Roma 3
3
Tsaˈa Miya Takur Nǝ Hyal
1Ɗǝm ya, mi ngǝ akkǝri nga ariya nagǝ ndǝr Yahudiya? Mi ngǝ nubwa nǝ thla pǝlzha? 2Jiri aˈyi nda gangǝu wu lagu pampamǝu! Nǝ tanggǝrma, ca ngǝ, anǝ nda ngǝ Hyal ǝnga kǝrnyi lǝr ndǝr nyi aga nda mǝl thlǝr ǝni ǝnga nda tsǝrpǝri. 3Kar ma alenyi nji wu pama nda aˈyi ǝnga tsaˈa miya takur ma ya? Gǝra tsaˈa miya takurǝr nda wu sǝni mǝliya tsaˈa miya takur nǝ Hyal a ɗa sǝ kurthlǝ ya? 4Awau! Alaga kushu! Bǝgǝ Hyal ja ɗa ndǝ jijiri, alaga kǝ kalar ndǝ, ndǝ fafati ngau. Ənggǝr kǝra ja tsǝtsǝfau,
“Aga nja cabiya abǝr ndǝr ngau, jijiri nga nyi,
ba ga sǝmku tǝlkur ar pǝcira nju zhigǝɗǝ ndǝr ngau.”
5Ya, ma nggyabiya gǝra tsapǝkur nǝr mǝn a sǝni cabiya tsapǝkur Hyal ya, mi nga mǝna sǝni na ja? Kariya, aga nja na Hyal aˈyi tsapǝ mai ya, ma ji nǝ mǝn numa nǝ huɗǝ ndzǝndzǝ nyi ya? (Ya vǝr ndǝr kǝ wu ndǝndǝkur.) 6Awau! Abangǝ nga nyi mai! Maja abangǝ nga nyi, lagu mani ngǝ Hyal wu nda mǝl numa anǝ duniya?
7Ma ghar jirkur ɗa nga sǝni mǝliya jirkur nǝ Hyal a biyar babal, ǝnga ja cakǝri kadakadarkur nyi, ya, mi ngǝ ɗa baˈanǝ kabangǝkau, nju mǝl numa anǝ ɗa ar viya ndǝr bikǝ ka? 8Ma abangǝ ja, aˈyi mǝna dumwa ǝnga mǝl ɗǝmwaˈyikur aga ja ɗa lagur uya mǝnahǝkur wa? Ariya alenyi njir ndza thlǝmǝr ˈya a vǝr na abǝr abangǝ nga ˈya vǝr na ǝngwa. Nju nda mǝliya nda numa tsatsaˈa aga sǝr mǝla nda.
Ndǝ Tsapǝu Aˈyi Mai
9Ya, mi nga ˈya sǝni na? Kariya, naˈya njir Yahudiya ˈyu ndiya alenyi nji ya? Awau! Alaga kushu! Tsu kaɗǝu a cabiyar ˈya abǝr njir Yahudiya ǝnga njira aˈyi njir Yahudiya mai, patǝ nda njir bikǝ ngau. Ənga tsu patǝ nda ǝgya kiɗa bikǝ nga nda. 10Ənggǝr kǝra nji tsǝfǝri, abǝr,
“Ndǝ tsapǝu aˈyi mai,
alaga ndǝ pathlǝu.
11Ndǝr nggabiya sǝ aˈyi mai,
ndǝ tsu kǝra a vǝr gal Hyal aˈyi mai.
12Patǝr nji shini nyi yi anǝ Hyal,
a ɗar nda patǝ nji papatagǝu.
Ndǝr mǝl sǝ mǝnahǝ aˈyi mai,
alaga ndǝ pathlǝu.
13Fǝlanga nda ǝnggǝr hu papahau,
kyara nda a ɗar sǝr ngguta vi.
Sǝra wu biya wu miya nda
ǝnggǝr daɗǝ mǝtsapa.
14Miya nda cumu nyinyau ǝnga ndǝr shiˈwa ndǝ ba ǝnga ndǝr nǝ nggǝnggǝl ndau.
15Ənga kusa ndu gal lagur pǝ mashi,
16Kalar vira ndǝ maˈyi a ndari kǝl nda ndzana sau ǝnga nda lǝr ɓwaɓwatǝ anǝ nji.
