رَسولون اَعمال 14
14
پولوس و برنابا قونیه کا
1شهر قونیَه کا نی پولوس و برنابا یَهودیون عیبادَتگارا شینَه و هِنتَه، گَفِشون ژَ کن، خَیلی یهودیِن و یونانیونکا ایمانشون وردَ. 2ولی یهودیِنی کن ایمان نِوَردَشون بَه، غَیر یَهودیونشون جیکو جیکو ژِشون و چَوون فِکری برااون زِرَبَرا مسموم کردِشون. 3پس پولوس و بَرنابا وِرَ روجِنی اَ جِگاکا مَندین و جورئَتینه خداوندی خونه گف ژِشون، خداوندی کن اَوون موعجیزَ و نَشونَه اون اَنجوم دوعِه اینجاری اَدَریَه و اِنتَرَکِه اِشتَن فِیض بَخشه پَیغومی تایید اَکَری. 4ولی اَ شَهری آدَمِن دِ کاولَه آبین؛ کاولَه ایی یَهودیون طرف بین و اَیَله کاولَه رَسولون طَرَفی گَتِشون. 5وَقتی یَهودییِن و غَیر یَهودییِن اِشتَن یالونَّه اَپیشون بَه، کن پولوس و بَرنابا اَیذَت و آزاربِکَن و سِنگسار بِکَرن، 6پولوس و بَرنابا اِمیکا سَر آگِنین، و لِسترِه و دِربِه را، کن لیکائونیَه شَهرونکا بَه ویریتین، 7و اَیِن اَ جِگاکا خَشه خَبَری دوعه، ایدامَه داشون.
پولوس و برنابا لِستْره کا
8لِسترِه کا مِردی نِشت بَه کن نَشایَه اِشتَن لِنگون تِم دَروَردِ و هَرگِز گَل ژَش نِبَه، اِمی خونه کن مادر زاد شِل بَه. 9هَنگومی کن پولوس گَف اَژَنی، اَ شِلَه مِرد گوش اَکَریَه. پولوس بَی چَم دَشتِشَه و ویندِشَه کن شفا گَتِه ایمانی دارِ. 10پس لَسَّنه بَش واتَه: «اِشتَن لِنگون سَردِرِ دیک پا بومون!» اَ مِرد اِشتَن جِگاکا وَشتَه و پا آرمَه.
11وَقتی مَردوم اَ چیی کن پولوس اَنجوم داشَه ویندِشون، لیکائونی زَبانینَه لَسَّه آداشون: «خدا اِن اینسانی شیوار چَمَه خونه بنیرا آمَه اینَه!» 12اَیِن بَرناباشون ’زِئوس‘ و پولوسی ’هِرمِس‘ نوم پِناشون، اِمی خونه کن پولوس اَصلیَه گَفَه ژَن بَه. 13زِئوسِ کاهِن کن چَی معبَد دِرِست شَهری دَروازَ بِرنیکا بَه، چَن گِلَه گا و تاجِ گُل، شَهری دَروازَ را وَردِش؛ اَ و جَماعَت اَپیشون بَه تا چَوونرا قِربونی بِدَرِن.
14ولی وقتی اَ دِ رَسول، یعنی بَرنابا و پولوس، اِم کِفرِشون درَسته، اِشتَن شِندِرون پِزارنِستِشون و جَماعَتی دِلَرا ویریتین، و جِکَّله ژِشونه کن: 15«اَی مِردِن چیرا اِنتَرَ بَکَرون؟ اَمه نی شِمَه شیوار، اینسانیمون. اَمه بَشِمَه خَشَه خَبَری آدرَم کن اِنتَرَ دَدارَ چییونکا دَس پِگِرَ و زندَ خدا کا، کن آستامون و زمین و دَیرا و هَر چیی کن چَوون دِلَکارَ، خَلقِش کردَیَه، ایمان بوعرَ. 16خدا گِذَشتَکا گِردِ یهودییَه قامی اودومِنِش آهَشتَه تا هَر کَم اِشتَن راه را بشون، 17اِم حالیکا اَ، بَشتَنِش بی شاهید آنِه ناشَه؛ اِمی خونه کن اَ کِلاکی وارِستِه نَه آستامونیکا و پُربارَ فَصلون بَخشِستِنَه، شِمَرا چاکی کَردِشَه، و فِرَوونَه هَردَ چیی بَشمَه آرَدا و شِمَه دِلون خَشیکا پتلَمه بَکَی.» 18اَیِن حتی اِم گَفونَّه، خَیلی چَتین شاستِشون مَردومی ناری قِربونی دوعِه را بیگِن. 19ولی یَهودییِنی، قونیَه و اَنطاکیَه کا آمینَه و مردومی اِشتَنَه همدَست کردِشون، و پلوسِشون سِنگ سار کَردَ و اِم گَمونینَه کن مَردَیَه، شَهری بِرنیرا دَراکِنیشون. 20اَمّا وَقتی شاگِردِن پولوسی دوور جَم آبین، راست آمَندَ و شَهریرا ویگَردِستَه. اَ روجی سَوسَه، اَ و برنابا شهر دِربِه را شین.
21اَیِن اَ شَهریکا نی خَشَه خَبری اییلام کردشون و خَیلییون، عیسی شاگِرد آکَردِشون. چَی بَه دوملَه لِسترِه و قونیَه و اَنطاکیَه را ویگَردِستین. 22اَ شَهرونکا شاگِردون جانی زبق آداشون و اَوون آمبَست مَندِ ایمانیکا تَشویق کَردِشونَه و نَصیحتِشون کردَ کن: «پی خدا پادیشاهی دِلَه دَشِه را برکَه سختیون تاو بوعَرَم.» 23اَیِن هر کِلیسا ایکا ایسبیَه ریشونی، ایماندارون سَر آناشون و دِوا و روجَه نَه اَوون خداوندی دَست، کن بَی ایمان وَردَشون بَه آداشون.
24چَی بَه دومله پیسیدیَه منطقَه کا دَیوَردین و پامیفیلیَه منطقَه را شینَه، 25و شهر پِرجَه کا خدا کَلامی آموج دوعِه بَه دوملَه، اَ جِگاکا، آتّالیَه بندَریرا آمین.
26آتّالیَه کا کَشتینَه شهر اَنطاکیَه را آگَردِستین، هَه جِگا ایکا کن ایماندارِن پولوس و بَرناباشون خدا فِیضی دَست آدوعَشون بَه تا هَه کاری بکَن کن اَیِن اَنجوم دوعَشون بَه. 27وقتی پولوس و بَرنابا اَجِگارا آرَستین، کِلیسا آدَمِنِشون جَم آکردَ، و هَنی واتِشون کن خدا چَوون واسیطَنَه چِه کارِنی کَردَشَه و چِنتَه، ایمانی بَرَنگا غَیرِ یَهودیونرا آج آکَردَشَه. 28اَیِن وِرَ زمانی، اَ جِگاکا شاگِردونَّه مَندین.
اکنون انتخاب شده:
رَسولون اَعمال 14: CTB
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
@ 2024 Korpu Company
