Suma ka sariyad’a Wana ni modo zla d’a kuruta
Wana ni modo zla d’a kuruta
Mbaktumba hi Suma Ka Sariyad’id’a, ti de zlad’a ni yam atchogoi d’a suma a nga tcha tatad’a gak mba ata kaka hi Israel-lîd’a yam ambas sa Kanan-ndid’a, ki tin nda a tin amulid’a mi.
Ki vun francais-na a yi mbaktum ndata ala Juges, nala, Suma Ka Sariyad’a, wani väd’u mata tak kei ala sum ndazina a nga ni suma ka sariyad’a yam Israel-lâ hol li, wani a ni suma nglo suma avorozina mi. Kayam ndata, mbaktum ndata ndak á yat simiyêt ala Suma Ka Sariyad’a, wani kur mbaktumba a yi sum ndazina ala suma nglo suma avok Israel-lîna mi.
Simiyê mbaktum ndata tcholï nata zla d’a irat ta nga d’i vad’ud’a yam sunda ndandala d’oze kaka hi suma nglo avok Israel suma hiunina mi. Zla ndata nga d’i vei ad’ud’a yam suma Alona mi zlazi vunam suma hlazi kal lei tegles yam suma suma a nga tinizi nglod’a avok sumina. Sum ndazina Alona mi tinizi ná te yam suma d’oze á prut andjafâ tu d’oze andjaf ma ablau ma suma a nga lum ndakina woyo.
Mbaktumba hi Suma Ka Sariyad’id’a ndak á walat ad’u hindi.
Wal la avoka nga d’i de zlad’a yam ahle suma a le ba Israel-lâ a mba kak yam ambas sa Kanan-ndina gak mba ata matna hi Josue-na. Gol 1.1–2.10.
Wal mat ta mbàd’a nga d’i tagei woi ala ni nana ba, Alona nga mi sut sum mama woi ata yima nga mi man suma nga mi sunuzi á tak sun nda ndandala woi yam sut ndata mi ge? Gol 2.11–16.31.
Wal mat ta hindid’a nga d’i vei ad’ud’a yam zla d’a mbà d’a nga d’i tagei tit ta batrang nga aduk Israel-lîd’a avok tinda hamulid’a. Gol 17.1–21.25.
Kur Mbaktumba hi Suma Ka Sariyad’id’a, ahle suma a mba yam Israel-lîna a tcholî ata tit mazi d’a kAlonid’a. Ata yima a nga tit d’ingêr ruo avoroma, suma azi kak adigazina d’oze ndrozi sumazina a lazi ndaka. Wani le azi hulong gen Alona, a yum ala mi ndjunuziya ni, mi prud’uzi woi mi. Burâ ki burâ Israel-lâ a nga ki d’od’oka á tuwal fileina hi suma Kanan-nina d’oze a hut go kAlona yam vama azi minima d’i (Gol 17.1–18.30), d’oze a mar yam gat ta tetenga hAlonid’a. Gol 19.1–21.25. Ata yima a nga le hina na, ladjï Alona mi ndjunuzi d’uo ni, a i ná b’laka woyo. t Wana ni wal mata
Ahle suma a le gak matna hi Josue-nina 1.1–2.10
Suma nglo suma avok Israel-lîna 2.11–16.31
Ahle suma teteng suma a lena 17.1–21.25
اکنون انتخاب شده:
Suma ka sariyad’a Wana ni modo zla d’a kuruta: BA
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Azumeina Bible © Alliance Biblique du Tchad, 1999.