Ansa 31
31
Kadanshi ko mogono Lemuwelu
1Kadanshi ko mogono Lemuwelu. Kadanshi kaꞋa ku ugbari, Ka na a̱na̱ku a̱ ni a piꞋisaka ni.
2Pana maku ma̱ va̱, maku ma̱ ka̱tsuma̱ ma̱ va̱,
Pana avu maku ma̱ wu ushuki wa avasa a̱ va̱.
3Ka̱ta̱ vu neke katsura ka̱ nu a̱ ubuta̱ wa̱ a̱ma̱ci ba,
ko ugboji u nu wa aza a na unai ngono ba.
4Avu Lemuwelu, ili yi ngono i ɗa ba,
yi ngono i ɗa ba o soꞋo ma̱kya̱n,
ili yi aza o tsugono i ɗa ba a yaꞋan mali ma̱ ma̱kya̱n,
5ta lo o kusoꞋo ka̱ta̱ a cinukpa n wila̱ n ili i na u danai,
ka̱ta̱ a̱ sa̱nka̱ aza a na o doroi ili i le.
6Neke vuza vu na wi ɗevu n ukpa̱ ma̱ra̱ mu utsura,
ma̱kya̱n tamkpamu wa aza a na i a̱ ka̱tsuma̱ ka atakaci.
7ka̱sukpa̱i le o soꞋo ka̱ta̱ a cinukpa n unambi u le
a̱ kpa̱ɗa̱ kuciɓa n una̱mgbuka̱tsuma̱ u le.
8Dansa adama aza a na i a kufuɗa kudansa ba,
adama a ili i na yi ya aza a n i n a̱ɓa̱nki ba.
9YaꞋan kadanshi ka̱ta̱ kpamu a yaꞋan afada a usuɓi,
ka̱ta̱ ere ili ya aza a unambi n aza a yali.
Vuka vu ka̱ɗu ka singai
10Yayi u kuciya̱ vuka vu usuɓi?
UgaꞋin u ni u laꞋa ta̱ atali a singai.
11Vali vi ni vu tsu ushuku ta̱ n a̱yi,
kpamu u tsu namba ilisingai ba.
12U tsu yaꞋanka yi ta̱ kasingai, ba ka gbani-gbani ba,
a ayin a wuma a̱ ni dem.
13U tsu la̱nsa̱ ta̱ tsugbere tsu tsuzogu
ka̱ta̱ u ka̱na̱ kucaꞋa n ekiye a̱ ni m ma̱za̱nga̱.
14Wi ta̱ an kpantsu ka aza a tsulaga,
u tsu tuka̱ ta̱ n ilikulyaꞋa i ni daꞋangi.
15U tsu ɗa̱nga̱ ta̱ m kpasani
ka̱ta̱ u yaꞋanka aza a kpaꞋa a̱ ni ilikulyaꞋa
ka̱ta̱ u peceke nkere n kpaꞋa ku ni
ulinga u na a kuyaꞋan.
16U tsu la̱na̱ ta̱ kashina mayin ka̱ta̱ u tsula kaꞋa,
kodokpotsu ka ulinga wi ikebe i na u tsu ciya̱,
ɗaɗa u tsu tsu cimbaka kashina ki itacishi.
17U tsu zuwa ta̱ ka̱ɗu
ka̱ta̱ u yaꞋan ulinga n ka̱ɗu ke te.
ekiye a̱ ni i ta̱ n ufa̱ka̱ a ulinga u ni.
18U tsu la̱na̱ ta̱ mayin,
wi ta̱ a̱ kuciya̱ kodokpotsu a tsulaga ci ni,
ma̱kuni ma̱ ni ma̱ tsu kima̱ n kayin ba.
19N ekiye a̱ ni a ɗa u tsu ka̱na̱ tsugbere
n a̱jivu a̱ ni a ɗa kpamu u tsu ka̱na̱ ili i kucaꞋa.
20U tsu neꞋe ta̱ aza a unambi ili ba̱ri,
u tsu ɓa̱nka̱ ta̱ aza a yali.
21A makyan ma na baci o yoꞋi mini ma atali,
u tsu pana wovon adama a kpaꞋa ku ni ba.
adama a na ra̱ka̱ vi le, i ta̱ n akashi a̱ uta̱ni.
22U tsu caꞋaka ta̱ ivaꞋantsu i ni kuminya,
aminya a̱ ni tsugbere tsu ɗa tsu singai tsu ma̱ɗiya̱.
23E kuneke vali vi ni tsugbayin a̱ utsutsu u kuꞋuwa ku likuci,
a̱ ubuta̱ u na u tsu da̱sa̱ngu a̱ ka̱tsuma̱
ko nkoshi m gba̱ra̱-gba̱ra̱ n likuci.
24U tsu caꞋa ta̱ aminya e tsugbere ka̱ta̱ u denge.
U tsu denke ta̱ aza a tsulaga aɗambura.
25Utsura n tsugbayin ɗaɗa aminya a̱ ni,
wi ta̱ a kufuɗa kuzoso a ayin a̱ kuta̱wa̱.
26U ci yaꞋan ta̱ kadanshi n cicoꞋo,
Kpamu kadanshi ku usuɓi ki ta̱ e kelentsu ka̱ ni.
27U tsu la̱na̱ ta̱ muku n ni mayin,
kpamu u ci lyaꞋa ilikulyaꞋa i wonvoli ba.
28Muku n ni n tsu ɗa̱nga̱ ta̱,
ka̱ta̱ a dana yi vuza vu una̱singai.
vali vi ni feu, u tsu cikpa yi ta̱ u dana.
29<<A̱ma̱ci n a̱bunda̱i a ci yaꞋan ta̱ ili i kucikpa.
ama avu vu laꞋa le ta̱ ra̱ka̱.>>
30Ucanuku u maluwa gbani ɗa,
tsuloboi kpamu tsu tsu kotso ta̱.
ama vuka vu na vi a kupana wovon u Vuzavaguɗu,
ili i kucikpa i ɗa.
31Nekei ni katsupu ka na ka gaꞋin u ciya̱ka̱ ka̱ci ka̱ ni.
yaꞋan ulinga u ni u tuka̱ yi n ucikpi a utsutsu u kuꞋuwa a̱ likuci.
©️2025 Language Development and Translation Initiative (LDTI)