˍ hta‸ tiˇ pehˍ tuˬ ca ve yoˬ. Ya‸ hkʼaˇ, Moˉseˍ Meˇdiˍanˍ mvuhˇmiˬ lo hpaw-e leh oˇ kaˬ lo chehˇ taˍ ve yoˬ.

16Teˇ nyi htaˇ, Moˉseˍ nanˬ bawˍ teˇ maˬ awˬ paˇ lo mui chehˇ htaˇ, Meˉdiˍanˍ mvuhˇmiˬ hkʼaw chehˇ ve paw hkuˇ Yeˍtaˍroˍ ve yaˇ miˇ suhˍ gʼaˇ oˇ kaˬ lo gaˬ la leh, yawˇ hui awˬ pa ve yawˬ leh aˉ che‸ teˇ hpaˍ hta‸ iˉ kaˆ ca taw piˇ la ve yoˬ. 17Awˬ nu ve yawˬ hawˉ shehˍ hpaˇ teˇ hpaˍ htawˇ kʼaw‸ gaˬ la leh, Yeˍtaˍroˍ ve yaˇ miˇ teˇ hpaˍ hta‸ gʼa‸ kʼoˬ piˇ ve yoˬ. Moˉseˍ tu leh yaˇ miˇ teˇ hpaˍ ve yawˬ ehˉ teˇ hpaˍ hta‸ iˉ kaˆ taw piˇ ve yoˬ. 18Yawˇ hui ve awˬ pa geh kʼaw‸ gaˬ la ve teˇ yanˇ awˬ pa lehˬ, Hkʼaˬ hkʼe te ya‸ nyi nawˬ hui teˇ na‸ kʼaw‸ gaˬ la ve le, teh‸ na nyi ve yoˬ.

19Yawˇ hui kʼoˆ ve, Eˇjiˇtu‸ chaw teˇ gʼaˇ ngaˬ hui hta‸ yawˬ hawˉ paˍ teˇ hpaˍ ve la‸ sheh hkʼaw ponˬ laˇ leh, ngaˬ hui ve yawˬ teˇ hpaˍ awˬ pon iˉ kaˆ nyiˉ laˇ ve yoˬ, teh‸ kʼaw‸ kʼoˆ piˇ ve yoˬ.

20Yawˇ hui ve awˬ pa lehˬ, Chi beu‸ yawˇ hkʼaˬ lo chehˇ le. Aˬ hto‸ ma pa taw nawˬ hui yawˇ hta‸ oˇ kaˬ lo baˬ taˉ ve le. Ngaˬ hui geh awˍ caˇ la tuˬ yawˇ hta‸ ca kuˬ-o‸, teh‸ yawˇ hui hta‸ kʼoˆ piˇ ve yoˬ.

21Hkʼe te leh, Moˉseˍ Yeˍtaˍroˍ geh chehˇ leh, yawˇ ve yaˇ miˇ Ziˆpawˇraˆ hta‸ heuˆ ve yoˬ. 22Yaˇ miˇ oˇ ve yaˇ paˍ teˇ gʼaˇ paw la leh, yawˇ hta‸ Geˍraˍshonˍ teh‸ meh piˇ ve yoˬ. Awˬ lawn kʼo, Ngaˬ lehˬ shu ve mvuhˇmiˬ hkʼaw ca chehˇ la ve hkehˉ chaw hpeh‸ ve yoˬ, teh‸ kʼoˆ ve yoˬ.

23Awˬ yanˇ maw la leh, Eˇjiˇtu‸ jawˇmawˇ suh-e ve yoˬ. Ya‸ hkʼaˇ, Iˉsaˍreˍlaˆ chaw teˇ hpaˍ shu ceˬ te leh hkʼanˇ chehˇ sheˍ ve yoˬ. Yawˇ hui hkʼanˇ ve awˬ hkawˇ hta‸ Gʼuiˬsha geh gaˬ ve yoˬ. 24Gʼuiˬsha lehˬ yawˇ hui hkʼanˇ chehˇ ve awˬ hkawˇ hta‸ gʼa kaˇ leh, Aˍbraˍhanˍ, Iˉcaˆ, Yaˍkoˆ hui hta‸ te piˇ taˍ ve ka ti‸ hta‸ kʼaw‸ dawˇ nawˇ la ve yoˬ. 25Yawˇ hui hkʼaˬ hkʼe hpeh‸ chehˇ ve hta‸ Gʼuiˬsha gʼa mawˬ leh, yawˇ hui kuˬ hkawˇ hta‸ yawˇ na yuˬ ve yoˬ.

اکنون انتخاب شده:

Tawˆ kʼai ve li‸ 2: LHBE

های‌لایت

کپی

مقایسه

به اشتراک گذاشتن