Къанун 1
1
Мусал ракӀалдещвеял
1Гьале Иордан гӀурул бакъбаккул рахъалъул гӀатӀиракьалда рукӀаго, Мусаца тӀолалго гӀизраилазе гьабураб вагӀза-насихӀат. Гьеб заманалда гьел рукӀана Суфалда аскӀор – Параналдаги, Тофелалдаги, Лаваналдаги, Хацероталдаги, Ди-Загьавалдаги гьоркьоб бугеб авлахъалда. 2(Сеиралъул мугӀруздехун балагьун ани, Хоривалдаса Кадеш-Барнеаялде щвезе анцӀила цо къо бала нухда.)
3Мисри тун хадусеб кӀикъоабилеб соналъул анцӀила цоабилеб моцӀалъул тӀоцебесеб къоялъ Муса ГӀизраилил халкъалда кӀалъана, БЕТӀЕРГЬАНАС тӀадкъарал тӀолалго амрабиги гьезда ракӀалде щвезарун. 4Гьеб ккана, Хешбоналда тах лъурав амориязул пача Сихонидаги, Аштароталдаги Эдреиялдаги тах лъурав Башаналъул пача Огидаги тӀад бергьенлъи босун хадуб.
5МогӀавалъул ракьалда Иордан гӀурул бакъбаккул рахъалда халкъалда кӀалъана Муса ва гьезда Къанун малъана:
6«Хоривалда нилъ рукӀаго БЕТӀЕРГЬАН Аллагьас нилъеда абуна: „ГӀела гьаб мегӀералда аскӀор рукӀарал. 7РакӀаре нужерго чадрал ва нухда рахъа. Нуж амориязул тӀалъиялде ва тӀолабго гьезул мадугьаллъиялде, ай авлахъазда, мугӀрузда, Негевалда ва ралъдал рагӀаллъиялда ругел ракьазде а. Ханааналъул ва Ливаналъул ракьаздасан кӀудияб Ефрат гӀурухъе щвезегӀан а. 8Дица нужее кьолеб буго тӀолабго гьеб ракь – инеги ун, бахъе гьеб. Дун гьедун вукӀана нужер умумул Ибрагьимиеги, ИсхӀакъиеги, Якъубиеги, гьезул наслабазеги гьеб ракь кьелин абун“.
ДиванчагӀи хъулухъалде тӀами
(Тар. 18:13-27)
9Доб заманалда дица абуна: „ГӀицӀго дида бажаруларо нужее нухмалъи гьабиялъул бакӀаб гьир баччун. 10БЕТӀЕРГЬАН Аллагьас нужер къадар цӀикӀкӀинабуна ва гьале жакъа нуж зодир цӀвабигӀанги гӀемерал руго. 11Биччанте нужер умумузул БЕТӀЕРГЬАН Аллагьас нужер къадар гьелдасаги азарго нухалъ цӀикӀкӀинабизе! Биччанте Гьес, Жиндирго рагӀуда рекъон, нужее баракатаб гӀумруги кьезе! 12Амма кинха гӀицӀго дица нужги нужеда гьоркьоб кколебщинаб дагӀба-рагӀиги нухда бачинеб?! 13Щибаб къавмалда гьоркьоса тӀаса рище гӀакъилал, лъайги хӀалбихьиги бугел чагӀи ва дица гьел тӀамила нужер бутӀруллъун“.
14Нужеца жаваб кьуна: „Гьеб лъикӀаб гӀакълу буго. Гьедин гьабила“, – ян.
