Roma 10
10
O le Vala‘auina o Nu‘u ‘Ese
1Le ‘au uso e, o le mana‘o lava lenei o lo‘u loto, ma la‘u tatalo i le Atua mo Isaraelu, ‘ia fa‘aolaina i latou.#Galu 22.3 2Auā ‘ou te molimau ‘iā te i latou, ‘ua latou mā‘elegā i la le Atua, ‘ae lē tusa ma le malamalama. 3Auā ‘ua lē iloa e i latou le amiotonu mai le Atua, ma ‘ua sā‘ili e fa‘atū la latou lava amiotonu, ‘ua latou lē usiusita‘i ai i le amiotonu mai le Atua.#Roma 9.31-32 4Auā o le i‘uga o le tulafono o Keriso lea, e o‘o mai ai le amiotonu i ē fa‘atuatua uma lava.#Mata 5.17; Ioane 3.18; Epe 8.13
O le Fa‘aolataga mo Tagata Uma
5Auā ‘ua tusia e Mose le amiotonu e maua i le tulafono, “O le tagata na te faia ia mea, e ola ai lava ia.”#Levi 18.5; Kala 3.12 6A o le amiotonu e maua i le fa‘atuatua, ‘ua fa‘apea ‘ona fai mai, “‘Aua le fa‘apea ifo i lou loto, ‘O ai se alu a‘e i le lagi?’” (o lona uiga, ‘ina ‘ia ‘a‘ami ‘iā Keriso ‘ia maliu ifo)#Teu 30.12-13 7“pe fa‘apea, ‘O ai se alu ifo i le mea loloto’” (o lona uiga, ‘ona ia ‘a‘ami ‘iā Keriso ‘ia maliu a‘e nai ē ‘ua oti;) 8a o lē a ‘ua fai mai ai?
“‘Ua latalata ‘iā te oe le ‘upu,
o i lou gutu ma lou loto;
o le ‘upu lea o le fa‘atuatua o matou o tala‘i atu ai.”#Teu 30.14
9‘Āfai ‘e te ta‘utino i lou gutu i le Ali‘i o Iesu, ma talitonu i lou loto ‘ua toe fa‘atūina mai o ia e le Atua nai ē ‘ua oti, e fa‘aolaina ai oe;#2 Kori 4.5 10auā o le loto e talitonu ai, e o‘o mai ai le amiotonu; a o le gutu e ta‘utino ai, e o‘o mai ai le ola. 11Auā ‘ua fa‘apea mai le Tusi, “E lē mā se tasi e fa‘atuatua ‘iā te ia.”#Isai 28.16 12Auā e lē ‘ese‘ese le Iutaia ma le Eleni; auā o le Ali‘i e to‘atasi o tagata uma e faula‘i lona alofa ‘iā te i latou uma lava o ē vala‘au atu ‘iā te ia.#Galu 10.34; 15.9 13Auā “E fa‘aolaina i latou uma o ē vala‘au i le suafa o le Ali‘i.”#Ioe 2.32
14O lenei, pe fa‘apefea ‘ona latou vala‘au atu i lē ‘ua latou lē fa‘atuatua i ai? Pe fa‘apefea fo‘i ‘ona latou fa‘atuatua i lē ‘ua latou lē fa‘alogo atu i ai? Pe fa‘apefea fo‘i ‘ona latou fa‘alogo atu, pe ā leai se tala‘i atu? 15Pe fa‘apefea fo‘i ‘ona latou tala‘i atu, pe ‘āfai ‘ua lē ‘a‘auina atu i latou? Pei ‘ona tusia, “E matagofie na‘uā o latou vae o ē ‘aumai le tala lelei i le manuia.”#Isai 52.7 16‘Ae le‘i usiusita‘i i latou uma lava i le tala lelei; auā ‘ua fa‘apea mai Isaia, “Le Ali‘i e, o ai ‘ea ‘ua talitonu ‘iā matou ‘upu e taulogologo atu?”#Isai 53.1 17O lenei, e tupu le fa‘atuatua i le taulogologo atu, o le taulogologo atu fo‘i o i le afioga a le Keriso lea.
18‘Ae ‘ou te fai atu: ‘Ua latou lē fa‘alogo mai ‘ea?#Sala 19.4
“E moni, ‘ua o‘o lo latou leo i le lalolagi uma lava,
o a latou ‘upu fo‘i i tulu‘iga o le atu laulau.”
19‘Ae ‘ou te fai atu: E le‘i iloa ‘ea e Isaraelu? ‘Ua mua‘i fai mai Mose,#Teu 32.21
“‘Ou te fa‘atupu le fuā
‘iā te ‘outou e le nu‘u ‘ua lē se nu‘u,
‘ou te fa‘a‘ono‘ono ‘iā te ‘outou i le nu‘u valea.”
20A ‘ua fa‘amalosi lava Isaia, ‘ua fa‘apea mai,#Isai 65.1
“‘Ua maua a‘u e i latou na lē sā‘ili mai ‘iā te a‘u,
‘ua fa‘aalia a‘u i ē na lē fesili mai ‘iā te a‘u.”
21A ‘ua fa‘apea mai o ia ‘iā Isaraelu, “‘Ua ‘ou fa‘aloaloa atu o‘u lima i aso uma i le nu‘u fa‘alogo gatā ma le fīnau mai.”#Isai 65.2
اکنون انتخاب شده:
Roma 10: RSCB
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Revised Samoan Catholic Bible © Bible Society of the South Pacific, 2010.