Mataio 13
13
O Fa‘ata‘oto i le Tagata Lūlū Saito
(Mare 4.1-9; Luka 8.4-8)
1O lea lava aso ‘ua ulufafo ai Iesu nai le fale, ‘ua nofo i lalo e latalata ane i le vai. 2‘Ona fa‘apotopoto mai ai lea ‘iā te ia o le motu o tagata e to‘atele, o le mea lea na maliu a‘e ai o ia i le va‘a, ‘ua nofo ai; ‘ua tutū mai fo‘i le motu o tagata uma i le ‘auvai.#Luka 5.13 3‘Ona fetalai atu lea o ia ‘iā te i latou i mea e tele i fa‘ata‘oto, ‘ua fa‘apea atu, “Fa‘auta, ‘ua alu atu le tagata e lūlū saito e lūlū ai saito. 4‘Ua ia lūlū saito, ‘ua pa‘ū ai isi i le auala; ‘ona ō ane lea o manu felelei ma ‘a‘ai ai. 5‘Ua pa‘ū fo‘i isi i le mea papa, e itiiti le ‘ele‘ele sa i ai; ‘ona vave tupu ai lea, ‘ona o le ‘ele‘ele ‘ina itiiti. 6‘Ua alu a‘e le lā, ‘ua velasia; ‘ona magumagu ai lea, ‘ona ‘ua leai ni a‘a. 7‘Ua pa‘ū fo‘i isi i le vao tuitui, ‘ua tutupu a‘e fo‘i le vao tuitui, ‘ona fētina‘iina ai lea. 8A ‘ua pa‘ū isi i le ‘ele‘ele lelei, ‘ona fua mai ai lea e ta‘iselau i nisi ma ta‘ionogafulu i nisi ma ta‘itolugafulu i nisi. 9O lē ‘ua i ai taliga e fa‘alogo ai, ‘inā fa‘alogo mai ia o ia.”
O le Uiga o le Fa‘ata‘oto
(Mare 4.10-12; Luka 8.9-10)
10‘Ona ō mai ai lea o ona so‘o, ‘ua fa‘apea mai ‘iā te ia, “Se a le mea ‘ua e fetalai atu ai ‘iā te i latou i fa‘ata‘oto?”
11‘Ona tali atu ai lea o Iesu, ‘ua fa‘apea atu ‘iā te i latou, “‘Ua foa‘iina atu ‘iā te ‘outou ‘ia ‘outou iloa mea lilo a le mālō o le lagi, a ‘ua lē foa‘iina atu ‘iā te i latou. 12Auā o lē ‘ua i ai mea, e foa‘iina atu ‘iā te ia, e atili tele ai ana mea, a o sē lē i ai mea, e ‘ave‘eseina fo‘i ‘iā te ia le mea ‘ua ‘iā te ia.#Mata 25.29; Mare 4.25; Luka 8.18; 19.26 13O le mea lea ‘ou te tautala atu ai ‘iā te i latou i fa‘ata‘oto, ‘auā o lo latou va‘ai latou te lē va‘ai ai, o lo latou fa‘alogo fo‘i, latou te lē fa‘alogo ai pe lagona.’#13.13 lagona: po o le malamalama. 14‘Ua taunu‘u ai ‘iā te i latou le valo‘aga a Isaia, ‘ua fa‘apea mai:
‘E fa‘alogo lava ‘outou, ‘ae tou te lē lagona;
e matuā va‘ava‘ai fo‘i ‘outou, ‘ae tou te lē iloa.#Isai 6.9, 10; Ioane 12.40; Galu 28.26, 27
15Auā ‘ua mafiafia loto o lenei nu‘u,
ma ‘ua fa‘alogo gatā o latou taliga i fa‘alogo,
‘ua moei‘ini fo‘i o latou mata;
ne‘i va‘ai o latou mata,
ma fa‘alogo o latou taliga
ma lagona o latou loto ma liliuina i latou,
ma ‘ou fa‘amālōlōina i latou.’
