Ansa 20
20
1Ma̱kya̱n ili i ma̱ya̱nsa̱ka̱ i ɗa,
ma̱ra̱ kpamu ma̱ tsu tuka̱ ta̱ n vishili,
Yaba dem vu na u ka̱sukpa̱i uye
adama a ili i nanlo wi n ugboji ba.
2Asuvusuɗukpi o mogono i ta̱ tsu yura̱ i kawu
yaba dem vu na u zuwai ni wupa wi ta̱ a̱ ku kuwa̱.
3Tsugbayin tsu ɗa vuma u suma vishili.
ama kalau ki ta̱ o moloko ma̱ vishili.
4Korogo ka tsu cimba
a makyan ma vu cimba ba
ka̱ta̱ ayin a vukyaꞋa u namba ili.
5Kusheshe ku ka̱ɗu ku vuma ki ta̱ an mini mu uga̱vi,
vuza vu na wi n kuyeve ɗa koci wi a kurono maꞋa.
6Uma n a̱bunda̱i a tsu sala ta̱
i ta̱ ucigi u na u tsu sabaꞋa ba,
ama ili ya atakaci i ɗa
vu ciya̱ vuma vu usuɓi.
7Vuza vu usuɓi u ci yaꞋan ta̱ nwalu n singai,
aza a una̱singai a ɗa
muku n ni nu ntsukaya n na mi a̱ kuta̱wa̱ n ka̱ca̱pa̱ ka̱ ni.
8Ayin ana baci mogono ma̱ da̱sa̱ngi
a kakuba ko tsugono kuyaꞋan afada,
u tsu ene ta̱ ka gbani-gbani n a̱shi a̱ ni.
9Yayi wa kudana,
<<Mpa n ciɗatangu ta̱ ka̱ɗu ka̱ va̱,
m buwa n unushi ba?>>
10Kagisamkpatsu ka aꞋuwa
n ka kagisamkpatsu ka̱ ma̱ya̱nsa̱ka̱,
Vuzavaguɗu u iwan ta̱ ili i nanlo ra̱ka̱.
11E ci yeve ta̱ muku n kenken
a̱ ubuta̱ wu ili i na i a kuyaꞋan,
i ta̱ a kufuɗa kuyeve ko kuyongo ku le
ku singai ku ɗa ko ku mejege ku ɗa.
12Atsuvu a na a panai n a̱shi a na enei,
Vuzavaguɗu ɗa u yaꞋin le ra̱ka̱.
13Ka̱ta̱ vu ciga alavu ayin tutu ba,
talo vo ko okpo n unambi,
yongo a kataci makyan dem
vi ta̱ a̱ kuciya̱ ilikulyaꞋa n a̱bunda̱i.
14<<Katsuli ka tsu dana ta̱ ili i yaꞋan ta̱ ikebe,>>
ama u laza baci,
ka̱ta̱ u ka̱na̱ a̱ra̱ɗi u fuɗa ta̱ tsulaga.
15Azanariya a ɗa lo,
atali a singai a ɗa lo gbani,
ama una̱ u na u tsu dansa n kuyeve,
u laꞋa le ta̱ a kugaꞋan ra̱ka̱.
16Isai motogu ma vuza vu na u shamkpai komoci,
remei ni tsu kaguta wo okpo baci
magan adama o komoci ka.
17IlikulyaꞋa i na a̱ ciya̱i a uye
kalyaꞋa yi ta̱ n uyoꞋo u kulyaꞋa ka̱u,
ama a ukocishi yi ta̱ o ko okpo an kayala a una̱.
18La̱nsa̱ odoki a singai vi ta̱ a̱ ku ciya̱ ulyaꞋi,
vu uwa kuvon babu vu ufoɓushi ba.
19Vuza vu nsata u zuwa ta̱
a̱ kpa̱ɗa̱ ku ushuku n a̱yi
adama a nannai suma
vuza vu utonu n a̱bunda̱i.
20Ɗa baci vuza u shikai esheku a̱ ni ko a̱na̱kpa̱ a̱ ni,
kanna ki ta̱ ku kotso yi n kanna a kaci.
21Ili yu uka̱ni i na a̱ ciya̱i gogoꞋo lo n ugiti,
yi o ko okpo wu una̱singai a ukocishi ba.
22Ka̱ta̱ vu dana,
<<Mi ta̱ a kutsupa ka gbani-gbani ka na a yaꞋankai mu ba,>>
Ama vana Vuzavaguɗu,
a̱yi ɗa u ku wawa wu.
23Vuzavaguɗu u iwan ta̱ kagisamkpatsu ka aꞋuwa,
n kagisamkpatsu ka̱ ma̱ya̱nsa̱ka̱.
24Nwalu n vuma dem,
Vuzavaguɗu ɗa u tsu tono n a̱yi,
nini ɗai vuma u kuyeve uye u ni?
25Maza maꞋa u vuza
u yaꞋan moloko ma kutakpa ili adama a vuzavaguɗu
ka̱ta̱ n ka̱ca̱pa̱ kpamu
u ciɓa n ili i na u yaꞋin.
26Mogono mo cicoꞋo
ma̱ tsu me yeve uma a gbani-gbani,
ka̱ta̱ kpamu u takacika le
ko kupana asuvayali e le.
27Ayinviki a vuma i ta̱ tsu ma̱kuni
ma Vuzavaguɗu ma na ma̱ tsu la̱na̱
ka̱ɗu ka vuma,
ma̱ tsu la̱na̱ ta̱ ka̱ɗu ka̱ ni n kusheshe ku ni.
28Ucigi m ma̱riki e ci ere ta̱ mogono,
kakuba ko tsugono ka̱ ni ki ta̱
a kushamgba mayin adama a ucigi.
29UgaꞋin u muku mo olobo ɗaɗa utsura u le,
ama tsugbayin tsu nkoshi tamkpamu
ɗaɗa ka̱nji ka̱ri.
30Ka̱kuꞋun ka tsu takpa ta̱ ka gbani-gbani,
ulapi u tsu zuwa ta̱ ka̱ɗu ka vuma ko yongo ciɗa.
©️2025 Language Development and Translation Initiative (LDTI)