Galuega 26
26
O le Lauga a Paulo i luma o Feso ma Akeripa
1‘Ona fai mai lea o Akeripa ‘iā Paulo, “Faitalia oe ‘ona e tautala mo oe.” ‘Ona fa‘aloaloa atu lea e Paulo o lona lima, ma fai atu lana fa‘amatalaga.
2“Le tupu e Akeripa, ‘ou te manatu ‘ou te manuia ‘ina a ‘ou fai atu la‘u fa‘amatalaga i ou luma i lenei aso, i mea uma ‘ua molia ai a‘u e Iutaia; 3‘ae maise ‘ua e silafia i tu ma su‘ega uma lava o lo‘o ‘iā Iutaia. O le mea lea ‘ou te ‘ai‘oi atu ai ‘iā te oe ia ē fa‘afofoga mai ‘iā te a‘u ma le ‘onosa‘i.
4“‘Ua iloa e Iutaia uma la‘u amio sa faia talu ‘ina o ‘ou itiiti, i lo‘u lava nu‘u o i Ierusalema, talu i le amataga; 5‘ua latou iloa fo‘i a‘u nei talu mai anamuā, pe ‘āfai ana fia molimau mai i latou, o le itū‘āiga e matuā faigatā o la tatou tapua‘iga sa ‘ou i ai a‘u o le faresaio.#Galu 23.6; Fili 3.5 6‘Ua fa‘amasinoina nei fo‘i a‘u ‘ona o le fa‘atuatuaga na folafolaina e le Atua i o tatou tamā; 7o lo‘o fa‘amoemoe i ai o tatou itū‘āiga e sefulu ma le lua, ma latou ‘au‘auna ma le naunau i le po ma le ao, ‘ina ‘ia latou maua. Le tupu e Akeripa, ‘ona o lea fa‘amoemoe ‘ua molia ai a‘u e Iutaia. 8‘Āfai ‘ua toe fa‘atūina mai e le Atua ē ‘ua oti se a le mea ‘ua ‘outou manatu ai e lē mafai ‘ona talia o lea mea?
9“O a‘u nei fo‘i, na ‘ou manatu ifo e tusa ‘ona ‘ou fa‘atu‘i‘eseina o mea e tele i le suafa o Iesu le Nasareta.#Galu 8.3; 22.4-5 10Sa ‘ou fai ai fo‘i i Ierusalema; na ‘ou maua fo‘i le pule mai le ‘au ositaulaga sili, ‘ona ‘ou puipuia lea o le ‘au pa‘ia e to‘atele i fale puipui na fasiotia fo‘i i latou, ‘ua ‘ou fa‘aopoopo i ai. 11Na ‘ou sauā so‘o atu fo‘i ‘iā te i latou i sunako uma lava, ma ‘ou tauānau atu ai ‘iā latou fāifai ‘iā Iesu; na ‘ou fa‘avalemalosi atu fo‘i ‘iā te i latou, ‘ua ‘ou sauā atu ‘ua o‘o lava i ‘a‘ai ‘ese.
‘Ua Fa‘amatala e Paulo lona ‘avea ma Tagata Fa‘atuatua
(Galu 9.1-19; 22.6-16)
12“O mea ia, le tupu e, na ‘ou alu atu ai i Tamaseko ma le pule ma le fe‘au mai le ‘au ositaulaga sili, 13o le tutonu o le lā, na ‘ou iloa atu ai i le ala le malamalama mai le lagi ‘ua sili lona pupula i le lā, ‘ua pupula fa‘ata‘ali‘oli‘o mai ‘iā te a‘u ma la matou ‘au malaga. 14‘Ua pa‘u‘ū i matou uma i lalo i le ‘ele‘ele, ‘ona ‘ou fa‘alogo atu lea i le si‘ufofoga ‘ua fetalai mai ‘iā te a‘u, ‘ua fa‘apea mai i le ‘upu Eperu, ‘Saulo, Saulo e, se a le mea ‘ua e sauā mai ai ‘iā te a‘u? O le mea faigatā ‘iā te oe ‘ona e a‘a i tui.’ 15‘Ona ‘ou fai atu lea, ‘Le Ali‘i e, o ai ‘ea oe?’ ‘Ona fetalai mai lea o ia, ‘O a‘u o Iesu ‘ua e sauā i ai. 16‘Ae tula‘i o ia i luga o ou vae; auā o le mea lea ‘ua fa‘aali ai a‘u ‘iā te oe, ia tofia oe e fai ma ‘au‘auna ma molimau i mea ‘ua e va‘aia, ‘atoa ma mea e toe fa‘aali ai a‘u ‘iā te oe; 17ma ‘ou lavea‘i ‘iā te oe a‘i le nu‘u nei, ‘atoa ma nu‘u ‘ese, ‘ou te ‘auina atu ai nei oe, 18e fa‘apupula i o latou mata, ia liliu mai mai le pouliuli i le malamalama, mai le pule fo‘i a Satani ia liliu i le Atua; latou te maua ai le fa‘amāgaloga o agasala, ma le tofi fa‘atasi ma i latou ‘ua fa‘apa‘iaina i le fa‘atuatua ‘iā te a‘u.’
