2 Reyes 3
3
Israelpi rey Joram munaychakusqanmanta
1Judá nacionpi rey Josafat chunka pusaqniyuq wataña munaychakuchkaptinmi, Israel nacionpi Acabpa churin Joram Samaria llaqtamanta munaychakuyta qallaykurqa, chunka iskayniyuq watam munaychakurqa. 2Payqa Tayta Diospa qayllanpim mana allinkunata ruwarqa. Ichaqa manam taytanpa nitaq mamanpa ruwasqanta hinachu; payqa taytanpa rumimanta ruwasqan Baalpa idolonkunatam wischururqa. 3Chaywanpas Israelpa mirayninkunata huchallichiq Nabatpa churin rey Jeroboam hinam huchallikurqa.
Moab nación vencesqa kananmanta
4Moab nacionpa reynin Mesam achka ovejakunata uywaq, chaymi Israel nacionpa reyninman impuestota pagaq pachak waranqa malta carnerokunatawan pachak waranqa millwantin carnerokunata. 5Ichaqa rey Acab wañuruptinmi, Israel nacionpa reynin Jorampa contranpi Moab nacionpa reynin hoqarikururqa. 6Rey Joramñataqmi Samaria llaqtamanta lloqsiruspan Israel nacionpa tropankunata huñururqa. 7Hinaspam Judá nacionpa reynin Josafatman kaynata willachimurqa:
Moabpa reyninmi contraypi hoqarikurun, ¿yaqachu paypa contranpi peleaq reysiwankiman? nispa.
Chaymi Judapa reynin Josafat nirqa:
Arí risaqmi, qanwan ñoqawanqa chullallam kanchik, runaykunawan caballoykunapas qampa hinallam. 8¿Maylawnintataq risunchik? nispa.
Rey Joramñataqmi nirqa:
Edom nacionman riq chunniq ñannintam risun, nispa.
9Chaymi Israelpa, Judapa hinaspa Edompa reyninkuna rirqaku. Qanchis punchawña chunniqninta muyuchkaptinkum soldadokunapaqwan animalkunapaq yaku pisirurqa. 10Hinaptinmi Israelpa reynin nirqa:
¡Imallapitaq rikukunchik! Tayta Diosmi kimsanchikta huñuramuwanchik moabitakunaman qoykuwananchikpaq, nispa.
11Chaymi rey Josafatqa tapukurqa:
¿Manachu pipas Tayta Diospa profetan kaypi kanman, chaynapi paynintakama Diosta tapunanchikpaq? nispa.
Hinaptinmi Israel nacionpi reypa serviqninkunamanta kaq nirqa:
Kaypim kachkan Safatpa churin Eliseo, payqa Eliaspa serviqninmi, nispa.
12Josafatñataqmi nirqa:
Payqa Tayta Diospa nisqantam willaykuwasun, nispa.
Chaymi Israel nacionpa reynin, Edom nacionpa reynin hinaspa rey Josafat, Eliseopa kasqanman rirqaku. 13Chaymi Israelpa reyninta Eliseo nirqa:
¿Imatataq ñoqawan munanki? Taytaykipa chaynataq mamaykipa profetankunata tapukamuy, nispa.
Israelpa reyninñataqmi nirqa:
Manam, Tayta Diosmi kay kimsa reykunata huñuramuwanku moabitakunaman qoykuwanankupaq, nispa.
14Hinaptinmi Eliseo nirqa:
Tukuy Atiyniyuq Tayta Diosqa kawsanmi, paypa qayllanpim kunan kachkani, Judá nacionpa reynin Josafatta mana respetaspayqa manam qawayllapas qawarikimanchu karqa. 15Chaynaqa, arpa tocaqta pusamuwaychik, nispa.
Chaymi arpa tocaq tocanankama Tayta Diospa atiynin Eliseoman huntaykurqa, 16hinaptinmi kaynata nirqa:
Tayta Diosmi nin, kay qechwapiyá pozokunata ruwaychik, 17Tayta Diosmi kaynata nin: Manam wayratapas nitaq paratapas rikunkichikchu, ichaqa kay qechwamanmi yaku huntamunqa, hinaptinmi qamkunapas tomankichik chaynataq animalnikichikkunapas tomanqaku. 18Chaykunaqa Tayta Diospaqqa mana kaq hinallam, payqa moabitakunatapas makikichikmanmi churamunqa. 19Qamkunañataqmi llapa murallasqa llaqtakunatawan sumaq llaqtakunata tuñichinkichik, allinnin sachakunatam kuchunkichik, llapa pukyukunatam pamparunkichik, tarpuna chakrakunatapas rumikunawanmi huntachinkichik, nispa.
20Paqarinnintin achikyaqtam, Diosman ofrenda ofrecena horata, Edom lawmanta yaku chayaramuspan lliw qocharurqa. 21Moabitakunañataqmi paykunawan peleanankupaq reykuna hamusqanta yacharuspanku, chayllaraq arma hapiy yachaqkunamanta qallaykuspa llapallan qarikunata huñururqaku, hinaspam nacionninkupa patanpi churakururqaku. 22Paqarinnintin tutapayta Moab runakuna hatariruspa qawariptinkum yakuta inti kanchaykamurqa, hinaptinmi paykunapaqa yawarpaq rikchakarapurqa. 23Chaymi ninakurqaku:
Wakqa yawarmi. Ñoqanchikman hamuq reykunam kikinkupura peleaspa wañurachinakunku. Chaynaqa, imankutapas hoqarikamunapaq hakuchik, nispanku.
24Israel miraykunapa campamentonman chayaruptinkum ichaqa Israel runakuna hatarispa moabitakunata atacamurqaku, chaymi ñawpaqninkumanta lluptirqaku, hinaptinmi Israel runakunaqa hayparuspa wañurachirqaku. 25Hinaspam llaqtakunatapas tuñichirqaku, allinnin chakrakunamanpas sapakamam rumiwan huntachirqaku, yakuyuq pozokunatapas pamparuspam allinnin sachakunatapas kuchuparurqaku. Kir-hareset llaqtallatañam manaqa tuñirachirqakuchu, ichaqa warakaqkunam muyuriqninpi churakuruspanku tuñichirqaku.
26Moab nacionpa reyninmi peleasqanpi vencerachikusqanta qawakuykuspan, qanchis pachak soldadokunata akllaykurqa Edom nacionpa reyninta atacananpaq, ichaqa manam atirqachu. 27Chaymi paypa rantinpi munaychakunanpaq kaq piwi churinta wañurachispan diosninman murallapa hawanpi kañapurqa. Chayta qawaykuspankum Israel tropakunaqa anchallataña piñakuruspanku llaqtankuman kutikurqaku.
Chuya Qellqa Revisión @ Sociedad Bíblica Peruana, 2012