रोमियो 9
9
परमेश्वर ए दोऊ अंङषी मीहरे
1-3हेंतेग अगर छिल्ला हेंदिंङ परमेश्वरो दाह ओ दोरच़ी शत्ह लेह मरपोतो, गिऊ यहुदी मीहरे, परमेश्वरो दोरच़ी शत्ह छारिंङ तोतोर? गिह्बी दोतु थल्जी महस दुख तो, दंङ हमेशा गिऊ सेहमरिंङ दोतु थल्जी दुख महसूस शवाह। हेलेरिंङ, हेंदु ए मीहतु उद्धार लहज़िमी थल्जी, गेह घेंङौ टोहकठे दोष लगाच़िमी ए मसीहू दोरच़ी शत्ह शुबिमी थल्जी तेयार तोतोग, गेह दोऊ थल्जी तेयार तोतोग। गेह मसीह बि गवाह मानेकि हेले कुट्रातग पवित्र आत्मा ए गिऊ दिमाग ला गवाही रंड्रा कि दि हप्सी माह शुह। 4दोरे इस्राएली मीहरे तोतोर, दोतिंङ परमेश्वरे गोद लेहपच़ी एनोह कटुतु रूपा रिंङ अंङे च़रति। दोतु थल्जी परमेश्वरे एनोह महिमा प्रकट लहसी ततो; दोतंङ साते एनोह वाईदा लहरी दंङ दोतिंङ कानून रांई; दोरे सच्चा तरीका रंङ परमेश्वरो अराधना लहज़ातोर दोच़ी परमेश्वरो वाईदा खोक्शातोर। 5अब्राहम, इसहाक ए याकूब दोतु पूर्वज शुरे, दंङ फुको हिसाबे मसीह दोतु ए खानदानो तोह। परमेश्वर, अंऊ भत्ते तु टोहकठे राज लहज़ा, दोऊ हमेशा ओ थल्जी षटणा शुहबी जूंस। आमीन। 6तांला दि सोचेक्सी माह जूंस कि परमेश्वर एनोह वाईदा पूरा लहज़िमी थल्जी नाकाम शुहचे इलि, छना कुचे इस्राएलो खानदाना रिंङ जेह्की भत्ते मीहरे सच्चे इस्राएली र माह तोर। 7अब्राहमो खानदाना रिंङ जेह्कपिमी रंङ साते भत्तेरे परमेश्वरो सच्ची ओलाद शुहबी मरपोर, छना कुचे परमेश्वरे अब्राहमो हखा कुहते, “अंऊ इसहाको खानदाना रिंङ जन्म लेहपच़ा तोर, दोरे ए कांह खानदान शोर।” 8दिऊ मतलब दि तोह कि अंऊ फुको हिटी ऊ हिसाबे जन्म लेहपच़ा तोर, दोरे परमेश्वरो ओलाद माह शुरे पर अतु जन्म वाईदा ओ हिसाबे शुई, दोरे ए अब्राहमो ओलाद शोर; 9छना कुचे वाईदा ओ बचन दि तोह, “गेह दि टेमो हिसाबे अपोग, दंङ सारा ओ इच्च़ा योह शोतो। 10दंङ सिर्फ दि माह, पर अपेहल रिबका ला इच्च़ा रंङ ए साते मतलब हेंदु पूर्वज इसहाको दोरच़ी खोकटुंङ तोहई, दू मुक्का दोऊ खोकटुंङ झुह्ट कटुरे तोईरे।” 11-12जेह्कपिमी तुहई ए छा रूठे ए मदम लहज़िमी तुहई प्रभु ज़ि रिबका ओ हखा कुई कि दोतु मोह्ड़े योह ज़ि कवचि दोऊ सेवा लोहतो। प्रभु ज़ि दि कंड्रिमी थल्जी कुई कि दू एनोह पसन्द एनेह बणाएच़ा दंङ दि छिल्ला कम ओ दोरच़ी माह तोहई अंऊ दोई लाहते। 13दि ठीक ध्वांए ए तोह छना पवित्र शास्त्र रिंङ च़ेहसी तोह, “गेह याकूब रंङ साते दाह लहरिग, पर एसाव बि प्यारे माह ञेंएतिगा।” 14दंङ दिऊ मतलब छि शुई? छि दि परमेश्वरो अन्याय तोहई आ? माह! बिल्कुल ला माह! 15छना कुचे परमेश्वरे मूसाओ हखा कुट्रा, “गेह अतुआ टोहकठे दया लेह तरपोग, दोऊ टोईच़ी दया लोहग, दंङ अंऊ दिऊ टोईच़ी कृपा लहज़ी जुंज़ातग दोऊ टोईच़ी कृपा लोहग।”
16झांह लेह दि मीहू हिटी या दोऊ मेहनतो टोहकठे मशत, पर दया लहज़ार परमेश्वरो टोहकठे निर्भर शुहवा। 17छना कुचे पवित्रशास्त्र रिंङ रज्ज़ा फिरोनो हखा प्रभु ज़ि कुहषी ताहरे, “गेह कनिंङ रज्ज़ा दिऊ थल्जी बणाएक्तग, कि कनिंङ घेंङौ सामर्थ कंबोग, दंङ गिऊ मिन्दु प्रचार भत्ते संसारो टोईच़ी शुहबी जूंस।” 18दंङ यह्च़ा, परमेश्वर अतिंङ जुंज़ा दोऊ टोहकठे दया लहज़ा; दंङ अपि जुंज़ा दोबि हठिला (ज़िद्दी) बणाके च़रच़ा।