16‘Amu‘ia o ‘outou mata, auā ‘ua va‘ava‘ai ma o ‘outou taliga, auā ‘ua fa‘alogo.#Luka 10.23-24 17Auā e moni, ‘ou te fai atu ‘iā te ‘outou, E to‘atele perofeta ma tagata amiotonu sa naunau i le fia iloa o mea ‘ua ‘outou va‘ai i ai, ‘ae le‘i iloa; na latou fia fa‘alogo fo‘i i mea ‘ua ‘outou fa‘alogo i ai, ‘ae le‘i fa‘alogo ai lava.
‘Ua Fa‘amalamalamaina e Iesu le Fa‘ata‘oto o le Tagata Lūlū Saito
(Mare 4.13-20; Luka 8.11-15)
18“O lenei, ‘inā fa‘alogologo mai ia ‘outou i le fa‘ata‘oto i le tagata lūlū saito. 19A fa‘alogo se tasi i le ‘upu o le mālō, ‘ae lē lagona, ‘ona alu ane ai lea o lē ‘ua leaga, ‘ua fao le mea sa lūlūina i lona loto; o le mea lea sa lūlūina i le auala. 20A o le mea sa lūlūina i le mea papa, o le tagata lea ‘ua fa‘alogo i le ‘upu, ‘ona talia loa lea ma le fiafia; 21a ‘ua leai ni a‘a ‘iā te ia, ‘ua fa‘alētumau ia; auā pe a tupu le puapuagā, po o le sauāga ‘ona o le ‘upu, ‘ona tausuai loa lea o ia. 22O le mea sa lūlūina i le vao tuitui, o ia lea ‘ua fa‘alogo i le ‘upu, a o le loto popole i mea a lenei lalolagi ma le pepelo o le ‘oa#13.22 pepelo o le ‘oa po o mana‘o i le ‘oa po o fa‘aosoosoga o le ‘oa. ‘ua fētina‘iina ai le ‘upu, ‘ona lē fua mai lava lea.#Mata 6.19-34; 1 Timo 6.9 23A o le mea sa lūlūina i le ‘ele‘ele lelei, o ia lea ‘ua fa‘alogo i le ‘upu ma lagona ai; ‘ua fua mai lava ia, e ta‘iselau i nisi, e ta‘ionogafulu i nisi, e ta‘itolugafulu fo‘i i nisi.”
O le Fa‘ata‘oto i le Titania
24‘Ua sauni atu e Iesu le tasi fa‘ata‘oto ‘iā te i latou, ‘ua fa‘apea atu, “‘Ua fa‘atusaina le mālō o le lagi i le tagata na lūlūina le saito lelei i lona fanua;#Mata 13.36-43 25‘ua momoe tagata, ‘ona alu ane ai lea o lē ‘ua ita mai ‘iā te ia, ‘ua na lūlūina le titania i totonu o le saito, ‘ona alu ‘ese ai lea o ia. 26‘Ua totogo a‘e le saito ma fua mai, ‘ona iloa ai lea o le titania. 27‘Ona ō mai ai lea o ‘au‘auna a le matai o le ‘āiga, ‘ua fa‘apea mai ‘iā te ia, ‘Le ali‘i e, e lē o le saito lelei ‘ea na e lūlūina i lou fanua? O lenei, pe naifea nei titania?’ 28‘Ona fai atu ai lea o ia ‘iā te i latou, ‘‘Ua fai lenei mea e se tagata ‘ua ita mai.’ ‘Ona fai mai ai lea o ‘au‘auna ‘iā te ia, ‘‘E te finagalo ‘ea matou te ō atu e vele‘eseina ia mea?’ 29A ‘ua fai atu o ia, ‘‘Aua, ‘ina ne‘i ‘outou lia‘i ma le saito pe a ‘outou vele ‘ese le titania. 30Tu‘u ia, ‘ia tupu lua pea se‘ia o‘o i le seleselega; a o‘o atu i ona po e selesele ai, ‘ou te fai atu ai i ē selesele, ‘Ia ‘outou mua‘i fa‘apotopoto mai le titania ma ‘outou fusia i fusi e susunu ai; a o le saito, tou te fa‘aputuina lea i lo‘u fale saito.’”
