رومی کلیسارا نامه 7
7
شریعتیکا رَخِستِه
1برا اِن، مگَم نینَّموست، هنته کَسِنی نَه گَف دَرِمَه کن شَریعَتیکا با خَبَرین، شَریعَت تاکَه تا زمانی اینسانی سَردِرِ حِکم بَکَیَه کن اینسان زِندَیَه؟ 2اِمی خونه کن شَریعَتی واتنَه، شو دارَ ژِن تا وقتی کن شو زندَیَه، بَی وابستَیَه. ولی اَگَم چَی شو بِمِرِ، اَ ژِن شرعَا اَیکا بَرخِستی. 3پس اَگَم اَموقه کا کن چَی شو زِندَیَه، دییَرَ مِردینَه ببو، زیناکار بَبی. اَمّا اَگَم چَی شو بِمِرِ، اِم شَریعَتیکا رَخِستَه یَه، و اَگَم دیَرَ مِردینَه ایزدواج بکَرِ، بَی زینا کار نینَّوات.
4چمن برا اِن، هِنترکِه، شِمَه نی مَسیح جندَکی واسیطنَه شَریعَتی را مَردَ ایرون، تا دیَرَ شَخصینَه وَصلَت بکَرَ، یعنی اَینَه کن مَردَاونکا زندَ آبَه یه، تا خِدارا بَرَ بِدرَم. 5چون زمانیکا کن جندَکیکا زندَگی اَکَریمون، چَمَه نفس کن گِناخینَه پَتلَمه بَه، شریعَت اوون جیکو دَروَری، و چَمَه جندَکی اَعضا، کار اَگِری تا مَرگیرا بَرَ بِدرَم. 6ولی ایسَه، اَمه اَ چیی ایی خونه کن بَیکا ویلاخیستَه بیمون مَردیمون و شَریعَتیکا رَخِستیمون، تا خدا موقدسَه روح نَه، ایلَه تازَ راه دلَکا خیدمَت بِکَرَم، نِه کَنَه راه نَه کن، تاکَه ایلَه نوشتَه یَه.
شریعت و گِناخ
7پس چِه بِواجَم؟ مَگَم شَریعَت گِناخَه؟ هیچ موقِه! اِم حالیکا اَگَم شَریعَت نِبَه، سَر آنِگِنیمون کن گِناخ چِچیَه. اِمی خونِه کن اَگَم شَریعَت واتَش نِبَه «طمَع مَکَ» نَشایمونَه سَر آگِنِه کن طمَع کَردِ چِه چییَه. 8ولی گِناخ شَریعَتی اِم حِکمیکا ایلَه فرصَتی پَیداش کردَ، تا هَر مودیل طَمَع چمن دِلَکا بوجود بوعَرِ. چون جِدا شَریعَتیکا، گِناخ مَردَیَه. 9زمانی اَز شَریعَتیکا جِدا، زِندَ بیمَه؛ ولی وقتی کن شریعتی حِکم آمَه، گِناخ زِندَ آبَه و اَز مَردیم. 10هَه حکم کن زندَگی وَعدَش دوعَه به، چمن مَردِ باعیث بَه. 11اِمی خونِه کن شریعَتی حِکمی واسیطنَه، گَناخ فِرصَتیش پَیدا کردَ و اَینَه بَمنِش گول ژَ و کِشتِش. 12پس، شَریعَت موقدسَه و شَریعَتی حِکم نی موقدسَه و دِرِست و چاکَه.
13پس مَگَم اَ چیی کن چاک بَه، چمن مَردِ باعیث آبَه؟ هرگز! بسکم گِناخ اَ چیی کن چاک بَه واسیطَنَه، مَردِ چمن دِلَکا بوجود وَردِشَه تا اِنتَرَکِه آمونِه کن گِناخ، گِناخَه، و شریعَتی حِکمی واسیطنَه دیار آبو کن گِناخی پَلیدگیریی بَرک وِرَ.
14چون اَمه بَموستیمون کن شریعت روحانیَه، ولی اَز جسمانیَه اینسانیمَه و هنته وَزییَری شیوار، گِناخی خِرَتَه آبَه ایمَه. 15چیرا کن اَز، دِ نِمَموست چِه بَکَمَه، چون اَ چیی کن بَپیمَه، اَنجوم نِمَدا، بَسکَم اَ چیی کن اَیکا بیزاریمَه، اَنجوم آمَدا. 16ولی اَگَم اَ چیی کن نِمَپی، اَنجوم دَرِم، پس قِبول بَکَمَه کن شَریعَت چاکَه. 17پس اِنتَرَکه، دِ اَز نیمَه کن اَ کاری بَکم، بَسکم اَ، گِناخیَه کن چمن دِلَکارَ. 18چون بَموستیم کن چمن دِلَکا، یعنی چمن جندَکی دِلَکا، هیچ چاکَی ایی دَرِ نیَه. اِمی خونِه کن هَر چَنَه چاکَه کارون اَنجوم دوعِه مِیل چمن دِلَکارَ، ولی چَی اَنجوم دوعِه نِمَشا. 19چون اَ چاکَه کاری کن اَپیمَه، اَنجوم نِمَدا، بَلکَم بَدَ کاری کن نَپیمَه، یَژَن اَنجوم آمَدا. 20ایسَه اَگَم کاری بَکَمَه کن نَپیمَه اَنجوم بِدَرِم، پس دِ اَز نیمَه کن اَ کاری بَکَم، بَلکَم چَی اَنجوم آرَدَر اَ گِناخیَه کن چمن دِلَکا دَرِ یَه.
21پس اِم قانونی بَفَهمِسستیم کن وَقتی بَپیمَه چاکی بِکَرم، بَدی دَست آرَسَه. 22اِمی خونه کن اَز باطِنیکا خدا شَریعَتیکا کیف بَکَم، 23ولی دییَرَ قانونی چمن جَندَکی اَعضاکا بَویندیمَه کن اَ، شَریعَتینَه کن چمن عقِل اَی قِبول بَکَی، بَجَنگِستی و بَمن شریعتی گِناخیکا ویلاخنِه، کن چمن جَندَکی اَعضاکا دَرِ. 24اَخ کن چَنَه بَد بَختَه آدَمی هِستیمَه! کیَه کن بَمن اِم مَردَ جَندَکیکا اَراخِمونِه؟ 25شِکر خدا، چَمَه خداوند عیسی مسیح واسیطنَه!
پس اَز اِشتَن عقلینه خدا شَریعَتی وَزییَر بَبیم، اَمّا اِشتَن جندَکینَه گِناخی شریعتی وَزییَریمَه.
اکنون انتخاب شده:
رومی کلیسارا نامه 7: CTB
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
@ 2024 Korpu Company