Mataio 10
10
O ‘Aposetolo e To‘asefulu ma le To‘alua
(Mare 3.13-19; Luka 6.12-16)
1‘Ua vala‘au atu Iesu#10.1 Iesu: O le fa‘aliliuga tuai; ia. i ona so‘o e to‘asefulu ma le to‘alua, ‘ona tu‘u atu lea e ia ‘iā te i latou le pule i agaga leaga, ‘ina ‘ia tutuli ‘iā te i latou ma fa‘amālōlō i ma‘i uma ma ma‘i tigā uma. 2O igoa nei o le ‘au ‘aposetolo e to‘asefulu ma le to‘alua; e muamua Simona e igoa ‘iā Peteru ma Aneterea lona uso, o Iakopo le atali‘i o Sepetaio ma Ioane lona uso, 3o Filipo ma Patolomaio, Toma ma Mataio le ao lafoga, o Iakopo le atali‘i o Alefaio ma Tataio, 4o Simona le Kanana ma Iuta le Sekara, o ia fo‘i na fa‘alata ‘iā te ia.
Galuega Tala‘i o le To‘asefulu ma le Lua
(Mare 6.7-13; Luka 9.1-6)
5‘Ua ‘a‘auina atu e Iesu lenei to‘asefulu ma le to‘alua, ‘ua ia fetalai atu ‘iā te i latou, ‘ua fa‘apea atu, “‘Aua tou te ui i ala o nu‘u ‘ese, ‘aua fo‘i tou te ō atu i se ‘a‘ai o Samaria; 6‘ae lelei ‘ona ‘outou ō atu i mamoe o le ‘āiga o Isaraelu ‘ua lē iloa. 7A ‘outou ō, ‘ia ‘outou tala atu, ‘ia fa‘apea atu, ‘‘Ua latalata mai le mālō o le lagi.’#Luka 10.4-12 8‘Ia ‘outou fa‘amālōlō i ē mama‘i, fa‘amamā lepela, fa‘atutū i ē ‘ua oti, tutuli i temoni. ‘Ua maua fua ‘outou, ‘ia ‘outou foa‘ifuaina atu. 9‘Aua ne‘i teu ma ‘outou auro, po o ario, po o ‘apamemea i o ‘outou fusi. 10‘Aua fo‘i le ‘ave se taga i le malaga ‘aua fo‘i le ta‘ilua o ‘ofu tino, po se‘evae, po o se to‘oto‘o; auā e tatau ‘ona avatu le mea ‘ai i lē fai galuega.#1 Kori 9.14; 1 Timo 5.18 11O se ‘a‘ai po se faoa ‘a‘ai tou te o‘o atu i ai, ‘ia fesili po o ai sē i ai ‘ua tatau; ‘ia ‘outou nonofo ai i le tou ō ai. 12A ‘outou ulufale atu i se ‘āiga, ‘ia ‘outou ofo alofa atu i ai. 13Pe ‘āfai fo‘i ‘ua tatau le ‘āiga, ‘ia o‘o atu i ai la ‘outou fa‘amanuia; ‘ae ‘āfai ‘ua lē tatau, ‘ia toe fo‘i mai ai ‘iā te ‘outou la ‘outou fa‘amanuia. 14‘Ai sē lē talia ‘outou, pe lē fa‘alogo ‘iā ‘outou ‘upu, a ‘outou ō atu nai lea fale po o lea ‘a‘ai, ‘ia ‘outou tūtū atu le ‘ele‘ele mai ‘outou vae.#Galu 13.51 15E moni, ‘ou te fai atu ‘iā te ‘outou, O le aso fa‘amasino e feoloolo ai Sotoma ma Komoro i lea lava ‘a‘ai.#Mata 11.24; Kene 19.24-28
O Puapuagā o le a o‘o Mai
(Mare 13.9-13; Luka 21.12-17)
16“Fa‘auta, ‘ou te ‘a‘au atu ‘iā te ‘outou e pei o mamoe i le vā o luko; o lenei, ‘ia ‘outou atamamai pei o gata, a ‘ia fīfīlemū pei o lupe.#Luka 10.3 17‘Ia ‘outou ma tagata; auā latou te tu‘uina atu ‘outou i fono ma latou sasa ‘iā te ‘outou i o latou sunako. 18E ta‘ita‘iina atu fo‘i ‘outou i luma o ali‘i ma tupu ‘ona o a‘u, e fai ma molimau ‘iā te i latou ‘atoa ma nu‘u ‘ese.#Mare 13.9-11; Luka 12.11-12; 21.12-15 19Pe a latou tu‘uina atu ‘outou, ‘aua tou te popole pe fa‘apefea, pe se a fo‘i tou te fai atu ai, auā e foa‘iina mai ‘iā te ‘outou i lea lava itū aso se ‘upu tou te fai atu ai. 20Auā e lē o ‘outou e tautala atu ai, a o le Agaga o lo ‘outou Tamā e tautala mai ai i totonu ‘iā te ‘outou. 21E tu‘uina atu le uso e le uso ‘ia oti, e tu‘uina atu fo‘i le fānau e le tamā; e tutū atu fo‘i le fānau i o latou mātua ‘ina ‘ia fasiotia i latou.#Mare 13.12; Luka 21.16 22E ‘inosia fo‘i ‘outou e tagata uma ‘ona o lo‘u igoa; a o lē tumau se‘ia o‘o atu i le gata‘aga, e fa‘aolaina o ia.#Mata 24.9, 13; Mare 13.13; Luka 21.17 23Pe a latou fa‘asauā ‘iā te ‘outou i le tasi ‘a‘ai, ‘ia ‘outou sōsōla i se tasi; auā e moni, ‘ou te fai atu ‘iā te ‘outou, e lē so‘o ‘a‘ai o Isaraelu ‘iā te ‘outou se‘ia sau le Atali‘i o le tagata.