15Цинги дица тӀаса рищана нужер къавмаздаса гӀакъилал ва хӀалбихьи бугел чагӀи ва гьел тана нужер диванчагӀилъун: азаргоязул, нусгоязул, кӀикъоялда анцӀгоязул ва анцӀгоязул бутӀруллъун. 16Дица нужер диванчагӀазда лъазабуна: „Нужер вацазда гьоркьоб ккараб дагӀба-рагӀиялъухъ гӀенекке ва ритӀухъаб хӀукму къотӀе, гьеб гӀизраилазда гьоркьоб ккараб букӀа, ялъуни батӀияб халкъалъул чагӀазулгун ккараб букӀа, батӀалъи гьабичӀого. 17ХӀукму къотӀулелъул щивниги инсан батӀа гьавуге: къуватав яги загӀипав батӀа вахъичӀого къотӀе хӀукму. ГӀадамазукьа хӀинкъуге, щайгурелъул диван къотӀи – гьеб Аллагьасул иш кколелъул. Нужехъан бажарулареб цӀакъго захӀматаб иш ккани, дихъе босе, дун гӀенеккила гьелъухъ“. 18Доб мехалда дица нужеда лъазабуна кинабго нужеца гьабизе кколебщинаб.
Жасусал нухда ритӀи
(Тар. 13:1-33)
19Хадубги, БЕТӀЕРГЬАНАСУЛ амруялдалъун нилъ Хоривалдаса къватӀире рахъана ва кӀудияб хӀинкъараб авлахъ къотӀун (нужеда бихьана доб авлахъ) амориязул мугӀрузде рилълъана ва Кадеш-Барнеаялде щвана. 20Гьебмехалъ дица нужеда абуна: „Нуж щвана, БЕТӀЕРГЬАН Аллагьас нужее кьолел ругел, амориязул мугӀрузде. 21Гьале, БЕТӀЕРГЬАН Аллагьас нужее кьуна гьаб ракь. Нужерго кверщаликье босе гьеб, нужер умумузул БЕТӀЕРГЬАН Аллагьасул амруялда рекъон. Я хӀинкъуге, я къуркьуге!“
22Гьебмехалъ нуж киналго рачӀана дихъе ва нужеца абуна: „РачӀа цин гьенире чагӀи ритӀизе, дол ракьазул хал-шалги гьабун, нилъ ине кколеб нухалъулги нилъеца кверде росизе ругел шагьаразулги нилъехъе хабар босун рачӀине“.
23Дир гьелда ракӀ рекъана ва нужеда гьоркьоса анцӀила кӀиго чи тӀаса вищана, щибаб къавмалдаса цо-цо чи. 24Гьел нухда ана. МугӀрул тӀалъиялдеги рахун, Эшкол абураб гӀатӀидаб расалъиялде щвезегӀан ана гьел ва кинабго ракьалъул хал-шал гьабуна. 25Гьенисан пихъги босун, нилъехъе тӀадруссиндал, гьез абуна: „БЕТӀЕРГЬАН Аллагьас нилъее баракатаб ракь кьолеб буго!“ – ян.
ГӀизраилазул дандечӀей
(Тар. 14:1-45)
26Амма нужее бокьичӀо гьенире ине – нуж БЕТӀЕРГЬАН Аллагьасул амруялда данде чӀана. 27Нуж къулкъудана нужерго чадразда жанир: „БЕТӀЕРГЬАНАСДА ниж рихун руго! Гьединлъидал Гьес, Мисриялдаса къватӀиреги рачун, амориязул кверщаликье кьолел руго нилъ, гьез гъуризе рукӀине. 28Кире унел чагӀи нилъ? Нилъер вацаз бицаралъги ракӀал тамахлъизарун ругеб мехалъ. Гьез абуна доб халкъ нилъедаса къуватабги чӀахӀиябги бугилан ва дозул шагьарал кӀудиял зодире гӀунтӀарал къадаз сверун ккурал ругилан. Гьенир Анакилалцин#1:28 Анакилал – цӀакъго чӀахӀиял залимал чагӀи. ругин абуна гьез“.
