Isaías 56
56
Diospa pacton waqaychanamanta
1Tayta Diosmi kaynata nin:
Mana pimanpas sayapakuspa lliwpaq allinkunallata ruwaychik,
munasqayman hina kawsaychik,
libranay punchawmi hichpamuchkanña,
allin ruwaq kasqayta qawachinay punchawmi chayamuchkanña.
2Mayna kusisqam kamachisqaykunata
mana iskayrayaspa kasukuq runaqa,
samana punchawta mana sarutyaq runaqa,
mana allin ruwaymanta rakikuq runaqa.
3Tayta Diosman hapipakuq huklaw llaqtayuq runaqa amayá nichunchu:
“Tayta Diosqa llaqtanmantachá rakiruwanqa”, nispaqa.
Qolluq runapas amayá nichunchu:
“Ñoqaqa chakisqa sacha hinam kani”, nispaqa.
4Chayraykum Tayta Dios kaynata nin:
Sichum qolluq runakuna kasuwaspa
samana punchawniykunapi samanqaku,
chaynataq munasqaykunata ruwaspa
pactoytapas kasukunqaku,
5hinaptinqa paykunamanmi
churikuna qonaymantapas aswan allin kaqkunata qosaq,
temploypa perqankunapim sutinkuta qellqachisaq,
mana chinkaq wiñaypaq takyaq sutitam qosaq.
6Sichu huklaw llaqtayuq runakunapa churinkuna
ñoqa Tayta Diosman serviwananpaq hapipakuptinkuqa,
ñoqapa sutiyta kuyaspa serviqniyña rikuriruptinkuqa,
chaynataq kasuwaspa samana punchawpi samaptinkuqa,
hinaspa pacto ruwasqaytapas kasukuptinkuqa,
7 #
Mt 21.13; Mr 11.17; Lc 19.46. paykunatam sapaqchasqay orqoman pusasaq,
mañakuwananku wasiypim samachisaq;
lliw kañana sacrificiotawan ofrendakuna ofrecewasqankutapas chaskisaqmi.
Temployqa “llapallan llaqtakunapa mañakunan wasiwan” sutichasqam kanqa.
8Israel runakunata preso kasqankumanta
kutichimuq Tayta Diosmi kaynata nin:
Chay kutichimusqay llaqtamanmi huk runakunatawanraq
huñumusaq, nispa.
Mana allin kamachikuqkunata qaqchasqanmanta
9Purun animalkuna,
montepi manchakuypaq animalkuna,
mikuq hamuychik.
10Llaqtay nanachikuqkunaqa ñawsakunam,
mana imallatapas yachaqkunam,
llapallankupas mana rimariq allqokunam,
mana anyakuy atiq allqokunam,
wischurayaspa puñuywan arwitakuqkunam,
puñukuylla kuyaqkunam.
11Paykunaqa mikuspapas mana saksaq allqokunam,
mana imatapas musyaq michiqkunam;
sapakama munasqankuman hina kawsaqkunam,
kikillankupaq chaskikuy munaqkunam.
12Paykunam ninku:
“Hamuychik vinota upyakusun,
poqosqa aqata sinkananchikkama upyakusun;
paqarinpas kunan punchaw hinam kanqa,
kunanmantapas aswan allin punchawraqmi kanqa”, nispanku.
Chuya Qellqa Revisión @ Sociedad Bíblica Peruana, 2012