17Nandu sǝni lagur jamǝkur mai.
18Hivǝr Hyal aˈyi wu liya nda mai.”
19Namǝn tsu, a sǝni mǝn abǝr patǝ sǝra dlaɗǝ wu nana, ju na anǝ njira ǝgya kiɗa dlaɗau. Naja kau, a nggya abangau aga kalar ndǝ ja tini sǝr fǝr miya, ǝnga tsu njir duniya patǝ nda nggya ǝgya kiɗa numa nǝ Hyal. 20Agabangau, ndǝ aˈyi kǝra sǝni uya nggya tsapǝu a dumwar Hyal lagur ɓǝlari dlaɗǝ mai. Sǝra mǝnahǝ ara dlaɗau, ca ngǝ ju cabiya bikau anǝ kalar ndau.
Tsapǝkur Lagur Mbǝrsa
21Ama kabangǝkau, tsapǝkur sara ara Hyal, kǝra aˈyi wu shili lagu dlaɗǝ mai, a cabiyar dzau, kǝra dlaɗau ǝnga nabiˈyar lǝri sakida ar kǝri. 22Tsapǝkur kau sara ara Hyal nga ja, kǝra nju uya lagur mbǝrsa wu Yesu Kǝrsiti anǝ patǝr njira hǝnggǝri. Ca pampamǝkur aˈyi mai, 23ariya kalar ndǝ a mǝliyar bikau, ba ji tuwa wu kadakadarkur nǝ Hyal.
24Ama lagur mayiwakur kǝra Hyal mǝliya kurthlǝu anǝ kalar ndau, kalar ndǝ a uya tsapǝr dzǝ lagur bǝliya mǝn kǝra Kǝrsiti Yesu bǝliya. 25Hyal ngǝ sǝwa Yesu aga ja ɗa sǝr thla nǝ saɗaka, nǝ hǝ bikǝr nji, lagur pǝ mashi nyi ar wu dladlakau, aga ja dlǝwur nda, ma ndǝ hǝnggǝri ǝnga ja. Patǝr sǝˈyar kǝ ɗarkǝr aga ja cabiya tsapǝkur nǝ Hyal, ara wu mba ɗǝfu nyi nga ji cana mǝl numa anǝ bikǝ kǝra nji mǝliya tsu kaɗǝu. 26Lagu kǝ ngǝ Hyal cabiya tsapǝkur nyi wu pǝci kǝ ǝshina, ara naja ǝnga kǝrnyi ndǝ tsapǝ nga ja, ǝtsu ji mǝliya kalar ndǝra hǝnggǝri ǝnga Yesu ju uya tsapǝr dzau.
27Ya, ǝmani ngǝ ɓwadzǝr mǝna? Vanyi sǝr ɓwadzǝ aˈyi mai! Lagu mani nga nji hǝna ɓwadzǝ ka? Abǝr lagur ɓǝla dlaɗǝ ya? Awau, kǝl ja ɗa lagur mbǝrsa. 28Ariya a nggabiyar mǝn abǝr lagur mbǝrsa nga nju uya tsapǝr dzau, ama aˈyi lagur nu sǝra dlaɗǝ nana nja mǝl mai.
29Kariya, Hyal nǝ njir Yahudiya nga ja waci ya? Aˈyi ja Hyal nǝ njira aˈyi njir Yahudiya mai tsu wa? Pakatǝu, Hyal nǝ njira aˈyi njir Yahudiya mai nga ja tsu, 30ta ɗa Hyal zǝmǝ nga ja. Ju nda nǝ nda tsapǝr dzǝ anǝ njira nji thlana nda pǝlzha lagur mbǝrsa, ǝnga ju nda nǝ nda tsapǝr dzǝ anǝ njira nji gǝra thlana nda pǝlzha lagur mbǝrsa. 31Kabangǝ kǝ ya, mǝnu mǝl thlǝr ǝnga mbǝrsa aga mǝna wushina dlaɗǝ ya? Alaga kushu! A sǝni ɗa mai. ˈYu hǝnggǝri abǝr dlaɗau sǝra kyikyi ngau.
©2024 Initiative for the Translation and Development of African Languages and Margi Tiwi Nga Təm