O le Fa‘ata‘oto i le Sinapi
(Mare 4.30-32; Luka 13.18-19)
31‘Ua sauni atu e Iesu le tasi fa‘ata‘oto ‘iā te i latou, ‘ua fa‘apea atu, “E tusa le mālō o le lagi ma le fua o le sinapi, na ‘ave e le tasi tagata, ma totō i lona fanua; 32e itiiti lava ia i fua o la‘au uma; pe a uma ‘ona tupu, e sili ia i la‘au afu, e i‘u ‘ina fai ma la‘au tele, e ō mai ai manu felelei ma latou momoe i ona la.”#Tani 4.12, 21; Eseki 17.23; 31.6; Sala 104.12
O le Fa‘ata‘oto i le mea Fa‘afefeteina
(Luka 13.20-21)
33‘Ua fetalai atu e Iesu le tasi fa‘ata‘oto ‘iā te i latou, “E tusa le mālō o le lagi ma le mea fa‘afefete na ‘ave e le fafine ma tu‘u i totonu o le falaoa mata pe tusa ma le onosefulu pauna, ‘ua o‘o ‘ina fa‘afefeteina uma ai.”
O Fa‘ata‘oto a Iesu
(Mare 4.33-34)
34‘Ua fetalai atu o Iesu ia mea uma i le motu o tagata i fa‘ata‘oto, ‘ua na o fa‘ata‘oto na fetalai atu ai o ia ‘iā te i latou. 35‘Ina ‘ia taunu‘u ai o le ‘upu a le perofeta, ‘ua fa‘apea mai: #Sala 78.2
“‘Ou te tautala atu i fa‘ata‘oto,
‘ou te ta‘u atu mea na lilo talu ‘ona fa‘avaeina o le lalolagi.”
‘Ua Fa‘amalamalamaina e Iesu le Fa‘ata‘oto i le Titania
36‘Ona tu‘ua ai lea e Iesu o le motu o tagata, ‘ua ulufale atu ai i le fale; ‘ona ō mai ai lea ‘iā te ia o ona so‘o, ‘ua fa‘apea mai, “‘Ia e fa‘amatala mai ‘iā te i matou le fa‘ata‘oto i le titania i le fanua.”#Mata 13.24-30
37‘Ona tali atu ai lea o Iesu, ‘ua fa‘apea atu ‘iā te i latou, “O lē lūlū le saito lelei, o le Atali‘i lea o le tagata; 38a o lē fanua, o le lalolagi lea; o le saito lelei, o tagata ia o le mālō; o le titania, o le fānau ia a lē ‘ua leaga;#1 Kori 3.9 39o lē ‘ua ita mai na na lūlūina ia mea, o le tiapolo lea; o le seleselega, o le gata‘aga lea o le lalolagi, o ē selesele, o agelu ia. 40O lea e pei ‘ona fa‘aputuina ai o le titania ma susunuina i le afi, e fa‘apea fo‘i ‘ona faia i le gata‘aga o lenei lalolagi.#Ioane 15.6 41E ‘a‘auina atu e le Atali‘i o le tagata ana agelu, latou te fa‘apotopotoina nai lona mālō mea uma e tausuai ai ma ē amio leaga.#Sefa 1.3; Mata 25.31-46; 7.23 42E lafoina i latou i totonu o le ‘ogāumu ‘a‘asa; e i ai le tagiauē ma le lilivau o nifo. 43‘Ona pupula ai lea o ē amiotonu e pei o le lā i le mālō o lo latou Tamā. O lē ‘ua i ai taliga e fa‘alogo ai, ‘inā fa‘alogo mai ia o ia.#Tani 12.3
O le Fa‘ata‘oto i le ‘Oa na Natia
