Mataio 12
12
O le Fesili e Uiga i le Sapati
(Mare 2.23-28; Luka 6.1-5)
1O ia ona aso ‘ua ui atu ai Iesu i tosaito i le sapati; ‘ua fia ‘a‘ai fo‘i ona so‘o, ‘ona ‘o‘oti ai lea e i latou o ‘au saito ma ‘a‘ai ai. #Teu 23.25 2‘Ua iloa atu e le ‘au faresaio, ‘ona latou fa‘apea atu ai lea ‘iā te ia, “Fa‘auta, ‘ua faia e ou so‘o le mea e sā ‘ona fai i le sapati.”
3A ‘ua fetalai atu o ia ‘iā te i latou, “E le‘i faitaulia ‘ea e ‘outou le mea na faia e Tavita, ‘ina ‘ua fia ‘ai o ia, ‘atoa ma i latou sā ‘iā te ia. #1 Samu 21.1-6 4Na ulufale o ia i le fale o le Atua, na ‘ai fo‘i e ia areto ‘ua laulauina i luma, o mea e sā ‘ona ‘ai ai o ia, ‘atoa ma i latou sa ‘iā te ia, e gata lava i le ‘au ositaulaga? #Levi 24.9 5E le‘i faitaulia ‘ea fo‘i e ‘outou i le tulafono, o sapati uma ‘ua solia ai le sapati e le ‘au ositaulaga i le malumalu, ‘ae lē sala i latou? #Nume 28.9-10 6‘Ou te fai atu fo‘i ‘iā te ‘outou, o ‘i‘inei lē ‘ua sili i le malumalu. 7‘Ana ‘outou iloa le uiga o lea ‘upu, ‘‘Ou te loto i le alofa, ‘ae lē o le taulaga,’ po ‘ua ‘outou le fa‘asalaina o ē lē sala. #Mata 9.13; Hose 6.6 8Auā o le Atali‘i o le tagata, o le Ali‘i lava ia o le sapati.”
O le Tagata Lima Gase
(Mare 3.1-6; Luka 6.6-11)
9‘Ua maliu ‘ese Iesu i lea mea, ‘ona ulu atu ai lea o ia i lo latou sunako. 10Fa‘auta fo‘i, sā i ai le tagata ‘ua gase lona lima; ‘ona latou fesili mai ai lea ‘iā te ia, ‘ua fa‘apea mai. “E tatau ‘ea ‘ona fa‘amālōlō i le sapati?” ‘ina ‘ia latou momoli ‘iā te ia.
11‘Ona fetalai atu ai lea o Iesu ‘iā te i latou, “O ai ‘ea so ‘outou e ana le mamoe e tasi, ‘āfai fo‘i e pa‘ū o ia i le lua i le sapati, e lē tago ‘ea i ai ma ‘ava‘e i luga? #Luka 14.5 12E lē sili lava ‘ea le tagata i le mamoe? O lea, e tatau ai ‘ona agalelei i le sapati.” 13‘Ona fetalai atu ai lea o ia i le tagata, “‘Inā fa‘aloaloa ia o lou lima.”
‘Ona fa‘aloaloa ai lea e ia, ‘ona toe lelei ai lea, ‘ua pei o le tasi. 14A ‘ua ō i fafo le ‘au faresaio, ‘ona latou taupulepule ai lea ‘iā te ia, ‘ina ‘ia latou fasioti ‘iā te ia.
O le ‘Au‘auna Filifilia a le Atua
15A ‘ua silafia e Iesu, ‘ona maliu ‘ese ai lea o ia i lea mea; ‘ua mulimuli mai fo‘i ‘iā te ia le motu o tagata e to‘atele; ‘ona fa‘amālōlōina ai lea e ia o i latou uma; 16‘ua matuā fetalai atu fo‘i o ia ‘iā te i latou, ‘aua ne‘i latou fa‘alaua‘i tele ia; 17‘ina ‘ia taunu‘u ai le ‘upu a le perofeta o Isaia, ‘ua fa‘apea mai:
18“Fa‘auta, o la‘u ‘au‘auna na ‘ou filifilia,
o la‘u pele o lo‘o fiafia i ai lo‘u loto;
‘ou te tu‘uina atu lo‘u Agaga i ona luga,
e fa‘ailoa atu e ia le fa‘amasinoga i nu‘u ‘ese.
