Ansa 29
29
1Vuma vu na baci u lyaꞋi kelime n ugbamukaci,
ayin ana a ɓarangi ni,
i ta̱ a ku una yi gogoꞋo lo.
2Ayin a na baci aza a usuɓi i o tsugono,
uma a ci yaꞋan ta̱ ma̱za̱nga̱,
Ama ɗa baci aza a gbani-gbani i o tsugono,
uma a̱ tsu ka̱na̱ ta̱ mololo.
3Vuma vu na u tsu ciga cicoꞋo dem,
u tsu zuwa ta̱ esheku a̱ ni ma̱za̱nga̱,
ama vuza vu na wi o kuyongo n ashakanlai,
u tsu la̱nga̱sa̱ ta̱ udukuyan u ni.
4Mogono ma na mi o kutono mejege,
iɗika i ni yi ta̱ a kushamgba mayin,
ama vuza vu kalyaꞋa,
u tsu la̱nga̱sa̱ ta̱ iɗika ya.
5Vuza vu na u tsu yaꞋanka vuza vu na
wi a ida̱shi ɗeɗevu una̱ wu uyoꞋo,
wi ta̱ a kuzuwaka yi maza.
6Unushi maza maꞋan u vuma vu gbani-gbani,
ama vuza vu usuɓi u tsu canana ta̱ vishipa
ka̱ta̱ kpamu u yaꞋan ma̱za̱nga̱.
7Aza a usuɓi a̱ tsu la̱na̱ ta̱ ili i na yi
ya aza a unambi,
ama, aza a gbani-gbani
e ci yeve n ka nanlo ba.
8Aza a ulami a̱ tsu ɗa̱ngusa̱ ta̱ vishili a̱ likuci,
ama aza o cicoꞋo a tsu vaꞋanka ta̱ wupa.
9Ɗa baci vuza vu ugboji u banai ubuta̱ wa afada n kalau,
kalau ka̱ tsu ka̱na̱ ta̱ wupa ko izoshi,
i tana feu a̱ kuciya̱ ma̱ta̱na̱ ba.
10Aza a munuka a ci iwain ta̱ vuma vu singai,
ka̱ta̱ a̱ la̱nsa̱ tsu na a ku una vuza vu ukuna u mayun.
11Kalau ka̱ tsu uta̱ka̱ ta̱ wupa u ni e keteshe,
ama vuza vu cicoꞋo u tsu reme ta̱ wupa u ni.
12Ɗa baci vuza vu tsugono wi a kupana aꞋuwa,
aza a ulinga a̱ ni ra̱ka̱ i ta̱ o ko okpo
uma a gbani-gbani.
13Aza a unambi n aza a kalyaꞋa, kete kaꞋa le dem,
Vuzavaguɗu ɗa u tsu neke ra̱ka̱ vu le a̱shi e kene.
14Mogono ma yaꞋanka baci aza a unambi afada a usuɓi,
tsugono ci ni ci ta̱ o kuyongo ko wannai.
15Mashashawun ma̱ tsu tuka̱ ta̱ cicoꞋo,
ama maku ma na a̱ kpa̱ɗa̱i kugbara
u tsu ronoko ta̱ a̱na̱ku a̱ ni ili i wono.
16Ayin a na baci aza a gbani-gbani i o tsugono,
unushi u tsu yimkpa ta̱ m ka̱bunda̱i,
ama aza a usuɓi i ta̱ e ku ene uyikpi u uma a nanlo.
17Gbara maku ma̱ nu, wi ta̱ tana e kuneke wu ma̱ta̱na̱,
wi ta̱ zuwa wu ma̱za̱nga̱ ma na vi a kuciga.
18Uduniyan u na baci u tsu ciya̱ akaka
a̱ Ka̱shile a̱ ubuta̱ kene ba,
o tsu okpo ta̱ aza a ugbamukaci,
Ama vuza vu una̱singai ɗa vuza vu na u tsu tono wila̱.
19A tsu yaꞋanka kagbashi kulapulu ku una̱ koci ba,
adama a na ko u yeve wi a kuyaꞋanka ulinga n kaꞋa ba.
20Ko vu saꞋwa ta̱ ku ene vuma vu na vu ci yaꞋan kadanshi gogoꞋo lo?
U laꞋa ta̱ e keɗe a̱pa̱Ꞌa̱ u kalau a na a kuzuwa a̱ɗu wa̱ ni.
21Vuza vu na baci u leꞋeshei kagbashi ka̱ ni ali a̱yi kenu,
wi ta̱ a̱ kutuka̱ n una̱mgbuka̱tsuma̱ a ukocishi.
22Vuza vu wupa gogoꞋo lo u tsu ɗa̱ngusa̱ ta̱ vishili,
vuza va asuvusuɗukpi kpamu
u tsu yaꞋan ta̱ unushi wa̱ a̱bunda̱i.
23A̱ra̱ɗi a vuma a̱ tsu tuka̱ yi ta̱ n kugoyi,
ama vuma vu na u goyoi ka̱ci ka̱ ni wi ta̱ a̱ kuciya̱ tsugbayin.
24Vuma vu na wi ka̱ja̱Ꞌa̱ ko koboki
vurala vu ka̱ci ka̱ ni ɗa wi.
wi ta̱ a kupanaka yi akucina,
ama wi e kukeɓece ukuna ba.
25Kupana wovon u vuma, maza maꞋa
ama vuza vu na u zuwai katsura u Vuzavaguɗu,
wi ta̱ a̱ kuda̱sa̱ngu m ma̱ta̱na̱.
26Uma n a̱bunda̱i a̱ tsu la̱nsa̱ ta̱
mapasa ma singai a̱ ubuta̱ u mogono,
ama a̱ ubuta̱ u Vuzavaguɗu u ɗa
vuma u tsu ciya̱ ukuna wu usuɓi.
27Aza a usuɓi e ku ene unata
wa aza a i o kutono mejege ba
uma a gbani-gbani e ci ene ta̱ unata wa aza a na i a kuyaꞋan ukuna u mayun.
©️2025 Language Development and Translation Initiative (LDTI)