2 Samuel 18
18
Absalón wañusqanmanta
1Davidmi soldadonkunata tropa-tropata rakinaspan sapa waranqa soldadokunapaq hinaspa sapa pachak soldadokunapaq kamachikuqta churarqa. 2Kimsaman tropankunata rakiruptinmi, punta kaq tropata Joab kamachirqa, iskay kaq tropatam Sarviapa wawan Joabpa wawqen Abisai kamachirqa, kimsa kaq tropatañataqmi Gat llaqtayuq Itai kamachirqa. Tropankunatam David nirqa:
Ñoqapas qamkunawan kuskam peleaq risaq, nispa.
3Ichaqa tropankuna nirqaku:
Manapunim ñoqaykuwanqa riwaqchu, enemigonchiktaqa manam imapas qokunqachu ñoqayku lluptiptiykupas otaq wakin soldadokuna wañuptiykupas, qamqa chunka waranqa soldadomantapas mastam valenki. Aswanqa yanapamuwanaykikupaq llaqtapi qepay, nispanku.
4Hinaptinmi rey David nirqa: Qamkunapa nisqankichik ruwasqa kachun, nispa.
Llaqtapa punkunpa waqtanpi rey sayaykuptinmi tropankuna pachakninpi waranqanpi lloqsirqaku.
5Reymi Joabta, Abisaita hinaspa Itaita kaynata kamachirqa:
Ñoqaraykum churiy Absalonta ama imanankichikchu, nispa.
Absalonmanta capitankunaman reypa kamachisqantam llapa tropakunapas uyarirqaku. 6Davidpa tropankunam Israel tropakunawan peleaq lloqsirqaku.
Chaymi Efraín law montepi peleaptinku, 7Israel tropakuna Davidpa tropankunawan vencerachikurqaku, chay punchawpim iskay chunka waranqa soldadokuna wañururqaku. 8Guerram lliw llaqtaman chayarurqa. Chay punchawqa espadawan wañuqkunamantapas mastaqa montepim wañururqaku. 9Absalonmi mulanpi sillada richkaspan Davidpa tropankunawan tuparurqa, chaymi kallmasapa hatun encina sachapa ukunman mulan yaykuruptin chukchan wankikururqa, hinaptinmi warkurayachkaq qeparurqa, mulanñataqmi pasakurqa. 10Chaytam huk runa rikuruspan Joabman willarqa:
Absalontam encina sachapi warkurayachkaqta rikuramuni, nispa.
11Joabñataqmi chay runata nirqa:
¡Rikuchkaspaykiqa pampaman wichiykachispachiki wañurachiwaq karqa! Ñoqam pachak gramo qollqetawan weqaw watanata qoykiman karqa, nispa.
12Chaymi Joabta chay runa nirqa:
Waranqa gramo qollqetaña qowaptikipas reypa churintaqa manam imanaymanchu karqa. Reymi kamachisurqankichik qamta, Abisaita hinaspa Itaitapas, “churin Absalontaqa amam imanankichikchu nispa”, chaytam uyarirqaniku. 13Chaytaqa vidaypa contranpichá ruwayman karqa. Reypaqqa manam imapas pakasqaqa kanchu. Qampas manam yanapawankimanchu karqa, nispa.
14Joabñataqmi nirqa:
Yanqañam qanwanqa tiempoyta usuchini, nispa. Hinaspanmi kimsa lanzawan Absalonta qasqonpi clavarurqa encina sachapi warkurayachkaqta. 15Joabpa arman apaq chunka jovenkunapas Absalonpa muyuriqninpi churakuykuspankum wañupaykachirqaku. 16Hinaspam cornetata Joab tocaykuspa soldadonkunata harkakuruptin Israel runakunata manaña qatirqakuñachu.
17Absalonpa cuerpontam montepi hatun uchkuman wischuykuspa hawanman rumikunata montorurqaku. Israel soldadokunañataqmi sapakama wasinkuman ayqekurqaku.
18Absalonmi kawsachkasparaq huk monumentota ruwarachikurqa “reypa wayqon” nisqanku sitiopi, kaynata tanteaspa:
Ñoqapaqqa manam churiypas kanchu sutiy yuyarisqa kananpaqpas, nispa.
Chay monumentotam kikinpa sutinwan suticharqa. Chaymi kunankama “Absalonpa monumentonwan” reqsisqa.
