Gat ta a hat á mbàd’id’a 24
24
Gat ta yam dika hatchad’id’a
1Moise mi de kua ala: Le sana mi vatchad’a, bugola, tam lum nga djivi kat tuo kayam vama ti lum nga ata yam mbuo na ni, mi b’irit mbaktum mba dik atchad’a, mi hattchi abod’u, mi digit tei avo hatamu. 2Le ti nde woi avo hatam da ni, ti ndak á ve mandjuf ma dingâ. 3Le ndjuvut ma vat bugolâ hurum vat nga d’uo, le mi b’irit mbaktum mba dik atchad’a mi hattchi abod’u, mi digit tei avo hatamu, d’oze le ndjuvut ma vat bugolâ mi mit ni mid’a ni, 4ndjuvut ma digit tei avo’â, mi ndak á vat ti, kayam ti mbut ndjendjed’a da’, kayam ni vama ndjendjed’a avok Ma didina. Ar agi mbud’ugi suma tchona kur ambas sa Ma didina Alo magina nga mi hagizi á tagi kat wanda d’i.
Gat ta yam sama mi vatchad’a awilina
5Moise mi de kua ala: Le sana mi vatchad’a awiliya ni, agi aram mi i avun ayî ma durâ d’i, agi tinim sun nda ding kam mbuo mi, agi aram mi le bizad’a hawa sop á le furîd’a kamam mba mam vat awilid’a.
Gat ta yam vama dengid’a
6Moise mi de kua ala: Ar agi vagi ahina d’a lutna d’oze gorotna denga abo sa d’i, kayam ni vama mam kak ki arid’a kama.
Gat ta pat sana woid’a
7Moise mi de kua ala: Le ma Israel-lâ mi ve wiyema, nga mi lum magomba d’oze mi guzum mbeyo ni, agi tchum mbeyo. Hina wani, agi mba d’elegi tcho d’a led’a woi adigagiya.
Gat ta yam libinid’a
8Moise mi de kua ala: Yam zlad’a hi libinid’a, agi ngomogi zlad’a pet ta suma ngat buzu suma hi Levi-na a had’agizid’a, agi ngomogizi djiviya, agi tid’igi yam ahlena pet suma an hagi vuna kazina mi. 9Agi djib’eregi yam vama Ma didina Alo magina mi lum ki Miriyam ata yima agi nga kur lovota, bugol la agi buzugugï woi kur ambas sa Ezipte-d’ina.
Gat ta yam vama dengid’a
10Moise mi de kua ala: Le wiyegina mi nde va abogi mi dengêgi va ni, ar agi kalagi avo hatam á veï vama mi dengêgizina d’i. 11Agi tchologi woi abua; sama mi nde vana abogina, mi vagï vama mi dengêgizina woi abua. 12Sa máma le ni ma houd’a ba, mi dengêgi baru mam mba ngola ni, agi arat ti bur abogi d’i. 13Agi hulongômzi bei afata nika, kayam ni ndat ba, mam zlubut kam kä andjege. Hina wani, mam mba mi b’agi vuna kagiya; wana ni sun magi d’a d’ingêr ra avok Ma didina Alo maginid’a.
Gat ta a hat yam ma houd’id’a
14Moise mi de kua ala: Ar agi kid’eyêgi ir sama hou ma le sun nda beged’ina, d’oze ma kid’ak ma le sun nda beged’ina d’i. Le sa máma ni wiyegina d’oze angei ma nga kaka yam ambas magid’ina pî, agi kid’eyêm iram mbi. 15Agi hum bege mam mba mi le sunda kat burâ tud’a bei afata nika, kayam mam mi sama houd’a, nga mi le lilinga á ve bege mamba d’i. Le hina d’uo ni, mba mi tchi avok Ma didina kagiya, zlad’a mba d’i vagiya.
Nge nge pî mba mi tchol avun zla mamba
16Moise mi de kua ala: Ar agi tchagi abuyod’a yam tchod’a hi grod’id’a d’i, ar agi tchagi grod’a yam tchod’a habuyod’id’a d’uo mi, ar agi tchagi nge nge pî yam tcho mam mba mi lata.
Gat ta yam ahle suma ndak á lazi yam sama houd’ina
17Moise mi de kua ala: Ar agi lagi ir angeina d’oze ma hokuyod’a ata yima ka sariyad’a d’i, ar agi vagi barud’a hatcha d’a modonod’a denga d’uo mi. 18Agi djib’eregi ala adjeu agi ei ni magomba kur ambas sa Ezipte-d’a, Ma didina Alo magina mi tchugugï woi akulo. Ni kayam ndata ba, an hagi vun ma he ma wana wana, agi tid’igi kamu.
19Fata agi zagi awu maginid’a, le mbugulud’a ti mar kä blogogi kur asinena ni, agi hulong yot ti, agi arat ni mangeina ki ma hokuyod’a katcha d’a modonod’a kayambala Ma didina Alo magina mi b’e vunam kagi kur sun nda lara ge pet ta agi mba lat kabogid’a d’a. 20Ata yima agi tchagi agu olif maginina, agi lagi hina mi, agi hulongôgi ata blangâm ma ar akulona á tchid’a d’i. Agi aragizi ni mangeina ki ma hokuyod’a katcha d’a modonod’a. 21Ata yima agi ngad’agi vud’a guguzlu magid’ina, agi lagi hina mi, agi hulongôgi ata blangât ma ar akulona d’i, agi arat ni mangeina ki ma hokuyod’a katcha d’a modonod’a. 22Agi djib’eregi ala adjeu agi ei ni magomba kur ambas sa Ezipte-d’a. Ni kayam ndata ba, an hagi vun ma he ma wana wana, agi tid’igi kamu.
اکنون انتخاب شده:
Gat ta a hat á mbàd’id’a 24: BA
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Azumeina Bible © Alliance Biblique du Tchad, 1999.