19E lē finau ia, e lē ‘alaga fo‘i o ia,
e lē lagona fo‘i lona leo e se tasi i ala.
20E lē gagau e ia le u ‘ua gapēpē,
e lē tinei fo‘i e ia le vavae ‘ua mū itiiti;
se‘ia fa‘amanumālō e ia le fa‘amasinoga.
21O lona igoa fo‘i e fa‘amoemoe i ai nu‘u ‘ese.”
O Iesu ma Pelesepulo
(Mare 3.20-30; Luka 11.14-23)
22‘Ona ‘aumaia lea ‘iā Iesu o le tagata ‘ua uluitinoina e le temoni, o le tauaso fo‘i o ia ma gūgū; ‘ona fa‘amālōlōina ai lea e Iesu o ia, ‘ona tautala ai lea ma va‘ai lē sa tauaso ma gūgū. 23‘Ona taufaiofo ai lea o le motu o tagata uma, ‘ua fa‘apea ane, “Po o le atali‘i ‘ea lenei o Tavita?”
24A ‘ua lagona e le ‘au faresaio, ‘ona latou fai ane ai lea, “‘Ana lē se anoa Pelesepulo le ali‘i o temoni, e lē tulia e lenā tagata o temoni.” #Mata 9.34; 10.25
25A ‘ua silafia e Iesu o latou manatu, ‘ona fetalai atu ai lea o ia ‘iā te i latou, “O mālō uma ‘ua fevaevaea‘i e fa‘aumatia ia; o ‘a‘ai uma fo‘i po o ‘āiga e fevaevaea‘i e lē tumau ia. 26‘Āfai fo‘i e tulia e Satani ia Satani, ‘ona fevaevaea‘i lea o Satani ‘iā te ia lava;#12.26 Satani ‘iā te ia lava: O le fa‘aliliuga tuai; ia ‘iā te ia. pe fa‘apefea fo‘i ‘ona tumau o lona mālō? 27‘Āfai fo‘i o Pelesepulo ‘ou te tulia ai o temoni, po o ai ‘ua tulia ai temoni e a ‘outou fānau? O le mea lea e fai ai i latou ma fa‘amasino ‘iā te ‘outou. 28‘Ae ‘āfai o le Agaga o le Atua ‘ou te tulia ai o temoni, ‘ua o‘o mai lava ‘iā te ‘outou le mālō o le Atua. 29E mafai fa‘apefea se tasi ‘ona ulu atu i le fale o le tagata malosi, ma vete ana mea? se‘ia mua‘i fusifusia le tagata malosi, i le vete ai lona fale. 30O sē lē ‘au ‘iā te a‘u, e ‘au ‘ese lea ‘iā te a‘u; o sē e lē fa‘aputu fa‘atasi ma a‘u, e fa‘ata‘ape‘ape lea. #Mare 9.40 31O le mea lea ‘ou te fai atu ai ‘iā te ‘outou, o agasala uma ma ‘upu fāifai e fa‘amāgaloina ia i tagata; a o lē fāifai i le Agaga, e lē fa‘amāgaloina lea i tagata. 32‘Ai sē fai ‘upu i le Atali‘i o le tagata, e fa‘amāgaloina lea; a o lē fai ‘upu i le Agaga Pa‘ia, e lē fa‘amāgaloina lea i le olaga nei po o le atalī.
O le La‘au ma ona Fua
(Luka 6.43-45)
33“‘Ia ‘outou ta‘ua le la‘au e lelei, ma ona fua fo‘i e lelei; a lē o lea, ‘ia ‘outou ta‘ua le la‘au leaga ma ona fua fo‘i e leaga; auā o ona fua ‘ua ‘iloga ai le la‘au. #Mata 7.20; Luka 6.44 34Fānau a gata fe‘ai e, ‘outou o lo‘o leaga, e mafaia fa‘apefea ‘ona ‘outou ‘upu lelei? Auā o le tele o mea i le loto e tautala mai ai le gutu. #Mata 3.7; 23.33; 15.18; Luka 3.7; 6.45 35‘Ua ‘aumai mea lelei e le tagata amio lelei i mea lelei ‘ua teu i lona loto; o le tagata amio leaga fo‘i, ‘ua ‘aumai mea leaga i mea leaga ‘ua teu i lona loto. 36A ‘ou te fai atu ‘iā te ‘outou, o ‘upu fa‘atauva‘a uma e faia e tagata, latou te talatala atu ai le tala i le aso fa‘amasino. 37Auā o au ‘upu e ta‘uamiotonuina ai oe, o au ‘upu fo‘i e fa‘asalaina ai oe.”
