2 Reyes 2
2
Hanaq pachaman Elías hoqarisqa kasqanmanta
1Eliasta remolino wayrapi hanaq pachaman Tayta Dios hoqarinanpaq kachkaptinmi Eliseowan Eliasqa Gilgalmanta lloqsimurqaku. 2Hinaptinmi Eliseota Elías nirqa:
Tayta Diosmi Bet-el llaqtaman kachawachkan, ama hina kaspaykiyá kayllapi kachkay, nispa.
Chaymi Eliseo nirqa:
Tayta Diosqa kawsanmi, qampas kawsankitaqmi, manam qepaymanchu, qatisqaykipunim, nispa.
Chaynapim kuskanku Bet-el llaqtaman rirqaku. 3Bet-el llaqtapi yachaq profetakunam, Eliseowan tupaq lloqsispanku nirqaku:
¿Manachu yachanki señorniki Eliasta Tayta Dios kunan hoqarirunanta? nispanku.
Chaymi Eliseo nirqa: Arí yachanim, upallaychik, nispa.
4Huktawanmi Eliseota Elías nirqa:
Tayta Diosmi Jericó llaqtaman kachawachkan, ama hina kaspayki kayllapi kachkay, nispa.
Hinaptinmi Eliseo nirqa:
Tayta Diosqa kawsanmi, qampas kawsankitaqmi, manam qepaymanchu, qatisqaykipunim, nispa.
Chaymi kuskanku Jericó llaqtaman chayarurqaku. 5Jericó llaqtapi yachaq profetakunam Eliseoman taripaykuspanku nirqaku:
¿Manachu yachanki señorniki Eliasta Tayta Dios kunan hoqarirunanta? nispanku.
Chaymi Eliseo nirqa:
Arí yachanim, upallaychik, nispa.
6Chaymantam Eliseota Elías nirqa:
Tayta Diosmi Jordán mayuman kachawachkan, ama hina kaspayki kayllapi kachkay, nispa.
Eliseoñataqmi nirqa:
Tayta Diosqa kawsanmi, qampas kawsankitaqmi, manam qepaymanchu, qatisqaykipunim, nispa.
Chaymi kuskanku pasarqaku. 7Ichaqa pichqa chunka profetakunam paykunata qatimuspanku chimpankupi sayaykuspa qawarqaku. Eliaswan Eliseoñataqmi Jordán mayupa patanpi sayaykurqaku. 8Eliasmi capanta pataraykuspan mayuta waqtarurqa, chaymi mayu kichakuykuptin chaki allpanta hina iskayninku chimparurqaku. 9#Dt 21.17.Chimparuptinkum Eliseota Elías nirqa:
Qampaq imapas ruwanayta munaspaykiqa mañakuway manaraq qanmanta rakikuruchkaptiy, nispa.
Chaymi Eliseo nirqa:
Espirituykimanta huk #2.9 Chaynatawan nispaqa “piwi churipa tupaqninta huk chaynatawan qoykuway” ninanmi.chaynatawan atiynikitam munani, nispa.
10Hinaptinmi Elías nirqa:
Sasa ruwana kaqtam mañakurunki. Sichum qanmanta rakisqa kasqayta rikuspaykiqa mañakusqaykitam chaskinki, mana rikuspaykim ichaqa mana chaskinkichu, nispa.
11Rimastin richkaptinkum lenwachkaq caballokunapa aysasqan lenwachkaq carreta rikuriykamuspan paykunata rakirurqa, chaymi remolino wayrapa ukunpi Elías cieloman hoqarikururqa. 12#2 R 13.14.Chayta qawaspanmi Eliseo qaparirqa:
Taytalláy, taytallá, qamqa atiyniyuq tropakuna hinam Israel nacionpaq karqanki, nispa.
Chaymantapunim Eliasta manaña Eliseo rikurqañachu, chaymi pachanta iskayman llikirurqa.
Eliaspa rantinpi Eliseo profetizasqanmanta
13Eliaspa wichiykusqan capanta hoqariykuspanmi Jordán mayu patanman kutirispa chaypi sayarqa. 14Hinaspam Eliaspa wichiykamuq capanwan mayuta waqtaspan nirqa:
¿Maypitaq Eliaspa yupaychasqan Tayta Dios kachkan? nispa.
Chaynata nispa waqtaruptinmi mayu kicharikuykurqa hinaptinmi Eliseo chimparurqa. 15Jericó llaqtapi kaq profetakunañataqmi waklaw chimpamanta qawamuspanku ninakurqaku:
Eliaspa espiritunmi Eliseopiña kachkan, nispanku.
Chaymi Eliseoman taripaspanku ñawpaqninpi qonqoranpa kumuykurqaku. 16Hinaspam nirqaku:
Kaypim ñoqaykuwan kachkan pichqa chunka allinnin qari-qari runakuna. Paykunayá rispanku servisqayki Eliasta maskaramuchunku, ichapas Tayta Diospa espiritun hoqariruspan chay-chay orqopi otaq qechwapi saqerun, nispanku.
Hinaptinmi Eliseo nirqa: Ama kachaychikchu, nispa.
17Ichaqa paykuna hikutaptinkum penqarikuspa Eliseo nirqa:
Maskaramuychikyá, nispa.
Chaymi paykuna pichqa chunka runakunawan rirqaku Eliasta maskamunankupaq, hinaspam kimsa punchaw maskamurqaku ichaqa manam tarimurqakuchu. 18Jericó llaqtapiraq Eliseo kachkaptinmi Eliasta maskamuqkuna kutiramurqaku, hinaptinmi paykunata nirqa:
¿Manachum nirqaykichik amaña rinaykichikpaq? nispa.
Jericó llaqtapi pukyuta Eliseo allinyachisqanmanta
19Jericó llaqtapi runakunam Eliseota nirqaku:
Señorllayku, rikusqaykipi hinam kay llaqtapa kasqan sitioqa allin sitio, ichaqa yakunmi mana allinchu, allpankunapas mana imapa qespinanmi, nispanku.
20Chaymi Eliseo nirqa:
Musoq mankata apamuwaspaykichik chayman kachita hinamuychik, nispa. Mañakusqanta qoykuptinkum,
21Eliseom rispam pukyuman kachita machqeykuspan nirqa:
Tayta Diosmi kaynata nin, ñoqam kay yakuta allinyachini, manañam kunanmantaqa wañuypas nitaq mana imapa qespinan allpapas kanqañachu, nispa.
22Chay punchawmantapunim Eliseopa nisqanman hina chay yakukuna tomanapaqña karqa.
23Jericó llaqtamantam Bet-el llaqtaman Eliseo rirqa. Ñanta qespichkaptinmi llaqtamanta lloqsimuq maqtillukuna burlakuspa nirqaku:
¡Paqla, qespimuy! ¡Paqla, qespimuy! nispanku.
24Eliseoñataqmi paykunata qawarispan Tayta Diospa sutinpi ñakaykurqa, chaymi montemanta iskay ukumarikuna lloqsiramuspa tawa chunka iskayniyuq warmakunata tisaparurqa. 25Chaymantam Eliseoqa Carmelo orqoman pasakurqa, hinaspam Samaria llaqtaman kutikurqa.
Chuya Qellqa Revisión @ Sociedad Bíblica Peruana, 2012