اوّلین نامَه قورَنتیانیرا 2
2
پولوس مسیح مصلوب بِه اییلام بَکَی
1برا اِن اَز نی، هَنگومی کن شِمَه وَر آمیم، نامیمَه تا خدا رازون، یالَه گَفونَّه و حیکَمتینَه شِمَرا اییلام بکَرم. 2اِمی خونه کن اِشتَن تصمیم داریمَه شمَه دلَکا، چیزی غَیراَز عیسی مسیح مَزنِم، کن اَ نی مَصلوب بَه عیسی اَ. 3و اَز بَرکَه عِجِز گیری، و ترسو لَرزینَه شِمَه وَر آمیم. 4و چمن پَیغوم و گَفِن حَکیمانَه کلَمَه اونَّه کن قانع بَکَیه نِبَه، بَلکَم خِداروح خِنَرینَه واتِم، 5تا شِمَه ایمان اینسانیَه حیکمَتی سَر مَبو، بَسکَم خدا خِنَرینه ببو.
حیکمت، خدا روح کا
6اِم حالیکا، اَمه یالَه آدَمون دِلَکا حیکمَتی خونه گَف بَژَمون، هر چَنَه نِه اَ حیکمَتی کن اِم زَمونه شِنَه یا اِم زمونه حاکیمِن شِن، کن نیفیت آبِرا مَحکوم آبَه اینَه، 7بَلکَم خدا نون آبَه حیکمَتیکا گَف بَژَمون کن ایلَه رازَه و جیگاش هردیَه، اَ حیکمت کن خدا دِنیا خلق بِه بَه نَ، چَمه شکوه و جَلالیرا تَیین کَردَشه. 8هیچ کِرَم اِم زَمونه حاکیمونکا اِم حیکمَتیکا سَر آنِگِنین، اِمی خونه کن اَگَم اَیکا سَر آگِنَه بینَه، خِداوندِ شکوه و جَلالی صَلیبی سَردِرِ نَکِشینَه. 9هَتَه کن اِشعَیای پَیغمبری کیتاویکا نوشته بَیَه:
«اَ چیی ایی کن هیچ چَمی نِویندِشَه،
هیچ گوشی دَرَستَش نی،
و هیچ فِکریرا آرَستَه نی،
خدا اَیِنیرا کن اَوون رَی بَداشتی آمادَ آکَردَشَه.»
10خدا اَی اِشتَن روح واسیطَنَه اِم چییون چَمرا دیار آکَردِش، چیرا کن خدا روح گِردِ چییون، حتی خدا اعماقی نی بَگَردستی. 11چون غَیراَزاینسانی روح، کن چَی دلَکارَ، کییَه کن اینسانی فکرونکا باخبر ببو؟ هِنتَرَکه، تاکَه، خدا روحَه کن خدا فکرونکا باخبَرَ. 12ایسَه اَمه اِم دِنیا روح ویگَتَمون نی، بَسکَم خدا روحِمون ویگَتَیَه، تا اَ چیی ایی کن خدا اَمَش خلا دوعیَه، بِزنَم. 13واَمه اِمیکا گَف بَژَمون، اَ نی نِه گَفِنینَه کن اینسانیَه حیکمَتینه آموج گَتَمون ببو، بَسکم اَ گِفنینَه کن خدا روح آموج دَرِ؛ و اِمی خاطر روحانییَه حَییقتون اَیِنیرا کن اِشتَن دلَکا خدا روح بَداشتینَه، باتیمون. 14اینسانی کن اِشتَن نفسی دوملَه ببو چییِنی کن خدا روح مَربوطَه قِبول نییَکَرد، اِمی خونه کن چَی نظَریکا نادونییَه، و اَوونکا سَر بَر نییَکَرد، چیرا کن تاکَه، خدا روح نَه بَبی چَوون دِرِست بِه کا، سَر آگِنِسته. 15اَ کن خدا روح بَداشتی گِردِ چییون سَر دیوون بَکَی، ولی هیچ کَم نییَشا چَی خونه دیوون بکَرِ.
16«چون کیَه کن خداوندی فکری بِزنِه
تا بَی آموج بِدَر؟»
ولی اَمه مسیح فکری دارَم.
اکنون انتخاب شده:
اوّلین نامَه قورَنتیانیرا 2: CTB
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
@ 2024 Korpu Company