Isaías 51
51
Jerusalén wiñaypaq salvasqa kananmanta
1Tayta Diosmi nin:
Allin ruwayta munaqkuna,
Tayta Diosta maskaqkuna, uyariychik.
Mayqan qaqamanta pakimusqa kasqaykichiktayá yuyariychik,
mayqan rumimanta hurqomusqa kasqaykichiktayá qawariychik.
2Taytaykichik Abrahammanta yuyariychik,
mamaykichik Saramanta yuyariychik.
Abrahamta qayaptiyqa sapallanraqmi karqa,
ichaqa bendecispaymi mirachirqani.
3Tayta Diosmi Sión llaqtata llakipayarinqa,
purmasqa llaqtatam kuyapayarinqa,
chunniq allpankunatam Edén huertaman tikranqa,
mana imapa qespinan allpankunata
Tayta Diospa huertanman tikranqa.
Chaypiqa ancha kusikuymi kanqa,
graciasta qospam takinqaku.
4Llaqtalláy chaylla uyariway,
runaykuna allinta uyariwaychik:
Yachachikuykunam ñoqamanta lloqsimunqa,
kamachikuyniymi runakunata kancharinqa.
5Allin ruwanay punchawmi hichpamuchkanña,
salvanay punchawmi chayamuchkanña,
atiyniywanmi llaqtakunapi munaychakusaq.
Lamar qochapa patanpi llaqtakunam ñoqamanta suyanqaku,
atiyniypim hapipakunqaku.
6Cielokunata qawariychik,
kay pachatapas qawariychik;
cielokunapas qosni hinallam chinkarunqa,
kay pachapas mawka pacha hinallam tukurunqa,
runankunapas lliwmi puchukarunqa.
Salvacionniymi ichaqa wiña-wiñaypaq takyanqa,
allinkuna ruwasqayqa mana tukuqmi kanqa.
7Allin ruwayta yachaqkuna,
yachachikuyniyta sonqoykichikpi hatalliqkuna uyariwaychik:
Runakuna kamisuptikichikpas ama hukmanyaychikchu,
usuchisuptikichikpas ama llakikuychikchu.
8Paykunaqa puyusqa pacha hinam tukurunqaku,
urupa mikusqan millwa hinam tukurunqaku.
Salvacionniywan allinkuna ruwasqaymi ichaqa wiñaypaq takyanqa.
9¡Rikchariy! ¡Tukuy Atiyniyuq Dios Taytalláy, rikchariy!
Atiywan pachakuy,
ñawpaq watakunapi hina rikchariy,
ñawpaq tiempokunapi hina rikchariy.
¿Manachum qamqa lamar qochapi manchakuypaq #51.9 Rahab nispaqa Egipto naciontawan rikchanachispam nichkan.Rahab sutiyuq animalta tuksiparurqanki?
10¿Manachum qamqa kachkanki uku-uku lamar qochata chakichispa,
salvasqaykikuna chayninta lluptinankupaq ñanta kichaykuq?
11Tayta Diospa kutichimusqankunaqa,
kusikuywan qaparispam Sión llaqtaman kutimunqaku,
umankupas wiñaypaq kusikuywan coronasqam yaykunqaku.
Ancha kusikuyllapiña tarikuptinkum
nanaypas llakikuypas paykunamanta chinkanqa.
12Tayta Diosmi kaynata nin:
Ñoqam kallpanchaqniki kani,
¿imanasqataq runakunata manchakunki?
¿Imanasqataq qora hina chakiruqlla runakunata manchakunki?
13¿Hanaq pachata mastarispa kay pachatapas takyachiq
unanchasuqniki Tayta Diostachu qonqarunki?
¿Hinallachu ñakarichisuqnikipa piñakuyninta
sapa punchaw manchakunki?
¿Maypitaq ñakarichisuqnikipa piñakuynin kachkan?
14Ñakarichisqa presokunam chaylla kacharisqa kanqaku,
calabozopiqa manam wañunqakuchu,
mikunankupas manam pisinqachu.
15Ñoqa Tayta Diosmi lamar qochata kuyurichini,
olankunatapas qaparichini.
Ñoqaqa Tukuy Atiyniyuq Tayta Dioswan sutichasqam kani.
16Cielokunatam mastarirqani,
kay pachatam takyachirqani.
Simikimanmi palabraykunata churarqani,
makiypa llantuyninwanmi harkarqayki.
Sionpi yachaqkunatam nini:
“Llaqtaymi qamqa kanki”, nispay.
17 #
Ap 14.10; 16.19. ¡Jerusalén llaqta Rikchariy,
rikcharispa hatariy!
Qanmi Tayta Diospa makinmanta piñakuynin copata chaskirunki,
sinkanaykikamam upyarunki,
tukunaykikamam vasopi kaqta tomarunki.
18Llapallan wachakusqayki wawaykikunamantapas
manam mayqanpas makikimanta pusasuqniki kanchu,
lliw uywasqayki warmakunamantapas
manam hukllapas makikimanta pusasuqniki kanchu.
19Kay iskay sasachakuymi hayparamusunki:
Guerrawan purmachisqa kaspa yarqaymanta ñakariy.
¿Pitaq llakipayasunkiman?
¿Pitaq hawkayayta qosunkiman?
20Wawaykikunam manaña kallpayuq rikurirunku,
mallapi wichqasqa luwichu hinam
callekunapi wischurayachkanku,
paykunaqa Diosnikipa piñakuyninwan ñakarichisqam kachkanku.
21Chaynaqa, ñakariypa intusqan llaqta,
mana vinollawan macharuq llaqta,
kayta uyariy;
22Dios Taytaykim,
llaqtanmanta nanachikuq Diosnikim kaynata nin:
Tankikachachisuqniki copatam makikimanta qechusqayki,
machanaykipaq upyasqayki piñakuyniy vasotam qechusqayki,
manañam piñakuyniy vasomantaqa upyankiñachu.
23Aswanqa ñakarichisuqniki nacionkunamanmi
chay vasomanta tomachisaq;
paykunam nisuq kanki:
“Hawaykita purinaykupaq pakchakuy”, nispanku.
Chaymi allpata hina sarupasunaykipaq,
ñanta hinam wasaykita pampaman churarqanki.
Chuya Qellqa Revisión @ Sociedad Bíblica Peruana, 2012