Ansa 19
19
1U laꞋa ta̱ n kugaꞋan vuma u yongo n unambi ko unushi,
n kalau vuza vu na kadanshi ka̱ ni aꞋuwa a ɗa.
2U gaꞋan vuma u yongo n ka̱ɗu
ka kuyaꞋan ili babu kuyeve ba,
ko vu okpo vuza vu moloko vu sula uye.
3Ayin a na baci tsulau tsu vuma tsu vakangi vuma,
ka̱ta̱ ka̱ɗu ka̱ ni ke neke Vuzavaguɗu unushi.
4Uciyi u tsu ɓolongu ta̱ a̱ja̱Ꞌa̱ n a̱bunda̱i,
ama ka̱ja̱Ꞌa̱ ka vuza vu unambi ka ci iwan yi ta̱.
5Magan ma aꞋuwa mi a kulaza gbani babu atakaci ba,
a̱yi na wi a̱ kutsungu aꞋuwa wi a kulaꞋaka ba.
6Yaba dem u tsu la̱nsa̱ ta̱ mapasa ma singai
a̱ ubuta̱ u vuza vu tsugono,
yaba dem u ciga ta̱ wo okpo ka̱ja̱Ꞌa̱ ka vuza na u ci neke kuneꞋe.
7Ɗa baci aza a vuza vu unambi a sumai ni,
teɗai tamkpamu a̱ja̱Ꞌa̱ ni?
Ko wi ishi baci u folonoi le, i a kupanaka yi ba.
8A̱yi vu na u ciya̱i cicoꞋo, wuma u ni u ɗa wi a kuciga,
a̱yi vu na u cigai kuyeve wi ta̱ a kulyaꞋa kelime.
9Magan ma aꞋuwa mi a kulaza gbani babu atakaci ba,
a̱yi na wi a̱ kutsungu aꞋuwa wi ta̱ a̱ kuna̱mgba̱.
10U gaꞋan kalau ko yongo a̱ ida̱shi ma̱za̱nga̱ ba,
ka nampa ka laꞋa ta̱ m gbani-gbani kagbashi ka lyaꞋaka
muku mu ngono tsugono.
11CicoꞋo u vuma tsu tsu zuwa yi ta̱ uka̱ni u ka̱ɗu,
tsugbayin ci ni tsu ɗa u cinukpa n unushi.
12Wupa u mogono wi ta̱ tsu yura̱ i kawu,
ama mapasa ma singai ma̱ ni mi ta̱ tsu ciza a̱ mita̱.
13Kalau ka maku ka tsu zamaka ta̱ esheku a̱ ni kadama,
vuka vu vishili vi ta̱ ci ijaꞋashi i na i ci jikpa ba.
14KpaꞋa n uciyi ili yi uka̱ni i ɗa
a̱ ubuta̱ wu mmaci,
ama vuka vu ma̱riki a̱ ubuta̱ u Vuzavaguɗu u ɗa.
15Tsurogo tsu zuwa ta̱ vuma alavu a̱bunda̱i,
vuza vu wonvoli tamkpamu wi ta̱ o kuyongo n kambulu.
16Vuza vu na u tsu pana kadanshi,
wuma u ni u ɗa wi e ku ere,
ama a̱yi na u kpa̱ɗa̱i ku zuka n uye u ni,
wi ta̱ a̱ ku kuwa̱.
17Vuza vu na baci u yaꞋankai vuza vu unambi kasingai,
Vuzavaguɗu ɗa wi e kuneke kutan,
wi ta̱ ta na a̱ kuciya̱ katsupu a ili i na u yaꞋin.
18Gbara maku ma̱ nu,
adama a na vi ta̱ e kukeɗe a̱pa̱Ꞌa̱
wi ta̱ a kuyaꞋan ili i na i gaꞋin,
ta baci nannai ba vi ta̱ a̱ la̱nga̱sa̱ yi.
19Vuza va asuvusuɗukpi wi ta̱ a̱ kuciya̱ kutsupa,
ɗa baci vu utukai ni
vi ta̱ o kudoku va̱ ku utuka̱ yi kpamu.
20Zuwa atsuvu vu pana odoki,
ka̱ta̱ vu isa kuyotsongusu,
adama a na a ukocishi
vi ta̱ o ku okpo vuza vu cicoꞋo.
21Kusheshe ku ka̱ɗu ku vuma ki ta̱ n a̱bunda̱i,
ama kusheshe ku Vuzavaguɗu
ku ɗa koci ki a kushana.
22Ili na a cigai u vuma i ɗaɗa
ucigi u na u tsu sabaꞋa ba,
u laꞋa ta̱ n ku gaꞋan vu yongo n unambi
a na vo ko okpo vuza va aꞋuwa.
23Wovon u Vuzavaguɗu u tsu neke ta̱ wuma,
ka̱ta̱ tana vuza u ciya̱ ku uvuka,
ko ili i na i ku uka yi muna.
24Korogo ka tsu uka ta̱ kukiye kapara ka tsuwa,
ama wi a kufuɗa wa banka a̱ una̱ u ni ba.
25Gbara vuza vu ulami,
ka̱mici ki ta̱ a̱ kuciya̱ kuyeve
ɓarangu vuza vu kuyeve, wi ta̱ o kudoku n kuyeve.
26Vuza na u bokoi esheku a̱ ni ili ɗa kpamu u lokoi a̱na̱ku ni,
maku ma na ma tsu tuka̱ n wono n kugoyi ɗa.
27Maku ma̱ va̱ ɗa baci vu kpa̱ɗa̱i kupana kadanshi
vi ta̱ a kukatsukpa vu ili i na vu yevei ɗe.
28Magan ma kavama u tsu yaꞋanka ta̱
afada a mayun ulami
vuma vu gbani-gbani u shatangu ta̱ una̱ u ni n kawuya ci ilikulya.
29Kalau vuza va̱ a̱ra̱ɗi
wi ta̱ a kutakacika.
©️2025 Language Development and Translation Initiative (LDTI)