‘Ua Fa‘amatala e Paulo ana Galuega
19“O lenei, le tupu e Akeripa, na ‘ou lē ‘augatā i le fa‘aaliga mai le lagi; 20a ‘ua ‘ou mua‘i folafola atu ‘iā te i latou i Tamaseko, ‘atoa ma Ierusalema, ‘ona o‘o lea i le nu‘u uma lava o Iutaia, ‘atoa ma nu‘u ‘ese, ‘ina ‘ia salamō i latou, ma liliu mai i le Atua, ma ‘ia latou faia amio e tatau ma le salamō.#Galu 9.20, 28-29 21‘Ona o nei mea ‘ua pu‘e mai ai Iutaia ‘iā te a‘u i le malumalu, ma latou taumafai ‘ona fasioti ‘iā te a‘u. 22O lea fo‘i na maua ai e a‘u le fesoasoani mai le Atua, ‘ou te tumau ai ‘ua o‘o i lenei aso, o lo‘o molimau i tagatanu‘u ma ali‘i, ‘ou te lē fai atu se tasi mea na o ia mea ‘ua ta‘u mai e le ‘au perofeta ma Mose o le a taunu‘u; 23e tigā le Keriso, i le ma lea ‘ona o ia e mua‘i toetū mai fo‘i o ia i ē ‘ua oti, na te folafola le malamalama i le nu‘u nei ‘atoa ma nu‘u ‘ese.”#Isai 42.6; 49.6; 1 Kori 15.20
24‘Ua fa‘apea ‘ona fa‘atonuina atu e ia, ‘ua fai mai ai Feso ma le leo tele, “Paulo e, ‘ua e valea; o le tele o lou su‘e i tusi ‘ua ‘avea ai oe ma vale.”
25A ‘ua tali atu o ia, “Le ali‘i e Feso, ‘ou te lē valea, a ‘ou te tautala atu i ‘upu moni ma le fa‘autauta. 26Auā o lo‘o silafia e le tupu nei mea ‘ou te tautala fa‘amalosi atu nei i ai; auā ‘ua ‘ou iloa lelei ‘ua lē lilo se tasi mea o ia mea ‘iā te ia; auā na lē faia fa‘alilolilo lenei mea. 27Le tupu e Akeripa, ‘ua e talitonu ‘ea i le ‘au perofeta? ‘Ua ‘ou iloa lava ‘ua e talitonu.”
28‘Ona fai mai lea o Akeripa ‘iā Paulo, “‘Ua e manatu o se mea itiiti ‘e te fa‘aliliuina ai a‘u e fai ma Kerisiano.”
29‘Ona fai atu lea o Paulo, “‘Ou te ‘ai‘oi atu lava i le Atua, ia lē o se mea itiiti, po o se mea tele, a ‘ia pei o a‘u nei, e lē na o oe, ‘ae ‘atoa fo‘i ma ē o fa‘afofoga mai uma lava ‘iā te a‘u i lenei aso, ‘ia fa‘apea lava ‘outou, ‘ae tu‘u pea ia o nei noanoaga.”
30‘Ua fa‘apea atu o ia, ‘ona tula‘i lea o le tupu ma le ali‘i, ma Perenike ma ē sa nonofo ma i latou. 31‘Ua ō ane i latou, ‘ona fetautalatala‘i lea, ‘ua fa‘apea ane, “‘Ua lē faia e lenei tagata se mea e tatau ai le oti, po o le noanoatia.” 32‘Ona fai atu lea o Akeripa ‘iā Feso, “‘Ana lē vala‘au lenei tagata ‘iā Kaisara, po ‘ua mafai ‘ona tu‘u atu ‘iā te ia e alu.”
اکنون انتخاب شده:
Galuega 26: RSCB
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Revised Samoan Catholic Bible © Bible Society of the South Pacific, 2010.