Roma 2
2
Numa Hyal Tsatsaˈa Nga Nyi
1Agabangau, nagǝ ndau, kǝra a vǝr numa nǝ bikǝ vanyi ndau, alaga nagǝ wa, sǝr fǝr miya aˈyi ara gǝ mai. Ariya wu pǝci kǝra ga vǝr mǝl numa nǝ bikǝ vanyi ndau, numa nga ga vǝr mǝl anǝ kǝrngau. Ara bikǝ kǝra ga vǝr numa nyi kau, ca nga ga vǝr mǝl tsu. 2A sǝni mǝn abǝr numa nǝ Hyal tsatsaˈa nga nyi ar kǝra njira a vǝr mǝl culi sǝˈyar kau.
3Nagǝ ndau! Ma ga vǝr mǝl numa ar kǝra njira wu mǝl naja ka sau, kǝra nagǝ ǝnga kǝrngau ga vǝr mǝl, gu nggani, gu sǝni mbǝɗǝbiya kǝrngau ara numa nǝ Hyal ya? 4Əndǝga ga vǝr diɗa gangǝkura kyiˈwakur Hyal, ǝnga sǝsǝˈu sǝ nyi, ǝnga mba ɗǝfu nyi ya? Ɗǝm ya, aˈyi gu sǝnibiya abǝr kyiˈwakur nǝ Hyal kau, ca nga vǝr nǝ ngǝ lagu nǝ tubi wa?
5Ama ariya ɓaɓalkur nǝ kǝra hyi ǝnga ɗǝfu ɓaɓal ca ngǝ kar hyi ara tubi, ba hyi dzǝgwa tsǝmiya a dar kǝra hyi huɗǝ ndzǝndzǝ nǝ Hyal, kǝra wu sa cabiya dzǝ ar pǝcir numa tsapǝ nǝ Hyal. 6Hyal wu sa mǝliya nyi numa anǝ patǝr nji ar lagu kǝra ndǝ mǝl thlǝrǝr nda ari.
7Njira cinapi a vǝr mǝl thlǝr kǝra mǝnahǝu, aga nda uya kadakadarkur, ǝnga dlǝdlǝvǝkur ba ǝnga nggya ǝnga Hyal, ju nda nǝ nda pi gǝra kuɗau. 8Ama njir yiwu kǝrnda, njira gǝra nu jirkur ama ndu nu ɗǝmwaˈyikur, huɗa ja wu nda ndzǝ ǝnga nda ba ja fǝnggǝr nda ɓwaɓwatǝu. 9Hyal wu nda nǝ nyi ɓwaɓwatǝu ǝnga nggya dzadzau anǝ njir mǝl ɗǝmwaˈyikur, tanggǝrma anǝ njir Yahudiya, a dzǝgwa ɗa njira aˈyi njir Yahudiya mai. 10Ama kalar ndǝra wu mǝl mǝnahǝkur ju nda uya kadakadarkur, ǝnga dlǝdlǝvǝkur, ba ǝnga huɗǝ pǝrtǝu, tanggǝrma anǝ njir Yahudiya, a dzǝgwa ɗa anǝ njira aˈyi njir Yahudiya mai. 11Ariya Hyal aˈyi ju tazhira mai.
12Patǝr njira wu mǝl bikau ǝnga gǝra sǝn dlaɗǝ Musa, ndu nda sanakǝr gǝra ǝnga dlaɗǝ Musa. Ama kalar njira wu mǝl bikau ǝgya dlaɗau, nju nda mǝl numa anǝ nda lagur dlaɗau. 13Ariya aˈyi njira wu nggari ar kǝra dlaɗǝ wacu ngǝ wu ɗa nji tsapǝu wu mwar Hyal mai, ama njira wu ɓǝlari dlaɗa nyi ngǝ wu nda ɗa nji tsapǝu.
14Ma njira aˈyi njir Yahudiya mai, njira gǝra ǝnga dlaɗau, sara wu ɗǝfuwa nda nga ndu mǝl sǝra dlaɗǝ wu yiwu, naja kǝ a ɗar dlaɗǝ anǝ nda, alaga kǝ nanda aˈyi ǝnga dlaɗǝ mai kau. 15Sǝr mǝla nda wu cabiya abǝr dlaɗǝ aˈyi tsǝtsǝfǝ wu ɗǝfuwa nda. Ɗǝngar ɗǝfuwa nda tsu a ɗar sakida anǝ nda ar kǝra sǝˈyar kau, ara ɗǝngar nda wu sǝni mǝliya nda nda ɗa ǝnga bikǝ vanyi pǝci, vanyi pǝci tsu nandu tsamǝr bikǝ kǝ mai. 16Ariya kau, ǝnggǝr kǝra ndǝshigu kǝra ya vǝr tǝtǝlna ndǝra nyi kǝ wu na, abangǝ nga nyi wu nda ɗa wu pǝci kǝra Hyal wu nda numa lagur Kǝrsiti Yesu anǝ patǝr sǝra ɗǝɗǝwa wu ɗǝngar nji.