19Sadocpa churin Ahimaasmi Joabta nirqa:
Ama hina kaspa kachaykuway reyman kallpaspay, imaynam enemigonmanta Tayta Dios libraykusqanta willamunaypaq, nispa.
20Chaymi Joab nirqa:
Kunanqa manam willamuwaqchu, reypa churin wañusqanraykum huk punchawña willamunki, nispa.
21Ichaqa Etiopía nacionniyuq soldadotam Joab nirqa:
Rispayki reyman imam rikusqaykita willamuy, nispa.
Hinaptinmi chay runaqa Joabpa ñawpaqninpi kumukuykurqa, hinaspam kallparqa. 22Sadocpa churin Ahimaasñataqmi huktawan Joabta nirqa:
Ima kaptinpas Etiopía nacionniyuq soldadopa qepanta kallpasaq, nispa.
Joabmi ichaqa nirqa:
Churilláy ¿imapaqtaq kallpawaq? Willamusqaykimantaqa manam ima premiotapas chaskinkichu, nispa.
23Chaymi Ahimaas nirqa:
Munanki mana munanki kallpasaqmi, nispa.
Joabñataqmi nirqa:
Munaspaqa kallpayá, nispa.
Chaymi Ahimaasqa pampan kaq ñanninta kallpaspan Cus nacionniyuq soldadota llallirurqa. 24Davidmi llaqtapa punkunpi tiyachkarqa. Llaqta cuidaq runañataqmi punkupi perqapa hawanman seqaruspan huk runa sapallan kallpamuchkaqta rikururqa. 25Hinaspam qaparispan reyman willarqa. Reyñataqmi nirqa:
Sapallan hamuspaqa allin willakuytam apamuchkan, nispa.
Kallpamuq runa astawan hichpamuptinmi 26llaqta cuidaqñataq huk runatawan kallpamuchkaqta rikururqa, hinaspam punku cuidaqta qayarqa:
Huk runapas sapallanmi kallpamuchkan, nispa.
Chaymi rey nirqa:
Chay runapas allin willakuytam apamuchkan, nispa.
27Llaqta cuidaqmi yapamanta nirqa:
Punta hamuqpa kallpamuyninmi Sadocpa churin Ahimaaspa kallpayninman rikchakun, nispa.
Chaymi rey nirqa:
Chay runaqa allin runam, allin willakuytachá apamuchkan, nispa.
28Chayaruspanmi Ahimaasqa reyta hatunmanta rimaykuspan ñawpaqninpi pampakama kumukuykuspan nirqa:
Yupaychasqayki Tayta Diosyá hatunchasqa kachun, paymi qam reyniypa contranpi hoqarikuqkunata makiykuman churaykamurqa, nispa.
29Hinaptinmi rey tapurqa:
¿Allinllachu churiy Absalón kachkan? nispa.
Ahimaasñataqmi nirqa:
Joab kachamuwachkaptinmi achkallaña runakuna huñunakuruspa chaqwakuchkaqta rikurqani, ichaqa manam ima pasakusqantapas yacharqanichu, nispa.
30Chaymi rey nirqa:
Suchurispa chaylawpi sayay, nispa.
Ahimaasñataqmi chaylawman suchurispan chaypi sayarqa. 31Chayllamanmi etíope soldadopas chayaramuspan nirqa:
Reynilláy, kay allin willakuytayá uyariy. Kunanmi contraykipi llapallan hoqarikuqkunamantam Tayta Dios libraykusunki, nispa.
32Hinaptinmi etíope soldadota rey tapurqa:
¿Allinllachu churiy Absalón kachkan? nispa.
Etíope soldadoñataqmi nirqa:
Chay runa hinayá qam señor reyniypa enemigoykikunapas ruwasqa kachun chaynataq daño ruwasunaykipaq contraykipi llapallan hoqarikuqkunapas, nispa.
33Chaymi rey hukmanyaruspan punkupa altonpi cuartoman waqastin seqarqa. Waqastin rispanmi nirqa:
¡Churilláy Absalón,
churilláy, Absalón!
¡Qampa rantikipi ñoqa wañuyman karqa!
¡Kuyasqay churilláy Absalón! nispa.
Chuya Qellqa Revisión @ Sociedad Bíblica Peruana, 2012