रोमियो 10
10
इस्राएलाबि रूठेह खबरो जरूरत
1हे प्यारे साथी विशवासी रे, गिऊ सेहमो हिटी ए गिऊ घेंङौ यहुदी मीहतु थल्जी दि प्रार्थना तोह, कि परमेश्वर दोतिंङ उद्धार रमतो। 2छना कुचे गेह दोतु पाहठी गवाही रंड्रातग, कि दोरे परमेश्वरो थल्जी उत्साहित ता तोतोर, पर परमेश्वरो सेवा छना लहज़ी, दि पाहठी दोतु समझ गलत तोह। 3दोरे दू धर्मिकता माह ञेंहच़ातोर, अंऊ दोबि परमेश्वरे जुंज़ा, दंङ दोरे एनोह धर्मिकता बि स्थापित लहज़ी बंङज़ातोर। झांह लेह दोच़ी एनाबि परमेश्वरो अधीन माह लहरिर। 4कानूनो मकसद हेंतेग मसीहू अपिमी रंङ साते पूरा शुहचे इलि। दिऊ नतीज़ा दि तोह कि हर इच्च़ा अंऊ मसीहू टोहकठे विशवास लहज़ा, दू परमेश्वरो नज़रारिंङ धर्मी घोषित शुहचे यवाह।
उद्धार भत्तेतु थल्जी
5छना कुचे मूसाओ कानूना रिंङ धर्मिकता ओ पाहठी परमेश्वरो बचना रिंङ दि च़ेहसी तोह, कि “कानूनो भाषे लहज़ा, दू ए कानूनो दोरच़ी श्रींङे बंङज़ोतो।” 6पर अंऊ धर्मिकता विशवास रिंङ तोह, दि पाहठी पवित्रशास्त्र कुट्रा, “केनाह रंङ साते दि गप्पा था कुडू कि स्वर्गो तचेक खेका योतो मसीह बि योंखा धरती रिंङ हपिमी थल्जी? 7या अधोलोकंङ अरि तकसोतो? मतलब मसीह बि सिऊ दोरच़ी श्रींङमी लहज़ी ते खेका हपिमी थल्जी!” 8दिऊ मतलब दि तोह कि, “परमेश्वरो बचन केहतु कछंङ तोह, केहतु आह रिंङ ए केहतु सेहमरिंङ तोह।” दि विशवासो दू बचन शुह, अतु प्रचार हेंज़ी लहज़ातंई। 9उद्धारो थल्जी, अगर केई केनोह आहच़ि यीशु बि प्रभु ञेंए मीहतु तुईज़ी अंगीकार लोहन, कि परमेश्वरे दोबि सिमी दोरच़ी श्रींङमी लहरी, दंङ परमेश्वर पक्का ए कांह उद्धार लोहतो। 10परमेश्वरो तुईज़ी धर्मी बणेक्पिमी थल्जी सेहमरिंङ ज़ि विशवास लेह जूंशी तोह, दंङ उद्धार खोकसिमी थल्जी आहच़ि अंगीकार लहज़मी जूंशी तोह। 11छना कुचे यशायाह भविष्यवक्ता ज़ि मसीहू पाहठी पवित्रशास्त्रारिंङ दि च़ेहसी तते, “अरिला दोऊ टोईच़ी विशवास लोहतो, दू शर्मिन्दा माह शोतो।” 12यहुदी मीहतु बिचंङ ए ऊईजाति तु मीहतु बिचंङ छल्ले भेद माह, झांह लेह कि परमेश्वर भत्ते तु प्रभु शुह; दंङ दू भत्ते तिंङ बचाएपोतो, अंऊ दोबि मदतो थल्जी हाऊष रंड्रातोर। 13छना कुचे पवित्रशास्त्रा रिंङ दि च़ेहसी तोह, “प्रभु दू भत्ते तिंङ बचाएपोतो, अंऊ दोबि मदत लहज़िमी थल्जी बुलाएच़ातोर।”
14पर दिऊ तुहई कि मीहरे परमेश्वरो दोरच़ी मदत पेट्रोर, दोतिंङ मसीहू टोहकठे विशवास लहज़ी जूंस; दंङ दिऊ तुहई कि दोरे दोऊ टोईच़ी विशवास लेह तरपोर, दोतिंङ दोऊ पाहठी रेड्री जूंस; दंङ मीहतिंङ प्रभु पाहठी रेड्रीमी थल्जी, अतिंङ अई दोतिंङ कंड्री जूंस। 15दंङ दिबे तुहई कि अरिया रूठे खबर सुनाएच़ा दोरे इलजे दोतिंङ कमबोतो, रूठे खबर सुनाएच़ा दोतिंङ चरच़ी ज़रूरी तोह। छना पवित्र शास्त्रारिंङ च़ेहसी तोह, कि “दोतु कोंज़ारे छि ठ्रोह रूठे तोतोरे, अंऊ रूठे गप्पो रूठे खबर सुनाएच़ातोर।” 16पर भत्ते मीहच़ी दू रूठे खबरो टोईच़ी विशवास माह लहरिर। यशायाह भविष्यवक्ता ज़ि कुट्रा, “हे प्रभु, थोड़े मीहच़ी ए हेंदु रूठे खबरो टोईच़ी ए विशवास लहज़ातोर। 17झांह लेह विशवास दू मुक्का अपा अपेहल केरे खबर रेड्रातंई, दंङ दि खबर मसीहू पाहठी बचन तोह।”
18पर गेह रूहक्च़ातग, “छि यहुदी मीहच़ी पक्का रूपारिंङ मसीहू पाहठी खबर माह रैंईर?” दोच़ी रेड्रतोर ता पक्का। छना कुचे पवित्र शास्त्रारिंङ च़ेहसी तोह,
“रूठे खबर सुनाएच़ा दोतु सग भत्ते धरतीऊ टोईच़ी,
दंङ दोतु बचन धरतीऊ भत्ते ठाहरीरिंङ, पिचे इलि। 19यह्च़ा गेह रूहक्च़ातग। छि इस्राएलो मीहतिंङ मसीहू पाहठी खबर समझ अंजा? बेई दोतिंङ समझ अच़ा अंजा। तुहई ता परमेश्वरे मूसा भविष्यवक्ता ओ दोरच़ी दि कुई,
गेह केरे यहुदी मीहतिंङ, जलनारंङ पिंङषी ठ्रोह बणाएपोग
अपेहल केरे दू मीहतु पाहठी गिऊ दाह खमोंई
अंऊ यहुदी माहतोर, गेह इच्च़ा मुर्ख जातिऊ दोरच़ी केतिंङ रोहष लहज़िमी वहज़ा रमोग।”
20दंङ यशायाह भविष्यवक्ता ज़ि मोह्ड़े जोशारंङ साते प्रभु बचन सुनाएति, कि “अंऊ दोच़ी गेह माह पेट्रातोर, दोच़ी गेह खोकशी च़रतिर; दंङ अंऊ दोच़ी गेह रूहक्च़ातेर ला माह, दोतु टोईच़ी गेह प्रगट शुहचे इलिग।” 21पर इस्राएलो मीहतु पाहठी परमेश्वरे यशायाह भविष्यवक्ता ओ दोरच़ी कुई, “गेह नीर पूरे घेंङौ गुट्री इच्च़ा हुकुम माह मनेक्च़ा ए बहस लहज़ा प्रजाबि गिऊ कछंङ यहच़िमी थल्जी फेलाके केई।”
Lahuali Bible (लाहौली) by The Love Fellowship is licensed under Creative Commons Attribution-ShareAlike 4.0 License.