Josue 5
5
1Amulei suma Amor-râ pet suma sä kaka abo alum ma Jurdê-na woi abo ma fladegenina kamulei suma Kanan-na pet suma a nga kaka avun alum ma ngol ma Mediterane-na, a hum ala Ma didina mi so alum ma Jurdê-na woi avok Israel-lâ gak a djak keyo d’a. Huruzi ka mbina avok Israel-lâ, ad’engêzi d’a tchol avorozid’a nga d’uo d’a.
A ngat Israel suma a vud’uzi bugolâ bayâd’a
2Ata yi máma Ma didina mi de mi Josue ala: Ang tchet ahinad’a mbigeud’a, ang ngat andjaf Israel suma a vut danana bayâd’a. 3Josue mi tchet ahinad’a mbigeud’a, mi ngat Israel-lâ bayâd’a yam ahina d’a Aralot-ta#5.3 Aralot: Nala, Bayâd’a.. 4D’op zla d’a Josue mi ngad’azi bayâd’a kata ba wana: Kayam Israel-lâ pet suma a buzugï woi avo Ezipte-na, gro andjof suma dur ayîna pet a bo woi abagei hur fulâ kur lovota bugol la azi buzugï woi avo Ezipte-d’a. 5Suma pet suma a buzugï woi avo Ezipte-na ni suma a ngat bayâd’ina. Wani suma pet suma a vut abagei hur fulâ kur glovota bugol la azi buzugï woi avo Ezipte-d’ina a ngat nga sa bayâ tu d’i. 6Kayam Israel-lâ a le biza d’a abagei hur fulâ dok fid’i ki tita, gak suma dur ayî suma a buzugï woi avo Ezipte suma a hum nga vun Ma didina d’uo na, a dap peyo. Kayam Ma didina mi gunuzi tam ala azi mba kal kur ambas sa ambira ki mbul ayuma a nga sor kä kua d’a mi hle vunam kat mabuyozi ngolo á heizid’a d’i. 7Ni grozina ba, Ma didina mi vragazi blangâziya. Josue mi ngad’azi bayâd’a, kayam azi ngad’azi nga bayâd’a ata yima azi nga kur tita kur lovotina d’i. 8Kid’a a ngad’azi bayâd’a pet dad’a, a ar kaka kur kangâ gak mbilizi mi tchila.
9Ma didina mi de mi Josue ala: Ini an pad’agi wa zulo ma ei Ezipte-na woi kagiya. Ni kayam ndata ba, a nga yi yi máma gak ini ala Gilgal.
Pak ma a lum avok kikidji avo Kanan-na
10Israel-lâ a ve kangâ Gilgal, a le vun til ma Pa’â kur bur ma dogo yam fid’ina hi til mámina ki fladeged’a hur ful la Jeriko-d’a. 11Tcha ndjivinda azi te te ma yam ambasa ma a lum kavungô ma bei angufina kawu ma a hawâma, kur bur máma tamba. 12Tcha yorogod’a azi te te ma yam ambasina, manna ad’um ka; Israel-lâ a fum nga d’uo d’a. Kur biza ndata azi te ni te ma kur ambas sa Kanan-ndina.
Ma ngol ma dur ayîna hi Ma didinina
13Kid’a Josue mi mba go ki Jeriko-d’a, mi hle iram akulo, mi gol yina. Gol wani, sana mi nga tchola avorom ki mbigeu mam mba fiyaka pata woi abomu. Josue mi hut gevemu, mi djobom ala: Angî sa mamina d’oze angî sana hi mami suma djangûnina zu?
14Mi hulong dum ala: Hawa! An ni ma ngol ma dur ayîna hi Ma didinina, an mba wa da’. Josue mi grif kä andaga avoromu, mi dum ala: Salana, ang min dan an azong mangâ nana ge?
15Ma ngol ma dur ayîna hi Ma didinina mi de mi Josue ala: Ang pat atuguru ma asengâ woyo, kayam yima ang nga tchola kua wana ni yima a tinim iram vama. Josue mi pat atuguruna woi mi.
اکنون انتخاب شده:
Josue 5: BA
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Azumeina Bible © Alliance Biblique du Tchad, 1999.