O le Talosaga a le ‘au Faresaio ma le ‘au Tusi‘upu ‘iā Iesu i se Fa‘ailoga
(Mare 8.11-12; Luka 11.29-32)
38‘Ona tali mai ai lea o isi o le ‘au tusi‘upu ma le ‘au faresaio, ‘ua fa‘apea mai, “Le a‘oa‘o e, ‘ua matou fia iloa se fa‘ailoga ‘iā te oe.”
39A ‘ua tali atu Iesu, ‘ua fa‘apea atu ‘iā te i latou, “O le tupulaga leaga ma le mulilulua ‘ua latou sā‘ilia mai se fa‘ailoga; e leai se fa‘ailoga e avatua i ai ‘ua nā o le fa‘ailoga o Iona le perofeta. #Mata 16.4; Mare 8.12 40Auā e pei o Iona sa i le manava o le i‘a tele i ao e tolu ma po e tolu, e fa‘apea fo‘i ‘ona i ai o le Atali‘i o le tagata i lalo i le ‘ele‘ele i ao e tolu ma po e tolu. #Iona 1.17 41E tutū mai tagata o Nineva i le fa‘amasinoga fa‘atasi ma le tupulaga nei e fa‘asala i ai; auā na latou salamō i le tala‘iga a Iona; fa‘auta fo‘i, o ‘i‘inei lē sili ‘iā Iona. #Iona 3.5 42E tutū mai fa‘atasi le tupu fafine o le itū i saute#12.42 itū i saute: O le fa‘aliliuga tuai; itū i toga. ma le tupulaga nei i le fa‘amasinoga, o fa‘asala i ai; auā na sau o ia mai le gata‘aga o le lalolagi e fa‘alogologo i le poto o Solomona; fa‘auta fo‘i o ‘i‘inei lē sili ‘iā Solomona. #1 Tu 10.1-10; 2 No 9.1-12
O le Toe Liliu mai o le Agaga Leaga
(Luka 11.24-26)
43“Pe a alu i fafo i le tagata le agaga leaga, ‘ona fealua‘i ai lea o ia i nu‘u naumati, ‘ua sā‘ili se mālōlōga, ‘ae lē maua. 44‘Ona fa‘apea ane ai lea o ia, ‘‘Ou te fo‘i atu i lo‘u fale na ‘ou sau ai;’ ‘ua alu i ai, ‘ona iloa ai lea ‘ua tu‘ufua, ‘ua uma fo‘i ‘ona tafitafi ma teuteu. 45‘Ona alu ai lea o ia, ‘ua nā ‘aumaia isi agaga e to‘afitu e sili lo latou leaga i lona, ‘ona latou ulufale atu ai lea, ‘ua nonofo ai; ‘ona sili ai lea o le leaga le tulaga o lea tagata i lo le tulaga muamua. E fa‘apea fo‘i ‘ona fai i lenei tupulaga leaga.”
O le Tinā o Iesu ma ona Uso
(Mare 3.31-35; Luka 8.19-21)
46‘Ua tautala o Iesu i le motu o tagata, fa‘auta, ‘ua tutū mai i fafo o lona tinā ma ona uso, ‘ua fia tautala ma ia. 47‘Ona fai mai ai lea o le tasi ‘iā te ia, “Fa‘auta, ‘ua tutū mai i fafo lou tinā ma ou uso, ‘ua fia tautala ma oe.”#12.47 O nisi fa‘aliliuga e lē maua ai le fuai‘upu 47.
48‘Ona tali atu ai lea o Iesu, ‘ua fa‘apea atu i lē na ta‘u mai ‘iā te ia, “O ai ‘ea lo‘u tinā? O ai fo‘i o‘u uso?” 49‘Ona fa‘aloaloa ai lea e ia o lona ‘a‘ao i ona so‘o, ‘ua fa‘apea atu, “Fa‘auta, o lo‘u tinā ma o‘u uso, 50auā o lē faia le finagalo o lo‘u Tamā o i le lagi, o lo‘u uso lea ma lo‘u tuafafine ma lo‘u tinā.”
اکنون انتخاب شده:
Mataio 12: RSCB
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Revised Samoan Catholic Bible © Bible Society of the South Pacific, 2010.