2 Samuel 6
6
Arcata Jerusalenman David apasqanmanta
(1 Cr 13.5-14)
1Davidmi, Isaraelpi soldadokunamanta akllaspan kimsa chunka waranqata huñururqa, 2#Ex 25.22.hinaspam llapallan tropankunapiwan Judá lawpi Baala llaqtaman pasarqaku Diospa Arcanta chay lugarmanta Jerusalenman apanankupaq. Chay Arcapim Diospa sutinta mañakuqku. Chaypitaqmi querubinkunapa chawpinpi Tukuy Atiyniyuq Tayta Diosqa munaychakuq. 3#1 S 7.1-2.Moqopi kaq Abinadabpa wasinmantam Diospa Arcanta musoq carretaman churaykuspanku aparqaku. 4Abinadabpa churinkunañataqmi Diospa Arcanwan rirqaku. Paykunam karqaku Uzawan Ahío. Arcapa ñawpaqnintam Ahío rirqa. 5Davidwan Israel runakunañataqmi, Tayta Diospa ñawpaqninta rirqaku tukuy sonqomanta takistin, danzastin, arpakunata, tinyakunata, panderetakunata hinaspa platillokunata tocastin. 6Naconpa eranman chayaruptinkum, torokuna mitkaruptin, Diospa Arcan mana wichiykunanpaq Uzañataq takyachirqa. 7Hinaptinmi Uzapaq Tayta Dios llumpayta piñakururqa mana manchakuspa ruwasqanrayku. Chaymi Uza chayllapi wañururqa.
8Uzata Tayta Dios wañurachisqanraykum Davidqa llumpayta piñakururqa, chaymi chay lugarta #6.8 Hebreo simipi Pérez-uza ninanqa “Uza sutiyuq runapa wañusqan” ninanmi.“Pérez-uza” nispa suticharqa. 9Chaynapim Tayta Diosta manchakuspan Davidqa chay punchaw kaynata nirqa:
“Manañam Diospa Arcantaqa apaymanchu”, nispa.
10Jerusalén llaqtaman Tayta Diospa Arcanta manaña apayta munaspanmi, kamachirqa Gat llaqtayuq Obed-edompa wasinman apanankupaq. 11#1 Cr 26.4-5.Chaymi Tayta Diospa Arcan Obed-edompa wasinpi kimsa killa karqa, chayraykum Obed-edomtawan lliw ayllunkunata Tayta Dios bendeciykurqa.
Diospa Arcanta Jerusalenman chayachisqankumanta
(1 Cr 15.1-16.6)
12Rey Davidmanmi willaykurqaku:
Obed-edompa wasinpi Tayta Diospa Arcan kasqanraykum payta, ayllunkunata chaynataq lliw kapuqninkunatapas Dios bendeciykun, nispa.
Chaymi Obed-edompa wasinmanta Diospa Arcanta kusikuywan Jerusalenman David apachimurqa. 13Tayta Diospa Arcan apaqkuna soqta ichiyta puriruptinkum, Davidqa huk torotawan huk poqosqa carnerota Diospaq sacrificarqa.
14Davidmi linomanta efodwan pachasqa Tayta Diospa ñawpaqninpi tukuy kallpanwan danzarqa. 15Chaynatam ancha kusikuywan qaparispanku, trompetata tocaspanku, Davidwan llapa Israel runakuna Diospa Arcanta aparqaku.
16Jerusalenman Tayta Diospa Arcan chayaruptinmi, Saulpa warmi churin Micalmi ventananta qawarispa rey Davidta Tayta Diospa ñawpaqninpi pawaykachaspa danzasqanta rikururqa, hinaspanmi llumpayta penqarqa.
17Tayta Diospa Arcanta chayarachispankum Davidpa hatarichisqan carpapa ukunman churaykurqaku. Davidmi Tayta Diospa qayllanpi lliw kañana sacrificiota ofrecerqa chaynataq Dioswan allinlla kasqankumanta ofrendakunatapas. 18Ofrendakuna ofreceyta tukuruspanmi, Davidqa llapa runakunata Tukuy Atiyniyuq Tayta Diospa sutinpi bendeciykurqa. 19Hinaspanmi chaypi tarikuq Israel runakunaman, qarimanpas warmimanpas, huk tantanka, huk parten aychata chaynataq uvas pasasmanta huk parten tortillata aypurqa. Chaymantam lliw runakuna sapakama wasinkuman kutikurqaku.
20 # 1 Cr 16.43. Davidpas ayllunta bendecinanpaqmi palacionman kutirqa. Ichaqa Saulpa warmi churin Micalmi Davidta chaskinanpaq lloqsiruspan nirqa:
¡Mayna alabasqam kunan punchaw Israelpa reynin karunki, mana penqakuyniyuq runa hina criadoykikunapa qayllanpi penqaynikita qawachikamuspayki! nispa.
21Chaymi Micalta David nirqa:
Arí, Tayta Diospa qayllanpim danzarqani, taytaykimantapas chaynataq llapallan mirayninkunamantapas, Israel runakunapi kamachikunaypaq akllawasqanrayku. Diospa qayllanpiqa aswanraqmi danzakusaq. 22Kay ruwasqay penqakuypaq rikchakapusuptikiqa aswan mastaraqmi ruwasaq; ichaqa chay nisqayki criadakunapa allin qawasqanraqmi kasaq, nispa.
23Chaymi Saulpa churin Micalqa wañunankama mana wawayuq karqa.
Chuya Qellqa Revisión @ Sociedad Bíblica Peruana, 2012