Job 2
2
1Huk punchawmi llapa angelkuna Tayta Diospa qayllanman rirqaku. Satanaspas Diospa qayllanmanmi rirqa. 2Chaymi Satanasta Tayta Dios tapurqa:
¿Maymantataq hamuchkanki? nispa.
Satanasñataqmi nirqa:
Allpa pacha patan-patan muyumusqaymantam hamuchkani, nispa.
3Hinaptinmi Tayta Dios nirqa:
¿Yaqachum rikumurqanki serviqniy Jobta? Kay allpa pachapiqa manam pipas pay hinaqa kanchu mana huchallikuspa munasqayman hina ruwaqqa, payqa kasuwaspam ima mana allinkunamantapas sapaqchakun. Yanqapuni paypa kapuqninkunata tukurachiwachkaptikipas hinallam payqa mana huchayuq kachkan, nispa.
4Chaymi Tayta Diosta Satanás, nirqa:
Runaqa aychanta mana imanasqaqa hawkam kawsakun, vidanraykum ichaqa imatapas ruwanman. 5Sichum aychanpiwan tullunpi nanayta qoykuptikiqa uyaykipipunim ñakaykusunkiman, nispa.
6Hinaptinmi Satanasta Tayta Dios nirqa:
Allinmi, munasqaykitayá paywan ruway, ichaqa amam wañuchinkichu, nispa.
7Tayta Diospa qayllanmanta lloqsiruspanmi Satanasqa Jobpa aychanta isuwan llumpa-llumpayta tukurachirqa chaki pampanmanta uma puyukninkama. 8Chaymi Jobqa uchpapa hawanpi tiyaykuspan pakisqa kallanawan siksikurqa. 9Warminñataqmi nirqa:
¿Hinallaraqchu iñiynikipi takyapakuchkanki? ¡Diosta ñakaspayki hukllata wañuy! nispa.
10Hinaptinmi Job nirqa:
¡Mana yuyayniyuq warmikuna hinam rimarunki! allin kaqkunata Diosmanta chaskichkaspaqa ¿manachum mana allin kaqkunataqa chaskichwan karqa? nispa.
Tukuy chaykuna rimasqanwanpas Jobqa manam huchallikurqachu.
Amigonkunapa Jobman watukusqankumanta
11Jobpam kimsa amigonkuna karqa: Temán llaqtayuq Elifaz, Súah llaqtayuq Bildad hinaspa Naamat llaqtayuq Zofar. Paykunam Jobpa sasachakuyninta yacharuspanku sonqonta tiyaykachinankupaq watukuq rirqaku. 12Paykunam karullamantaraq qawarispanku Jobtaqa mana reqsiytapas atirqakuchu, chaymi qaparispa waqarqaku, pachankutapas llikikuspankum allpatapas umankuman machqekurqaku. 13Hinaspam Jobwan kuska pampapi tiyaykurqaku. Jobpa nanaynin llumpa-llumpay kasqanraykum paykunaqa mana imallatapas rimapayaspanku qanchis punchaw qanchis tuta chaynalla karqaku.
Chuya Qellqa Revisión @ Sociedad Bíblica Peruana, 2012