1 Samuel 20
20
Jonatan mi ngom David abo Saul
1David mi tchol ringâ avo Nayot go ki Rama, mi i mi fe Jonatan, mi dum ala: An le ni me ge? Tcho manda ni me ge? Tcho d’a an lat avok abunga ni me ba, mi halan á tchid’a ge? 2Jonatan mi hulong dum ala: Nga na d’i! Va nga mi lang ngi! Abun nga mi le vama ngol loze ma gor bei dan ndi. Ni nana ba, mba mi ngeyen zla ndata ge? Zla nga d’i!
3David mi de mi Jonatan kua ki gun tad’a ala: Abung mi we woi tetet ala ang hurung vanu. Dam mi de wa kurum ala: Ar Jonatan mi we zla ndata tala hurum zal d’a d’i. Wani Ma didina ni Ma bei matna, ang nga ki irang wan mi, adigami nga dei ki matna d’i.
4Jonatan mi de mi David ala: An mba ni le vama ang minima.
5David mi hulong dum ala: Gola! Tilâ mi deî navini; ni bur ma an mba ni kak kamulâ á te tenina, wani ang aran an i ni ngei tan abagei gak fladeged’a hi bur ma hindinid’a. 6Le abung mi djib’er kan yam mba d’a an mbaza d’uo d’a ni, ang dum ala: David mi tchenen ngola ala an aram mam i avo hatam Betelehem atogo zak, kayam azi nga ki he d’a hawa d’a ngat buzuna kur bizad’a ki bizad’a d’a ngad’a yam ades ma lara ge petna. 7Le mi dang ala: Djiviya ni, ni halasa yam an azong mangâ. Wani le hurum zala ni, ang wala mi nga wa hurum kan á tchid’a. 8Ang tak djivi manga woi mi an azong mangâ, kayam ang djin vunang ki an azong mangâ ki simiyê Ma didina. Le an le vama tcho ni, ni ang tanga ba, tchanu. Ni kayam me ba, ang in mabung mbeî ge?
9Jonatan mi dum ala: Ar ang djib’er ala an we ni nga d’a abun nga hurum kang á tchid’id’a ko ba, an dang nguo ni de na d’i?
10David mi de mi Jonatan ala: Le abung hulongông zla d’a ded’a kad’enga ni, ni nge mba mi dan nge?
11Jonatan mi de mi David ala: Mbei i kele. Azi buzuk kel zla tazi djak. 12Jonatan mi de mi David ala: Ma didina Alona hi Israel-lîna ni glangâs mana, an mba ni hal hur abun avin ndoze siyâ aboi na hina dedege, le mi nga hurum djivid’a kangû, le an sun nga sa á dang nguo ni, 13ar Ma didina mi mban ndak ka ngol la kala kanu. Le ba abun nga hurum á lang tchod’a ni, an mba ni dangû, an arang ang iya, kayam ang i ki halasa. Ar Ma didina mi kak ki sed’eng d’igi mi kak kabun na mi. 14Le an nga ki iran tua ni, ang le djivid’a hi Ma didinid’a ki sed’en ndala va lan nduo d’a. 15Le Ma didina mi dap mang suma djangûna woi yam andagad’a pet pî, ang ar djivi mang nga kanda woi yam andjavan ndi.
16Kayam Jonatan mi djin vunam kandjafâ hi David-na ala: Ar Ma didina mi sä David atchugulum ki mam suma djangûna. 17Jonatan mi gun tam avok David kua, kayam mam hurum vum heî, kayam mam le kamî d’igi mam tamba na.
18Jonatan mi de mi David ala: Tilâ mi deî navini, azi mba djib’er kangû, kayam blangâng mba mi ar kä hawa. 19Kur bur ma hindina ang tchugï aseng kä á i ata yima ang ngei fata kua kur bur ma zlad’a lena, ang kak go kahina d’a Ezel-la. 20An mba ni yet yeûd’a ngarad’a kat yeyet yan hindi d’igi an d’ingêrî va na. 21Ata yi máma an mba ni sun gogorâ, an mba ni dum ala: Ang i halanï yeûd’a. Le an dum ala: Gola! Yeûd’a blogong kä wana, ang yod’ïya ni, ang mbeya, ang mba kak ki halasa; zlad’a ding nga d’i; Ma didina ni Ma bei matna.
