Isaías 57
57
1Allin kawsakuq runakunam wañunku,
manam pitapas imapas qokunchu.
Kuyapayakuq runakunam chinkanku,
ichaqa manam pipas musyanchu
sasachakuymanta librasqaña kasqankuta.
2Paykunaqa hawka kaymanmi yaykurunku,
sepulturankupim hawkaña samarunku.
Ídolo yupaychaqkunata sentenciasqanmanta
3Tayta Diosmi kaynata nin:
Brujakunapa wawankuna asuykamuychik,
chuchumikapa mirayninkuna asuykamuychik.
4¿Pimantataq asikurqankichik?
¿Pitataq simikichikwan hatunmanta kutipakurqankichik?
¿Pitataq qallupayarqankichik?
Qamkunaqa mana kasukuq llulla miraykunam kankichik.
5¿Manachum encina sachakunapa,
llaqesapa sachakunapa ukunpi huchapakunkichik?
Wawakunatam wayqokunapi, uchkukunapi idolokunapaq wañuchipunkichik.
6Qamkunaqa wayqokunapi lluchka rumikuna yupaychaytam munankichik,
chay rumikunapaqmi vinota tallipunkichik,
kawsaykunamanta ofrendakunatam kañapunkichik.
Chaykunata ruwachkaptikichikchu
¿qamkunata mana castigaykichikman karqa?
7Sayay-sayay alto orqopa puntanpim camaykita churarqanki,
chay orqokunamanmi ofrenda kañaq seqarqanki
8Wasi punkuykipa qepanpim
millakuypaq idolokunata churarqanki.
Ñoqata qepanchawaspaykim pachaykikunata chustukuspa
hatun camapi hukwan puñukurqanki.
Huchapakusqayki qarikunawanmi
chay idolokunapa qayllanpi contratota ruwarqanki.
9Moloc idolomanmi aceite aparisqa rirqanki,
perfumekunatam payman aparqanki;
karukunamanraqmi comisionta kacharqanki,
wañuqkunapa kasqanmanraqmi uraykachirqanki.
10Purikusqaykipi llumpayta pisiparuchkaspapas,
manam “chaykamallaña kachun” nirqankichu;
aswanraqmi kallpanchakuspa
mana allin ruwaynikita mana saqenkichu.
11¿Pita manchakuspaykitaq
ñoqapi manaña iñispa karunchakurunki?
¿Unayña mana rimarisqayraykuchu
manaña kaqpaqpas hapiwanki?
12Imaynam kawsasqaykitam willakachakusaq,
chay ruwasqaykikunaqa manam imapipas yanapasunkichu.
13Maynataña qayakuptikipas
millakuypaq idoloykikunaqa manam librasunkichu,
chaykunataqa sinchi wayram aparuspa chinkarachinqa.
Ñoqapi hapipakuqkunam ichaqa herencianpaq allpata chaskinqaku,
ñoqapaq sapaqchasqa orqopim yachanqaku.
Wanakuqkunata consuelasqanmanta
14Tayta Diosmi nin:
Ñanta kichaspa allichaychik,
llaqtay pasananpaq ñanpi mitkachikuqkunata wischuychik, nispa.
15Wiña-wiñaypaq kawsakuq Diosmi,
hatu-hatun Chuya Diosmi kaynata nin:
Ñoqaqa alto-altopim, chuyay-chuyay sitiopim yachani,
wanakuspa uchuychakuqkunawanmi yachani,
hinaspaymi paykunata kallpanchani.
16Manam wiñaypaqchu llaqtaywan churanakusaq,
nitaqmi wiñaypaqchu paykunapaq piñakusaq,
mana chayqa llapa runakunawan lliw unanchasqaykunam
qayllaypi hukmanyanmanku.
17Engañaspa mana allinkunata ruwasqanraykum
piñakuspay Israelta ñakarichirqani,
piñakuyniypim paymanta pakakurqani;
Aswanqa paymi mana kasukuq rikurirurqa,
munasqallan ruwaymanmi qokururqa.
18Imaynam kawsasqantam qawarqani,
chaywanpas hampispaymi payta michisaq,
paytaqa ñoqam hawkayachisaq,
llakinkunamantam consuelasaq.
19 #
Ef 2.13. Ñoqa Tayta Diosmi llapallankuta rimachisaq:
“Karupi kaqkunapas, hichpapi kaqkunapas hawkallayá kachunku”, nispa.
Llaqtaytaqa ñoqam hampisaq.
20Mana allin ruwaq runakunam ichaqa
sinchi wayrapa pukusqan lamar qocha hina,
manam hawkalla kaytaqa atinkuchu,
yakunkunapas mitutawan qachankunata wischumuq hinaraqmi.
21 #
Is 48.22. Mana allin runakunapaqqa
manam haykapipas hawkayay kanchu.
Ñoqa Tayta Diosmi chaynata nini.
Chuya Qellqa Revisión @ Sociedad Bíblica Peruana, 2012