Njir Yahudiya Ənga Dlaɗau
17Nagau, ma gu ngga kǝrngau ndǝr Yahudiya, ma ga fǝrkǝr ǝnga dlaɗau ba ga dzǝgwa ɓwadzau ǝnga pama gǝ ǝnga Hyal. 18Ma gu na abǝr gu sǝni yiwur huɗa Hyal, ǝnga tsu gu caɗǝbiya sǝra tsatsaˈa ariya gu sǝni dlaɗau. 19Ma jijiri nga gu nggani abǝr ndǝr tǝɗǝmwa nga gau anǝ njira ǝnggǝr nji lǝfau, ǝnga mbǝmbǝl tsu anǝ njira wu kuthlǝu. 20Ənga ndǝr highiɓǝ anǝ nji dza, ǝnga malǝmǝ anǝ njira wu ɗǝnga sǝ ǝnggǝr wazha, ara dlaɗǝ Musa ngǝ mǝliya gǝ nggabiya sǝ ar kǝra Hyal ǝnga sǝra jijiri. 21Ta ɗa nagǝ ndǝr highiɓǝ anǝ nji, aˈyi ga highiɓǝr nyi anǝ kǝrngǝ wa? Nagǝ ndǝr tǝtǝlna ndǝr Hyal abǝr a sara nja hǝl mai, gu hǝl ya?
22Nagǝ ndǝra na abǝr a sara nja mǝl sǝsukur mai, gu mǝl sǝsukur ya? Nagǝ ndǝr diɗa katǝu, gu hǝl wu umbwa katǝ ya? 23Nagǝ ndǝr ɓwadzǝ ǝnga dlaɗau, gu diɗa thlǝmǝr Hyal lagur ɓǝlna dlaɗa nyi ya? 24Ənggǝr kǝra ja tsǝtsǝfǝ wu ndǝr Hyal tsǝtsǝfǝ “Ariya hyi nahyi njir Yahudiya nga nju ndǝr nǝ diɗa thlǝmǝr Hyal wu pama nji kǝra aˈyi njir Yahudiya mai.”
25Ma gu ɓǝlar dlaɗǝ Musa, thla pǝlzha aˈyi ja ǝnga akkǝri anǝ ngau. Ama ma nagǝ aˈyi a vǝr ɓǝlar dlaɗǝ mai, ju ɗa anǝ ngǝ ǝnggǝr ndǝra nji gǝra thlana nyi pǝlzha. 26Ma njira nji gǝra thlana nda pǝlzha mǝl sǝra dlaɗǝ nana nja mǝl, aˈyi nju nda hǝr nda ǝnggǝr njira nji thlana nda pǝlzha wa? 27Njira aˈyi nji thlana nda pǝlzha lagur kumǝr dzǝ mai, ama ndu mǝl sǝra dlaɗǝ na nja mǝl, ndu nda mǝliya hyi numa nahyi njir mǝl sǝ ɗǝmwaˈyu. Ndu nda mǝliya ngǝ numa nagǝ ndǝra ǝnga dlaɗǝ tsǝtsǝfau, ba ǝnga pǝlzha, ama nagu ɓǝlar dlaɗa nyi mai.
28Ndǝr Yahudiya nǝ jijiri aˈyi ndǝ kǝra ndǝr Yahudiya lagu kumǝr dzǝ wacu mai, ǝnga pǝlzha nǝ jijiri aˈyi pǝlzha nǝ kumǝr dzǝ waci mai. 29Agabangau, ndǝr Yahudiya nǝ jijiri ca ngǝ ndǝra ndǝr Yahudiya wu ɗǝfu. Ətsu pǝlzha nǝ jijiri ca ngǝ pǝlzha nǝ ɗǝfu, kǝra Mambǝl Hyal ngǝ wu mǝl, aˈyi kǝra dlaɗǝ tsǝtsǝfǝ na nja mǝl mai. Culi fal nǝ ndǝ kau, aˈyi sara ara nji ngǝ mai, ama sara ara Hyal ngau.
©2024 Initiative for the Translation and Development of African Languages and Margi Tiwi Nga Təm