Rumi 15
15
Arw kaisanw sukhu khailaidi
1Chwng jebwrok paitokmao karak, chwng saknw khachang rwnai aita kha rwya karwi kebel paitoairokni kebelnw soithai. 2Chini jothoni kothe paitoai takhuk rokni gamni bagwi tei paitokmao gathiyoi tisani bagwi boknw khachang rwthai kalayw. 3Khristobw saknw khachang rwjiya. Kathar elembagw suijak tongw, "Jebwrok nwnw lachima phunok, boknw lachima phunoknai jotho Ani sagw kalaikha." 4Kathar elembagw jebw aguo suijak obw chwnw phrwngni bagwise suimani, jate o elembak daini chwng khalong tei khabaja amrai khalai mannaitwi tei obwni bagwi chwng khadung manw. 5Kaitor, Jebw khalong tei khabaja rw Bw nokhni jothoni khanw thancha khalaitwk, jekhalaywi Khristo himjak nokhbw bwtwijar khalaywi himnaitwi. 6Halai nokh khabai tei kharangbai thancha ongwi chini Subrai Jisu Khristoni Kaitor tei Aphani chwngsacha khalaimannw.
Kothoma jothoni bagwi
7Kaitorni chwngsacha phuak janaitwi, aithani Khristo jekhalaywi nokhnw sodor khalaywi lajak obwtwijar khalaywi nokhbw kaisa bai kaisanw sodor khalaywi ladi. 8-9Bakha tondi Kaitorni kok je kwbwi, obwnw majra khalaini bagwi Khristo Jihudi rokni mwngnai ongjak. Bini bachung ongkha, Jihudi hodaipiri rokni dayo Kaitor jebw samai tangjak obw kwplwng ongnaitwi, tei Bini khakhammani bagwi Bejihudirok Bini chwngsacha khalainaitwi. I kothoyw kathar elembago suijak tongw,
aithani bagwi ang Bejihudi rokni kothe dopharokni dayo ang Nwnw lobnw,
tei Nini mwngwi lobwi rachapnw.
10Arw elembak sagw, Bejihudirok, nokh Kaitorni chongjak borog rokbai tongthokdi." #15:10 Ditiyo biboron 32:43
11Elembagw imwbw sagw, "Jotho Bejihudirok Subrainw lobdi, Jotho borogrok Bwnw lobthwk." #15:11 Gitsonghita 117:1 12Arwbw Jisaiyo sajak, "Jisoyni kaisa bosong phainai Jebw jotho Bejihudirokni sakao pwsini khalainw, arw Bejihudirok Bini sakao khadung tonnai."#15:12 Jisaiyo 11:10 13Jebw khadung ruai rw o Kaitor nokhni paitokmani bisingtwi kabangma tongthokma tei khachangmabai nokhnw kwplwng khalaitwk. Iswkhlai Phala Katharni pharanbai nokhni khao khadung ubur baywi kalainw.
Polni muchungma
14Ani takhukrok, ang nokhni kothoyw i kok paitogw je, nokhni kha hamkrai muchungmabai kwplwng, nokhni jatejar mwkchak tongw, tei nokh kaisa bai kaisanw hamphrwng rwmanw. 15-16Hekphwng kwrwngsa kwrwngnwi kothoy nokhnw bakha karwgwi rwni bagwi ang kharagwi nokhni dayw i kokroknw suikha, twmwi hinba Kaitor anw Bejihudi rokni dayw Khristo Jisuni mwngnai hamari ruai rwjak. Kathar phalani bisingtwi je Bejihudi roknw juta khlayoi tonjak, bok Kaitorni yachakjuai dali ongmanaitwi aithani bagwise Bini rwnai kothomanw piriywi ang chontaini samung tangdok. 17Ang Kaitorni bagwi je samung tangdok, obwbai Khristo Jisuni bisingtwi chwngsacha khalaini ani bagri tongw. 18-19Khristo ani bisingtwi jebw khalaiha obwni phatarw mwngsa kok sani ang kharak galak. Bw kok tei samungni bisingtwi, amok samung tei sidom samungni bisingtwi arw kathar phalani pharan bai Bejihudi roknw Kaitorni kok rumrwkha. Aithani ang Jirusalemni jimin chengwi Illurika jora jotho jegao Khristoni kothoyw kothoma thum pirsukjak. 20Jedayw Khristoni mwng oaisabw sajajiya odayw Khristoni kothoma pirnai ongkha ani langmani naichwng, arw kaisani gathijak binda sakao ang tangwi tisani naiya. 21Kathar elembagw suijak tongw, "Jebwrokni dayw Bini kothoyw sajajiya bok obwnw nungnw, tei jebwrok oaisabw khanajiya bok bijimannai."
Polni Rumo thangnaini muchokma
22Ang nokhni dayw thani naywibw kabangma thema manjak. 23Matwr tabok o jila rogw ani samung tangni arw jega kwrwi. Kabangma bisini jimin nokhni dayw ang thani muchukjak, 24Aithani tabok Espen hauarw thangnai lamagw ang nokhni dayo thani naidok. Ang khadungw je o lamatwi thanai jorao nokhni dayw thangmanw tei nokhbai baksa rangsa jora tongthoknai jerw nokhse anw Espen hauarw thani bagwi chubanw. 25Matwr tabok ang Kaitorni borogroknw chubani bagwi Jirusalemw thandok, 26Twmwi hinba Jirusalemw Kaitorni borog rokni bisingni jebwrok bigra tong bokni bagwi Mesidoniya tei Akhayani motharokni borogrok kisa rang khollaijak. 27I chongjak rangnw bok tongthok jagwise tisamani. I motharok Jirusalemni Kaitorni borogrokni dayw rwthi, twmwi hinba Jihudirokni bagwi Bejihudirok Kaitorni pholangni hamari mankha, aithani Bejihudi rokbw swngsarni kothoyw Jihudiroknw chubathai kalaiyw. 28Ani i samung paikhalai ang jephini sinw je, o chongjak rangba thi khalaywi kasokjak aiphuo ang nokhni obwtwi khlaywi Espenw thangnw. 29Ang siyw jephini ang nokhni dayw phainw aiphuo Khristoni sohkpura hamari lagwi phainw. 30Takhukrok, Chini Subrai Jisu Khristoni bisingtwi arw Phala Kathar rwnai hamjakmani bisingtwi ang nokhnw baithak khalaywi kabokjagw, nokh Kaitorni dayw ani bagwi surimwng sandi. 31Jihudiyao jebwrok Kaitorni kok khanaya bokni yakni ang rwkkhia mannaitwi, arw Jirusalemni Kaitorni borogrok ani i Bejihudirokni daini twiphainai ruaipharnw yachaknaitwi. 32Kaitorni muchungmabai ang tongthokma khabai nokhni dayw thang mannw tei nokhbai baksa tongwi lengkhonai mannw. 33Khakchangma rwnai Kaitor nokhbai baksa baksa tongthok. Amen.
©️2025 Bible Students Fellowship of Bangladesh