Ansa 25
25
Ansa o yoku a Sulemanu
1Nava feu ansa a Sulemanu a ɗa a na uma a Hezekaya mogono ma Yahuda o ɓolongi.
2Ci neke ta̱ Ka̱shile tsugbayin adama a ili i na u sokongi,
ci neke ta̱ ngono tsugbayin adama ili i na a̱ uta̱ka̱i e keteshe.
3Uteku tsu na gaɗi wi ɗe vuza, iɗika kpamu yi ta̱ ɗaka,
ta a̱ɗu o ngono i nannai n atakaci e kuyeve.
4Luwa̱ azurufa a, vu uta̱ka̱ ucanuku u singai
adama a kayimi ka azurufa,
5utuka̱i aza odoki a gbani-gbani e kelime ko mogono,
kakuba ko tsugono ka̱ ni ki ta̱ a kushamgba mayin.
6Ka̱ta̱ vu cikpa kaci ka̱ nu e kelime ko mogono ba,
ka̱ta̱ vu la̱nsa̱ka̱ ka̱ci ka̱ nu
ubuta̱ a̱ ka̱tsuma̱ ka uma a gbagbaꞋin ba,
7u laꞋa ta̱ n kugaꞋan u dana wu <<Ta̱wa̱ gaɗi na,>>
a na e kuneke wu wono a̱ ubuta̱ u uma a gbagbaꞋin.
Ili i na vu enei n a̱shi a̱ nu,
8ka̱ta̱ vu yaꞋan moloko ma ku banka kadanshi a̱ ubuta̱ wa afada ba,
adama a na yiɗa̱i va kuyaꞋan a ukocishi
ɗa baci vuza vu na yi ida̱shi ɗeɗevu u nekei nu wono?
9I yaꞋan baci kanananai n vuza vu na yi a ida̱shi ɗeɗevu,
ka̱ta̱ vu utuka̱ yi e keteshe ba,
10adama a na vu yaꞋan baci nannai vi ta̱ o ko okpo n wono,
kpamu kula ku nu ki ta̱
a̱ kuna̱mgba̱ a̱ ubuta̱ u uma.
11Kadanshi ka na a dansai mayin
ki ta̱ tsu azanariya a na a̱ luwa̱i a gaɗi va azurufa.
12Kupana uɓarangi u vuza vu cicoꞋo,
u laꞋa ta̱ ucanuku u na a yaꞋin n azanari koci.
13Vuza vu usuki vu ma̱riki vu na a̱ suki,
u tsu zuwa ta̱ ka̱ɗu ka aza a na a̱ suki ni ma̱za̱nga̱,
tsu mini ma̱ ta̱ku a makyan ma usuɗukpi.
14Vuma vu na u yaꞋin uzuwukpani u yaꞋan kuneꞋe,
ɗa u kpa̱ɗa̱i kuneke,
wi ta̱ tsu uguyi n wunla̱i u na wi m mini ba.
15N uka̱ni u ka̱ɗu u ɗa a tsu fuɗa a lyaꞋa utsura u vuza vu tsugono,
una̱ wu uyoꞋo u tsu vaꞋanka ta̱ n ugbamiwasuvu.
16vu ciya̱ baci ishigi, lyaꞋa i ɗa wuntsukpi,
i laꞋa wu baci ulyaꞋi vi ta̱ a kushama i ɗa.
17Ka̱ta̱ vu ka̱na̱ kubansa a kpaꞋa
ku vuza vu na yi a ida̱shi ɗeɗevu ba,
ku ene ku na wi e ku eneshe wu
makyan dem wi ta̱ o ku kovo wu.
18Vuma vu na u tsu okpo magan
ma aꞋuwa u vuza vu na i a ida̱shi ɗeɗevu,
wi ta̱ tsu kalangu ko kotokobi,
ko kayaꞋa ka alyu.
19Vuza vu na u nekei katsura
u vuza vu na wi m ma̱riki ba a makyan ma atakaci,
wi ta̱ tsu anga a̱ mɓa̱la̱
ko nwalu m ma̱kutsuma̱.
20Ku yaꞋanka vuza vu una̱mgbuka̱tsuma̱ ishipa
wi ta̱ an vuma vu na o foɗoi motogu a ayin uta̱ni,
ko mini ma kalam a̱ kuntsu.
21Vurala vu nu vi baci n kambulu,
neke yi ilikulyaꞋa u lyaꞋa
wi baci kpamu a kupana kakuli
neꞋe yi mini u u soꞋo.#Rom 12:20
22Nannai ɗa va ku neke yi wono,
ka̱ta̱ Vuzavaguɗu tana u zuwaka wu una̱singai.
23Tsu na wunla̱i wu uɓongaɗi u tsu tuka̱ m mini
ta feu kadanshi ka nsata ka̱ tsu tuka̱ n wupa nannai.
24U kulaꞋa ta̱ n kugaꞋan vu da̱sa̱ngu
a̱ kunu ku kenu pulai,
a na vo kuyongo a kpaꞋa ku te n vuka vu vishili.
25Tsu na mini ma̱ ta̱ku mi,
a̱ ka̱ɗu ka vuza vu na kakuli ka̱ ka̱na̱i,
ta kaꞋa ki nannai a pana baci arabali a singai a iɗika i daꞋin.
26Vuza vu usuɓi vu na u ka̱sukpa̱i ka gbani-gbani ko olo yi ni,
wi ta̱ an a̱shi a̱ mini a na a̱ na̱mgba̱i,
ko kayinva ka na mini ma̱ ni mi n tsukono.
27U gaꞋan vu lyaꞋa ishigi n a̱bunda̱i ba,
ta feu nannai u gaꞋan vu la̱nsa̱ka̱ ka̱ci ka̱ nu tsugbayin ba.
28Vuma vu na u fuɗai u ka̱na̱i ka̱ci ka̱ ni ba,
wi ta̱ an likuci i na o ɓosoi mashilya ma̱ ni.
©️2025 Language Development and Translation Initiative (LDTI)