Gat ta a hat á mbàd’id’a 34
34
Matna hi Moise-sâ
1Moise mi tchol hur ful la Mowap-pa, mi djak akulo yam ahina d’a Nebo-d’a, mi i akulo yam ahina d’a Pisga d’a ngagad’a yam Jeriko d’ara yat ta ked’iwurenga. Ma didina mi tagam ambasa pet, 2tinï ad’ud’a Galät dei gak mba Dan, ki d’a hi Neftali-d’a, ki d’a hi Efraim-mba, ki d’a hi Manase-d’a, ki d’a hi Juda-d’a pet gak mba avun alum ma ngol ma Mediterane-na, 3ki d’a abo ma sutna kandaga d’a papana d’a avun alum ma Jurdê-nid’a, ki hor ra Jeriko-d’a, ki Jeriko azì ma ngol ma amulongeîna nga kua na gak mba Sowar. 4Ma didina mi dum ala: Wana nambas sa an hle vunan kat ki gun tad’a mi Abraham ki Isak ki Jakob ala: An mba ni hat mandjavagiya d’a. An tagangziya wa; ang wat ki irangû, wani ang mba kal kur ri.
5Moise azongâ hi Ma didinina mi mit sä kolâ yam ambas sa Mowap-pa d’igi Ma didina mi de na. 6Ma didina mi tozom kur hor ra yam ambas sa Mowap pa ngagad’a yam Bet-Peyor d’ara. Gak ini sa wum nga asuwam mbi.
7Ata yima Moise mi mitna, bizamî kis kam dok mbà, mi mit ni kad’engêm bei iram mbi mbut zizimit ba. 8Israel-lâ a tchi Moise hur ful la Mowap-pa gak burâ dok hindi. Bur ma tchina ki ma yor tad’a yam Moise-sâ daba.
9Josue Nun goroma mi oî ki muzuk ma ned’a, kayam Moise mi tin abom kamu. Israel-lâ a ge yazi kä avorom d’igi Ma didina mi he vuna mi Moise na.
10 Ma djok vun Alona ma tchol aduk Israel-lâ d’igi Moise ma Ma didina mi wum ira ki ira na na nga d’i. 11Ma didina mi sunum Ezipte á ndak vun ahle suma simata kahle suma atchapma avok Faron kazungeî mama ki sum mama pet. 12Moise mi lahle suma mandarâ kad’enga avok Israel-lâ mi.
اکنون انتخاب شده:
Gat ta a hat á mbàd’id’a 34: BA
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Azumeina Bible © Alliance Biblique du Tchad, 1999.