29Гьебмехалъ дица нужеда абуна: „Нуж гьезукьа хӀинкъуге! 30Мисриялдаго гӀадин, нужее гӀоло вагъизе, нужер БЕТӀЕРГЬАН Аллагь унев вуго нужеда цеве-цеве. Нужерго беразда бихьана Гьев нужеда цеве-цеве унев вукӀин. 31Салул авлахъалдасаги (нужедаго бихьана гьеб) инсуца кодовги ккун жиндирго вас вачунев кинигин, рачана нуж БЕТӀЕРГЬАНАС тӀолабго нухда, гьанире щвезегӀан.
32Гьебги гӀечӀого, нуж гьанжеги БЕТӀЕРГЬАН Аллагьасда божулел гьечӀо! 33Гьевин абуни, нуж нухда ругебгӀан заманалда, нужеда цеве-цеве вукӀана, къаси цӀалъун, къад накӀкӀул парчалъун, нужеда нухги хӀухьбахъизе бакӀги бихьизабулаго“.
34Добмехалъ нужер кӀалъай рагӀана БЕТӀЕРГЬАНАСДА, ва гьелъ Гьесул кутакалда ццин бахъана ва Гьес хӀукму къотӀана: 35„Гьаб квешаб гӀелалъул цониги чиясда бихьизе гьечӀо гьезул умумузе Дун гьедараб гьарзаяб ракь, 36Ефуннил вас Халевида гурони. Гьесда бихьила гьеб, ва гьесиеги гьесул лъималазеги кьела Дица гьеб, гьев ракӀ-ракӀалъ БЕТӀЕРГЬАНАСЕ мутӀигӀав вукӀиндал“, – ин.
37Нуж сабаблъун дидеги ццин бахъана БЕТӀЕРГЬАНАСУЛ ва Гьес абуна: „Мунги лъугьине гьечӀо гьениве. 38Амма дур кумекчи Нунил вас Егьошуа лъугьина гьеб ракьалде. Гьесда къвакӀун чӀаян абе, гьес бачине бугелъул ГӀизраилил халкъ гьеб ракь мукӀур гьабизе. 39Нужер лъимал асирлъуде ккелин хӀинкъана нуж, амма квешаб-лъикӀаб жеги батӀа бахъизе лъаларел гьел лъимал ине руго гьеб ракьалде. Гьезие кьезе буго Дица гьеб ракь ва гьел рукӀине руго гьелъул ирсилал. 40Нужин абуни, тӀадрусса ва БагӀараб ралъдахъе унеб нухда бугеб салул авлахъалде а“.
41Гьебмехалъ нужеца абуна: „Нижеца, БЕТӀЕРГЬАНАСДА дандеги рахъун, мунагь гьабуна. Амма гьанже ниж ина рагъ гьабизе, БЕТӀЕРГЬАН Аллагьасул амруялда рекъон“. Нужеца ярагъ борчана, доб мугӀрузул улка кверде боси бигьаяб жойиланги ккун.
42Амма БЕТӀЕРГЬАНАС дида абуна: „Гьезда абе: ‘Унге гьеб тӀалъиялде ва гьезулгун рагъ гьабуге, щайгурелъул Дун нужгун вукӀине гьечӀо ва тушбабаз нуж гъуризе руго’, – ян“.
43Дица гьеб нужеда бицана, амма нуж гьелъухъ гӀенеккичӀо. БЕТӀЕРГЬАНАСУЛ амруги гӀадахъ босичӀого, гӀамал кӀодого мугӀрул тӀалъиялде ана нуж. 44Гьенир чӀарал амориязги нужеда данде рагъ гьабуна. Наязул бо кинигин, нужеда хадур лъугьана гьел ва Сеиралдаса Хормаялде щвезегӀан нуж гъурана. 45Цинги, тӀадги руссун, нужеца БЕТӀЕРГЬАНАСДА цебе магӀу тӀуна, амма нужер гӀодиялъул Гьес кӀвар гьабичӀо – Гьев нужехъ гӀенеккичӀо. 46Нужги гӀемераб мехалъ Кадешалда хутӀана.
اکنون انتخاب شده:
Къанун 1: АварАК
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© Институт перевода Библии, 2005-2023