44“E tusa fo‘i le mālō o le lagi i le ‘oa ‘ua natia i le fanua; ‘ua iloa e le tasi, ‘ona nanā ai lea e ia; ‘ua alu fo‘i ma le fiafia ma fa‘atau atu ana mea uma, i le fa‘atau mai ai lea fanua.#Mata 19.29; Luka 14.33; Fili 3.7; Fa‘ata 2.4
O le Fa‘ata‘oto i le Penina Tau Tele
45“E tusa fo‘i le mālō o le lagi ma le tagata fa‘atau ‘oa, ‘ua sā‘ili‘ili penina lelei; 46‘ua iloa e ia le tasi penina tau tele, ‘ona alu ai lea o ia, ‘ua fa‘atau atu ana mea uma, i le fa‘atau mai ai lea penina.#Fa‘ata 8.10, 11
O le Fa‘ata‘oto i le ‘Upega
47“E tusa fo‘i le mālō o le lagi ma le ‘upega ‘ua lafo i le vai, ‘ua maua ai i‘a ‘ese‘ese uma. 48‘Ua tumu, ‘ona latou toso a‘e ai lea i le matāfaga, ‘ua nonofo ma fafao i‘a lelei i ola, a o i‘a leaga ‘ua lafoa‘i. 49E fa‘apea fo‘i i le gata‘aga o le lalolagi; e ō atu le ‘au agelu o ē vavae ‘ese i ē amio leaga ma ē amiotonu,#Mata 25.32 50‘ona latou lafoina lea ‘iā te i latou i le ‘ogāumu ‘a‘asa; e i ai le tagiauē ma le lilivau o nifo.”
O Mea Fou ma Mea Tuai
51‘Ona fetalai atu lea o Iesu ‘iā te i latou, “‘Ua ‘outou malamalama ‘ea i nei mea uma?” ‘Ua latou fai mai ‘iā te ia, “Ioe, le Ali‘i e.”
52‘Ona fetalai atu lea o Iesu ‘iā te i latou, “O lenei, o tusi‘upu uma o ē ‘ua a‘oa‘oina i le mālō o le lagi, e tusa i latou ma le matai o le ‘āiga, ‘ua ‘aumai mea fou ma mea tuai mai lona tu‘ugā‘oloa.”
‘Ua lē Talia Iesu i Nasareta
(Mare 6.1-6; Luka 4.16-30)
53‘Ua fa‘ai‘u e Iesu nei fa‘ata‘oto, ‘ona maliu ‘ese ai lea o ia i lea mea. 54‘Ua o‘o atu o ia i lona lava nu‘u, ‘ona a‘oa‘o atu ai lea o ia ‘iā te i latou i lo latou sunako; ‘ua latou taufaiofo ai, ‘ua fa‘apea ane, “Po o fea na maua ai e lenei tagata lenei poto ma ia vāvega? 55E lē o le atali‘i ‘ea lenei o le tufuga? E lē o Maria ‘ea le igoa o lona tinā, o ona uso fo‘i o Iakopo, ma Iosefa, ma Simona, ma Iuta? 56E lē o ‘iā te i tatou ‘ea ona tuafafine uma? po o fea fo‘i na maua ai e lenei tagata nei mea uma?”#Ioane 7.15, 52 57‘Ona latou tausuai ai lea ‘iā te ia.
A ‘ua fetalai atu Iesu ‘iā te i latou, “E leai se perofeta e lē mamalu, ‘ua nā o lona lava nu‘u ma lona ‘āiga e lē mamalu ai.”#Ioane 4.44 58‘Ua lē tele fo‘i ni vāvega na ia faia i lea mea, ‘ona o lo latou lē fa‘atuatua.
اکنون انتخاب شده:
Mataio 13: RSCB
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Revised Samoan Catholic Bible © Bible Society of the South Pacific, 2010.