परमेश्वर ए दोऊ रोहष ए दोऊ दाह
19दंङ रेह मीहरे गिऊ हखा कोर: “अगर झांह तोह ता, दंङ परमेश्वर छना कुचे तरपोतो कि हेनर गलत तोतोंई? छना कुचे दोई छि जुंज़ा दू लहज़िमी थल्जी अच़िला दोबि रोकेकी मरपोतो।” 20हे मित्रा, कांह मीहरे अरि शुनाह, अच़ि परमेश्वरो हखा सवाल लहज़ा? छि पथेके चीज़ एनोह बणाचा दोरंङ साते कुट्री तरपोतो, “केई गिह्बी झांह ठ्रोह छिल्ले बणेकतन?” 21छि कुमाहराबि षोह टोईच़ी अधिकार माह, कि षोह युन ज़ि इच्च़ा नंदे खास कमो थल्जी, दंङ अईबि रोज इस्तेमाल लहज़िमी थल्जी बणाएतेनि? 22परमेश्वर बि अधिकार तोह कि अंऊ मीहतिंङ दोई बणाषी ततो दोतंङ साते एनोह हिटी हिसाबे छना जुंज़ा ध्वांए लेह तरपोतो परमेश्वर एनोह रोहष कंड्री ततो दंङ हर इच्च़ा खिलाप एनोह शाक्ति प्रगट लहज़ा अंऊ नष्ट शुहबिमी हकदार तोह। पर दिऊ वहज़ा, दोई धीरज़ारंङ साते दोतु सहन लहरी। 23दोई झांह दिऊ थल्जी लहरी छना कुचे दोई दि कंड्री तते, कि दू अंयों महान तोह अपेहल दोई दू मीहतु टोईच़ी दया लहरी अंऊ दोतिंङ दोई एनोह महिमा रिंङ भागीदार शुहबिमी थल्जी अंङषे ततो। 24चाहे यहुदी शुह या ऊईजाति, हेनर ए दू अंङषी मीह शुई। 25छना परमेश्वर होशे ऊ कताबारिंङ ला कुट्रा,
“अंऊ गिऊ प्रजा माह तोहई, दोतिंङ गेह घेंङौ प्रजा कोहग,
दंङ अंऊ प्यारे माह तोहई, दोबि प्यारे कोहग; 26दंङ अंऊ ठाहरीरिंङ परमेश्वरे दि कुहते, कि केरे गिऊ प्रजा माह शुई, दोर्तिंङ ए श्रींङे परमेश्वर दोतिंङ एनोह ओलाद कोहतो।”
27दंङ यशायाह भविष्यवक्ता इस्राएलो पाहठी हाऊष रंड्रा कुट्रा, “चाहे इस्राएलो मीहतु गिनती समुंद्रो शिरतु ठ्रोह महस शोतो, तांला दोतु बिचंङ थोड़े ए बचेक्पोर।”
28छना कुचे प्रभु युरनाह ए, दंङ इच्च़ा ए फेरा हमेशा ओ थल्जी, धरतीऊ टोईच़ी भत्ते मीहतु न्याय लोहतो। 29छना यशायाह भविष्यवक्ता ज़ि तुहई ए कुहषी तोहई,
“अगर सर्वशक्तिमान प्रभु ज़ि हेंदिंङ ओलाद शुहबिमी अनुमति माह रांहषी शुंईयां,
ता, हेनर सदोम ए अमोरा ओ शहरो मीहतु ठ्रोह शुहचे इबि तोहई, अंऊ दोतिंङ परमेश्वरे पूरे ठ्रोह नष्ट लेह च़रति।”
इस्राएलो अविश्वास
30ञेंहच़ी छिला कुट्रातंई दोऊ मतलब दि तोह, ऊईजाति परमेश्वर रंङ साते सही तच़िमी कोशिश माह लहज़ातेर, पर परमेश्वरे दोतिंङ विशवासो दोरच़ी धर्मी घोषित लहरी। 31पर इस्राएली मीहरे; मुसाओ कानूनो भाषे लहज़ा परमेश्वर रंङ साते धर्मी बणेक्च़िमी कोशिश लहज़ातेर, पर दोरे धर्मी शुहबिमी पाहठी सफल माह शुईरे। 32दि छना शुहबी तरपोतो? झांह लेह कि दोरे विशवासा रंङ मशत, पर रूठे कमो थल्जी परमेश्वर रंङ साते धर्मी बणेक्च़िमी कोशिश लहज़ातेर: दोच़ी मसीह बि ठुकराके च़रति अतु दुह रह्घ तु रंङ साते बराबरी लहसी ताहरेर अंऊ मीहतिंङ ठोकर रंड्रा।
33छना पवित्र शास्त्र रिंङ च़ेहसी तोह, “खंई, गेह यरूशलेम शहर रिंङ ठोकर रंड्रा ठ्रोह रह्घ, दंङ मीहतिंङ दह्पी लहज़ा अंऊर ठोकर ज़हरी चटान केट्रातोग, अंऊर अंऊ दोई टोईच़ी विशवास लहज़ा दुह माह षेपोदो।”
Lahuali Bible (लाहौली) by The Love Fellowship is licensed under Creative Commons Attribution-ShareAlike 4.0 License.