Ansa 24
24
1Ka̱ta̱ vu yaꞋan cisheꞋe tsu uma a gbani-gbani ba,
ka̱ta̱ vu yaꞋan mali ma kuyongo n a̱ le ba,
2adama a na a̱ɗu e le vishili ɗa i e kusheshe koci,
una̱ u le kpamu kuzama ku vishili ku ɗa.
3N cicoꞋo u ɗa a maꞋin kpaꞋa,
n ubuta̱ u kuyeve u ɗa kpamu a zuwai ku ɗa,
4n ubuta̱ u kuyeve u ɗa a shatangi unu
n ucanuku u singai ra̱ka̱ n uciyi.
5Vuza vu cicoꞋo u ci yaꞋan ta̱ n utsura,
keyevi kpamu ka̱ tsu ka̱na̱ ta̱ kudoku n utsura,
6adama a kuyaꞋan kuvon vi ta̱ a kuciga uɓa̱nki,
kpamu vu ciya̱ ulyaꞋi vi ta̱ a kuciga aza odoki n a̱bunda̱i.
7CicoꞋo ci ta̱ daꞋangi n kalau,
a̱ ubuta̱ u koɓolo a̱ utsutsu u likuci wi n ili i na u kudansa ba.
8Yaba dem vu na u tsu sheshe ka gbani-gbani,
i ta̱ e kuɗeke yi vuma vu nsata.
9Kusheshe ku kalau dem unushi u ɗa,
vuza vu kugoyi kpamu ili yu unata i ɗa u uma.
10Ikyamba i nu i kuwa̱ baci a kanna ka atakaci,
mayun vi n utsura ba.
11Isa aza a na i o kurono a kubanka a̱ ubuta̱ u ku una,
reme aza a na i a katangalasa a kubana a̱ ukpisa̱.
12Ɗa baci vu danai,
<<Ci yeve ili a ukuna u nampa ba,>>
a̱yi na wi o kukondo ka̱ɗu ka̱ nu u tsu ene ba?
Ko a̱yi na wi a̱ kula̱na̱ wuma u nu u yeve ba?
Wi a kutsupa yaba dem derere vu ili i na u yaꞋin ba?
13Maku ma̱ va̱, lyaꞋa ishigi, adama a na yi ta̱ n ugaꞋin.
maniꞋin mi ishigi a kabashi yi ta̱ n uyoꞋo a̱ una̱ u nu.
14Yeve a na ta cicoꞋo ci n uyoꞋo a̱ ka̱ɗu nannai,
vu ciya̱ baci tsu ɗa vi ta̱ n a̱pa̱Ꞌa̱ a ili i na yi kelime,
kpamu ukeɗi wa̱ a̱pa̱Ꞌa̱ a̱ nu wi o ko okpo gbani ba.
15Ka̱ta̱ vu vaku a kavaꞋawan tsu vuma vu gbani-gbani,
adama a na vu isa kpaꞋa ku vuza vu usuɓi,
ka̱ta̱ vu isa yi ubuta̱ wi ida̱shi ba,
16adama a na ko vuza vu usuɓi u yikpa̱ baci kucindere
wi ta̱ a̱ kuɗa̱nga̱ kucindere kpamu,
ama kawuya ki ta̱ a̱ kuciya̱ aza a gbani-gbani.
17Ka̱ta̱ vu yaꞋan ma̱za̱nga̱ ba,
kawuya ka̱ ciya̱ baci vurala vu nu,
ayin a na baci u ta̱ɗa̱tsa̱i ka̱ta̱ vu pana uyoꞋo ba,
18talo, Vuzavaguɗu wa ku ene,
u na̱mgba̱ ka̱tsuma̱,
ka̱ta̱ kucikpa u ka̱sukpa̱ wupa n a̱yi.
19Ka̱ta̱ vu takacika ka̱ci ka̱ nu
adama a uma a gbani-gbani ba,
ko vu ka̱na̱ cisheꞋe n aza a gbani-gbani ba,
20adama a na vuma vu gbani-gbani
wi n a̱pa̱Ꞌa̱ ayin a̱ kuta̱wa̱ ba,
wuma u uma a gbani-gbani wi ta̱
tsu ma̱kuni ma na a̱ kukima̱.
21Maku ma̱ va̱ pana wovon u Vuzavaguɗu m mogono kpamu,
ka̱ta̱ kpamu vu gbaɓa kaci
n aza a ugbamiwasuvu ba,
22adama a na icuꞋu i uma a nanlo
i ta̱ a̱ kukuwa̱ gogoꞋo lo,
yayi u yevei kawuya ka na i a kufuɗa ku tuka̱?
Kadanshi ko cicoꞋo
23Nava feu kadanshi ka aza o cicoꞋo a ɗa
u gaꞋan kayaꞋinkafada ka ciga vuza vu yoku
u ka̱sukpa̱ vuza vu te ba.
24Yaba dem vu na u danai vuza vu unushi
<<Avu vu nusa ba,>>
uma i ta̱ a kuyaꞋanka yi una̱,
ka̱ta̱ uduniyan u nana yi,
25Ama yaba dem vu na u ɓarangi
vuma vu gbani-gbani wi ta̱ a kuciya̱ ma̱ta̱na̱,
kpamu wi ta̱ a̱ kuciya̱ uciyi n una̱singai wa̱ a̱bunda̱i.
26Vuza vu na wu ushuki n ukuna u mayun,
u yotsongu ta̱ cija̱Ꞌa̱ tsu singai.
27Kotso biꞋi ulinga u nu u pulai ra̱ka̱,
ka̱ta̱ kpamu vu lapula ashina a̱ nu ra̱ka̱,
ka̱ta̱ yeve vu maꞋa kpaꞋa ku nu.
28Ka̱ta̱ vu shamkpa vuza vu na yi
a ida̱shi ɗeɗevu ko koyoku ba,
talo va kudansa aꞋuwa.
29Ka̱ta̱ vu dana
<<Mi ta̱ a kuyaꞋanka yi tsu na u yaꞋankai mu ba,
mi ta̱ a kutsupa ili i na vuma vu nampa
u yaꞋankai mu.>>
30N walai a kashina ko korogo,
n walai n kashina ki itacishi ka̱ ka̱mici,
31awana a ɗa o gbonguroi a̱ ubuta̱ dem,
mita̱ ma palai ubuta̱ dem,
nshilya ma atali n na mi uka̱ra̱Ꞌi n kaꞋa m ɓosoi.
32Ana menei ili i nanlo, ɗa n sheshei a̱ ka̱ɗu ka̱ va̱,
ɗa n ciya̱i udokushi a ili i na menei va.
33Alavu kenu, agbaɗiki kenu,
kukeɓe kukyuꞋun mu uvuka kenu,
34nannai ɗa unambi u kuta̱wa̱ wu an koboki,
ka̱ta̱ kpamu u ɗa u ka̱na̱ wu nannai
an vuza vu ma̱ga̱la̱ka̱.
©️2025 Language Development and Translation Initiative (LDTI)