24“E lē sili le so‘o i le a‘oa‘o e lē sili fo‘i le ‘au‘auna i lona ali‘i;#Luka 6.40; Ioane 13.16; 15.20 25tau lava ‘ina ‘avea le so‘o ‘ia fa‘apei o lona a‘oa‘o, o le ‘au‘auna fo‘i ‘ia fa‘apei o lona ali‘i. ‘Āfai ‘ua latou ta‘ua le matai o le ‘āiga o Pelesepulo, e lē sili ‘ea ‘ona fa‘apea atu fo‘i i tagata o le ‘āiga?#Mata 9.34; 12.24; Mare 3.22; Luka 11.15
‘Aua le Matata‘u
(Luka 12.2-7)
26“O lenei, ‘aua tou te matata‘u ‘iā te i latou; auā e leai se mea o lo‘o ufiufitia e lē fa‘aalia, e leai fo‘i se mea lilo e lē fa‘ailoaina.#Mare 4.22; Luka 8.17 27‘Ou te fai atu ‘iā te ‘outou i le pouliuli tou te ta‘u atu lea i le malamalama; o le mea fo‘i ‘ua lagona i o ‘outou taliga, ‘ia ‘outou tala‘i atu i luga o fale. 28‘Aua fo‘i tou te matata‘u i ē fasioti le tino, ‘ae latou te lē mafaia ‘ona fasioti le agaga; ‘ae lelei ‘ona ‘outou matata‘u i lē ‘ua mafai ‘ona fano ‘iā te ia le agaga ‘atoa ma le tino i Kēna. 29E lē fa‘ataulia ‘ea ni manu iti se lua i le asari? E leai fo‘i so lā‘ua e pa‘ū i le ‘ele‘ele e aunoa ma lo ‘outou Tamā. 30A o ‘outou lauulu lava ‘ua faitaulia uma ia. 31O lea ‘aua tou te matata‘u ai; e sili ‘outou i manu iti e tele.
O le Fa‘afitia ma le Ta‘uta‘u atu o Keriso
(Luka 12.8-9)
32“O lenei, ‘ai sē na te ta‘uta‘u a‘u i luma o tagata, o a‘u fo‘i ‘ou te ta‘uta‘uina o ia i luma o lo‘u Tamā o i le lagi. 33‘Ai sē fa‘afiti fo‘i ‘iā te a‘u i luma o tagata, ‘ou te fa‘afitia fo‘i o ia i luma o lo‘u Tamā o i le lagi.#2 Timo 2.12
E lē o le Filemū a o le Pelu
(Luka 12.51-53; 14.26-27)
34“‘Aua tou te mānatunatu ‘ua ‘ou sau e avatu le filemū i le lalolagi; ‘ou te le‘i sau e avatu le filemū, a o le pelu.
35Auā ‘ua ‘ou sau e fa‘amāsesei le tagata ma lona tamā,
o le tama teine fo‘i e fa‘amāsesei ma lona tinā,
o le avā fo‘i e fa‘amāsesei ma le tinā o lana tane.#Mika 7.6
36E fai fo‘i le tagata ma fili o lona ‘āiga.
37O lē ‘ua tele lona alofa i lona tamā po o lona tinā ‘ae itiiti ‘iā te a‘u, e lē aogā lea ‘iā te a‘u; o lē ‘ua tele fo‘i lona alofa i lona atali‘i po o lona afafine, ‘ae itiiti ‘iā te a‘u, e lē aogā fo‘i lea ‘iā te a‘u. 38O sē lē ‘ave lona satauro ma mulimuli mai ‘iā te a‘u, e lē aogā fo‘i lea ‘iā te a‘u.#Mata 16.24; Mare 8.34; Luka 9.23 39O lē maua lona ola, e māumau ai ‘iā te ia. O lē fa‘amaumau i lona ola ‘ona o a‘u, e maua e ia.#Mata 16.25; Mare 8.35; Luka 9.24; 17.33; Ioane 12.25
O le Taui
(Mare 9.41)
40“O lē talia ‘outou, ‘ua talia e ia o a‘u; o lē talia fo‘i a‘u, ‘ua talia e ia o lē na ‘auina mai a‘u,#Mare 9.37; Luka 9.48; 10.16; Ioane 13.20 41O lē talia fo‘i o se perofeta i le igoa o le perofeta, e maua e ia le taui o le perofeta; o lē talia fo‘i se tagata amiotonu i le igoa o le tagata amiotonu, e maua e ia le taui o le tagata amiotonu. 42‘Ai sē avane fo‘i tau lava se ipu vai malūlū e inu ai se tasi o i latou nei e fa‘atauva‘a i le igoa o le so‘o, e moni, ‘ou te fai atu ‘iā te ‘outou, e lē māumau lona taui.”
اکنون انتخاب شده:
Mataio 10: RSCB
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Revised Samoan Catholic Bible © Bible Society of the South Pacific, 2010.