Gosota-Kəmkàrje 2
2
Kəmkàr ɔg sí dɔ néra gə́ majel’g
1Ŋgonəm, ɓó lé i taa taje ləm ləm
Ŋgəm godndumje məəi’g ləm,
2Ɓó lé i ur mbii gèŋ dɔ takəmkàr’g
Ar məəi ndolè goo gosonégər ləm,
3Ɓó lé i ɓar kəmkàr
Ɔr ndui gə́ tar wəl gə́ rɔ gosonégər’g ləm,
4Ɓó lé i saŋgee to gə́ saŋg ne larnda ləma
Ndolè gée to gə́ nébao bèe ləm tɔ ndá
5Yen ɓa i a gər loo ɓəl Njesigənea̰ ləm,
Kəmi a kinja dɔ gər ndaa Ala’g lé ləm tɔ.
6Mbata Njesigənea̰ ɓa
Ar dəw kəmkàr,
Tea-yeḛ nja ɓa négər
Gə gosonégər d’ḭ keneŋ,
7Kəmkàr gə́ ka̰ teḛkɔr lé
Yeḛ unda kul mbata lə dəwje
Gə́ njéra nédanaje ləm,
Yeḛ to dər-rɔ lə deḛ gə́ panjaa dee
To gə goo rəbee ləm tɔ
8Gə mba ŋgəm ne kila-rəwje
Gə́ ka̰ néra gə́ gə dɔ najee ləm,
Gə mba gəd ne majikojije ləa
Dɔ rəw-kaw dee’g ləm tɔ.
9Bèe ɓa i a gər ne néra gə́ gə dɔ najee ləm
Gə goo rəbee ləm, gə néra gə́ danasur ləma
Gə goo rəw gə́ rara kara gə́ maji ləm tɔ.
10Mbata kəmkàr a ree məəi’g ləm,
Négər a kari rɔlel ləm tɔ.
11Ta gə́ i iya məəi’g lé
A kaa dɔi kər-kər ləm,
Gosɔnégər a ŋgəmi maji ləm tɔ
12Gə mba kɔri ne rəw né gə́ majel’g
Kilai tar ləm, gə ji dəw’d
Gə́ njepata kori-kori ləma,
13Gə ji deḛ gə́ d’uba kila-rəwje
Gə́ danasur d’ya̰
Gə mba njaa ne dan rəwje’d gə́ ndul njudu-njudu ləm tɔ.
14Deḛ gə́ d’iŋga rɔlel loo ra né gə́ majel’g
D’ar rɔ dee lel dee dɔ néra gə́ kori-kori’g ləm,
15Deḛ gə́ rəwje lə dee ɔr goŋ ləm
Gə kila-rəwje lə dee nduni koŋ-koŋ ləm tɔ,
16Gə mba kɔri ji dené gə́ raŋg’d,
Dené gə́ to kaḭ el gə́ njepa taje gə́ rii.
17Yeḛ gə́ uba ŋgawkasee yá̰
Ar mée wəi dɔ ta manrɔ’g lə Ala ləa lé,
18Mbata kəi ləa to podè gə́ loo-yoo’g ləm,
Rəw-kabeeje aw njal
Teḛ ɓee lə njé gə́ d’wəi’g ləm tɔ,
19Dəw kára kara mbuna deḛ gə́
D’aw rəa’g lé tel ree el ləm,
Esé tel iŋga kila-rəwje
Gə́ ka̰ kisi gə kəmə lé gogo el ləm tɔ.
20I lé a njaa togə́bè rəw-kaw dəwje’d
Gə́ njéra némajije ləm,
I a ŋgəm kila-rəw-kaw njémeekarabasurje ləm tɔ.
21Mbata dəwje gə́ njéra nédanaje
Ɓa d’a si mee ɓee’g ləm,
Dəwje gə́ njéra né gə goo rəbeeje lé
Ɓa d’a nai keneŋ ləm tɔ.
22Nɛ njémeeyèrje lé
D’a kɔr dee mee ɓee’g ləm,
Deḛ gə́ to majikojije el kara
D’a tɔs dee rɔd-rɔd
Tɔr dee keneŋ ləm tɔ.
Ngambai Bible © Alliance Biblique du Tchad 1989, 2015.