22Wani le an de mi gogorâ ala: Gola! Yeûd’a sä avorong wan ndö na ni, ata yi máma ang iya. Kayam Ma didina mi hang lovota á id’a ni mamu. 23Wana ni zla d’a ei vei banad’a kata: Gola! Ma didina ni ma glangâsâ adigei ki ang gak didin.
24Wani David mi i ngei abageya; ni bur ma tilâ mi deî kuana, amulâ mi kak kä á te tena. 25Amulâ mi kak kä ata yi mam ma kak ma adjeu deina, yam zlam mam mba nga tinda ata gongid’a. Jonatan mi tchol akulo, Apner mi nga kaka gen Saul, wani yina hi David-na mi ar kä hawa. 26Wani Saul mi de nga zla kur bur máma d’i, mi djib’er ala: David va lumî le, mi nga ni yed’et ti, gagazi mi nga ni yed’et ti.
27Tcha ndjivin kur bur ma mbàna hi tilîna, yina hi David-na mi nga kä hawa d’ei. Saul mi de mi goroma Jonatan ala: Ni kayam me ba, Jesse goroma mi mba ata tena kama ki ini d’uo ge?
28Jonatan mi de mi Saul ala: David mi tchenen ngola ala an aram mam i Betelehem. 29Mi dan ala: An tchenengû, ang aran an iya, kayam ami nga ki he d’a hawa d’a ngat buzuna kur azina ngad’a yam adesâ, wani wiyena mi hanï vuna ala an iza. Le ang hurung vanu ni, ang aran lovota an i ni gol b’oziyona. Ni kayam ndata ba, mam mba ata te mangâ d’uo ni na.
30Ata yi máma Saul hurum zal ngola ata Jonatan, mi ngulum ala: Ang gor ma yang nga d’uo ma bei hum vun máma, an we nga d’ala angî Jesse goroma banama ni yam zulo mangâ ki ma hasungâ mi d’uo zu? 31Wani le Jesse goroma nga ki iram yam andagad’a tua ni, ang mba kak ki halasa d’i, leu manga mba d’i kak djivi d’uo mi; ki tchetchemba, ang sun i halamïya, a mbeyendjïya, kayam mi ndak á tchid’a.
32Jonatan mi hulong de mabum Saul ala: Ni kayam me ba, a tchum ge? Mi le ni me ge? 33Saul mi hlasap mamba nga mi pigid’et á tchok Jonatan. Jonatan mi wala ni zla d’a abum ngat kurum á tchi David-ta. 34Jonatan mi tchol akulo kayîna ngola avun tena, mi te nga tena kur bur ma mbàna hi til mámina d’i, kayam mam nga ki hur ma hata yam David, kayam me abum nga mi lum ndaka.
35Tcha ndjivin yorogod’a Jonatan mi i abagei á gol David d’igi azi de tazi na. Mi ve gogorâ ad’um tu, 36mi dum ala: Ang ring ang i halï yeû d’a an yed’eta. Gogorâ mi ringâ, Jonatan mi yet yeû d’a dinga ti kal sä woi kamu. 37Kid’a gogorâ mi mbaza ata yima Jonatan mi yettcha yeûd’a kua avo’â, Jonatan mi er ad’um akulo blogom ala: Yeûd’a ti kal sä woi kang hina d’uo zu? 38Mi er ad’um akulo kua ala: Ang b’attcha atogo, ang tchol li. Gogorâ hi Jonatan-na mi yoï yeûd’a, mi hulongî mi mba gen salama. 39Wani gogor máma mi we nga ad’u zla ndata d’i; ni Jonatan azi ki David hol ba, a wäd’u zla ndata. 40Jonatan mi hahle mam suma sïna abo gogor ma ki sed’ema, mi dum ala: Ang izi avo. 41Kid’a gogorâ mi id’a, David mi tcholï iram abo ma sutna, mi tchok yam kä andaga, mi grif kä gigrif yam hindi. Azi ki banama djak a bet tazi kok, a nde tchina; sama tchi ngolina ni David.
42Jonatan mi de mi David ala: Ang i lafiya! Ki tchetchemba, ei djak guni wa tei ki simiyê Ma didina ala ar Ma didina mi kak glangâsâ adigeya, aduk andjavan kandjavang mi gak didin.
43David mi tchol iya, Jonatan mi hulong avo hur azì ma ngolâ.
اکنون انتخاب شده:
1 Samuel 20: BA
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Azumeina Bible © Alliance Biblique du Tchad, 1999.