Rumi 14
14
Kaisa arw kaisani nalchir takhalaidi
1Paitokmao jebw kebel, obwtwijar takhuknw nokhni bisingw yachagwi lani narang takhalaidi, bini mapita lagwi bwbai tokratokri ta khalaidi. 2Kaisa kainwi bakha kago bw jotho chamanw, matwr jebw paitokmagw kebel bw keber dalwk mwilwkse chagw. 3Muideng chanai muijua chanainw nalchir takhalaidi arw muideng chanai mujua chanainw khatta tarumdi, twmwi hinba Kaitorlai bok kainwinwbw yachagwi lajak. 4Nwng swro, je arw kaisa gaburni nalchir khalainai? Bw bachagwi tongjak, na klayoi tongjak, bini nophangse bijinai. Matwr bw bachagwise tongnai, twmwi hinba Subraise bwnw bacharwgwi tonni phariyo.
5Kaisa kainwi bakha kagw sal kwrwngsani naywi arw kwrwngsa sal kabang nangru. Kaisa kainwi bakha kagw jotho sal baksa. Jotho borogbw khamkham bokni sakni bakhanw paitokmani kothoyw thi tongthwk. 6Kwrwngsa baithak salnw je pale bwlai Subrainw borom rwni bagwise khalaiyw. Arw je jotho manwi cha, bw Subrainw borom rwni bagwise chagw, twmwi hinba bw Kaitornw hambai rwgw. Arw jebwrok podsa podnwi manwi chaya, bok Subrainw borom rwni bagwise chaya, matwr bok Kaitornw hambai rwgw. 7Chini bisingw kaisabw sakni bagwi thangwi tongya arw kaisabw sakni bagwi bw thwibw thwiya. 8Jwtini Chwng kwthang ongwi tongw hai Subraini bagwise thangwi tongw, tei thwiyw hingkhai Subraini bagwise thwiyw. Halai chwng kwthang tongw eba thwiyw chwng Subrainise.
9Aithani Khristo thwijak tei arwbw thangwi kasajak, Bw kathang tei kwthwi i kwrwngnwi nibw Subrai ongmanaitwi. 10Halai tani nwng nini takhukroknw nalchir khalaidok? Tei tani phwng nini takhuknw hela khalaidok? Nalchirni bagwi chwng jotholai Kaitorni sakangw bachanw. 11Kathar elembagw suijak tongw, "Subrai sakha, 'Ang Ani mwngwi samai tangwi sadok, Ani sakango jothobw yesu mokromwi achuknw tei Anw Kaitor hinwi gosenw.'"
12Halai nungjagw, chwng jothobw sakni kothoyw Kaitorni dayw thikip marwnw.
Takhuknw sumsokni lamagw ta tilangdi
13Aithani chwng kaisabai kaisani nalchir khalainai thakrwnai, obwni solai imwtwi jar samung tangya hinwi thi khlainw, jebwni bagwi chini kaisa takhuk khagw kebeng manyatwi eba sumsogw kalaiyatwi. 14Subrai Jisubai baksa kwrwngjak hinwise ang khamka khalayoi siyo je, kwbwise mwngsa chamwngbw unthaya, matwr kaisachwk jwtini mwngsachwk chamwngnw untha hinwi bakha kagw, hai obw bini daywse untha. 15Nini chamwngni bagwi jwtini nini takhukni pholang khao dugu manw, hai nwnglai hamjakmani kha lagwi himdokya. Je takhukni bagwi Khristo thwijak, chamwngni bagwi bwnw tabaikhrup rwdi. 16Nwng mwngsa swknw gam hinwi bakha kamanw. Matwr jwtini arw borogrok obwnw chaya sagw, hai nwng obwnw ta khalaidi. 17Kaitorni auar keber chamwng nwngmwng kothoyw ya, matwr raidattiya, khachangma tei tongthokmani jebw phala kathar rw. 18Jebw imwtwi jar khlaywi Khristonw mwngo Kaitor bwnw lagwi khachangw arw borogrokbw bwnw gam hinwi bakha kagw.
19Aithani jebw khalaikhai khakchangma phai arw jebwni bisingtwi chwng kaisabai kaisanw gathiywi tisaman, phaidi, chwng obwnwse chaitoklainw. 20Mwngsachwk chamwngni bagwi Kaitorni samung ta phiyakdi. Jotho chamung katharse, matwr kaisachwk jwtini mwngsachwk chagwi arw kaisani bakhagw thema ujirwgw, hai obwnw chamani bini phaiching benirai. 21Mwikhan chanai, uamtwi bwtwi nwngnai eba arw jephwng manwi chathaiya, jebwni bagwi nini kaisa takhuk khao thema man. 22I kothoyw nwng jebw gam hinwi paitok obwnw Kaitor tei nini bisingw tondi. Kaisachwk jwtini bakha kagw bw ja khalai obw gam tei bini khabuk bwnw khatta ganang khalaiya hai bw hamsajak. 23Matwr kaisaswk jwtini kha hamya kagwi mwngsachwk chagw, iswkhlai bw khatta ganag, twmwi hinba bw bini paitokmani kosol samung tangdokya. Paitokmani baithe mwngsachwk khlaikhaise sumsok.
©️2025 Bible Students Fellowship of Bangladesh