Gosota-Kəmkàrje 3
3
Kəmkàr gə kila ŋgonkoji dɔ Ala’g lé
1Ŋgonəm, ar məəi wəi dɔ taje’d
Gə́ ma m’ndooi lé el,
Maji kari ŋgəm godndumje dɔ ɓəŋgəri’g,
2Yee ɓa a kar ndɔje ləi
Gə ləb si kəmbaje ləi d’ḭ ne dɔ maree’d gə́ kédé-kédé ləm,
Meelɔm ləi kara a k’ḭ ne dɔ maree’g ləm tɔ.
3Maji kar meemaji gə ŋgonkoji d’ubai d’ya̰’i el,
Tɔ dee gwɔsi’g ləm,
Ndaŋ dee dɔ ɓəŋgəri’g ləm tɔ.
4Togə́bè ɓa i a kiŋga ne meenoji
Gə takə̰ji gə́ maji kəm Ala’g lé ləm,
Gə kəm dəwje’g ləm tɔ#Lug 2.52.
5Ɔm məəi jəb-jəb dɔ Njesigənea̰’g
Ɓó nduna rɔi dɔ négər’g ləi-i el.
6Maji kari gəree rəw-kabije’g lai
Ndá yeḛ a kar kila-rəwkabije d’asəna rai-rai.
7Maji kari oo rɔi gə́ njekəmkàr el,
Ɓəl Njesigənea̰ ndá
Unda rɔi ɓad dɔ néra gə́ majel’g#Rɔm 12.7.
8Yee ɓa kuburu-rɔije
D’a ŋgəŋ ne ŋgəŋ-ŋgəŋ ləm,
Siŋgarɔije d’a kul ne lɔm-lɔm ləm tɔ.
9Tədkag Njesigənea̰ gə némajije ləi ləm,
Gə néje gə́ doŋgɔr lai gə́ i iŋga dee ləm tɔ.
10Togə́bè ɓa damje ləi d’a rusu tub-tub ləm,
Dura mán-nduúje ləi kara d’a rusu tub-tub ruba naŋg pɔ-pɔ ləm tɔ.
11Ŋgonəm, maji kari ə̰ji takwɔji-kəmkàr
Le Njesigənea̰ lé bəḭ-bəḭ el ləm,
Ar məəi ila kas bilim
Loo gə́ yeḛ ndaŋgi dɔ néraije’g el ləm tɔ#Jɔb 5.17 #Ǝbr 12.5-6.
12Mbata yeḛ gə́ Njesigənea̰
Undá dan kəmee’g ɓa
Yeḛ wɔjee kəmkàr asəna gə ŋgon gə́ mee bɔbeeje lelee dəa’g bèe#LkJ 3.19.
Kəmkàr gə si dan maji’g
13Rɔlel nai gə dəw gə́ iŋga kəmkàr ləm,
Gə dəw gə́ tel to njegosonégər ləm tɔ.
14Mbata né gə́ yeḛ iŋga keneŋ lé
Maji ur dɔ larnda’g ləm,
Némaji gə́ yeḛ iŋga keneŋ kara
Ur dɔ larlɔr’g ləm tɔ.
15Yee lé gadee ur dɔ mərkwɔjije’g ləm,
Majee ur dɔ némajije’g ləi lai ləm tɔ.
16Kur ndɔje (lə dəw) lé
To mee jikɔlee’g ləm,
Nébao gə rɔnduba lé kara
To mee jigelee’g ləm tɔ.
17Rəwje ləa lai to rəwje gə́ ar mee dəw lelee ləm,
Kila-rəwje ləa lai lé kara
To kila-rəw meelɔmje ləm tɔ.
18Yee to kag-kəmə mbata deḛ lai
Gə́ d’wá gə ji dee ləm,
Deḛ gə́ d’wá ga̰ lé kara
Rɔ dee lel dee ne ləm tɔ.
19Gə goo kəmkàr ɓa Njesigənea̰
Unda ne naŋg nee ləm,
Gə goo gosonégər lé ɓa
Yeḛ ar dara to ne njaŋg ləm tɔ,
20Gə goo gosonégər ləa ɓa
Ta ɓul-manje to ne tag ləm,
Kil-lə-ndi ar mán tàl wa ne naŋg nee ləm tɔ.
Njesigənea̰ aḭ bada dɔ njekəmkàr’g
21Ŋgonəm, maji kari un kəmi rəw
Dɔ tandooje’g neelé el.
Maji kari aa dɔ kəmkàr
Gə dɔ ta gə́ la̰ji toree məəi’g ləm tɔ.
22Deḛ d’a to kəmə ləi ləm,
D’a to nékura gə́ bə̰dərə bə̰
Gə́ to gwɔsi’g ləm tɔ.
23Togə́bè ɓa
I a nda ne məəi kaḭ dɔ rəw-kabi’g ləm,
Né kára kara a tuga gɔli keneŋ el ləm tɔ.
24Loo gə́ i to naŋg ndá
I a ɓəl né kára kara el ləm,
Loo gə́ i a to naŋg lé
I a toɓi gə meelɔm ya ləm tɔ.
25Maji kari ɓəl néɓəl-boo
Gə́ a teḛ wai el ləm,
Gə kuba naŋg bus lə njémeeyèrje el ləm tɔ.
26Mbata Njesigənea̰ ɓa a to nékɔm mee dɔ’g ləi ndá
Yeḛ a ŋgəm gɔli kar gum wai el tɔ.
Kunda mari dan kəmi’g
27Loo gə́ i askəm ra maji
Gə dəw gə́ aw ndòo né jii’g ndá
Maji kari maḭ gə rɔi dɔ’g el.
28Maji kari ula njeboatakəi ləi pana:
Aw ɓa gə́ ree ɓəi,
Ndá bèlè ɓa m’a kari (né lé) ɓəi,
Loo gə́ né to jii’g lé,
Maji kari pa bèe el.
29Loo gə́ njeboatakəi ləi si lɔm mbɔri’g ndá
Maji kari wɔji-kwɔji ra səa né gə́ majel el.
30Loo gə́ dəw ra səi né gə́ majel el ndá
Maji kari kɔl səa gə mḭdé ba el.
31Dəw gə́ njera né kərm-kərm lé
Maji kar kəmi əḭ dəa’g el ləm,
Maji kari un rəw-kabeeje kára kara
Mba njaa keneŋ el ləm tɔ.
32Mbata dəwje gə́ njéra né kori-korije lé
Njesigənea̰ oo dee gə́ né gə́ mina̰
Nɛ yeḛ to baokura lə dəwje gə́ njéra nédanaje.
33Ndɔl lə Njesigənea̰
To mee kəi’g lə njémeeyèrje
Nɛ yeḛ tɔr ndia dɔ loo-si njémeekarabasurje’g.
34Yeḛ ula sul dɔ njékula sul dɔ mar deeje’g
Nɛ yeḛ wa noji gə njékula dɔ deeje#Jak 4.6, 1PI 5.5.
35Njékəmkàrje lé
Rɔnduba ɓa d’a kwa gə́ nénduba lə dee
Nɛ mbəje lé rɔkul ɓa gə́ né ka̰ dee-deḛ ya.
Ngambai Bible © Alliance Biblique du Tchad 1989, 2015.